Ịmaakị 6
6
Anịnazarẹtị e yi sì Ijeesu
(Imt 13.53-58; Irk 4.16-30)
1Ijeesu ộ hụụ ịzọọ, dị ọ nọ eehi anị nị. Ezirẹma anị ệ saasa a na. 2Ẹkụhị ụhwọtụ mè si tù, dị Ijeesu aa zụ̀ aza ịsa ini irehi ahẹkẹ Aniju nị. Aza ọrụrụ-ọrụrụ hi ịzọọ. Ẹ mẹ̀ wụ́ ịrẹyị anị, ô hí wa irenu ẹtẹẹtẹrẹ. Dị ẹnịnị aa họ̀ ẹngụ ka, “Ịzọọ maanị re avaba ẹsẹnị hụrẹ? Ẹnẹ maanị sị ịrẹyọyẹ yọ? Wee re ụkọrọ ẹbanyị-ẹbanyị ana aa mẹ! 3Aanị ka ẹ yị vị ikahunta ọnọọ yị, ana vị ozi Imeri? Aa vị ọnị ọ rẹ vị ẹnẹbẹnị Ijemiisi ọnịrị Ijosẹsị beri Ijudasi ọnịrị Ịsayịmọnị? Aa vị ẹyịrị ẹyịnyara anị anẹẹ e dudu yà ịzẹnị?” Dị ẹnịnị aa kụ́ ayị anị nị. 4#Ịjọ 4.44Dị Ijeesu kà a yị wa ka, “Ọnịsẹ ọ mā nyị ụbanyị ịnị ẹkụra anị ụvọta ọnịrị éehi anị beri ịnị akakana anda ẹnịnị, ẹ̀ yị vị aha ọsa.” 5Ijeesu ọ yị nyẹngụ mẹ̀ ụkọrọ ohyozirenu ịzọọ, ẹ̀ yị vị ọnịkụ chee aanị kẹnẹ, ọnị ọ sị ụvọ tụra, dị ọ mẹ wa ụkụ nị. 6Ô hí oo irenu pooro, agụvị ka aza ẹ yị dọ wụ́. Dị ọ hụụ ịzọọ, dị aa ngụ ịnị ẹkụra ọsa ana gụrị ịzọọ zịịzị, dị aa zụ̀ wa ịsa nị.
Ijeesu ộ tụ́ ezirẹma anị jịnẹ
(Imt 10.5-15; Irk 9.1-6)
7Ijeesu ộ hị́ ezirẹma anị ẹwụrẹva, dị ọ tụ́ wa ẹvẹẹva jịnẹ nọ ẹhẹ nị. Ộ sị ụkata yị wa ka ẹ̀ẹ dụ ụhwẹ echuu jịnẹẹ hụụnị ẹngụ aza. 8Ọ kà asị ẹ sị ịsọnyị-ịsọnyị ẹ̀ẹ yaa na, ẹ̀ yị vị okutẹ kẹnẹ; ọ rẹ ka asị ẹ sị ịsọyịrị, asị ẹ sị ampo, dị asị ẹ rẹ sị ẹkẹhị tụ́ ini oku awuru ẹnịnị. 9Ọ kà ẹ̀ sị adava tụ́ ahụ kẹnẹ; asị e chire awuru gụ ẹẹva. 10Dị ọ kà a yị wa ka, “Irehi ana àa dọ wụ nịnị azọga aha tụra aha ọnị ụ wàa nọ, yà ịzọọ nịnị pooro, dị ụ wa hụụ ịzọọ nịnị! 11#Ụkọ 13.51#Irk 10.4-11Aha tụra aha ọnị ụ wàa ngụ, dị aza è yi sì wu nịnị ọzọga, dị ẹ̀ yị rẹ wụ́ ịrẹyị awụ nịnị nị, ịjị ụ wàa hụụ ịzọọ nịnị, dị ụ bànyị edudu ịnị ahụ awụ nịnị hi ịzọọ, dị ọ̀ vị ivenu yị wa ka ịsị ẹnẹ ẹ mẹ, ô divi.” 12Dị ẹ jịnẹ na, dị ẹyaa kà ịrẹyị Ohomorihi ka aza è ro ịnẹ varẹma nị. 13#Ije 5.14Ẹ rẹ dụ ụhwẹ echu ọrụrụ-ọrụrụ jịnẹ hụụnị ẹngụ aza. Dị ẹ rẹ sị angwẹ sisi ọnịkụ ọrụrụ-ọrụrụ ịrẹsụ, dị ẹ mẹ wa ụkụ nị.
