Ịmaakị 4

Ọza ene mi ịsa ọyịna

(Imt 13.1-9; Irk 8.4-8)

1 # Irk 5.1-3 Íjeesu mẹ̀ yà ụtọ irehu, di o re nyima aa sị ịsaa zụ̀ aza nị. Aza ana wara ne tù ọọ, ẹ sị rụrụ baaba; agụvị avọọ dị ọ ngụ ịnị ẹpa ọnya ana yà ini enyi, dị ọ yaayịtẹ ịnị anị nị. Dị avaba aza ana vọ jẹẹ ụtọ irehu, dị ẹ và eyi kà irehu nị. 2Dị ọ sị ụhịrẹyị, dị aa sịị sị ịsa ọrụrụ-ọrụrụụ zụ̀ wa nị. Ọ màa zụ̀ wa ịsa, dị ọ kà a yị wa ka: 3“Sị ụtọ pe ẹtẹ nịnị! Re, â nyị ọza ịnya aanị ene ne mi ịsa ọyịna. 4O mèe mi ọọ, dị ẹnyị hụrẹ tụ́ ụtọ oze nị; di inomi nịnị wụsẹ vẹ, dị ẹ tọ̀ọ́ yọọ rị nị. 5Ihu ẹnyị ẹ rẹ hụrẹ tụ́ ịrẹsụ ịda ana nyị ezi chee aanị. Ịjịịjọọ dị ẹ chị nị, dị ẹyaa hụ nị, agụvị ka ezi anị ọyị rụrụ. 6Ịjị ọyị aa há, dị ẹ sị và hí nị, ama agụvị ka e yi re aha ha ẹpa ngụ, di e sú nị. 7Dị ẹnyị rẹ hụrẹ ne ngụ ịnị akakana ikeyi nị. Ịjị ikeyi ẹnẹẹ aa hụ, dị ẹ za wa rị nị, dị ịsa ọyịna ẹnẹẹ ẹ yị nyị ẹtụtụ nị. 8Ihu ẹnyị ẹ rẹ hụrẹ ne ngụ ịnị ẹtẹ ozoza, dị ẹ chị, dị ẹ hụ, dị ẹ nyị ẹtụtụ nị; ẹnyị ệ nyị ẹtụtụ ohurẹẹwụ-ohurẹẹwụ, ẹnyị ẹbẹẹta-ẹbẹẹta, ẹnyị vị ẹchẹhị-ẹchẹhị.” 9Dị Ijeesu ka, “Ọza ana àa nyị ụtọ ọyịsị wụ́ ịrẹyị, ọ̀ sị ụtọ pe ẹtẹ!”

Iruvo ọnị Ijeesu sị ịrẹyị hị́ ọsa

(Imt 13.10-17; Irk 8.9-10)

10Ịjị ọ sị vị ọnịnya, dị aza anaā dụ ọọ zị ọnịrị ezirẹma anị ẹwụrẹva va họ̀ ọ use ini oze ụhịrẹyị ẹnẹẹ nị. 11Dị ọ ka, “Ohomorihi ọ raà mẹ ka wa yẹ nịnị ịrẹyị ịjọva Ohomorihi oni iruvo anị ana nyịnẹ. Ama ẹnị ene hi ẹhẹ vị ana aa wụ́ avaba ịrẹyị ẹnẹnị ini oze ụhịrẹyị; 12#Ayị 6.9,10agụvị ẹ̀ẹ daka re ẹtẹ pooro, asị ẹ yẹ ịsị eyee re. Ẹ̀ẹ sị ụtọ pe ẹtẹ pooro, di asị ẹ yẹ ịsị ẹyaa wụ́, agụvị asị e ro ịnẹ varẹma, dị Ohomorihi ọ̀ va na vagu wa ịnị ịvị ẹnịnị.”

