UMÁKI 7

Ɔdā nɛ̄ Ádáádā alɔ nwū ā

(Umát 15.1-9)

1Ɛ̄cī éyi ācɛ ōhī kú Ufarisīi mla ācɛ o nwū íne kú Umósīsi wā ŋmá Ujerúsālɛm gaá jīla Ujísɔ̄si eyī. 2É le má ka ayíkpó kú nū bá gē lé ɔdōlé nēé na abɔ̄ gbɔbū ŋ́, ɔ́ɔmā lé kéē na abɔ̄ ɔwɛ nɛ̄ ācɛ Ufarisīi dɔɔ̄kā kú ācɛ kéē na abɔ̄ ā ŋ́. 3Ohígbū ka ācɛ Ufárisīi mɛ́mla ācɛ Ujíyu ohile gē yɛce íne nēé mīyɛ ŋmá abɔ̄ aádáádā uwā. É gē lɛ abɔ̄ na ɔwɛ okpaakpa gbɔbū ɛ́ɛ́ nēé gē lé ɔdōlé á. 4Ɔwɛ ékpó ɔ́ɔmā, é gáā lé ɔdā dúú nēé le lá ŋmá olihi ŋ́, ń táafú ŋ́ é lɛ ɔ́ na aflɛ́yí. É klla gē lɛ aíne alɛwa ɔhá nēé kpó lɛ uwá ā tū. Ɔdā lɛbɛ̄ɛka ɔwɛ okpaakpa nɛ̄ ɔ̄cɛ í le na ikókwū mɛ́mla ɛhī mla ógo udɔ mɛ́mla agōdō. 5Anɔ́ɔ ācɛ Ufarisīi mla ācɛ onwu íne kú Umósīsi lɛ ɔ̄kā da Ujísɔ̄si kahíníī, “Ɔdíyá nɛ̄ ayíkpó kú uwɔ í gē yɛce ɔdā nɛ̄ aádáádā alɔ nwū klla kpó tū alɔ abɔ̄ ā ŋ́ māā? Amáŋ ikɔkɔ ɔ́ɔmā é gē na abɔ̄ gbɔbū ɛ́ɛ́ nēé ī lé ɔdōlé ā ŋ́.” 6#Ayis 29.13Ujísɔ̄si tá uwā ohi kahíníī, “Ɛlā nɛ̄ Ayisáya ka lɛyíkwu aá nyā wɛ ɔkwɛ̄yi nɛ̄ n.” Aá wɛ ācɛ o leyī ɛpa, ɛ́gɛ́nɛ̄ ó tá ɔ̄ lɛ ā. Ɔwɔicō ka,

“Ācɛ nēe bá ā gē lɛ ojīlīmā kú ákpókónu

ce um, amáŋ ɔtū kú uwā le ligbó gā um.

7Ɛ̄gbā nēé gē gbā um ā í ŋmá ɔtū kú uwā ŋ́. É gē nwū ācɛ kéē lɛyí táajɛ lɛ íne nēé wɛ ákú um ŋ́.”

8Aá leyí gwo íne kú Ɔwɔicō bónū, anɔ́ɔ aá gē lɛyí táajɛ lɛ ɔdā nɛ̄ ācɛ nwū ā.”

9Anɔ́ɔ Ujísɔ̄si klla da uwá kahíníī, “Aá jé ɔwɛ olɔhi nɛ̄ aá gáā lɛ íne kú Ɔwɔicō tū ŋ́, o yá ɛ́ɛ́ kú aá lɛ abɔ̄ bī ɔdā nɛ̄ aá gē nwū ā. 10#Oyɛb 20.12; Obla 5.16; Oyɛb 21.17; Ulīf 20.9Ohígbū ka Umósīsi je ɔ́da ka, ‘Aá lɛ ojīlīmā ce ádā aá mɛ́mla ɛ́nɛ́ aá’, amáŋ ɔ́dāŋ ka ‘Ɔ̄cɛ dúúmā lɛ okónu tá lɛ ádā ámāŋ ka ɛ́nɛ́ nū, kéē lɛ ɔ̄cɛ ɔ́ɔmā ŋmó.’ 11Amáŋ aá gē nwū ka ɔ́dāŋ ka ɔ̄cɛ lɛ ɔdā nɛ̄ ó géē bī le tá ádā ámāŋ ɛ́nɛ́ nū abɔ̄, amáŋ anɔ́ɔ ó klla ka, anúɔ lɛ okónu ce ka anúɔ géē je ɛ̄nyā lɛ Ɔwɔicō mɛ́ɛnɛ, 12cɛ́ɛ́ aá lɛ ɛga je lɛ ɔ́ kóō híī tá ádā mla ɛ́nɛ́ nū abɔ̄ gɛ ŋ́. 13Ɔwɛ ɛ́gɛ́nyā, íne nɛ̄ aá kpó tá ācɛ abɔ̄ ā, lɛ ɛlɔ̄ɔwɔicō yá kóō tīile gɛ ŋ́. Ó kē lɛ aɔ́dā obɔ̄bí ɔhá alɛwa ɛ́gɛ́nyā nɛ̄ aá gē yá.”

