UJƆ́NI 13

Ujísɔ̄si na ikpó kú ayíkpó kú nū

1Ujísɔ̄si le jé ka eko nɛ̄ anúɔ géē nyɛ̄ɛ̄ ŋmá ɛcɛ nyā ga ɛgiyí ádā nū ā le yá, ɛcī éyi gbɔbū ɛ́ɛ́ kéē lé ucɛ kú onyatá. Ó húmáyī yíihɔtū tá ācɛ ɔlɛ́ nū nēe bá ipú ɛcɛ nyā ā, anɔ́ɔ ó kē yíihɔtū tū uwā jāā ga eko ámōōmɛ á. 2Ujísɔ̄si mɛ́mla ayíkpó kú nū bá ɛgiyí ɔdōlé ɔ̄nɔ̄ɔ̄nɛ̄. Eko nyā ebilíi tɛɛtɛ le nwū tū Ujúdasi Iskárīyɔ̄tu, ɔyí Usáyímɔ̄ni ɔtū kóō mīyɛ ije ce īkpɛ̄yí Ujísɔ̄si. #Amáŋ Ebilíi tɛtɛ le miya ka Ujúdasi ɔyí kú Usímɔ̄n Iskáriyɔ̄tu géē yá ibīyājɛ tū Ujísɔ̄si 3Ujísɔ̄si le jé ka Ádā ā kwú odúúdú ɔfú ú kpó tū anúɔ abɔ̄. Ó klla kē jé ka anúɔ ŋmá ɛgiyí Ɔwɔicō, anúɔ klla yɔ̄ ī nyɔ̄ ɛgiyí Ɔwɔicō. 4Ujísɔ̄si cāŋjɛ ŋmá ɛgiyí ɔdōlé ā, anɔ́ɔ ó kwú awulú kú nū ú plla bá ajɛ, kwú ogōdōgōdō ú kpó le ɛ́nyɔ́ kú nū gbō á. 5Anɔ́ɔ ó le éŋkpɔ̄ hɛ́ pīya tū ipú ɔgbanjɛ̄, anɔ́ɔ ó gbɔɔ́ ō na ikpó kú ayíkpó kú nū á. Eko nōó le uwá ikpó na kwɛyí cɛ́ɛ́ ó kwú ogōdōgōdō nɛ̄ ó le gbō ɛ́nyɔ́ ā le ikpó ā nya. 6Eko nōó gā ɛgiyí Usáyímɔ̄ni Upíta ā, Upíta da ɔ́ kahíníī, “Óndú a gáā na um ikpó nɛɛ?” 7Anɔ́ɔ Ujísɔ̄si tá ɔ̄ ohi kahíníī, “Ɔdā nɛ̄ n gē yá ā, á jɛ́yí nū abālɔbányā ɛ́ɛ́ ŋ́, amáŋ a géē jɛ́yí nū ɛ̄cɔ̄bū.” 8Anɔ́ɔ Upíta da ɔ́ kahíníī, “Á gáā na um ikpó gbóógbóō ŋ́.” Ujísɔ̄si tá ɔ̄ ohi kahíníī, “Ɔ́dāŋ́ ka ń na uwɔ ikpó ŋ́, ayíka á kē wɛ ɔyíkpó kú um ŋ́.” 9Usáyímɔ̄ni Upíta da ɔ́ kahíníī, “Óndú, ó wɛ ikpó kú um ōfōōfūnū nāa géē na ā ŋ́, amáŋ abɔ̄ mɛ́mla ɛyí kú um dúú.” 10Ujísɔ̄si da ɔ́ kahíníī, “Ɔ̄cɛ nōo le iyē gwā ɛɛ́ mā le yá yēŋēē dúúdú ɛé cɛgbá kéē gwīīyē dúú gɛ ŋ́. Ayíka ikpó kú uwā ōfōōfūnū nēé í na mɛ́ɛ̄ á. Odúúdú aá le yēŋēē ɛɛ́, ayíka ɔ̄cɛ éyi ōfōōfūnū.” 11Ohígbū ka Ujísɔ̄si jé ɔ̄cɛ nōo géē yá ibīyājɛ tū ɔ̄ ā. Ohígbū ɔ́ɔmā yá ɛ́ɛ́ nōó kahíníī, “Ó wɛ odúúdú aá le yēŋēē ā ŋ́” má.

