UJƆ́NI 16

1Ujísɔ̄si klla da uwá kpɔ́ kahíníī, “N lɛ ɔdā nēe bá ā kpó ka lɛ aá cɛ́ɛ́ kú aá híī kwúcē ŋmá o cɛ̄ ɛlɔ̄ɔwɔicō ŋ́. 2É géē nū aá tɛ́ɛcɛ ŋmá Ɛgogbɔ̄ɔkɔ, amáŋ eko gē wā, eko nɛ̄ ɔ̄cɛ dúúmā nōo lɛ aá ŋmó géē gbɛlá ka anúɔ yɔ̄ ī cɛ̄ Ɔwɔicō ɛhɔ̄. 3É géē yá ɔdā nēe bá ā ohígbū kéē jé Ádā ā ŋ́ ɛ́ɛ́ nēe kē í jé um ŋ́. 4Amáŋ n le aɔ́dā nēe bá ā kpó da aá, cɛ́ɛ́ eko nɛ̄ eko le yá, aá géē bla ka n kɛlā lɛ aá lɛyíkwu uwā.

Ń da aá ɔdā nēe bá ā ŋmá aflɛ́yí ŋ́ ohígbū ka n yɔ̄ mla aá. 5Amáŋ abālɔbányā n gē nyɔ̄ ɛgiyí ɔ̄cɛ nōo tū um ɛhɔ̄ ā, ɔ̄cɛ dúú kú ipú aá í kē da um ɔ̄kā ka, ‘Iní nāa gē nyɔ̄ ŋ́?’ 6Abɔ̄ n le da aá ā, ɔtū le bīya lɛ aá. 7Amáŋ n̄ da aá ɛlā ɔkwɛ̄yi, ó géē tū ile lɛ aá ká n̄ nyɛ̄ɛ̄, ohígbū ka ɔ́dāŋ ka ń nyɛ̄ɛ̄ ŋ́, otɔ́tūlé ā í gáā wā ɛgiyí aá ŋ́. Amáŋ ɔ́dāŋ́ ka n le yɛ, n géē tū ɔ̄ ɛhɔ̄ fu aá. 8Eko nɛ̄ ó gā, ó géē mafú lɛ ācɛ kú ɛcɛ ka é jé ɔdā dúú lɛyíkwu ínoōbīya ŋ́, é klla jé ɔdā dúú lɛyíkwu ɔdā nōo le kpaakpa ŋ́, ɛ́ɛ́ nēé ī jé ɔdā dúú lɛyíkwu ɛpɔ̄ nɛ̄ Ɔwɔicō gē hɛ́ ā ŋ́. 9É le ɛpɔ̄bí kú íne ō bīya ā lé, ohígbū ka é cɛ̄ɛ̄lā kú um ŋ́. 10É jé ɔdā dúú lɛyíkwu ɔdā olɔhi ō yá ŋ́ ohígbū ka n yɔ̄ ī nyɔ̄ ga ɛgiyí Ádā um, aá kē gáā má um glá gɛ ŋ́, 11ákú ɛpɔ̄, é jé ɔdā dúú lɛyíkwu ɛpɔ̄ nēé ī ka ā ŋ́ ohígbū kéē lɛ ɛpɔ̄ ka tū otrɛ̄yí kú ɛcɛ nyā kwɛyí ɛɛ́.

12N lɛ ɔdā alɛwa nɛ̄ n géē da aá kpɔ́ ɛ́ɛ́, amáŋ aá gáā bī uwā glá ɛ́ɛ́ ŋ́. 13Eko nɛ̄ Alelékwū kú ɛlā ɔkwɛ̄yi ā gā, ó géē bī aá tá ga ipú ɛlā ɔkwɛ̄yi dóódu. Ohígbū ka, ó gáā kɛlā ŋmá ɔfú kú abɔ̄yī nū ŋ́, amáŋ ɔdā dóódu nōó pó, nōó géē ka á, ó klla géē da aá aɔ́dā nēe gē wā ā. 14Ó géē mafú ka n wɛ idáagó ohígbū kóō géē da aá ɔdā dúú nōó í pó ŋmá ɛgiyí um ā. 15Ɔdā dóódu nɛ̄ Ádā um lɛ ā wɛ ákú um, ohígbū ɔ́ɔmā nɛ̄ n ka, ‘Ó géē da aá ɔdā nɛ̄ ó í pó ŋmá ɛgiyí um ā á.’