Aɔ́dā nēe gē cɛ̄ lɛ ɔ̄cɛ bīya íne kú Ɔwɔicō ā

(Umát 15.10-20)

14Anɔ́ɔ Ujísɔ̄si lɛ ɛwa kú ācɛ ā hīgwú wā ɛgiyí nū kpɔ́, anɔ́ɔ ó da uwá kahíníī, “Aá jāāhɔ gā um, odúúdú aá, cɛ́ɛ́ kú aá lɛ ɔdā nɛ̄ n gbɛlá ā jé. 15Ó lɛ ɔdā dúúmā nōo ŋmá ɛcɛ yɛ ga ipú kú ɔ̄cɛ nōo lɔfú je ɔ̄ tēelihɔ kóō híī lɔfú gbō Ɔwɔicō ɛ̄gbā glá ŋ́. Ikɔkɔ ɔ́ɔmā ɔdā nōo ī bɛ̄cɛ ŋmá ipú kú ɔ̄cɛ ā gē yá kú ɔ̄cɛ kóō je teelihɔ kóō lɔfú gbō Ɔwɔicō ɛ̄gbā glá ŋ́ má. 16Ɔ̄cɛ dúúmā nōo lɛ ahɔ̄ ō pó ɛlā, kóō pó.” 17Eko nɛ̄ ó nyɛ̄ɛ̄ ŋmá ipú ɛwa le tá ipú inu ā, anɔ́ɔ ayíkpó kú nū da ɔ́ kóō lɛyí kú ācīije nɛ̄ ó tá ā ka lɛ uwá. 18Ujísɔ̄si da uwá kahíníī, “Aá ā í kōō jé ɔdā dúú ŋ́ bɛ̄ɛka ācɛ ɔhá ā dúú nɛɛ? Ó lɛ ɔdā dúú nōo ŋmá ɛcɛ ga ipú kú ɔ̄cɛ nōo lɔfú je ɔ̄cɛ ɔ́ɔmā tēelihɔ glá ŋ́. 19Ohígbū koó bēé ga ipú ɔtū kú nū ŋ́. Amáŋ ipú úklo nōó nyɔ̄ á. Anɔ́ɔ ó klla ŋmá abɔ́ɔ le bɛ̄cɛ ŋmá iyē á.” (O ŋmá ɛlā nyā, Ujísɔ̄si yɔ̄ gē ka tɛ́ɛcɛ ka ɔ̄cɛ lɔfú lé ɔdōlé dóódu glá.) 20Ó klla kahíníī, “Ɔdā nōo ī ŋmá ipú kú ɔ̄cɛ wɛ̄ɛcɛ ā ī je ɔ̄cɛ ɔ́ɔmā tēelihɔ á. 21Ohígbū ka oŋmá ipú kú ɔ̄cɛ, o ŋmá ipú odo kú ɔ̄cɛ, nɛ̄ ɛlá obɔ̄bí dóódu nōo gē cɛ̄ lɛ ɔ̄cɛ gē yá ɔdōbɔ̄bí ā gē ŋmá á. Éjulúgwu ō hɛ́, ācɛ ō ŋmó, 22mla ikpɔ́nyā nɛ̄ ācɛ gē cē, eyī ōkwu ɔdā ācɛ, ɛdɔ kú odōbɔ̄bí dóódu nɛ̄ ācɛ gē yá, ɛ̄kɛ̄mgbɛ̄ ō kā bī ācɛ ɔhá iyē, ɔbɔ́ōcɛ nɛ̄ ācɛ í ya, ɔdā kú olila nɛ̄ ācɛ í yá ā, 23odúúdú aódōbɔ̄bí nēe bá āa ī bɛ̄cɛ ŋmá eyīpú kú ɔ̄cɛ. Anú gē je ɔ̄cɛ tēelihɔ á.”

