UJƆ́NI 14

Ujísɔ̄si wɛ ɔwɛ nɛ̄ ɔ̄cɛ ī yɛ ga ɛgiyí Ádā ā

1Ujísɔ̄si yɔ̄ ī kɛlā lɛ ayíkpó ā kahíníī, “Ɔtū kú aá kóō lɛ unwalu ŋ́, aá lɔtūce Ɔwɔicō, cɛ́ɛ́ aá klla kē lɔtūce um dúú. 2Ɛga omlɛ́nyɔ́ alɛwa bá ɔlɛ́ Ádā um. N yɔ̄ ī nyɔ̄ gaá tú ɛga tū gbēyī aá. Ɔ́dāŋ́ kóō lɛ ā ŋ́ nɛɛ, n géē yɛ í da aá dɛ̄ɛ̄ ŋ́. 3Ɔ́dāŋ́ ka n kē gaá lɛ ɛga tútū gbēyī aá, n géē wā igbɔhá ká n̄ gaá lɛ aá kpó wā ɛgiyí um, cɛ́ɛ́ ɛga nɛ̄ n yɔ̄ ā, abɔ́ɔ nɛ̄ aá géē bá dúú á. 4Aá jé ɛga nɛ̄ n gē nyɔ̄ ā, aá kē jé ɔwɛ kú nū ā.” 5Utɔ́mɔ̄si da ɔ́ kahíníī, “Óndú, alɔ í jé ɛga nāa gē nyɔ̄ ā ŋ́, abɔ̄ ó yá lɛ nɛ̄ alɔ í jé ɔwɛ kú nū ā?” 6Ujísɔ̄si da ɔ́ kahíníī, “Ami wɛ ɔwɛ á, ɔkwɛ̄yi mɛ́mla oyēeyī á. Ɔ̄cɛ dúúmā í wā ɛgiyí Ádā um glá ŋ́, ń táafú ŋ́ ó yɛ ŋmá ɛgiyí um. 7Ɔ́dāŋ́ ka aá lɛ um jé nɛɛ, aá géē yɛ í lɛ Ádā um jé dúú. O ŋmá abālɔbányā aá lɛ ɔ́ jé, klla lɛ ɔ́ má ɛɛ́.”

8Ufílīpu da ɔ́ kahíníī, “Óndú, ma Ádā ā fú lɛ alɔ, ká ɔtū kóō he alɔ.” 9Ujísɔ̄si da ɔ́ kahíníī, “N húmáyī yɔ̄ mla aá gbojī gbojī ɛɛ́, anɔ́ɔ aá jé um ɛ́ɛ́ ŋ́ má ā, Ufílīpu? Ɔ̄cɛ nōo lɛ um má, lɛ Ádā ā má ɛɛ́. Ɔdíyá nāa klla ka, ‘Ma Ádā ā fú lɛ alɔ ā?’ 10Á cɛ̄ ka n yɔ̄ ipú Ádā ā, Ádā ā kē yɔ̄ ipú um ŋ́ nɛɛ? Ɛlā nɛ̄ n gē ka lɛ aá ā, ń ka ŋmá ɔfú kú um ŋ́, amáŋ Ádā nōo yɔ̄ ipú um ā gē yúklɔ́ kú nū á. 11Aá cɛ̄ ɛlā kú um ka n yɔ̄ ipú Ádā ā, Ádā ā kē yɔ̄ ipú um. Ɔ́dāŋ́ kóō lɛ ā ŋ́, aá cɛ̄ ɛlā kú um ohígbū úklɔ́ ā.”

12Ujísɔ̄si kɛlā gɔbū kpɔ́ kahíníī, “N yɔ̄ ī ka ɛlɔ̄kwɛ̄yi lɛ aá, n̄ da aá ka, ācɛ néē cɛ̄ ɛlā kú um ā, úklɔ́ nɛ̄ n gē yá ā, é géē yá ɔ̄. É kōō í yá aɔ́dā nɛ̄hi fíyɛ́, ohígbū ka n yɔ̄ ī kwúcē ga ɛgiyí Ádā um. 13Ɔdā dúúmā nɛ̄ aá bī iyē kú um ba, n géē yá uwā, cɛ́ɛ́ kú Ɔyínɔ̄nyīlɔ ā kóō yá kú ācɛ kéē lɛ ɛ́gɛ́nɛ̄ Ádā ā wɛ idáagó lɛ ā má. 14Ɔ́dāŋ́ ka aá ba ɔdā dúúmā ohígbū ka aá wɛ ācɛ kú um #14.14 kpá ōhī í lɛ ami ŋ́. ā, n géē yá ɔ̄ lɛ aá.”