Ị́jọọnụ ọhwọzenyi meme sú
(Imt 14.1-12; Irk 9.7-9,19-20)
14 #
Imt 16.14; Ịmk 8.28; Irk 9.19 Ohinọyị ana aā hị́ Ịhẹrọdị ộ wụ́ ịrẹyị Ijeesu, agụvị ka ịrẹyị anị ọ sị ngụ ịrẹyị zịịzị. Dị ọ ka Ịjọọnụ ọhwọzenyi yọ nị, ọ sị ha hụụnị ikuta; agụvị avọọ ọ maanị nyị ụkata ẹbanyị-ẹbanyị nị. 15Aza ẹnyị ka Erija yọ nị. Dị aza ẹnyị rẹ ka ọnịsẹẹ yọ anka ọnịsẹ ịyẹẹyẹ nịnị. 16Ịjị Ịhẹrọdị maanị wụ́, dị ọ ka, “Ịjọọnụ ọnị mị jị ịrẹsụ yọ nị! Ọ sị ha hụụnị ikuta.” 17#Irk 3.19,20Ịhẹrọdị vị ana vịdị tụ́ na za Ịjọọnụ, dị ọ sị ẹba sụ́ ọọ, dị ọ sị ọọ na tụ́ ịnị ẹngwa nị agụvị Iherodiya. Iherodiya vịdị vị ose Ihwiripi, ọyịnyara Ịhẹrọdị. Ịhẹrọdị ộ dọ Ihwiripi ose anị ọnọọ, dị ọ nyị ọọ nị. 18Dị Ịjọọnụ kà a yị Ịhẹrọdị ka, “Ẹ yị vọrọ ka wa dọ ose ọyịnyara awụ, dị ụ wa nyị ọọ.” 19Agụvị avọọ dị Iherodiya aa kụ́ ayị Ịjọọnụ ẹtẹẹtẹrẹ, di ee sì ka ọnị ọ̀ wụ ọọ nị. Ama ọ yị nyẹngụ wụ ọọ, 20agụvị ka Ịhẹrọọdụ vị ene ee hí angwa Ịjọọnụ, agụvị ka ộ yẹ ka Ịjọọnụ vị ọnịrẹyịzẹyịza, dị ọ rẹ vị ọza ọnịnị nị. Agụvị avọọ dị Ịhẹrọdị ka à sị eyi pe Ịjọọnụ nị. Ịhẹrọdị ọ̀ọ wụ́ ịrẹyị Ịjọọnụ, dị ayị anị sị vazi, ama dị ịnẹ anị ee yii hine ka ọnị ọ̀ wụ́ ịrẹyị anị. 21Ẹkụhị ọnya dị Iherodiya sị oze re nị. Ịhẹrọdị ộ rị eche ẹkụhị anaa sị ma a. Dị ọ hị́ ọgọọga ana yà ịnị ịjọva, ọnịrị ọga isoja nịnị beri azẹbanyị Anigariri nịnị nị. 22Ịjị ozi ọnẹẹ Iherodiya ọnọọ vẹ, dị ọ nyị ẹzẹ nị. Ẹzẹ ozi ọnẹẹ ọnọọ ô zé Ịhẹrọdị ọnịrị azọga anị eyi pooro. Dị Ịhẹrọdị ohinọyị kà a yị ozi ọnọọ ka: Ịsa tụra ịsa ene èe zé e eyi, ọ̀ họ̀ use ka ọnị vaa sịị yọ. 23Dị Ịhẹrọdị hyeku yọ, dị ọ ka: Ịsa tụra ịsa oni òo họ̀ use anị, ọ̀ọ daka vị achẹva ohinọyị anị, ọnị vaa sịị yọ nị. 24Dị ozi ọnọọ jịnẹ ne tù ọnyị anị, dị ọ họ̀ ọ use ka, “Sị a vọrọ ka me họ̀ use anị?” Dị ọnyị anị ka, “Kàa ka ọ̀ sị ịrẹsụ Ịjọọnụ ọhwọzenyi yị wụ!” 25Dị ozi ọnọọ wụsẹ vẹ eyiha-eyiha, dị ọ kà a yọ ka booro aanị oni ee sì ka à sị ịrẹsụ Ịjọọnụ ọhwọzenyi, dị à sị tụ́ ịnị ịchacha yị ọnị. 26Ịjị ohinọyị wụ́, ẹngụ anị ọ sị và hí. Ama o yi sì ka oni ò yi, agụvị eku ọnọọ sị hị́ ini eyi avaba azọga anị. 27Dị ohinọyị wụsẹ tụ́ isoja anị ọnya, dị ọ ka ọ̀ na jị Ịjọọnụ ịrẹsụ vẹ nị. Dị isoja ọnọọ na, dị ọ ngụ ịnị ẹngwa, dị ọ jị Ịjọọnụ ịrẹsụ nị. 28Dị ọ sị ịrẹsụ ọnọọ tụ́ ịnị ịchacha, dị ọ sị yị ozi ọnẹẹ ọnọọ nị. Dị ozi ọnọọ sị ọọ na yị ọnyị anị nị. 29Ịjị ezirẹma Ịjọọnụ maanị wụ́, dị ẹ va sị oku anị, di e ne ne e tụ́ ini ikuta nị.
