UMÁKI 9

1Anɔ́ɔ ó da uwá kahíníī, “N yá kú aá le jé ka, ó lɛ ācɛ ōhī nēe bá amānyā nēé gáā kwú ŋ́ jāā gbéeko nēé lɛ ajɔ̄ɔ̄cɛ́ kú Ɔwɔicō mla ɔfú kú nū má.”

Oōpīyabɔhá kú Ujísɔ̄si

(Umát 17.1-13; Ulúk 9.28-36)

2 # 2 Upít 1.17,18 Ɛplá eko nɛ̄ ɛ̄cī ɛhīlī le gla ā, Ujísɔ̄si kwu Upíta mla Ujémīsi mɛ́mla Ujɔ́ni ú, le yɛ tá ɛfu olicō éyi, ɛga nēé bá ofōōfūwā cíí. Abɔ̄ é bá abɔ́ɔ ā, iyē kú Ujísɔ̄si kwú pīyabɔ̄ ipéeyī uwā, 3anɔ́ɔ úwé kú nū kwú pīya ɛnɛ̄hɛ́ gbɔɔ́ ō ceyī ŋmaáŋmaá, tɛ́ɛ́hɛ́ ɛ́gɛ́nɛ̄ ɔ̄cɛ dúú í lɔfú na ɔ́ tɛ́ɛ́hɛ́ lɛ ā glá ŋ́ mā. 4Anɔ́ɔ ayíkpó ɛtá ā má Ɛláyíja mla Umósīsi yɔ̄ ī kɛlā mla Ujísɔ̄si. 5Anɔ́ɔ Upíta da Ujísɔ̄si kahíníī, “Itíca, ó lɔhi abɔ̄ nɛ̄ alɔ bá amānyā a! Ālɔ̄ géē ce áklɔ̄kpɛ ɛtá, éyi wɛ ákú uwɔ, éyi wɛ ákú Umósīsi anɔ́ɔ ɔhá wɛ ákú Ɛláyíja.” 6Ó jé ɔdā nɛ̄ ó yɔ̄ ī ka ā ŋ́, ohígbū ka ufi yá anú mla ācɛ ohile ɛpa ā nɛ̄ɛ̄nɛ̄hi. 7#Umát 3.17; Umák 1.11; Ulúk 3.22Anɔ́ɔ ojuja gā gaá klá uwá á, anɔ́ɔ é pó ɔkɔ ŋmá ipú ojuja ā kahíníī, “Ɛ̄nyā wɛ ɔyínɔnyīlɔ kú um nōo he um ɔtū nɛ̄hi, aá jāhɔ̄ lɛ ɔ́.” 8Anɔ́ɔ igbeékpónú, é pīyeyī yɛjīla, amáŋ é má ɔ̄cɛ ɔhá dúúmā gɛ ŋ́, Ujísɔ̄si ōfōōfūnū yɔ̄ mla uwá mɛ́ɛ̄ á.

9Abɔ̄ é gāajɛ ŋmá ɛyí ɛfu ā, Ujísɔ̄si le ɔ́da je lɛ uwá kahíníī, “Aá da ɔ̄cɛ dúúmā ɔdā nɛ̄ aá má nyā ŋ́, jāā gbéeko nēé kwú ɔyínɔnyīlɔ kú ɔ̄cɛ ú héyī ŋmá ɔlékwū.” 10Anɔ́ɔ é bī ɛlā ā ɔtū, amáŋ igbo alɛwa é ge miya ɛlā ā mla iyī uwā gē kahíníī, “Ɔdí wɛ ɛyí kú o héyī ŋmá ɔlékwū nyā ā?” 11#Umál 4.5; Umát 11.14É lɛ ɔ̄kā da Ujísɔ̄si ka, ɔdíyá nɛ̄ aítíca kú íne ā gē ka ka Ɛláyíja ɔ́ɔ géē wā gbɔbū ɛ́ɛ́ kú ohɔ́nyɛtá kóō wā ā?” 12Ó tá uwā ohi kahíníī, “Ɛláyíja géē wā ɔkwɔ̄ɔ̄kwɛyi gbɔbū, o yá ɛ́ɛ́ kóō lɛ ɛjɛ̄ɛ̄jī ɔdā dóódu tútū. Nááná ɔdíya nɛ̄ ɛlɔ̄ɔwɔicō ka ka Ɔyínɔnyīlɔ kú Ɔ̄cɛ géē móōwē nɛ̄hi, ācɛ kē í tá ɛlā nū ā? 13Ká n̄ da aá, Ɛláyíja gā gbɔbū ɛɛ́, é kē yá ɔ̄ ōwē nɛ̄ɛ̄nɛ̄hi ɛ́gɛ́nɛ̄ ɛlɔ̄ɔwɔicō tɛtɛ ka tɛ́ɛcɛ lɛ ā.”

