UMÁKI 8

Ujísɔ̄si je ɔdōlé lɛ ācɛ úlā igwó

(Umát 15.32-39)

1Eko ɔhá kpɔ́ ɛwa nɛ̄hi wā í le jila tɔ̄há. Eko nɛ̄ ɔdōlé kú uwā mɛ ā, Ujísɔ̄si lɛ ayíkpó ā hīgwú anɔ́ɔ ó da uwá ka, 2“Ācɛ nēe bá mbaa í tū um eyīnyinyi ohígbū ka é húmáyī bá pi um ŋmá ɛ̄cī ɔ́mɛtá yɔ̄ mɛ́ɛ̄ á, é kē lɛ ɔdā dúúmā nēé ī lé gɛ ŋ́. 3Ɔ́dāŋ́ ka n cɛ̄ lɛ uwá i pɛ́ ga ɔlɛ́ ipú áncā, ācɛ ōhī kú uwā lɔfú hɛ́kwú ɔwɛ glá, ohígbū ka ācɛ ōhī kú uwā ŋmá ɛga oligbó.” 4Ayíkpó kú nū da ɔ́ ɔ̄kā ka, iní nɛ̄ ɔ̄cɛ ɔ́ɔ í má ɔdōlé nōo í jīla ācɛ nēe bá ā? É klla ka ɛga nɛ̄ aá bá ā kē wɛ ipú ígbíli. 5Ujísɔ̄si da uwá ɔ̄kā kahíníī, “Igbō ɛmulá nɛ̄ aá bī ā?” É tá ɔ̄ ohi ka igbō ahāapa nɛ. 6Ó lɛ ɔ́da je lɛ ɛwa kú ācɛ ā kéē cīce ajɛ. Anɔ́ɔ ó lɛ igbō ahāapa ā kpó, ó lɛ ahínyá tá Ɔwɔicō, ó lɛ uwá kpó cē, anɔ́ɔ ó kwú uwā ú kpó lɛ ayíkpó kú nū kéē kɔ̄ lɛ ɛwa kú ācɛ ā. Anɔ́ɔ ayíkpó ā le yá ɛ́gɛ́nɛ̄ ó ka ā. 7É lɛ ɛbéenyi lígíí dúú. Ujísɔ̄si lɛ ahínyá tá Ɔwɔicō ohígbū ɛbéenyi ā, anɔ́ɔ ó da ayíkpó kú nū kéē lɛ uwá kɔ̄ lɛ ācɛ ā dúú. 8Ɛjɛ̄ɛ̄jī ācɛ le lé jɛ̄ iyī uwā. Iwili kú ɔdōlé ā nōo hile nɛ̄ ayíkpó kpó ŋmá ajɛ ā wɛ ómbilí ahāapa. 9Ācɛ nēe bá abɔ́ɔ ā lɛbɛ̄ɛka ācɛ úlā igwó āa. Anɔ́ɔ ó lɛ uwá nū ga ɔlɛ́ eko nēé lɛ ɔdōlé lé kwɛyí ā. 10Anɔ́ɔ ɔkwɔɔkwu ɔ́ɔ́mā, anú mla ayíkpó kú nū le pɛ́ tá ipú ɔ́kɔ, anɔ́ɔ é le pɛ́ i yɛ tá ajɛ kú Udalimanúta.

Ujísɔ̄si tá ka anúɔ í yá ɔdā ō hídáagó ŋ́.

(Umát 16.1-4)

11 # Umát 12.38; Ulúk 11.16 Ācɛ Ufárisīi ōhī le pɛ́ wā ɛgiyí Ujísɔ̄si, anɔ́ɔ é gbɔɔ́ ō táafú mla anú á. É tíne kéē jé ɔ́dāŋ koó ŋmá ɛgiyí Ɔwɔicō ɔkwɛ̄yi. Anɔ́ɔ é da ɔ́ kóō lɛ ɔdā ō hídáagó éyi yá nōo í mafú ka Ɔwɔicō tū ɔ̄ wā ɔkwɛ̄yi á. 12#Umát 12.39; Ulúk 11.29Amáŋ Ujísɔ̄si lɛ owu hīlatá, anɔ́ɔ ó kahíníī, “Ɔdíyá nɛ̄ ācɛ kú eko nyā gē dɔɔ̄kā ɔdā ō hídáagó ā? Ehée, n̄ da aá, é gáā je ɔdocābɔ̄ ɛ́gɔ́ɔmā dúú lɛ ācɛ nēe bá nyā ŋ́!” 13Ó klla kwúcē í tá ipú ɔ́kɔ mla ayíkpó kú nū, anɔ́ɔ é gbɔɔ́ ō gā ogbeé ɔhá kú óókpoó ā á.