Ijeesu ộ sị ịsọyịrị pá aza ọrụrụ-ọrụrụ
(Imt 14.13; Irk 9.10-17; Ịjọ 6.1-13)
30Apositeri nịnị ệ kụ́ ẹngụ gụ ị́dị Ijeesu. Dị ẹ kà a yọ ịsa ẹnẹ ẹnịnị sị mẹ, ọnịrị ịsa ẹnẹẹ sị zụ̀ aza nị. 31Aza vị ana gwẹtẹ ịzọọ. Aza ẹnyị màa na, avọọ aza ẹnyị màa vẹ nị. Ijeesu ọnịrị ezirẹma anị ẹ yị hyakụ nyị eyi rị ịsa vụrụ-vụrụ. Agụvị avọọ dị Ijeesu kà a yị ezirẹma anị ka ẹ̀ vẹ, dị ẹnị ẹ̀ nọ aha ọnya ịzị ẹnịnya kẹnẹ vaa yà, agụvị dị ẹnị ẹ̀ nyẹngụ tụ́ ụhwọ́ nị. 32Ẹnịnị ệ ngụ ẹpa, ka ẹnị ẹ̀ nọ aha ọnya aanị ịzị ẹnịnya kẹnẹ vaa yà. 33Ama aza ọrụrụ ẹ sị wa re, ẹ màa na. Dị ẹnịnị wụsẹ sị yẹ ka Ijeesu ọnịrị ezirẹma anịị yọ nị. Obooboro ọnọọ, dị aza ẹnẹẹ hụrẹ ẹkụra ẹnịnị, dị ẹ sị ahụ zwe tụ́ ọvịdị Ijeesu na ngụ ịzị Ijeesu ọnịrị ezirẹma anị aa nọ nị. 34#Ịrị 27.17; 1 Ohi 22.17; 2 Ịtọ 18.16; Ezk 34.5; Imt 9.36Ịjị e si tù ịzọọ, dị Ijeesu jịnẹ hụụnị ẹpa nị. Ịjị o re ọkọnị aza ẹnẹnị, ayị ẹnịnị ộ vá Ijeesu, agụvị ka ẹnịnị vị ana yà anka atẹmẹ ẹnẹ ẹ̀ yị nyị ọza ene ee sere wa avọọ. Ijeesu ô nyima aa sị ịrẹyị ọrụrụ-ọrụrụụ zụ̀ wa. 35Ịjị oruva si tù, ezirẹma Ijeesu ẹ va kà a yọ ka, “Oruva o si tù ọ, ẹ yị nyị aza ana ra ịzẹnị. 36Kà a ka ẹ̀ẹ na, dị ẹ̀ na hị́ ịsa rị ịnị aarẹ ọnịrị ịnị ẹkụra ana gụrị ẹyị aanị!” 37Dị Ijeesu ka, “Sị ẹ vẹ? Ẹwụ nịnị ụvọta ọ̀ sị ịsọyịrị yị wa!” Dị ezirẹma anị ka, “Ho! Ụ wáá ka ya sị ẹkẹhị achuchu ẹẹva, dị ya sị na hị́ Ịbụrẹẹdị va yị wa, dị ẹ̀ rị ọọ nị?” 38Dị Ijeesu ka, “Na gara ẹtẹ nịnị daa re, ákara yà ụ nyị nịnị!” Ịjị ẹ na gara ẹtẹ re, ệ vavẹ va kà a yọ ka ẹnị ệ nyị Ịbụrẹẹdị ẹẹhị beri ivovo ẹẹva. 39Dị Ijeesu ka ezirẹma anị ẹ̀ kà a yị aza ẹnẹẹ ka ẹ̀ ga ẹngụ ẹnịnị yaayịtẹ ị́rẹsụ avị ohwoohu ene hi ịzọọ nị. 40Dị aza ẹnẹẹ ga ẹngụ ẹnịnị nị: Aza ẹnyị vị ẹnị ẹchẹhị, aza ẹnyị vị ẹnị ẹvarẹwụ, dị ẹ vavọọ yaayịtẹ nị. 41Ịjị ẹ sị yaayịtẹ, dị Ijeesu sị Ịbụrẹẹdị ẹẹhị ọnịrị ivovo ẹẹva ẹnẹẹ nị. Ộ kụ̀rà eyi tụ́ ẹba re ihinẹba, dị ọ kụ́ Ohomorihi avọ nị. Ộ dà Ịbụrẹẹdị ọnọọ yị ezirẹma anị ka ẹnịnị ẹ̀ gà ẹ yị aza ẹnẹẹ. Dị ọ rẹ gà ivovo ẹẹva ẹnẹẹ yị avaba aza ẹnẹẹ bẹẹ nị. 42Dị avaba ẹnịnị rị, dị ịnẹ há wa nị. 43Ịjị ẹ sị ịsa rị ta, dị ẹ sị uji kụ́ ana vọ ịnị Ịbụrẹẹdị ọnịrị ivovo ẹnẹẹ nị. Ana vẹtẹ vị ohihi uji ẹwụrẹva. 44Ịnị aza ana rị ịsa aanị, ẹnị anọrụ kẹnẹ vị akahị-akahị oze ẹẹhị (5,000).