Ijeesu ộ mẹ̀ ẹhahi ịrẹyị ọnị ọ sị hị́ ọsa

(Imt 13.18-23; Irk 8.11-15)

13Ijeesu ộ họ̀ wa ka, “Aanịka wẹ yị yẹ iruvo ụhịrẹyị ọnọnị nịnị? Ụ mẹmẹ vaa yẹ avaba ụhịrẹyị ana vọ nịnị? 14Ọza ene mi ịsa ọyịna aanị vị ene ne mi ịrẹyị Ohomorihi. 15Aza ẹnẹnị vị ana yà anka ihu enee mi tụ́ ụtọ oze; aza ẹnẹnị mẹ̀ yị wụ́ ịrẹyị Ohomorihi kẹnẹ, di Echu wụsẹ vẹ, dị ọ sị ịrẹyị enee mi tụ́ ịnị ayị ẹnịnị hụụ ịzọọ nị. 16Aza ẹnẹnị vị ana rẹ yà anka ihu ana hụrẹ tụ́ ịnị ẹtẹ ana sị mẹẹ ịda avọọ. Ịjị aza ẹnẹẹ wụ́ ịrẹyị ọnọọ, dị ẹ wụsẹ sị ịrajẹ dọ ọ nị. 17Ama agụvị ka ịrẹyị ọnọọ o yi re aha ha ẹpa ngụ ịnị ayị ẹnịnị, ệ sị tụ́ ịnị ayị chee; ịjị ọ da kù dị ẹngụkata ọnịrị ayamịkụ vẹ agụvị ịrẹyị ọnọọ, dị aza ẹnẹẹ wụsẹ sị varẹma nị. 18Aza ẹnẹnị vị ana rẹ yà anka ihu ene e mi tụ́ ịnị akakana ikeyi. Ệ wụ́ ịrẹyị ọnọọ, 19dị ariro ẹhẹ ọnọnị ọnịrị evene ẹkẹhị ọnịrị ụbanyị ẹhẹ beri oyisì odivi ịsa ana vọ ngụ ịnị ayị ẹnịnị, dị ẹ za ịrẹyị ọnọọ rị nị; agụvị avọọ ẹ yị nyị ẹtụtụ. 20Aza ẹnẹnị vị ana rẹ yà anka ihu ene e mi tụ́ ịnị ẹtẹ ozoza. Ệ wụ́ ịrẹyị ọnọọ, dị ẹ dọ ọ, dị ẹyaa nyị ẹtụtụ nị. Ẹnyị ệ nyị ẹtụtụ ohurẹẹwụ, ẹnyị ẹbẹẹta-ẹbẹẹta, ẹnyị ẹchẹhị-ẹchẹhị.”

Ijeesu ộ sị ịrakotupa hị́ ọsa ịrẹyị Ohomorihi

(Imt 5.15; 10.26; 13.12; Irk 8.16-18)

21 # Imt 5.15; Irk 11.33 Dị Ijeesu rẹ ka, “Vị ọza wéé hu ozotupa, dị ọ sị ụnọkọ kú ọọ nị, à vị ka dị ọ̀ sị ọọ tụ́ uruvo ịbẹẹdị nị? Ẹ yị vị ịzị ẹ nẹba aā sị ọọ gẹẹ? 22#Imt 10.26; Irk 12.2Agụvị ka ẹ yị nyị ịsa ana tẹ ẹnẹ ẹ̀ yị vaa tụ́ ẹhẹ; ẹ yị nyị ịsa ẹ tẹ ini ewere, ẹnẹ ẹ̀ yị vaa tụ́ ẹhẹ chapaa. 23Ọza ana àa nyị ụtọ ọyịsị wụ́ ịrẹyị, ọ̀ sị ụtọ pe ẹtẹ!” 24#Imt 7.2; Irk 6.38Dị ọ kà a yị wa ka, “Sị ụtọ pe ịrẹyị ọnị ụ waa wụ́ nịnị o! Ịsị ụ wàa sị mọ ịsa yị ọza, a rẹ vaa sị mọ ọ yị wụ nị; dị a ká tụ ọ wụ hu avọọ. 25#Imt 13.12; 25.29; Irk 19.26Agụvị ka ọza ana àa nyị ịsa, vị Ohomorihi vaa dàa tụ́ ọọ yọ nị. Ọza ẹnẹ ẹ̀ yị nyị, oyichee ọnọ ọ̀ọ hyakụ nyị, dị a dọ ọ hụrẹ ẹ ụvọ.”