Ujísɔ̄si lɛ ɔyípɛ̄nɔ̄nyīlɔ o lɛ alelékwū obɔ̄bí éyi hɛ́tá

(Umát 17.14-21; Ulúk 9.37-43)

14Eko nēe gaá tá ayíkpó ohile ā, é má ɛwa nɛ̄hi le jīla tū uwa biílí. Anɔ́ɔ aítíca kú íne ōhī kē bá yɔ̄ ī táafú mla uwá. 15Eko nɛ̄ ācɛ ā lɛ Ujísɔ̄si má ā, é le hídáagó nɛ̄ɛ̄nɛ̄hi, anɔ́ɔ é lɛ inya kwu gā ɛgiyí nū gaá lɛ okónu hɛ́ tū ɔ̄. 16Ujísɔ̄si da ayíkpó kú nū ɔ̄kā ka ɔdí nɛ́ɛ bá yɔ̄ ī táafú mla uwá lɛyíkwu ɔ́ ā?

17Ɔ̄cɛ éyi ŋmá ipú ɛwa ā tóohi kahíníī, “Itíca, n bī ɔyínɔnyīlɔ kú um gé lɛ uwɔ, ohígbū ka ó lɛ alelékwū obɔ̄bí nōó cɛ̄ lɛ ɔ́ kɛlā glá ŋ́. 18Eko dúúmā nɛ̄ alelékwū ā lɛ ɔ́ kwú nɛɛ, ó gē lɛ ɔ́ fíyaajɛ, cɛ́ɛ́ okónu kú nū gē cūūwū. Ó gē hīla ayīnu, cɛ́ɛ́ iyē kú nū gē ŋmó cikɔ́ɔ́. N da ayíkpó kú uwɔ kéē lɛ alelékwū obɔ̄bí ā nū tɛ́ɛcɛ, amáŋ é nū ɔ̄ glá ŋ́.”

19Ujísɔ̄si da uwá kahíníī, “Aá wɛ ācɛ nēé lɛ ɔtōōce ŋ́! Eko nyá nɛ̄ n géē yɔ̄ mla aá gaá kwu ā? Eko nyá nɛ̄ n géē cībū aá gáā kwu ā? Lɛ ɔyínɔnyīlɔ kú uwɔ ā bī gé um!” 20É lɛ ɔ́ bī gé lɛ Ujísɔ̄si ā. Abɔ̄ alelékwū obɔ̄bí ā lɛ Ujísɔ̄si má ā, ɔkwɔɔkwu ɔ́ɔmā ó cɛ̄ lɛ ɔyínɔnyīlɔ ā gbɔɔ́ ō fīyégbúlú, cɛ́ɛ́ ó fīyaajɛ gbɔɔ́ ō miyaajɛ, ūwū gbɔɔ́ ō cē ɔ̄ okónu. 21Ujísɔ̄si da ádā nū ɔ̄kā kahíníī, “Eko nyá nɛ̄ ó yɔ̄ lɛ ā ŋmá yɔ̄ ā?” Ádā nū tóohi ka oŋmífī nɔ́ɔ wɛ ɔyípɛ̄nɛ̄ŋ́cɛ́ ā. 22Ádā nū klla yɔ̄ ī kɛlā lɛ Ujísɔ̄si gɔbū kpɔ́ kahíníī, “Igbɛ alɛwa alelékwū obɔ̄bí ā gē tū ɔ́ ga ipú ɔlá mɛ́mla ipú éŋkpɔ̄, o yá ɛ́ɛ́ kóō lɛ ɔ́ ŋmó. Méyīnyinyi alɔ, tá alɔ abɔ̄, ɔ́dāŋ koó tū uwɔ ɔtɛ́!”