Ijeesu ộ zị ụsẹ ị́rẹsụ enyi
(Imt 14.22-33; Ịjọ 6.16-21)
45Obooboro ọnọọ, dị Ijeesu ka ezirẹma anị ẹ̀ wụsẹ ngụ ịnị ẹpa, dị ẹ̀ nọ akẹnẹ irehu, dị ẹ̀ẹ nọ ẹkụra Ịbẹtịsedaa zí ọnị; dị ọ ka ọkọnị aza ẹnẹẹ ẹ̀ẹ na nị. 46Ịjị ọ sị ọọ kà yị wa ka ẹ̀ẹ na, dị ọ nọ ịnị ataba ọnya, dị ọ naa mẹ̀ aduwa nị. 47Ịjị oruva si tù, ẹpa ọnọọ yà ịnị akakana enyi, dị Ijeesu ọnịnya yà ini eteesu nị. 48Di o re ka ezirẹma anị aa mẹ akanya, ẹ màa họ̀ ẹpa nị, agụvị ka ahị aa dọ wa oro. Ịnị ẹhụụ etumeyọnị dị Ijeesu aa ká waa vẹ; dị aa zị ụsẹ ị́rẹsụ enyi nị. Ịjị aa vaa para waa hu, 49di ezirẹma anị re e, ọ màa zị ụsẹ ị́rẹsụ enyi nị. Ẹnịnị ẹ sị ọọ hị́ ka arịjẹnụ yọ nị, di e nowu zẹtẹ nị. 50Avaba ẹnịnị mè re e, dị angwa ee hí wa ẹtẹẹtẹrẹ nị. Dị Ijeesu wụsẹ kà a yị wa ka, “Và ayị nẹtẹ nịnị, ka ẹmịị yọ nị! Asị u rè hí angwa nịnị!” 51Dị ọ ngụ ịnị ẹpa ne tù wa nị, dị ahị wụsẹ za jẹẹ keri nị. Ô hí wa irenu ẹtẹẹtẹrẹ ẹnẹmẹhị, 52agụvị ka ẹnịnị ẹ̀ yị va yẹ iruvo ụkọrọ ohyozirenu Ịbụrẹẹdị ẹnẹẹ, agụvị ka ayị ẹnịnị ọ sị katẹngụ.
Ijeesu ộ mẹ̀ aza ụkụ Ígenesareeti
(Imt 14.34-36)
53Ịjị e tù akẹnẹ irehu éyi ọsa, di e chí hi ẹtẹ ịnị ẹkụra Igenesarẹtị nị. Dị ẹ za ẹpa ẹnịnị jẹẹ ụtọ irehu nị. 54Ẹ màa yịị jịnẹẹ hụụnị ẹpa kẹnẹ, aza ệ wụsẹ sị Ijeesu yẹ. 55Dị ẹ wụsẹ zwe ngụ avaba ẹkụra ọnọọ zị, dị ẹyaa kụ́ ọnịkụ nịnị ị tụ́ ini odooro vee tù ọọ aha tụra aha ẹnẹ ẹ̀ẹ wụ́ ka ộ yà nị. 56Aha tụra aha oni Ijeesu ọ̀ọ zị ịnị ẹkụra oweyi, àa vị ịnị ẹkụra ọbanyị, àa vị ịnị aarẹ, dị a kụ́ ọnịkụ ve hi ini orere. Ệ dá ịpẹ yọ ka ọ̀ọ hyakụ daka vị ụtọ ịta anị kẹnẹ ẹnịnị ẹ̀ sị ụvọ kanyị ọ. Avaba aza ana sị ụvọ kanyị ọọ bemi, ẹngụ ẹnịnị ộ ta.
Currently Selected:
Ịmaakị 6: EBTP
Highlight
Share
Copy

Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.