Ịmaakị 7

Ido oni ohiku Aniju nịnị jị

(Imt 15.1-9; Irk 11.37-41)

1Ẹkụhị ọnya Anihwarisi nịnị beri ọzwọzọda ẹnyị aanị ệ hụrẹ Ijerusarẹmị ká Ijeesu vẹ. 2Dị ẹnịnị re ka ezirẹma anị ẹnyị aa sị ụvọ ịdọtịị rị ịsa nị, ọnọọ vị ka ẹ yị nyịna ụvọ ẹnịnị, dị ẹ vaa rị ịsa. 3Anihwarisi ẹnịrị Aniju nịnị ana vọ, ẹ mā rị ịsa, ẹ̀ yị vị ẹ nyịna ụvọ anka ido oni ohiku ẹnịnị jị. 4Ẹ̀ẹ maanị hụụnị ohu vẹ, ẹ mā rị ịsa, ẹ̀ yị vị ẹ nyịna ẹngụ ẹnịnị. A rẹ nyị ido irenyi-irenyi oni ohiku ẹnịnị jị, ẹnẹ ẹ sị ụvọọ za; ẹẹ̄ nyịna ako ọnịrị ịchacha, ẹ rẹẹ̄ nyịna age beri aga. 5Dị Anihwarisi nịnị ẹnịrị ọzwọzọda nịnị họ̀ Ijeesu use ka, “Sị ẹ vẹ dị ezirẹma awụ ẹ̀ yị mẹ ido oni ohiku ayị jị, dị ẹyaa rị ịsa dị ẹ̀ yị nyịna ụvọ?” 6#Ayị 29.13Dị Ijeesu ka, “Ẹwụ nịnị ọmọzakụyẹ ẹnẹnị! Ịrẹyị ana Ayịsaya chẹrẹ ịyẹẹyẹ, ộ da sẹrẹ wụ nịnị kẹnẹ, ọ ka: ‘Ohomorihi ka: Irenu kẹnẹ aza ẹnẹnị sị sị ụbanyị yị mị nị; ama ẹnịnị ẹ yị dọ ịrẹyị amị tụ́ ịnị ayị ẹnịnị. 7Ahẹkẹ ẹnẹẹ ka ẹnị aa hẹkẹ mị, vị osusu kẹnẹ, agụvị ka ọda aza kẹnẹ ẹ́ yaa sịị zụ̀, dị ẹ ka ọda Ohomorihii yọ nị.’ 8Wâ navọ ọda Ohomorihi tịtẹ nịnị, dị ụ waa mẹ ido ana aza jị nịnị nị.” 9Dị Ijeesu rẹ ka, “Wâ da yara mẹ apẹ nịnị ọyịnavọ ọda Ohomorihi tịtẹ, di u we re oze sị ụvọ za ido ọnị ụ jị nịnị! 10#Kụra 20.12; Ọda 5.16; Kụra 21.17; Ire 20.9Imosiisi ộ vịdị kà a ka: ‘Sị ụbanyị yị ada awụ ọnịrị ọnyị awụ!’ Ọ rẹ ka ọza ana àa kà ịrẹyị odivi hi ada anị, ọ̀ọ vị ọnyị anị, à wụ ọọ! 11Ama ẹwụ nịnị ka: Ọza ọ̀ọ kà a yị ada anị, àa vị ọnyị anị ka: ‘Ikobani yọ nị’, ọnọọ vị ka ịsa ana vọrọ ka ma yaanị sị mẹ ọgụvọ wụ, maa sị naa yị Ohomorihi; 12wẹ yị zẹẹ nịnị ka ọ̀ kụkụ tẹsị ada anị ọnịrị ọnyị anị. 13Aanị ụ mẹ̀ navọ ọda Ohomorihi tịtẹ, dị ụ sị ido oni ohiku awụ nịnị jị, dọ ọ ịrẹsụ nị. Avọọ ụ màa yịị mẹ̀ ịsa irenyi-irenyi nịnị nị.”

Ịsa enee du ọza ẹngụ

(Imt 15.10-20)

14Ijeesu ộ hị́ avaba ọkọnị aza gụ, dị ọ ka, “Avaba awụ nịnị ọ̀ sị ụtọ pe ẹtẹ, dị ụ wa wụ́ ịrẹyị nịnị! 15Ẹ yị nyị ịsị ẹ hụrẹ ẹhẹ na ngụ ịnị ịnẹ ọza, ene zụ du ọza ẹngụ. Ama ịsa ana jịnẹ hụụnị ịnẹ ọza vẹ, oni oō du ọza ẹngụ nị. 16[Ọza ana àa nyị ụtọ ọyịsị wụ́ ịrẹyị, ọ̀ sị wụ́!”] 17Ịjị Ijeesu sị hụụ ịdị aza ẹnẹ na ngụ ini eehi, di ezirẹma anị va họ̀ ọ use ini oze ụhịrẹyị ọnọọ nị. 18Dị ọ ka, “Aa, ẹwụ nịnị ọ yị rẹ yẹ bẹẹẹ? Wẹ yị yẹ nịnị ka ịsị ẹ̀ẹ hụrẹ ẹhẹ na ngụ ịnị ịnẹ ọza, o yi zụ du ọza ẹngụụ. 19Agụvị ka ẹ yị vị ịnị ayị anị ọ nọ, ama ini iruvu anị, di o re ne he e và ha, ọnọọ vị ka ẹ yị nyị ịsọyịrị ana vị enyisi.” 20Dị Ijeesu ka ịsị ẹ̀ẹ hụụnị ayị ọza vẹ, oō du ọza ẹngụ nị; 21agụvị ka ịnị ayị aza áriro odiviī hụrẹẹ vẹ nị, anaā mẹ ka ẹ̀ẹ sẹ̀ ịrẹka, di èe yi oyi, dị ẹ̀ẹ rẹẹ wụ̀ ọza, 22dị ẹ rẹ yaa mẹ eyọhụrẹ ọnịrị ebira odivi, dị ẹyaa mẹ apẹ, dị ẹ rẹ yaa mẹ̀ ebira kẹnẹ-kẹnẹ, dị ẹyaa mẹ ụra. 23Avaba ịsa edivi ẹnẹnị vị anaā hụụnị ayịị vẹ, di e du ọza ẹngụ.