Ɔdōnīgbo kú ācɛ Ufárisīi mla ákú Uhérɔ̄du

(Umát 16.5-12)

14Ayíkpó ā le mlanyī o bī ɔdōlé ga ipú ɔ́kɔ eko nēé pɛ́ ga ipú nū ā, ń táafú ŋ́ ayíka igbō ékpónú ōfūnū. 15#Ulúk 12.1Ó pi uwá ahɔ̄ kahíníī, “Aá lɛ ɛlá kwu ɔ́, aá klla leyī kwɛcɛ ohígbū ɔdōnīgbo kú ācɛ Ufárisīi mla ákú Uhérɔ̄du.” 16É bá gē ka lɛ iyī uwā ka, ɔ́ɔ ka ɛ̄nyā ohígbū ka aá í lɛ igbo dúúmā ŋ́. 17Ujísɔ̄si lɛ ɔdā nēé bá gē ka ā jé, anɔ́ɔ ó da uwá ɔ̄kā kahíníī, “Ɔdíyá nɛ̄ aá bá gē kɛlā lɛyíkwu o ka ka aá lɛ igbo ŋ́ māā? Aá jé ɛ́ɛ́ ŋ́ nɛɛ ámāŋ ka, aá jɛ́ɛyí nū ɛ́ɛ́ ŋ́ nɛɛ? Aá jé ɔdā dúú glá ŋ́ nɛɛ?” 18#Ujer 5.21; Isík 12.2; Umák 4.12Aá lɛ īkpēyī, nááná aá mɛ́ɛbɛ glá ŋ́ nɛɛ? Aá lɛ ahɔ̄ aá lɔfú pó ɔdā dúú ŋ́ nɛɛ. Aá blakwu ɔdā dúú glá ŋ́ nɛɛ? 19Eko nɛ̄ n cē igbō lɛ ācɛ úlā igwɛ́ɛpa ceofigwó ā, ómbili omōomu kú iwili nōo hile ā ɛmulá nɛ̄ aá túbá ŋmá ajɛ ā?” É da ɔ́ ka igwɛ́ɛpa.

20Ujísɔ̄si da uwá ɔ̄kā kahíníī, “Eko nɛ̄ n cē igbō lɛ ācɛ úlā igwó kéē lé ā bɛ́ɛ, ómbilí omōomu kú iwili ɛmulá hile nɛ̄ aá túbá ŋmá ajɛ ā? É da ɔ́ ka ahāapa.

21Ó da uwá ɔ̄kā ka, anɔ́ɔ é kōō jɛ́ɛyí nū ŋ́ kpɔ́ áā?

Ujísɔ̄si le ɔ̄cɛ opeyī éyi eyī nwūla Ubɛtsáyída

22Eko nēé ga ajɛ kú Ubɛtsáyída ā, ācɛ éyi le opeyī éyi bī gé lɛ ɔ́, anɔ́ɔ é gbɔ̄ɔkɔ lɛ ɔ́ kóō lɛ ɔ́ hɛ́tá. 23Ujísɔ̄si lɛ abɔ̄ tū ɔ̄cɛ opeyī abɔ̄ ŋmá eyīpɔ́lɛ́ ā ga eyɛ̄ɛ̄cɛ kú nū. Eko nōó lɛ ahɛ tá tū ɔ̄cɛ ā eyī, Ujísɔ̄si kwu abɔ̄ ú ce ɔ́, anɔ́ɔ ó da ɔ́ ɔ̄kā kahíníī, “A lɔfú má ɔdā dóódu glá āā?” 24Ɔnyīlɔ ā jeyī má icō anɔ́ɔ ó kahíníī, “Īī, n gē má ācɛ, amáŋ é lɛbɛ̄ɛka ɔcí nēe bá ī yāwu ā.” 25Ujísɔ̄si klla kwú abɔ̄ ú klá ɔnyīlɔ ā eyī kpɔ́. Eko nyā mɛ́ɛ̄ ā, ó pléyī kú nū lɔfú lɔfú anɔ́ɔ ō gbɔɔ́ ō mɛ́ɛbɛ á. Anɔ́ɔ ó le ɔdā dóódu má péee á. 26Ujísɔ̄si lɛ ɔ̄cɛ ā nū ga ɔlɛ́ nū. Anɔ́ɔ ó pi ɔ́ ahɔ̄ ká ɔ̄ híī kwúcē ga eyīpɔ́lɛ́ ā gɛ ŋ́.