Ɔtūnōbí géē je pīya ɔtū nɛ̄hɛ̄

16“Eko kpií ā, aá gáā má um gɛ ŋ́, eko kpií ɔhá kpɔ́, aá géē má um.” 17Aóhī kú ayíkpó kú nū da iyī uwā kahíníī, “Ɔdí wɛ ɔdā nyā nɛ̄ ó gē da alɔ ā mɛ́ɛ̄? ‘Eko kpií ā, aá gáā má um gɛ ŋ́, igbɔhá, eko kpií, aá géē má um, ohígbū ka n gē nyɔ̄ ɛgiyí Ádā.?” 18Ohígbū ɔ́ɔmā é kahíníī, “Ɔdí wɛ ɛyí eko kpií nyā ā? Alɔ í jɛ́yí ɔdā nɛ̄ ó ka ā ŋ́.” 19Ujísɔ̄si jé kéē ī tíne kéē da ɔ́ ɔ̄kā, anɔ́ɔ ó da uwá kahíníī, “Aá bā gē leyī yī ɛlā nɛ̄ n ka ka eko kpií aá gáā má um gɛ ŋ́, eko kpií aá kē í má um kpɔ́ ā. 20Ɔkwɔ̄ɔ̄kwɛ̄yi, n̄ da aá ka, aá géē jikwū, klla géē tɛgíkwū, amáŋ ɛcɛ ā géē gwéeyē. Aá géē bá ipɔ́tū nōbí, amáŋ ɔtūnōbí kú aá géē je pīya ɔtū nɛ̄hɛ́. 21Eko nɛ̄ ɔnyā gáā ma ɔyí, ó gē jé ɔnɔ ohígbū ka eko nōó gē jɔ́ɔnɔ ā gā ɛɛ́. Amáŋ eko nɛ̄ ó lɛ ɔyí ma, ó klla blakwu ɔnɔ kú nū gɛ ŋ́, ohígbū éeyē kú ɔyí nɛ̄ ó ma wɛ̄ɛcɛ ā. 22Ɛ́gɔ́ɔmā nɛ̄ ó lɛ abālɔbányā lɛ aá á, aá yɔ̄ ī yá ɔtū nōbí, amáŋ n géē má aá igbɔhá ɛ́ɛ́, ɔtū klla géē he aá. Cɛ́ɛ́, ɔ̄cɛ dúúmā í gáā je éeyē kú aá ŋmá ɛgiyí aá glá gɛ ŋ́. 23Ɛ̄cī ɔ́ɔmā aá gáā da um ɔ̄kā dúúmā ŋ́. Ɔkwɔ̄ɔ̄kwɛ̄yi, n̄ da aá ka, ɔdā dóódu nɛ̄ aá dɔɔ̄kā ŋmá ɛgiyí Ádā ā, ó géē je lɛ aá ŋmá iyē kú um. #Ádā ā géē je lɛ aá ɔdā dúúmā nɛ̄ aá ba ɔ́ iyē kú um, aɔ́kpá ōhī ka, ɔ́dāŋ ka aá ba Ádā a ɔdā dóódu, ó géē je lɛ aá ŋmá iyē kú um. 24Gbɔbū lɛ abālɔbányā, aá dɔɔ̄kā ɔdā dúúmā ŋmá lɛ iyē kú um ŋ́. Aá dɔɔ̄kā, aá géē mīyɛ, ká éeyē kú aá kóō le mu.”

Oyá ɛcɛ lé

25Ujísɔ̄si kɛlā gɔbū kahíníī, “N bī ācīije le da aá aɔ́dā nēe bá ā, amáŋ eko gē wā, nɛ̄ ń gáā kɛlā lɛ aá ipú ācīije gɛ ŋ́, amáŋ n géē da aá ɛlā lɛyíkwu Ádā ā pélúú. 26Eko nɛ̄ ɛ̄cī ɔ́ɔmā aá gā, aá géē da ɔ́ ɔ̄kā o ŋmá lɛ iyē kú um, n da aá ka ń gáā da Ádā ā ɔ̄kā kwɛyí aá ŋ́, 27ohígbū ka Ádā ā abɔ̄yī nū yíihɔtū tū aá. Ó yíihɔtū tá aá ohígbū ka aá yíihɔtū tū um, aá klla cɛ̄ ka n ŋmá ɛgiyí anú nōo wɛ Ɔwɔicō ā. 28N ŋmá ɛgiyí Ádā ā wɛ̄ɛcɛ, abālɔbányā n yɔ̄ ī nyɛ̄ɛ̄ ŋmá ɛcɛ ā ī nyɔ̄ ɛgiyí Ádā ā.”

29Ayíkpó kú nū kahíníī, “Má ɔ̄, abālɔbányā a gē kɛlā pélúú, nɛ̄ ó kē wɛ ācīije gɛ ŋ́. 30Abālɔbányā alɔ jé ka a jé ɔdā dóódu, ó kē cɛgbá nɛ̄ ɔ̄cɛ dúúmā gē da uwɔ ɔ̄kā ɔdā dúúmā gɛ ŋ́. Oŋmá ɛ̄nyā alɔ cɛ̄ ka a ŋmá ɛgiyí Ɔwɔicō.” 31Ujísɔ̄si tá uwā ohi kahíníī, “Aá cɛ̄ abālɔbányā ɛɛ́ ɛ́ɛ? 32Má ɔ̄, eko ā gē wā, ó kē gā ɛɛ́, eko nɛ̄ aá géē pahīla, ɔ̄cɛ dóódu géē ga ɔlɛ́ nū, aá klla géē habɔ̄ um tá ōfū um, nááná ā ń gáā yɔ̄ ōfū um ŋ́, ohígbū ka Ádā ā géē yɔ̄ pī um. 33N ka ɔdā nēe bá ā lɛ aá, ká aá lɛ ɛbɔ́ ɔ́dāŋ ka aá yɔ̄ ī piyatɔ̄há mla um. Ācɛ kú ɛcɛ géē yá ká aá móōwē. Amáŋ aá lɛ ɔtū lɛ! Ohígbū ka n lɛ ɛcɛ yálé mɛɛ́.”

Currently Selected:

UJƆ́NI 16: IFBCL

Highlight

Copy