Ịmaakị 3

Ijeesu ộ mẹ̀ osuvọ ọnya ụkụ

(Imt 12.9-14; Irk 6.6-11)

1Ẹkụhị ọnya Ijeesu ọ rẹ ngụ ini irehi ahẹkẹ Aniju. Â nyị ọza ịnya aanị ana yà ịzọọ ene sú ụvọ. 2Aza ẹnyị ệ sị eyi pe Ijeesu gegege ka ahịka ọ vaa mẹ osuvọ ọnọọ ụkụ anị ịnị ẹkụhị ụhwọtụ, agụvị dị ẹ̀ nyẹngụ re ịrẹyị ẹnẹ ẹ vaa sị za Ijeesu. 3Dị Ijeesu kà a yị osuvọ ọnọọ ka, “Vẹ ọvịdị ịzẹnị!” 4Ịjị ọ vẹ dị Ijeesu kà a yị aza ẹnẹẹ ka, “Áá vọrọ ka à mẹ ọyịza ịnị ẹkụhị ụhwọtụ, à vị odivi? Áá rẹ vọrọ ka à dọ ọza tụ́, à vị a vọrọ ka à wụ̀ ọza nị?” Dị ẹnịnị kú irenu, dị è yi tụ́ ohi nị. 5Dị Ijeesu kana eyi sì wa nị, ayị aa kụ́ ọọ, agụvị ka ayị aza ẹnẹẹ ẹ sị katẹngụ baaba. Dị ọ kà a yị osuvọ ọnọọ ka, “Tana ụvọ awụ!” Dị osuvọ ọnọọ tana ụvọ anị, dị ụvọ anị ta nị. 6Dị Anihwarisi nịnị jịnẹ tụ́ ẹhẹ nị, dị ẹ wụsẹ nọ ịda ogu Ịhẹrọdị nịnị, dị ẹ naa gẹ eyi Ijeesu ka ẹ́nị mẹmẹ vaa mẹ, dị ẹnị ẹ̀ wụ ọ nị.

Ijeesu ọnịrị ọkọnị aza ene hi ụtọ irehu

(Imt 12.15-16; Irk 6.17-19)

7Ijeesu ọnịrị ezirẹma anị ệ hụụ ịzọọ, dị ẹ nọ ụtọ irehu nị. Dị ọkọnị aza wara hụrẹ ẹtẹ Igariri ọnịrị Ijudiya saasa wa na nị. 8Aza ẹ rẹ hụrẹ Ijerusarẹmị ọnịrị Idumiya vẹ, ẹ rẹ hụrẹ akẹnẹ Okuha Ịjọdanị vẹ, dị ẹ rẹ hụrẹ ọgụrị ẹkụra Ịtaya ọnịrị Ịsịdọnị vẹ bẹẹ nị. Avaba aza ẹnẹnị ệ ká Ijeesu vẹ, agụvị ka ệ vịdị wụ́ ịsa ọnọọ mẹ. 9#Ịmk 4.1; Irk 5.1-3Aza ẹ sị rụrụ baaba; agụvị avọọ dị Ijeesu kà a yị ezirẹma anị ka è tenyi ẹpa ọnya tịtẹ yọ nị, agụvị asị aza tụ́ ọọ ụvọ nị. 10Ijeesu ọ raà mẹ aza ọrụrụ-ọrụrụ ụkụ; agụvị avọọ dị avaba ọnịkụ nịnị kụkụ aa haraa kú ọ nị, agụvị dị ẹ̀ zụ sị ụvọ kanyị ọ. 11Ịjị aza ana nyị ụhwẹ echu nịnị re e kẹnẹ, dị ẹ hyẹdụ nya ẹtẹ ọ́ vịdị anị, di e nowu zẹtẹ, dị ẹ ka, “Ẹwa vị Ozi Ohomorihi nọ!” 12Dị Ijeesu hú wa ụvọ ẹtẹẹtẹrẹ ka asị ẹ zẹẹ ka aza ẹ̀ yẹ ọza ọnọ ọnị vị nị.

Ijeesu ộ nyị ezirẹma anị

(Imt 10.1-4; Irk 6.12-16; Ụkọ 1.13)

13Dị Ijeesu hịrẹ nọ ịrẹsụ ataba ọnya aanị, dị ọ hị́ aza ẹnyị aanị oni o sì nị; dị ẹnịnị ve tù ọ nị. 14Dị ọ nyị ẹnị ẹwụrẹva ọnọọ hị́ odeyi ka ẹ̀ yà pe ọnị, dị ọnị ọ̀ tụ́ wa nọ ẹhẹ na kà ịrẹyị Ohomorihi yị aza, 15dị ẹ̀ nyị ọda ẹnẹẹ vaa sị mẹ aza ụkụ, dị ẹ̀ rẹẹ dụ ụhwẹ echu nịnị hụụnị ẹngụ aza. 16Ịrẹha ẹnị ẹwụrẹva ẹnẹẹ yị: Ịsayịmọnị oni Ijeesu rẹ yị Ipita, 17Ijemiisi, ozi Izebedi, ọnịrị Ịjọọnụ ọyịnyara Ijemiisi, ẹnị Ijeesu rẹ hị́ “Iboyanagisi” (iruvo ọsọnị ọ vị “ezi apaana ihinẹba”), 18Andụrụ, Ihwiripi, Ibatoromiwu, Imatiwu, Ịtọmọsị, Ijemiisi ozi Arịhwịyọsị, Ịtadịyọsị, Ịsayịmọnị Anikenaani, 19ọnịrị Ijudasi Isikarịyọtị, ọza ana vana sị Ijeesu chire ọnịvị anị ụvọ.