23Ujísɔ̄si ka, Īī, ɔ́dāŋ́ nɛ̄ ó tá awɔ abɔ̄yī uwɔ ɔtɛ́! Ɛjɛ̄ɛ̄jī ɔdā dóódu gē tɔ́ɔtɛ́ lɛ ācɛ nēe lɛ ɔtōōce ā.”

24Anɔ́ɔ ádā ɔyí ā dɛ̄gba tɛ́ɛcɛ igbeékpónú kahíníī, “N cɛ̄, amáŋ ó nwuné jɛ̄ ŋ́. Tá um abɔ̄ ká n̄ cɛ̄ fíyɛ́!”

25Ujísɔ̄si le má ka ɛwa kú ācɛ ā yɔ̄ ī pɛ́ wā gáā yɛ jīla ɔ́ tá, anɔ́ɔ ó lɛ ɔ́da je lɛ alelékwū obɔ̄bí ā kahíníī, “Aá nēe wɛ alelékwū obɔ̄bí odahɔ̄ mla odokónu ā, n je ɔ́da lɛ aá kú aá le pɛ́bɛ̄cɛ ŋmá ipú iyē kú ɔyínɔnyīlɔ nyā ká aá híī kwúcē ga ipú iyē kú nū gbóógbóō gɛ ŋ́!”

26Anɔ́ɔ alelékwū obɔ̄bí ā lɛ ɛgba dɛ̄, cɛ̄ lɛ ɔyí ā kóō fīyégbúlú kpákpá, anɔ́ɔ ó gā ɛcɛ ŋmá iyē kú nū á. Ɔyínɔnyīlɔ ā gwutá ajɛ bɛ̄ɛka okwū ā, anɔ́ɔ ɛjɛ̄ɛ̄jī ācɛ gbɛlá kɔ́ɔ̄ gekwú ɛɛ́. 27Amáŋ Ujísɔ̄si lɛ abɔ̄ bī ɔ̄ abɔ̄lɔ́na kwú ɔ̄ ú je gicō ŋmá ajɛ, anɔ́ɔ ó māháyi icō á.

28Ɛpláko nɛ̄ Ujísɔ̄si le tá ipú inu ā, ayíkpó kú nū lɛ ɔ̄kā da ɔ́ wɛɛlɛ kahíníī, “Ɔdíyá nɛ̄ alɔ í nū alelékwū obɔ̄bí ɔ́ɔmā tɛ́ɛcɛ glá ŋ́ mā?”

29Ujísɔ̄si da uwá kahíníī, “Ɔkɔ ō gbā lɛ Ɔwɔicō mla okónu ō gwū ōfōōfūnū lɔfú nū alelékwū obɔ̄bí ɛ́gɛ́nyā tɛ́ɛcɛ glá á.”

Ujísɔ̄si klla le ɛlā ka lɛyíkwu ikwū kú nū kpɔ́

(Umát 17.22,23; Ulúk 9.43)

30Ujísɔ̄si mla ayíkpó kú nū nyɛ̄ɛ̄ ŋmá abɔ́ɔ, anɔ́ɔ é le bū ipú Ugálīli. Ó dɔɔ̄kā kú ācɛ ɔhá dúú kéē jé ɛga nɛ̄ ó yɔ̄ ā ŋ́, 31ohígbū ka ó yɔ̄ ī nwū ayíkpó kú nū ɛlā. Anɔ́ɔ ó da uwá kahíníī, “Ācɛ géē yá ibīyājɛ tū Ɔyínɔnyīlɔ kú Ɔ̄cɛ, é kē í ŋmó ɔ̄. Ɛ̄cī ɔ́mɛtá le gla ó géē héyī ŋmá ɔlékwū.”

