Ịmaakị 5

Ijeesu ộ dụ ụhwẹ echu hụụ nị ẹngụ ọza ịnya

(Imt 8.28-34; Irk 8.26-39)

1Ijeesu ọnịrị ezirẹma anị ẹ va sị ngụ akẹnẹ irehu, ịnị ẹkụra Anigerasa. 2Íjeesu màa jịnẹẹ hụụ nị ẹpaa vẹ, dị ọnọrụ ọnya aanị wụsẹ hụrẹ ọgaanya vẹ nị. Ọnọrụ ọnọọ vị ana nyị ụhwẹ echu. 3Ọgaanya ọọ̄ zẹẹ yà nị. Ọza ọ yị kụkụ zụ sụ́ ọọ vụrụ-vụrụ, ọ̀ọ daka vị ẹba. 4Ụpọọpọsa a sịị̄ sị ịchẹkẹchẹkẹ sụ́ ọọ, dị a rẹ sị ẹba sụ́ ọọ ahụ bẹẹ nị; ama dị ọ jị ẹba anị, dị ọ gara ịchẹkẹchẹkẹ anị ha rugu-rugu nị. Ẹ yị nyị ọza ana nyẹngụ za a jẹẹ. 5Ịrahụ ọnịrị ọọdụ dị aa ngụ ịrẹsụ ataba ọnịrị ọgaanya zịịzị, dị eē nowu, dị aā sị ịrẹtaa na ẹngụ anị. 6O mè re Ijeesu ẹ́nẹẹnẹ, di o zwe ne tù ọọ, dị ọ và ku ẹtẹ ọ́vịdị anị nị. 7Di o nowu tụ́ ẹba nị, dị ọ ka, “Ijeesu, Ozi Ohomorihi ana ya ẹbẹẹba keekere, sẹ jị gẹ ẹmịrị ẹwụ? Aarịhịnị, mâ sị Ohomorihi dá ịpẹ wụ, asị ụ sị ụya rị mị!” 8Ộ maanị kà, agụvị ka Ijeesu ộ vịdị kà a yọ ka, “jịnẹ hụụnị ẹngụ ọnọrụ ọnọọ, ẹwụ ụhwẹ echu!” 9Dị Ijeesu họ̀ ọ use ka, “Ị́rẹha awụ rị?” Dị ọ ka, “Ịrẹha amị ọ rị ‘Ọkọnị’ nị, agụvị ka yâ rụrụ.” 10Dị aa dá ịpẹẹ yị Ijeesu ẹtẹẹtẹrẹ, dị ẹ ka asị ọ dụ ẹnị hụụnị ẹkụra ọnọọ nị. 11Â nyị ụ̀rá ọrụrụ ẹnyị aanị, ene hi akaha ataba ịzọọ aa rị. 12Dị ụhwẹ echu nịnị ẹnẹẹ dá ịpẹ yị Ijeesu ka ọ̀ navọ dị ọ̀ tụ́ ẹnị dị ẹnị ẹ̀ na ngụ ịnị ụra ẹnẹẹ nị. 13Obooboro dị Ijeesu ka: Ooho! nị, dị ụhwẹ echu ẹnẹẹ jịnẹ hụụnị ẹngụ ọnọrụ ọnọọ, dị ẹ na ngụ ịnịnẹ ụra ẹnẹẹ nị. Dị avaba ụra ẹnẹẹ, ẹnị ẹhụụ akawụ, zwe putu-putu, di e ne zina và hi ini irehu, di irehu mụnẹ wa nị. 14Aza anaā kụ́ ụra ẹnẹẹ rị ê zwe nọ eehi, dị ẹ na kà a ịnị ẹkụra ọnọọ ọnịrị ịnị aarẹ nị. Dị aza vẹ ka eni è ve re ịsa ana mẹ nị. 15Ẹnịnị ê ve tù Ijeesu, di e re ọza ana vịdị nyị ọkọnị ụhwẹ echu aanị ka ộ yaayịtẹ hẹẹ ịzọọ, ộ sị ịta kú ẹngụ, ọ sị ịrẹyọyẹ nyị nị. Dị angwa ee hí avaba ẹnịnị nị. 16Aza ene re e, ệ kà a yị aza ana vọ ịsa ana mẹ ọza ana nyị ụhwẹ echu ọnọọ, ọnịrị ịsa ana rẹ mẹ ụra ẹnẹẹ. 17Dị ẹ kwẹẹtẹ, dị ẹ yaa dá ịpẹẹ yị Ijeesu ka ọ̀ hụrẹ ẹkụra ẹnịnị nị. 18Ịjị Ijeesu aa ngụ ẹpa, dị ọza ana vịdị nyị ụhwẹ echu ọnọọ, aa dá ịpẹ ka ọnị aa saasaa nị. 19Ama Ijeesu ô yi, dị ọ kà a yọ ka, “Wa nọ eehi, dị ụ wa na kà a yị aza awụ ịsa ọbanyị ana Ananyị yị sị mẹ yị wụ ọnịrị ọ mẹmẹ nyị ayamva yị wụ!” 20Dị ọnọrụ ọnọọ sị varẹma aa na, dị ọ na a kà a ngụ avaba ẹkụra Idekaporii zịịzị, ịsa ọbanyị oni Ijeesu mẹ yọ nị. Ô hí avaba aza irenu.