12 # Ulúk 22.27 Eko nōó le uwá ikpó na kwɛyí ā, ó kwú awulú kú nū ú klá iyē, anɔ́ɔ ó le yɛ gáā cīce á. Ó da uwá ɔ̄ka kahíníī, “Aá jɛ́yí ɔdā nɛ̄ n yá nyā ā? 13Aá gē hī um ka, Itíca mɛ́mla Óndú ā. Ɔ́ɔmā le kpaakpa lɛ ā, ohígbū ka ɛ́gɔ́ɔmā nɛ̄ n wɛ á. 14Ɔ́dāŋ́ ka ó lɛ ā, nɛ̄ ami nōo wɛ Óndú mɛ́mla Itíca kú aá ā, lɛ ikpó kú aá na, ó lɛ ā aá cíkā ō na ikpó kú ɔ́mpa iyī aá. 15N lɛ ɔdā ōgbla ɔdā je lɛ aá ɛɛ́, cɛ́ɛ́ ká aá yá ɛ́gɛ́nɛ̄ n yá lɛ aá nyā. 16#Umát 10.24; Ulúk 6.40; Ujɔ́n 15.20Ɔkwɔ̄ɔ̄kwɛ̄yi, n̄ da aá ka, ɔ̄cocɛ̄hɔ̄ í gē nwuné fíyɛ́ ɔkpani nū ŋ́, ɔ̄cɛ nēe tɛ̄hɔ̄ í kē gē nwuné fíyɛ́ ɔ̄cɛ nōo tū ɔ̄ ɛhɔ̄ ā ŋ́ m. 17Abālɔbányā nɛ̄ aá le ɛlɔ̄kwɛ̄yi nēe bá ā jé ā, ó géē lɔhi lɛ aá ɔ́dāŋ ka aá gē bī uwā le yúklɔ́. 18#Aíjē 41.9Ń kɛlā nyā ohígbū odúúdú aá ŋ́. N jé ācɛ nɛ̄ n fu ā, amáŋ ká ɛlā nēé ka ipú ɔkpá kú ɛlɔ̄ɔwɔicō ka, ‘Ɔ̄cɛ nōo lé igbō kú um ā, kwú ɛyí ú bú kwu um ɛɛ́ kóō le yá jīla.’ 19N yɔ̄ ī da aá abālɔbányā ɔdā nōo gáā yá gbɔbū ɛ́ɛ́ kóō yá, cɛ́ɛ́ aá géē cɛ̄ ka, ‘Ami wɛ Anū nōo húmáyī yɔ̄ ā nɛ̄.’ 20#Umát 10.40; Umák 9.37; Ulúk 9.48; 10.16Ɔkwɔ̄ɔ̄kwɛ̄yi, n̄ da aá ka, ɔ̄cɛ dúú nōo mīyɛ ɔ̄cɛ nɛ̄ n tɛ̄hɔ̄ ā, mīyɛ um dúú. Ɔ̄cɛ nōo kē mīyɛ um ā, kē mīyɛ ɔ̄cɛ nōo tū um ɛhɔ̄ ā dúú.”

Ujísɔ̄si jé ɔ̄cɛ nōo géē yíbīyājɛ tū ɔ̄ ā

(Umát 26.20-25; Umák 14.17-21; Ulúk 22.21-23)

21Eko nɛ̄ Ujísɔ̄si lɛ ɛlā nēe bá ā ka ā, ɔtū nwula nwula gbo ō yá ɔ̄, anɔ́ɔ ó ka tɛ́ɛcɛ kahíníī, “Ɔkwɔ̄ɔ̄kwɛ̄yi, n̄ da aá ka, éyi kú ipú aá géē yá ibīyājɛ tū um.” 22Ayíkpó ā pīyeyī má iyī uwā, bá gē gbɛlá ɔ̄cɛ nōó kɛlā lɛyíkwu ɔ́ ā. 23Éyi kú ayíkpó ā nōo he Ujísɔ̄si ɔtū nɛ̄hi, cīce pī Ujísɔ̄si. 24Usáyímɔ̄ni Upíta yá ɔ̄ abɔ̄, anɔ́ɔ ó da ɔ́ kahíníī, “Da alɔ ɔ̄cɛ nōó gē kɛlā lɛyíkwu ɔ́ ā.” 25Abɔ̄ ó cīce pī Ujísɔ̄si ajaajɛ ā, ó da ɔ́ kahíníī, “Óndú, ɔ̄nyɛ nɛ̄?” 26Anɔ́ɔ Ujísɔ̄si tóohi kahíníī, “Ɔ̄cɛ nɛ̄ n géē je igbō nwū ɔhɔ̄ je lɛ ɔ́ ā wɛ anú á.” Anɔ́ɔ ó lɛ igbō ā nwū ɔhɔ̄, kwú ɔ̄ ú lɛ Ujúdasi ɔyí Usáyímɔ̄ni Iskárīyɔ̄tu á. 27Eko nōó le lé kwɛyí ā, Usɛ́tan le tá ipú ɔ́tū kú nū. Anɔ́ɔ Ujísɔ̄si da ɔ́ kahíníī, “Ɔdā nāa gáā yá ā, yá ɔ̄ fíya fíya.” 28Amáŋ ɔ̄cɛ dúúmā kú ipú ācɛ nēe bá gē lé ɔdōlé mla anú ā í jé ɔdā nōo yá nōó kɛlā nyā lɛ ɔ́ ā ŋ́. 29Ohígbū ka ācɛ ōhī gbɛlá ka, abɔ̄ Ujúdasi gē bī alítā kú ije ā, ka Ujísɔ̄si da ɔ́ ká ɔ̄ lɛ ɔdā nōo ce uwá ɛgbá kú ucɛ ā lá, ámāŋ ka ɔ́ɔ̄ je odée lɛ aógbɛhá. 30Ujúdasi mīyɛ igbō ā, anɔ́ɔ ó nyɛ̄ɛ̄ le tɛ́ɛcɛ bōōbū á. Ó kē wɛ otú.