Ọzọga ọnya ana sị ayị tụra Ijeesu

(Imt 15.21-28)

24Ịjị Ijeesu hụụ ịzọọ, dị aa nọ ọgụrị ẹkụra Ịtaya nị. Ộ ngụ ini eehi ọnya aanị, o yi sì ka à yẹ ka ọnị yà ịzọọ; ama ọ yị zụ tẹ. 25Â nyị ọnẹẹ ọnyara aanị oni ozi anị ọnẹẹ nyị ụhwẹ echu ọnya aanị. Ọ mẹ̀ yị wụ́ ịrẹyị Ijeesu kẹnẹ, di o ne tù ọọ, dị ọ và ku ẹtẹ ọ́vịdị anị nị. 26Ọnẹẹ ọnọọ vị Anigiriki; Anihwonesiya ịnị ẹtẹ Isiriya ọ vị nị. Ộ dá ịpẹ yị Ijeesu ka ọ̀ dụ ụhwẹ echu ọnọọ hụụnị ẹngụ ozi anị. 27Dị Ijeesu kà a yọ ka, “Jẹẹ, à vịdị sị ịsọyịrị yị ezi da, agụvị ka ọ yị vọrọ ka à sị ịsọyịrị ezi, di è ne e tịtẹ yị irezi nịnị.” 28Dị ọnẹẹ ọnọọ ka, “Avọọ yịị yọ, Nda; ama ẹhụ ana jị tịtẹ hụụ ịzị ezi yà aa rị ịsa, irezi nịnịị̄ rẹ tọ̀ọ́ yọọ rị.” 29Dị Ijeesu kà a yọ ka, “Agụvị ohi ọnị ụ tụ́ aanị, wa nọ eehi, ka ụhwẹ echu ọnọọ ọ sị hụụnị ẹngụ ozi ewu.” 30Dị ọnẹẹ ọnọọ si hu aa nọ eehi nị. Di o ne tù ka ozi anị hụtụ ịnị ịvẹẹdị nị; ụhwẹ echu ọnọọ ọ sị hụụnị ẹngụ anị.

Ijeesu ộ mẹ̀ ogutọ ọnya ụkụ

31Dị Ijeesu hụrẹ ọgụrị Ịtaya, dị ọ zị oze Ịsịdọnị nọ ẹkụra ana aā hị́ Idekapori, dị ọ na ngụ ụtọ irehu Igariri nị. 32Â nyị aza ẹnyị aanị ana sị ọza ịnya aanị vẹ ịdị Ijeesu. Ọza ọnọọ vị ene gu ụtọ, dị ọ rẹ vị ọsụkọrọ nị. Dị ẹ dá ịpẹ yị Ijeesu ka ọ̀ sị ụvọ tụra a nị; 33Ijeesu ộ sị ọza ọnọọ hụụnị akakana aza nọ oboka ọnya. Dị ọ jị igege ngwọ ọ ụtọ, dị ọ rẹ jị atẹ hi ụvọ, dị ọ sị kanyị ọọ ịrarẹ nị; 34Dị Ijeesu sị eyi tụ́ ẹba, di o hi ụhwẹ zẹtẹ, dị ọ ka, “Ehwata”, ọnọọ vị ka, “Há!” 35Dị ụtọ anị wụsẹ há nị, dị ịrarẹ anị ngwara, dị aa kà ịrẹyị chachacha nị. 36Dị Ijeesu hú wa ụvọ ka asị ẹ kà a yị ọza ọnyọọnyị nị. Dị ọ maanị yi hú wa ụvọ, vị ẹ yaa yịị kà enube ọnọọ zịịzị hu avọọ nị. 37Ô hí wa irenu ẹtẹẹtẹrẹ, dị ẹ ka, “Ịsa tụra ịsa ọnị ọ̀ọ mẹ vị eneē zoza ẹtẹẹtẹrẹ. Ộ mẹ ka ogutọ ọ̀ọ wụ́ ịrẹyị, ọ rẹ mẹ ka ogurenu ọ̀ọ kà ịrẹyị.”

Currently Selected:

Ịmaakị 7: EBTP

Highlight

Copy