Ụhịrẹyị akụ mẹmẹ mẹ

26Ijeesu ka, “Aanị Óhomorihi mẹmẹ aa mẹ ịjọva nị. Vị ọ sị mẹẹ anka ọnọrụ ọnya ana sị akụ, dị ọ na tụ́ ọọ nị. 27Ọza ọnọọ ọ̀ọ rẹ sụ̀, dị ọ rẹ ha eyinị-eyinị, pooro dị akụ ọnọọ chị dị ọ hụ; ama ọ yị yẹ ọ mẹmẹ mẹ. 28Ẹtẹ, ọnị ụvọta, ọ mẹ ka ọ̀ chị nị. Ịjị ọ sị chị, dị ọ hụ, di o ve hi ịrẹsụ nị. Ịrẹma ọnọọ, dị ọ va mẹ nị. 29#Ijow 3.13Ịjị akụ ọnọọ ọ̀ọ sị vị́, dị ọza ọnọọ wụsẹ sị ụhwọ anị, dị aa mẹ̀ ẹ nị, agụvị ka ụmẹ anaa sịị̄ mẹ̀ ẹ, o si tù.”

Ụhịrẹyị ihu oweyi ọnya

(Imt 13.31-32; Irk 13.18-19)

30Ijeesu ka, “Si i ve sii juwe ịzị Ohomorihi yà aa mẹ ịjọva kẹ? Ye re ụhịrẹyị oni i ve sii mẹ apojuwe anị? 31Vị ọ sị mẹẹ anka ihu oweyi ọnya aanị nị, ene weyi hu keekere ịnị ẹhẹ nị. Eē chire e tụ́ ịnị ẹtẹ. 32Èe si oo chire, dị ọ chị, dị ọ hụ, dị ọ vara ọchị ana banyị hu keekere ịnị avaba ọchị ịsẹpẹ. Ọọ̄ nyị avọ ọbanyị, di inomi nịnị vẹ, dị ẹ mẹ ịrẹngwẹ hi ini ihuhu anị.” 33Ijeesu ộ rẹ sị ụhịrẹyị ọrụrụ-ọrụrụ kà ịrẹyị Ohomorihi yị wa. Ọpa ẹ mẹ̀ zụ wụ́ kẹnẹ, ọ kà ịrẹyị yị wa nị. 34Ẹ yị nyị ịsị ọ kà yị wa, ẹnẹ ẹ̀ yị vị ini oze ụhịrẹyị. Ama ịjị ọ sị vị ọnịrị ezirẹma anị anava, dị ọ tangwa kà iruvo avaba anị zụ̀ ezirẹma anị nị.

Ijeesu ộ za ahị jẹẹ

(Imt 8.23-27; Irk 8.22-25)

35Ụmẹ oruva ịhị ọnọọ, di Ijeesu ka ezirẹma anị ẹ̀ vẹ dị ẹnị ẹ̀ nọ akẹnẹ irehu nị. 36Ịjị ẹ sị hụrị ịdị aza ẹnẹẹ, dị ẹ sị Ijeesu ọ mẹ̀ yị yà ngụ ịnị ẹpa, dị ẹyaa na nị. A rẹ nyị ẹpa ọsa ana aa dụ ọọ na. 37Di opomi ọbanyị ọnyara aa tụ́ nị, di enyi aa dàa hi ịnị ẹpa nị. Ẹpa ọnọọ ee vee hí. 38Ijeesu yà ịnị ẹpa ọnọ, ộ sị ịsa pe ịrẹsụ aa sụ̀ ara. Dị ẹ na ha a nị, dị ẹ ka, “Nda, eni ee vee sú ọ! Wẹ yị tẹsịị?” 39Di Ijeesu kwẹẹtẹ nị, dị ọ tụ́ ahị ọnọọ Ohuvọ nị. Dị ọ kà a yị enyi ka: ọ mẹ hẹẹ! Dị ahị jẹẹ keri, dị ẹtẹ tịtẹ sii nị. 40Di Ijeesu kà a yị wa ka: Sị ẹ vẹ di eyee hí angwa nị? Ọ kà ẹnịnị ẹ ẹ̀ yị va sị ayị tụra ọnịị? 41Angwa ô hí wa ẹtẹẹtẹrẹ, dị ẹyaa kà a yị ẹngụ ka: Ẹngụ ọza ịsị ẹ vị ọnọnị ana ahị ọnịrị irehu raa wụ́ụ chire bẹẹ aanị?

Currently Selected:

Ịmaakị 4: EBTP

Highlight

Copy