Ijeesu ọnịrị Echu

(Imt 12.22-32; Irk 11.14-23; 12.10)

20Ijeesu ọnịrị ezirẹma anị ệ nọ ini eehi ọnya, dị ọkọnị aza rẹ sị wara gụ tawụ-tawụ, ana ahịka Ijeesu ọnịrị ezirẹma anị e yi nyị eyi rị ịsa nị. 21Ịjị aza anị Ijeesu maanị wụ́, dị ẹ na ka ẹnị ẹ̀ na sị ọọ hụụ ịzọọ nị, agụvị ka vị aza kà a ka vi ee che uvu nị. 22#Imt 9.34; 10.25Ọzwọzọda nịnị ê chí hụrẹ Ijerusarẹmị vẹ, dị ẹ ka Ijeesu ộ nyị ụhwẹ echu ana aā hị́ “Ịbẹẹrịzẹbụ”, dị ẹ rẹ ka ụkata ọga ụhwẹ echu nịnị aa sịị dụ ụhwẹ echuu jịnẹẹ hụụnị ẹngụ aza nị. 23Dị Ijeesu va hị́ wa nị, dị aa sị ụhịrẹyịị kà ịrẹyịị yị wa nị. Dị ọ ka, “Échu mẹmẹ zụ dụ echu jịnẹ?” 24Ẹkụra ẹ̀ẹ gà hi dị ẹ và eyi kà ẹngụ nị, ẹkụra ọnọọ ọ yị zụ kwẹẹtẹ. 25Àa rẹ nyị irehi ana gà hi dị ẹ và eyi kà ẹngụ nị, irehi ọnọọ ọ yị zụ kwẹẹtẹ. 26Echu ọ̀ọ rẹ kwẹẹtẹ tù ẹngụ anị, di ee beri ẹngụ anị zyaazị nị, dị ọ sị gà hi ẹẹva nị, ọ yị zụ kwẹẹtẹ, vi ee vu ẹtẹ nị.

27“Ọza ẹ yị rẹ nyẹngụ ngụ ini eehi adarehi ana nyị ụkata ẹtẹẹtẹrẹ, dị ọ̀ na kụ́ ọọ ẹnya; ẹ yị vị o vịdị sì oze dị ọ̀ za adarehi ọnọọ, dị ọ̀ sụ́ ọọ, ịjọnọọ ọgọnị di ò ve re oze kụ́ ọọ ẹnya irehi.

28“Ịzẹyịza, mị kà wụ nị, Ohomorihi vaa vagu ọza ịnị avaba ịvị ọnịrị ụhụ ọnị ọ̀ọ kụ̀ Ohomorihi, ọ̀ọ daka divi pooro; 29#Irk 12.10ama ọza ana àa kụ̀ Ụhwẹ Ọnịnị ụhụ, ọ yị va nyị ẹvagu ịnị anị, ộ rị ịvị pooro zịna-zịna.” 30Ijeesu ộ maanị kà, agụvị ka ẹnịnị ka ộ nyị ụhwẹ echu.

Ọnyị Ijeesu ọnịrị ẹyịnyara anị

(Imt 12.46-50; Irk 8.19-21)

31Ẹkụhị ọnya ọnyị Ijeesu ọnịrị ẹyịnyara anị ệ vẹ, dị ẹ jẹẹ ẹhẹ, dị ẹ tụ́ ka à na hị́ ọọ vẹ nị. 32Aza ọrụrụ-ọrụrụ vị ana yaayịtẹ kara Ijeesu, dị ẹnịnị kà a yọ ka, “Re, ọnyị awụ ọnịrị ẹyịnyara awụ hi ẹhẹ, eyee sì wu.” 33Dị Ijeesu ka, “Ẹnẹ vị ọnyị amị ọnịrị ẹyịnyara amị?” 34Dị Ijeesu re aza ana yaayịtẹ kara a, dị ọ ka, “Re, ọnyị amị ọnịrị ẹyịnyara amị ẹ vị ẹnẹnị nị. 35Ọza tụra ọza ana àa mẹ̀ ịsa oni Ohomorihi sì, ẹnị ẹ vị ẹyịnyara amị ọnịrị onyeyiza amị beri ọnyị amị nị.”

Currently Selected:

Ịmaakị 3: EBTP

Highlight

Copy