32Amáŋ ayíkpó kú nū í jɛ́ɛyí kú ɔdā nɛ̄ ó nwū ɔ́ɔmā ŋ́, ufi nōo yá uwā ā í kē cɛ̄ lɛ uwá da ɔ́ ɔ̄kā ŋ́.

Ɔ̄nyɛ cɛgbá fíyɛ́ dúú ā?

(Umát 18.1-5; Ulúk 9.46-48)

33É gā Ukapánɔm, ɛplá nɛ̄ ó le tá ipú inu ā, Ujísɔ̄si lɛ ɔ̄kā da ayíkpó kú nū ɔdā nēé yɔ̄ gē táafú nū ŋmá ɔwɔɔwɛ ā. 34#Ulúk 22.24Amáŋ é tá ɔ̄ ohi ŋ́, ohígbū kēé bá gē táafu mla iyī uwā ɔwɛ lɛyíkwu ɔ̄cɛ nōo cɛgbá fíyɛ́ dúú ipú uwā ā. 35#Umát 20.26,27; 23.11; Umák 10.43,44; Ulúk 22.26Ujísɔ̄si má cīce, anɔ́ɔ ó lɛ ayíkpó igwɛ́ɛpa ā hīgwú, anɔ́ɔ ó da uwá kahíníī, “Ɔ̄cɛ dúúmā nōo dɔɔ̄kā ō wɛ ɔ̄cɛ o cɛgbá fíyɛ́ dúú, cíkā ō kwú iyī nū ú pīya ɔ̄cɛ nɛ̄ ó cɛgbá ŋ́, fíyɛ́ dúú ā, cɛ́ɛ́ ó kwú pīya ɔ̄cɛ nōo ī cɛ̄ odúúdú ācɛ ɛhɔ̄.” 36Anɔ́ɔ ó kwú ɔyípɛ̄ éyi ú gaá háyi ɔtāhɛ̄ uwā. Ó kwú ɔyí ā ū ce abɔ̄ anɔ́ɔ ó da uwá ka, 37#Umát 10.40; Ulúk 10.16; Ujɔ́n 13.20Ɔ̄cɛ dúúmā nōo mīyɛ éyi kú ayí nēe bá nyā iyē kú um, kē mīyɛ um dúú. Ɔ̄cɛ dúúmā nōo kē mīyɛ um, ó wɛ ami ofōōfū um nōó mīyɛ ā ŋ́, amáŋ ó mīyɛ ɔ̄cɛ nōo tū um ɛhɔ̄ ā dúú.”

Ɔ̄cɛ dúúmā nōó wɛ olɛlā kú alɔ ŋ́ wɛ ɔya kú alɔ

(Ulúk 9.49,50)

38Ujɔ́ni da ɔ́ kahíníī, “itíca, alɔ má ɔ̄cɛ éyi nōo bī iyē kú uwɔ yɔ̄ gē le nū alelékwū tɛ́ɛcɛ, alɔ da ɔ́ kóō mā ohígbū ka ó wɛ éyi kú alɔ ŋ́.” 39Ujísɔ̄si da uwá kéē híī ci uwá ŋ́, ohígbū ka ó lɛ ɔ̄cɛ dúú nōo bī iyē kú anúɔ le yúklɔ́ o hídáagó nɛ̄ ɔkwɔɔkwu ɔ́ɔmā nɛ̄ ó klla gbɔɔ́ ō ka ɔdōbɔ̄bí lɛyíkwu anúɔ glá ŋ́. 40#Umát 12.30; Ulúk 11.23 Ujísɔ̄si klla kɛlā gɔbū kpɔ́ ka, ohígbū ka ɔ̄cɛ dúúmā nɔ́ɔ wɛ olɛlā kú aá ŋ́, kē wɛ ɔya kú aá. 41#Umát 10.42 Ó klla kahíníī, “Ɔkwɔ̄ɔ̄kwɛ̄yi, n̄ da aá ka ɔ̄cɛ nōo lɛ éŋkpɔ̄ je lɛ aá gwá ohígbū ka aá gē tá Ohɔ́nyɛtá ɔkwu, Ɔwɔicō géē gbā ulé nū lɛ ɔ́.”