Ujísɔ̄si cokónu ō tū Alelékwū Ihɔ ɛhɔ̄ wā

15Ujísɔ̄si da ayíkpó kú nū kahíníī, “Ɔ́dāŋ́ ka aá yíihɔtū tū um, aá lɛ íne kú um tū. 16Anɔ́ɔ n géē ba Ádā ā kóō je otɔ́tūlé ɔhá lɛ á, nōo géē yɔ̄ mla aá piyóó. 17Anú wɛ Alelékwū nōo gē mafú ɔdā nɛ̄ Ɔwɔicō wɛ abāābɔ̄yī nū ā fú á. Ācɛ kú ɛcɛ í lɔfú mīyɛ ɔ́ ga ipú ɔtū kú uwā glá ŋ́, ohígbū kéē má ɔ̄ ŋ́, é klla jé ɔ̄ ŋ́. Aá jé ɔ̄, ohígbū kóō lā mla aá, #14.17 wɛ aɔ́kpá ōhī lɛ ɛ̄nɛ̄ o ka, géē wɛ. ó klla géē yɔ̄ ipú aá.

18Ń gáā habɔ̄ aá tá bɛ̄ɛka ayí okwū ā ŋ́, n géē wā ɛgiyí aá. 19Eko kpií ɛcɛ í gáā má um glá gɛ ŋ́, amáŋ aá géē mā um. Ohígbū ka abɔ̄ n yēeyī ā, aá géē yēeyī dúú. 20Ɛ̄cī ɔ́ɔmā aá géē jé ka n wɛ ɔ̄cɛ ékpó mla Ádā um, aá kē wɛ ɔ̄cɛ ékpó mla um, n kē wɛ ɔ̄cɛ ékpó mla aá. 21Ɔ̄cɛ nōo mīyɛ íne kú um, klla lɛ uwá tū, anú wɛ ɔ̄cɛ nōo yíihɔtū tū um á. Ɔ̄cɛ nōo kē yíihɔtū tū um, Ádā um géē yíihɔtū tū ɔ̄, n kē géē yíihɔtū tū ɔ̄, n kē géē ma iyī um fú lɛ ɔ́.” 22Ujúdasi (ó wɛ Ujúdasi Iskárīyɔ̄tu ŋ́) da ɔ́ kahíníī, ‘Óndú, ɛ́gɛ́nyā nāa géē ma iyī uwɔ fú lɛ alɔ ā, nɛ̄ á gáā ma iyī uwɔ fú lɛ ācɛ kú ɛcɛ ŋ́ mā ā?” 23Ujísɔ̄si tóohi da ɔ́ kahíníī, “Ɔ́dāŋ́ ka ɔ̄cɛ dúúmā yíihɔtū tū um, ó géē lɛ ɛlā kú um tū, Ádā um klla géē yíihɔtū tū ɔ̄, alɔ kē géē wā ɛgiyí nū, alɔ géē lā mla anú. 24Ɔ̄cɛ nɛ̄ ó yíihɔtū tū um ŋ́, í gáā lɛ ɛlā kú um tū ŋ́. Ɛlā nɛ̄ aá kē pó ā, í wɛ ákú um ŋ́, amáŋ é ŋmá ɛgiyí Ádā um nōo tū um ɛhɔ̄ ā nɛ.

25N le ɛlā nēe bá nyā ka lɛ aá eko nɛ̄ n yɔ̄ mla aá ā. 26Otɔ́tūlé, nōo wɛ Alelékwū Ihɔ, nɛ̄ Ádā ā géē tɛ̄hɔ̄ ohígbū ka aá wɛ ákú um ā, géē nwū aá ɔdā dóódu, ó géē blatū aá ɔdā dóódu nɛ̄ n da aá. 27N habɔ̄ aá tá ipú ɛbɔ́, ɛbɔ́ kú um nɛ̄ n je lɛ aá á. Ó wɛ ɛ́gɛ́nɛ̄ ɛcɛ gē je ā nɛ̄ n gē je lɛ aá ā ŋ́. Ɔtū kú aá kóō lɛ unwalu ŋ́, ɛ́ɛ́ nɛ̄ aá kē ī yúufi ŋ́. 28Aá pó abɔ̄ n da aá kahíníī, ‘N géē nyɛ̄ɛ̄, n klla géē wā ɛgiyí aá.’ Ɔ́dāŋ́ ka aá yíihɔtū tū um nɛɛ, aá géē gwéeyē, ohígbū ka n gē nyɔ̄ ɛgiyí Ádā ā, Ádā ā kē nwuné fíyɛ́ um á. 29Abālɔbányā n̄ le da aá gbɔbū kóō géē yá, cɛ́ɛ́ eko nōó le yá kú aá géē cɛ̄. 30Ń gáā kɛlā mla aá ligbó gɛ ŋ́, ohígbū ka otrɛ̄yí kú ācɛ kú ɛcɛ ā gē wā ɛɛ́. Ó kē lɛ ɔfú dúúmā ɛgiyí um ŋ́. 31Amáŋ n géē yá ɔdā nɛ̄ Ádā ā tíne ka n yá ā, cɛ́ɛ́ kú ācɛ kéē le jé ka n yíihɔtū tá Ádā um. Aá caŋ́jɛ ká ālɔ̄ nyɛ̄ ŋmá amānyā.”

Currently Selected:

UJƆ́NI 14: IFBCL

Highlight

Copy