Upíta ka tɛ́ɛcɛ kú Ujísɔ̄si ɔ́ɔ wɛ ohɔ́nyɛtá á

(Umát 16.13-20; Ulúk 9.18-21)

27Ujísɔ̄si mɛ́mla ayíkpó kú nū le pɛ́ nyɛ̄ɛ̄, le tá aéyīpɔ́lɛ́ nēe kwu ajɛ kú Usísarīya Ufilipayi ajaajɛ ā. Abɔ̄ é bá yɔ̄ ī nyɔ̄ ɔwɛ ā, ó lɛ ɔ̄kā da uwá kahíníī, “Aá da um ɛ́, ɔ̄nyɛ nɛ̄ ācɛ ka n wɛ ā?” 28#Umák 6.14,15; Ulúk 9.7,8 É tá ɔ̄ ohi kahíníī, “Ācɛ ōhī ka, a wɛ Ujɔ́ni oyúbatísim, ācɛ ɔhá ka, a wɛ Ɛláyíja, ɛ́ɛ́ nɛ̄ ɔ̄cɛ ɔhá ā ka a wɛ éyi kú ācomɛ́ɛbɛ á.” 29#Ujɔ́n 6.68,69Anɔ́ɔ ó da uwá ɔ̄kā kahíníī, “Aá ā bɛ́ɛ? Ɔ̄nyɛ nɛ̄ aá ka n wɛ ā?” Upíta tóohi kahíníī, “Awɔ wɛ ohɔ́nyɛtá á.” 30Anɔ́ɔ Ujísɔ̄si pi uwá ahɔ̄ kéē híī da ɔ̄cɛ dúúmā ɔdā dúú lɛyíkwu anúɔ nóó.

Ujísɔ̄si kɛlā lɛyíkwu ōwē nōó í má mla ikwū kú nū

(Umát 16.21-28; Ulúk 9.22-27)

31Anɔ́ɔ Ujísɔ̄si da ayíkpó kú nū kahíníī, “É géē yá ami nōo wɛ Ɔyínɔ̄nyīlɔ kú Ɔ̄cɛ ā ōwē nɛ̄hi, anyākwɔ́cɛ mla aótrɛ̄yí kú ācogwɛ́ɛya mla aítíca kú íne géē tá ɛlā kú nū. É géē je ɔ́ ŋmó, amáŋ é géē je ɔ́ héyī ŋmá ɔlékwū ɛ̄cī ɔ́mɛtá. 32Ó ka ɛ̄nyā tɛ́ɛcɛ cāā lɛ ayíkpó kú nū. Anɔ́ɔ Upíta lɛ ɔ́ hīgwú gɛcɛ ŋmá ɛgiyí ayíkpó ohile ā, anɔ́ɔ ó le ɛ̄gba dɛ̄ tū ɔ̄ á. 33Amáŋ Ujísɔ̄si pīyeyī má ayíkpó kú nū, anɔ́ɔ ó lɛ ɛgba dɛ̄ tū Upíta kahíníī, “Nyɛ̄ɛ̄ ŋmá ɛgiyí um, Ebilíi, ɛlá nāa gbo ā í ŋmá ɛgiyí Ɔwɔicō ŋ́, amáŋ ó ŋmá ɛgiyí ɔ̄cɛ ɔlamu nɛ̄!”

34 # Umát 10.38; Ulúk 14.27 Anɔ́ɔ Ujísɔ̄si lɛ ɛwa nēe jila bá ā hīgwú mla ayíkpó kú nū, wā ɛgiyí nū. Anɔ́ɔ ó kahíníī, “Ɔ́dāŋ ka ɔ̄cɛ dúúmā tíne kóō yɛce um kóō leyī gwō iyī nū bónū, cɛ́ɛ́ ó kwú ɔcóōnyɔ́kpá kú nū ú ce ɔkɔ cɛ́ɛ́, kóō yɛce um.” 35#Umát 10.39; Ulúk 17.33; Ujɔ́n 12.25Ohígbū ka ɔ́dāŋ ka ɔ̄cɛ dúúmā tíne ká ā nya oyēeyī kú nū tá, ó géē hɛ́ ɔ̄ abɔ̄, amáŋ ɔ̄cɛ dúúmā nōo kwú oyēeyī kú nū í tónú ohígbū um mɛ́mla ohígbū ɔkōōlɔhi ā, é géē nyá ɔ́ tá, 36Ile nyá nɛ̄ ó í tū lɛ ɔ̄cɛ, ɔ́dāŋ ka ó lɛ odúúdú aɔ́dā kú ɛcɛ nyā lɛ, amáŋ nɛ̄ á yēeyī ŋ́ bɛ́ɛ? Ó lɛ itene dúúmā ŋ́. 37Ó lɛ ɔdā ɔhá dúúmā nāa lɔfú yá ká ā yēeyī glá ŋ́. 38Ɔ́dāŋ́ ka ɔ̄cɛ dúúmā gē yúwēyī um mɛ́mla ɛlā nɛ̄ n gē nwū ā, eko kú ācobɔ̄bíipú nēé je Ɔwɔicō ŋ́ nyā ā, ami Ɔyínɔ̄nyīlɔ kú Ɔ̄cɛ géē híhó ka ń jé ɔ̄cɛ ɔ́ɔmā ŋ́ eko nɛ̄ n géē wā mla ɔfú nɛ̄hi kú Ádā um mla aálelékwū otɛ̄hɔ̄ kú nū ā.

Currently Selected:

UMÁKI 8: IFBCL

Highlight

Copy