Ɔdā nōo gē jé ɔ̄cɛ má kóō bīya íne ā

(Umát 18.6-9; Ulúk 17.1,2)

42Ó kē yɔ̄ ī kɛlā kpɔ́ kahíníī, “Ɔ́dāŋ́ ka ɔ̄cɛ dúúmā le yá kú éyi kú ayípɛ̄nɛ̄ŋcɛ́ nēe bá nyā kéē cɛ̄ɛ̄lā kú um gɛ ŋ́, ó géē lɔhi lɛ ɔ̄cɛ ɔ́ɔmā fíyɛ́ ɔ́dāŋ keé lɛ ígbɛ́cɔ̄ gbo bá ɔ́ ɔkɔ cɛ́ɛ́ é kwú ɔ̄ ú tá tū ipú ísu. 43-44#Umát 5.30 Ohígbū ɔ́ɔmā, ɔ́dāŋ ka abɔ̄ kú uwɔ í cɛ̄ gā awɔ cɛ̄ɛ̄lā Ɔwɔicō gɛ ŋ́ má nɛ, lɛ ɔ́ hɛ́ tónū! Ó í lɔhi gā awɔ fíyɛ́ ká ā le tá ajɔ̄ɔ̄cɛ́ kú Ɔwɔicō ɛga nāa géē lɛ oyēeyī opiyóó mla abɔ̄ éyi ikɔkɔ nāa géē bī abɔ̄ ɛplɛ́ɛpa ga ipú ɔlá íkɔtɔ, ipú ɔlá nōo gē nyí ŋ́ mā ā. 45-46Ɔ́dāŋ́ ka ikpó kú uwɔ ī yá ká ā cɛ̄ɛ̄lā Ɔwɔicō gɛ ŋ́ má nɛɛ, lɛ ɔ́ hɛ́ tónū! Ó lɔhi gā awɔ fíyɛ́ ká ā le tá ajɔ̄ɔ̄cɛ́ ɛga nāa géē lɛ oyēeyī opiyóó mla ikpó éyi ikɔkɔ nāa géē bī ikpó ɛplɛ́ɛpa gā ipú ɔlá ikɔtɔ ā. 47#Umát 5.29Ɔ́dāŋ́ ka ikpēyī kú uwɔ í cɛ̄ gā awɔ cɛ̄ɛ̄lā Ɔwɔicō gɛ ŋ́, lɛ ɔ́ wú tónū! O lɔhi ga awɔ fíyɛ́ ká ā le tá ajɔ̄ɔ̄cɛ́ ɛga nāa géē lɛ oyēeyī opiyóó mla ikpēyī ékpó, ikɔkɔ nāa géē bī ikpēyī ɛplɛ́ɛpa, cɛ́ɛ́ é kwú uwɔ ú tɛ́ɛcɛ ga ipú ɔlá ā. 48#Ayis 66.24Abɔ́ɔ ā, ɛkɔ̄ nēe gē lé ɛbɛ́ uwá ā í gē kwú ŋ́, ɔlá nōo gē yi uwá ā í kē gē nyí ŋ́.”

49É géē bī ɔlá le na ɔ̄cɛ dóódu yēŋēē ɛ́gɛ́nɛ̄ é gē bī ɔmā le yá ɛbɛ́ nēé le gwɛ́ɛya kóō le yēŋēē ā. 50#Umát 5.13; Ulúk 14.34,35 Ɔmā lɛ ɔhi, amáŋ ɔ́dāŋ nɛ̄ ɔmā í lɔnyɛ gɛ ŋ́, á gáā yá ɔ̄ kóō lɔnyɛ glá ŋ́. “Aá lɔnyɛ tū iyī aá bɛ̄ɛka ɔmā ā, aá bá ɛbɔ́ mla iyī aá.”

Currently Selected:

UMÁKI 9: IFBCL

Highlight

Copy