Ujísɔ̄si lɛ ɔyínɔ̄nyā kú ɔnya ílɔ́wa éyi hɛ́tá

(Umát 15.21-28)

24Ujísɔ̄si nyɛ̄ɛ̄ ŋmá abɔ́ɔ, anɔ́ɔ ó le yɛ tá ajɛ nōo yɔ̄ kwu igelī nɛ̄ŋcɛ́ kú Utáya ajaajɛ āá. Ó le bēé tá ipú inu éyi, anɔ́ɔ o kē tíne kú ɔ̄cɛ dúú kóō jé ka anúɔ yɔ̄ abɔ́ɔ ŋ́, amáŋ ó kē otayínū ɛga dóódu glá ŋ́. 25Ɔnyā éyi nɛ̄ ɔyínɔ̄nyā kú ɔlɛ́ nū lɛ alelékwū obɔ̄bí ā, lɛ ɔ̄kā pó lɛyíkwu Ujísɔ̄si. Anɔ́ɔ ó gā gaá lɛ okwúukwú kpó tāajɛ iyɔ̄bū nu bōōbū. 26Ɔnyā ā wɛ ílɔ́wá, nēé ma ajɛ kú Ufinísīya kú Usiríya. Ó gbɔ̄ɔkɔ lɛ Ujísɔ̄si kóō lɛ alelékwū obɔ̄bí ā nū tɛ́ɛcɛ ŋmá ipú iyē kú ɔyínɔ̄nyā kú ɔlɛ́ nū. 27Anɔ́ɔ Ujísɔ̄si tóohi kahíníī, “Ālɔ̄ lɛ ɔdōlé je lɛ ayípɛ̄ ā kéē lé gbɔbū ɛ́ɛ́. Ó lɔhi kú alɔ je ɔdōlé kú ayípɛ̄ tɛ́cɔ̄ gé lɛ aéwo ŋ́.” 28Ɔnyā ā tá ɔ̄ ohi ka, “Óndú um, amáŋ aéwo nēe bá ɛháajɛ itéblu kē ī lé iwilli kú ɔdōlé kú ayípɛ̄ ā dúú!” 29Anɔ́ɔ Ujísɔ̄si da ɔ́ ka, ohígbū ohi nɔ́ɔ tá ɔ́ɔmā, ká ɔ̄ kwúcē ga ɔlɛ́, ɔ́ɔ géē má ka alelékwū obɔ̄bí ā le bɛ̄cɛ ŋmá ipú iyē kú ɔyí nū ɛɛ́. 30Anɔ́ɔ ɔnyā ā kwúcē le tá ɔlɛ́ nū á. Ó le ɔyí nū má gwutá agōdō, alelékwū obɔ̄bí ā nyɛ̄ɛ̄ ŋmá ɔɔ́ iyē ɔkwɛ̄yi.

Ujísɔ̄si lɛ ɔ̄cɛ odahɔ̄ mla okónu hɛ́tá

31Ujísɔ̄si nyɛ̄ɛ̄ ŋmá ajɛ kú Utáya, anɔ́ɔ ó le bū ipú Usídɔn, bū ipú ajɛ kú aɔ́lɛ́ igwó, anɔ́ɔ ó le yɛ tá óókpóo kú Ugálīli á. 32Ācɛ ōhī lɛ ɔ̄cɛ odahɔ̄ nɛ̄ ó klla kɛlā glá ŋ́ bī gé lɛ Ujísɔ̄si, anɔ́ɔ é gbɔ̄ɔkɔ lɛ ɔ́ kóō lɛ ɔ́ hɛ́tá. 33Ujísɔ̄si kwu ɔ̄cɛ ā ú ōfōōfūnū gɛcɛ ŋmá ɛgiyí ójīla, anɔ́ɔ ó kwú ayíkābɔ̄ ú wu ɔ́ ahɔ̄, ó lɛ ahɛ tá tū ayíkābɔ̄ anɔ́ɔ ó kwú ɔ̄ ú kwú ɔnyīlɔ ā ígblɛ́nyī á. 34Ujísɔ̄si je eyī gicō má ɔkpáncō lɛ owuhīlatá, anɔ́ɔ ó kahíníī, “Efufáta” nɛ̄ ɛyí nū wɛ, “Le nwūla!” 35Ɔkwɔɔkwu ɔ́ɔmā ɔ̄cɛ ā gbɔɔ́ ō páhɔ̄. Ɔdā nōo gwū ɔ̄ okónu ā le fu, anɔ́ɔ ó gbɔɔ́ ō kɛlā gēdēē á. 36Ujísɔ̄si le ācɛ ā ahɔ̄ pi kéē híī da ɔ̄cɛ dúúmā ɔdā nōo yá ā ŋ́, amáŋ eko dóódu nɛ̄ ó ī ka lɛ ā, ācɛ gē ka ɔdā nɛ̄ ó yá tɛ́ɛcɛ kpɔ́. 37Anɔ́ɔ odúúdú ācɛ nēe pó ɛlā nyā le kpó hídáagó nɛ̄ɛ̄nɛ̄hi. É klla kahíníī, “Ó gē yá ɔdā dóódu kú nū lɔhi. Ó kōō lɛ odahɔ̄ yá kóō páhɔ̄, ó klla lɛ odokónu yá kóō kɛlā dúú.”

Currently Selected:

UMÁKI 7: IFBCL

Highlight

Copy