UJƆ́NI 15

Ujísɔ̄si lɛbɛ̄ɛka ɔcí Ufáyin okpaakpa á

1Ujísɔ̄si klla da ayíkpó kú nū kahíníī, “Ami wɛ ɛ́nɛ́nɛ̄ ɔcí ufáyin á, Ádā um wɛ ɔgɛ́ɛjí ō leyīkwu ɔcí ufáyin ā á. 2Ābɔ̄ kú um dúúmā nōó gwá īkpō ŋ́, ó géē gwó ɔ̄ tónū, abɔ̄ dúúmā nōo ī gwá īkpō, ó géē tá ɔ̄ hɛ́ yēŋēē kóō gwá īkpō fíyɛ́. 3Ɛlā nɛ̄ n nwū aá ā le aá gwó tá yēŋēē ɛɛ́, ɛ́gɛ́nɛ̄ ɔglɛ́jí gē gwó ūkwū ɔcí bónū ŋmá ɔcí ā. 4Aá yɔ̄ ī pīyatɔ̄há mla um, ká n̄ yɔ̄ ī pīyatɔ̄há mla aá. Ɛ́gɛ́nɛ̄ ābɔ̄ ɔcí í lɔfú gwá īkpō abɔ̄yī nū glá ŋ́ mā, ń táafú ŋ́ ó kwu ɔcí ufáyin ā, ɛ́gɔ́ɔmā nɛ̄ aá lɔfú gwá īkpō glá ŋ́ dúú á, ń táafú ŋ́ aá yɔ̄ ī pīyatɔ̄há mla um. 5Ami lɛbɛ̄ɛka ɔcí ufáyin á, aá kē lɛbɛ̄ɛka ābɔ̄ nū á. Ɔ̄cɛ nōo lā yɔ̄ ī pīyatɔ̄há mla um, nɛ̄ n kē yɔ̄ ī piyatɔ̄há mla anú, géē gwá īkpō nwuné nwuné, ohígbū ka ɔ́dāŋ kóō wɛ ami ŋ́, aá lɔfú yá ɔdā dúú glá ŋ́. 6Ɔ́dāŋ́ ka ɔ̄cɛ dúúmā í yɔ̄ ī piyatɔ̄há mla um ŋ́, é í je ɔ́ hɛ́ tɛ́ɛcɛ bɛ̄ɛka ābɔ̄ ɔcí ā, ó géē je ŋmókókó, anɔ́ɔ ācɛ lɛ uwá túbá, klla lɛ uwá kpó tɔ̄lá cɛ́ɛ́ é le kpó yɔlá. 7Ɔ́dāŋ́ ka aá yɔ̄ ī piyatɔ̄há mla um, nɛ̄ ɛlā kú um kē yɔ̄ ipú ɔtū kú aá, ɔdā dúúmā nɛ̄ aá tíne, é géē yá ɔ̄ lɛ aá. 8Ɔ́dāŋ́ ka aá gē gwá īkpō nwuné nwuné, aá gē mafú ka aá wɛ ayíkpó kú um, cɛ́ɛ́ é géē mafú lɛ ācɛ ka Ádā um wɛ idáagó. 9Ɛ́gɛ́nɛ̄ Ádā ā yíihɔtū tū um ā, ɛ́gɔ́ɔmā nɛ̄ n yíihɔtū tū aá dúú á. Aá yɔ̄ ī lɛyítáajɛ ga um, cɛ́ɛ́ ká n̄ yíihɔtū tá aá. 10Ɔ́dāŋ́ ka aá lɛ íne kú um tū, n géē yɔ̄ ī yíihɔtū tū aá, ɛ́gɛ́nɛ̄ n lɛ íne kú Ádā um tū, nōó kē yɔ̄ ī yíihɔtū tū um ā. 11N le aɔ́dā nēe bá nyā kpó ka lɛ aá, cɛ́ɛ́ kú ɛdɔ ká ɔtū nōo he um ā kóō he aá dúú, cɛ́ɛ́ ká aá gwéeyē gajaajɛ.