Ozi ọnẹẹ Ịjayịrọọsị ọnịrị ọnẹẹ ana kanyị ịta Ijeesu

(Imt 9.18-26; Irk 8.40-56)

21Ijeesu ọ rẹ ngụ ẹpa varẹma nọ akẹnẹ irehu. Dị ọkọnị aza gụ kara a, ọ mẹ̀ yà ụtọ irehu nị. 22Re, ọza ịnya aanị ịnị ọdọvịdị irehi ahẹkẹ Aniju nịnị ộ vẹ. Ịrẹha anị ọ rị Ịjayịrọọsị nị. O mè re Ijeesu, dị ọ và ku ẹtẹ ọ́vịdị anị nị. 23Dị aa dá ịpẹẹ yọ ẹtẹẹtẹrẹ nị ka, “Ozi emi ọnẹẹ aa mẹrị isu. Aarịhịnị, va sị ụvọ tụra a, dị ẹngụ anị ọ̀ nịya ụvị ọ̀ nyẹngụ yàra!” 24Dị Ijeesu aa dụ ọọ na nị. Dị ọkọnị aza rẹ wara saasa a, dị ẹyaa dọ ọ óze eyi ẹnyị eyi ọsa nị. 25Â nyị ọnẹẹ ọnya aanị ene ee re ịnẹ ọtọtọnya pooro hụrẹ ịrayị ẹwụrẹva. 26Ọ sị ụya rị ẹtẹẹtẹrẹ ngụ ịdị ọmahọnọ nịnị zịịzị. O reè du avaba ogu ọnị ọ nyị ha, ọ yị hyakụ dahi, aaka ene ee divii hu avọọ. 27Ộ vịdị sị ịrẹyị Ijeesu wụ́, dị ọ ngụ ịnị akakana aza, di o zị oze ị́rẹma anị, dị ọ sị ụvọ kanyị ọọ awuru nị. 28Ộ vịdị kà a ka, “Màa hyakụ yị zụ sị ụvọ kanyị awuru anị kẹnẹ, ẹngụ amị vaa ta.” 29Obooboro ọnọọ anya o si jị ịnị ẹngụ anị. Ộ yẹ ịnị ẹngụ anị ka a sị ọnị mẹ ụkụ. 30Dị Ijeesu wụsẹ sị yẹ ka â nyị ụkata ana hụụnị ẹngụ anị nị. Agụvị avọọ dị ọ wụsẹ vara eyi ịnị akakana aza, dị ọ ka, “Ẹnẹ sị ụvọ kanyị awuru amị?” 31Dị ezirẹma anị kà a yọ ka, “Wê re, aza mẹ̀ hana, di u kuku ee họ̀ use ka: Ẹnẹ sị ụvọ kanyị mịị?” 32Dị Ijeesu aa yịị kana eyi hee ọza ana vavọọ mẹ nị. 33Ọnẹẹ ọnọọ ộ yẹ ịsị ẹ mẹ ịnị ẹngụ anị, dị ọ vẹ eyi angwahi-angwahi beri ẹgahị, dị ọ và ku ẹtẹ ọ́vịdị Ijeesu nị. Dị ọ kà avaba ịrẹyị anịị yọ, ọ mẹ̀ yị yà ịzẹyịza nị. 34Dị Ijeesu kà a yọ ka, “Ozi, ẹdọwụ awụ ọ sị wụ mẹ ụkụ, waa na ịnị ẹngwọọrọ, dị ẹngụ awụ ọ̀ ta!” 35Íjeesu màa yịị kà ịrẹyị, dị ọnụtụ hụụnị eehi ọdọvịdị irehi Ohomorihi ọnọọ vẹ nị. Dị ẹ kà a yị Ịjayịrọọsị ka, “Ozi ewu ô wusu, sị ẹ vẹ dị ụ kụkụ aa tụ́ Ọga akanya?” 36Íjeesu mẹ̀ yị wụ́ ịrẹyị ana a kà, dị ọ kà a yị ọdọvịdị irehi Ohomorihi ọnọọ ka, “Asị u hí angwa, sị sị ayị tụra mị kẹnẹ!” 37Ijeesu ẹ yị zẹẹ ka ọza ọnyọọnyị ọ̀ dụ ọnị na, ẹ̀ yị vị Ipita ọnịrị Ijemiisi ne beri Ịjọọnụ, ọyịnyara Ijemiisi. 38Ịjị e tù ini eehi ọdọvịdị ọnọọ, ô re, aza mèe nowu, dị ẹyaa jị òrèrè di e ree nowuu tụ́ ẹba nị. 39Ịjị ọ sị ngụ ini eehi ọnọọ, dị ọ kà a yị wa ka, “Sị ẹ vẹ dị ụ maanị ee nowu nịnị, dị ụ waa jị òrèrè nịnị? Ozi ọnẹẹ ọnọọ o yi sú, ama vị aa sụ ara nị.” 40Dị ẹyaa sị ọọ mẹ enyinyi nị. Dị Ijeesu dụ wa hi ẹhẹ, dị ọ sị ada ozi ọnọọ ọnịrị ọnyị anị, vaka aza ana saasa a vẹ, dị ẹ ngụ ịzị ozi ọnọọ ya nị. 41Dị Ijeesu jị ụvọ chire ozi ọnọọ ụvọ, dị ọ kà a yọ ka, “Itarita kumi”, ọnọọ vị ka, “Ozi ọnẹẹ, mị ka wa kwẹẹtẹ!” 42Obooboro, di ozi ọnọọ wụsẹ kwẹẹtẹ, dị aa zị ụsẹ nị. Ozi ịrayị ẹwụrẹva ọ vị nị. Ô hí wa irenu ẹtẹẹtẹrẹ. 43Dị Ijeesu hú wa ụvọ ka asị ẹ kà a yị ọza ọnyọọnyị nị, dị ọ rẹ ka à sị ịsọyịrị yọ dị ọ̀ rị ọọ nị.

Currently Selected:

Ịmaakị 5: EBTP

Highlight

Copy