Íne ɛ̄yīpɛ̄ lɛyíkwu ihɔtū

31Eko nɛ̄ Ujúdasi nyɛ̄ɛ̄ le tɛ́ɛcɛ ā, Ujísɔ̄si kahíníī, “Abālɔbányā ācɛ géē má ɛ́gɛ́nɛ̄ é géē lɛ ojīlīmā ce Ɔyínɔ̄nyīlɔ kú Ɔ̄cɛ ā, ó géē yá kú ācɛ kéē má ɛ́gɛ́nɛ̄ nɛ̄ Ɔwɔicō wɛ idáagó lɛ ā. 32Ɔwɔicō abɔ̄yī nū géē mafú lɛ ācɛ ɛ́gɛ́nɛ̄ Ɔyínɔ̄nyīlɔ kú Ɔ̄cɛ wɛ idáagó lɛ āa, ó géē yá lɛ ā bōōbū. 33#Ujɔ́n 7.34Ayípɛ̄ ɔlɛ́ um, ń gáā yɔ̄ mla aá gbojī ajɛ gɛ ŋ́. Aá géē dɔɔ̄kā um, amáŋ ɛ́gɛ́nɛ̄ n da ācɛ Ujíyu ka, ‘Ɛga nɛ̄ n gē nyɔ̄ ā, aá wā abɔ́ɔ glá ŋ́ mā,’ ɛ́gɔ́ɔmā nɛ̄ n gē da aá abālɔbányā á. 34#Ujɔ́n 15.12,17; 1 Ujɔ́n 3.23; 2 Ujɔ́n 1.5N je íne ɛ̄yīpɛ̄ lɛ aá, ká aá yíihɔtū tū iyī aá. Ɛ́gɛ́nɛ̄ n yíihɔtū tū aá ā, ɛ́gɔ́ɔmā aá í yíihɔtū tū iyī aá lɛ ā dúú á. 35Ɔ́dāŋ́ ka aá gē yíihɔtū tá iyī aá, cɛ́ɛ́ ācɛ géē jé ka aá wɛ ayíkpó kú um.”

Ujísɔ̄si jé ka Upíta géē híhó kú anúɔ

(Umát 26.31-35; Umák 14.27-31; Ulúk 22.31-34)

36Usáyímɔ̄ni Upíta da ɔ́ kahíníī, “Óndú, iní nāa gē nyɔ̄ ā?” Ujísɔ̄si tá ɔ̄ ohi kahíníī, “Á tū um ɔkwu ga ɛga nɛ̄ n gē nyɔ̄ abālɔbányā ā glá ŋ́, amáŋ a géē yɛce um igbīhāajɛ.” 37Upíta da ɔ́ kahíníī, “Óndú, ɔdíyá nɛ̄ ń yɛce uwɔ abālɔbányā glá ŋ́ mā ā? N géē je oyēeyī kú um táajɛ gā uwɔ.” 38Ujísɔ̄si tóohi kahíníī, “A géē je oyēeyī kú uwɔ táajɛ gā um m? Ɔkwɔ̄ɔ̄kwɛ̄yi, n̄ da uwɔ ka, ɔbúgwū í gáā tōgwú ɛ́ɛ́ nɛ̄ a géē híhó igbɛ ɛtá ka anúɔ í jé um ŋ́ mā ā ŋ́.”

Currently Selected:

UJƆ́NI 13: IFBCL

Highlight

Copy