12 # Ujɔ́n 13.34; 15.17; 1 Ujɔ́n 3.23; 2 Ujɔ́n 1.5 “Ɛ̄nyā wɛ íne kú um á, ká aá yíihɔtū tá ɔ́mpa aá ɛ́gɛ́nɛ̄ n yíihɔtū tū aá lɛ ā. 13Ɔ́dāŋ́ nɛ̄ ɔ̄cɛ gekwú ohígbū aóklóbīya nū, ɔ́ɔmā mafú ka ó lɛ ihɔtū ɔhá dúú nɛ̄ ó mafú fíyɛ́ ɔdā nɛ̄ ó yá nyā glá gɛ ŋ́. 14Aá wɛ aóklóbīya um ɔ́dāŋ ka aá lɛ íne kú um tū. 15Ń hī aá ka ɔ̄cocɛ̄hɔ̄ gɛ ŋ́, ohígbū ka ɔ̄cocɛ̄hɔ̄ í gē jé ɔdā nɛ̄ ɔkpani nū gē yá ā ŋ́. Amáŋ n hī aá ka aɔ́ya, ohígbū ka ɔdā dóódu nɛ̄ n pó ŋmá ɛgiyí Ádā um mā, n le ɛjɛ̄ɛ̄jī nū kpó ka lɛ aá. 16Ó wɛ aá fu um ā ŋ́, amáŋ ami fu aá á. N je ɔfú lɛ aá ká aá nyɔ̄ gaá gwá īkpō, cɛ́ɛ́ ká īkpō kú aá kóō lɛ́ɛcɛ. Ká ɔdā dúúmā nɛ̄ aá dɔɔ̄kā ŋmá abɔ̄ Ádā um o ŋmá lɛ iyē kú um ā, ō géē je lɛ aá. 17Aíne nēe bá nyā nɛ̄ n je lɛ aá á, ka aá yíihɔtū tū ɔ́mpa aá.”

Íwɔ́tū kú ɛcɛ

18Ujísɔ̄si yɔ̄ ī kɛlā gɔbū kpɔ́ kahíníī, “Ɔ́dāŋ́ ka ācɛ kú ɛcɛ ī wɔ́tū aá, aá bla ka ācɛ kú ɛcɛ le ɔtū um wú gbɔbū, ɛ́ɛ́ nēé gbɔɔ́ ō wɔ́tū aá. 19Ɔ́dāŋ́ ka aá wɛ ákú ɛcɛ nɛɛ, cɛ́ɛ́ ɛcɛ ā géē yɛ í yíihɔtū tū aá abɔ̄ nɛ̄ aá wɛ ákú nū ā. Amáŋ ami fu aá ŋmá ipú ɛcɛ nyā a á. Aá kē wɛ ákú ɛcɛ ā gɛ ŋ́, amáŋ ami fu aá ŋmá ɛcɛ á, ɔ́ɔmā yá ɛ́ɛ́ nɛ̄ ɛcɛ ā gē wɔ́tū aá má. 20#Umát 10.24; Ulúk 6.40; Ujɔ́n 13.16Aá blakwu ɛlā nɛ̄ n da aá, Ɔfiyɛ í gē jājīlīmā fíyɛ́ óndú nū ŋ́ mā. Ɔ́dāŋ́ kéē yá um ŋmó, é géē yá aá ŋmó dúú. Ɔ́dāŋ́ kéē lɛ ɛlā nɛ̄ n nwū ā tū, é géē lɛ ɛlā kú aá tū dúú. 21Ācɛ géē yá aá aɔ́dā nēe bá nyā ohígbū ka aá wɛ ákú um, ohígbū kéē jé ɔ̄cɛ nōo tū um ɛhɔ̄ ā ŋ́. 22Ɔ́dāŋ́ ka ń wā gaá kɛlā lɛ uwá ŋ́ nɛɛ, é géē yɛ í bīyíne ŋ́. Amáŋ abālɔbányā é lɛ ɔdā ōlɛ abɔ̄ bá ɔ̄ dúúmā ohígbū íne nēé bīya ā gɛ ŋ́. 23Ɔ̄cɛ nōo wɔ́tū um, ī wɔ́tū Ádā um dúú. 24Ɔ́dāŋ́ ka ń yá aɔ́dā ō hídáagó nɛ̄ ɔ̄cɛ ɔhá dúúmā í yá jééjé ɛ́ɛ́ ŋ́ ipéēyī ūwā ŋ́ nɛɛ, é géē yɛ í ŋmó uwā ɛpɔ̄bí ŋ́. Amáŋ ɛ́gɛ́nɛ̄ ó lɛ nyā, é le odúúdú ɔdā nɛ̄ n yá ā má, nááná é gē wɔ́tū ami mla Ádā um. 25#Aíjē 35.19; 69.4 Ɛ̄nyā yá lɛ ā cɛ́ɛ́ ká ɛlā nēé tá tāajɛ ipú ɔkpá ɛlɔ̄ɔwɔicō ka, ‘É gē wɔ́tū um icííci’ ā kóō le yá jīla ɔkwɛ̄yi. 26Otɔ́tūlé ā géē wā, anú kē wɛ Alelékwū nōo ī ma ɛlɔ̄kwɛ̄yi lɛyíkwu Ɔwɔicō fú lɛ aá á. Anú ā kē ŋmá ɛgiyí Ádā á. N géē tū ɔ̄ ɛhɔ̄ ŋmá ɛgiyí Ádā ā fu aá, ó géē kɛlā lɛ aá lɛyíkwu um. 27Aá, dúú, géē cījáalí kú um, ohígbū ka aá bá mla um ŋmá eko aflɛ́yí ā.”

Currently Selected:

UJƆ́NI 15: IFBCL

Highlight

Copy