ᐊᒃᓱᑕᔅ 33
33
1ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᓂᑭᑕ ᐅ ᐃᑕᐅᓐ, ᒋᔾ ᑭᔭ ᐃᔅᕋᐃᓪ ᐃᔪᒡ ᐊᓐᒡ ᑲ ᐎᐎᑕᐃᑥᐤ ᐊᓐᑕ ᐃᒋᑉᑎᒡ ᐅᒡ᙮ ᒐ ᐃᑐᑕᐃᑥᐤ ᐊᓐᑕ ᑲ ᐊᓱᑎᒧᐅᒂᐤ ᐊᔅᒋᔪᐤ ᒐᒋ ᒥᔨᒂᐤ ᐊᑉᕋᐊᒻ, ᐊᐃᓯᒃ ᑭᔭ ᒐᑭᑉ, ᑭᔭ ᐅᑦ ᐊᓂᔅᑯᑕᐸᓄᐛᐛ᙮ 2ᓂᑭ ᐃᑎᓴᐛᐤ ᓂᑦ ᐊᓐᒋᓂᒻ ᒐᒋ ᒋᔅᒋᓄᑕᔨᑕᒄ, ᑭᔭ ᓂᑭ ᐎᐎᑎᓴᐛᐅᒡ ᑲᐃᓇᓐ ᐃᔪᒡ, ᐊᒧᕆ ᐃᔪᒡ, ᐊᑦ ᐃᔪᒡ, ᐸᕆᔅ ᐃᔪᒡ, ᐃᑉ ᐃᔪᒡ, ᑭᔭ ᒐᐱᐅᔅ ᐃᔪᒡ ᐊᓐᑕ ᐊᔅᒋᒡ ᐅᒡ᙮ 3ᒋᑭ ᐃᑐᑕᓇᐛᐤ ᐊᔅᒋᒡ ᐊᓐᑕ ᐊ ᐛᔪᑎᓯᒡ ᒋᒋᓇᐳᔭᐎᒡ ᑭᔭ ᑲᓯᐛᓯᐛᐳᔾ, ᒥᒄ ᓇᒪ ᒋᑭ ᒋ ᐎᒐᐅᑎᓇᐛᐤ ᐅᓴᒻ ᒋᔨᐛᐤ ᐅ ᑲ ᒥᔅᑯᔅᑎᒂᓇᒡ ᐃᔪᒡ ᑭᔭ ᒂᔄᓐ ᒋᑭ ᒋ ᓂᓱᐅᓇᒋᐃᑎᓇᐛᐤ ᒪᒂᒡ ᐊᑎ ᐱᒧᑕᔭᒄ᙮”
4ᐃᔅᐱ ᐱᔭᑕᒡ ᐃᔪᒡ ᐅᔭ ᐊᒥᔅᑲᑕᔨᑕᑯᓂᔨᒡ ᐃᔨᒧᐅᓂᔪᐤ, ᒂ ᓂᓇᐧᑲᒋᒧᒡ ᑭᔭ ᓇᒪ ᐅᒋ ᐳᔅᑭᒧᒡ ᐛᐛᓯᐅᓇᐱᔎ᙮ 5ᐛᔅ ᑎᐸᔨᒋᒐᓱᐤ ᒋ ᐃᑎᓱᒪᐤ ᒧᓱᓴ ᒐᒋ ᐃᑕᔨᒋ ᐃᔪᐛ, “ᒋᔨᐛᐤ ᐅ ᑲ ᒥᔅᑯᔅᑎᒂᓇᒡ ᐃᔪᒡ, ᐊᑎᓱᐧᒄ ᐸᐃᒄ ᐊᒐᐧᑭᔅᑕᒡ ᐎᒐᐅᑎᑯᒡ, ᓇᔅᒡ ᒋᐸ ᓂᓱᐅᓇᒋᐃᑎᓇᐛᐤ᙮ ᐊᑯ ᒥᓂᒥᒄ ᐊᓂᔭ ᐛᐛᓯᐅᓇᐱᔎ, ᑭᔭ ᓂᑭ ᐎᔭᔨᑕᓐ ᒐᒂᓐ ᒐ ᐃᑐᑕᑎᑯᒡ᙮” 6ᐊᑯ ᑲᒋ ᓂᑭᑕᒡ ᓴᐃᓇᐃ ᐱᔅᑯᑎᓇᔪᐤ, ᓇᒪ ᓴᔅ ᐅᒋ ᐳᔅᑭᒧᒡ ᐃᔅᕋᐃᓪ ᐃᔪᒡ ᐛᐛᓯᐅᓇᐱᔎ᙮
ᑲ ᓂᒋᔅᑲᑐᑕᓄᐅᒡ ᐸᔭᒋ ᐱᒍᐎᔭᓂᒥᒋᐛᑉ
7ᐃᔅᐱ ᒥᔭᓂᑲᓱᑥᐎ ᐃᔅᕋᐃᓪ ᐃᔪᒡ, ᒧᓱᔅ ᒋ ᐅᑎᓂᒻ ᑲ ᐸᔭᐧᑭᓂᔨᒡ ᐱᒍᐎᔭᓂᒋᐛᐱᔪᐤ ᑭᔭ ᐛᔪᐎᔅ ᐊᓐᑕ ᐛᒋᓇᓄᐎᒡ ᐅᒡ ᒋ ᒋᒥᑕᐤ᙮ ᐊᑯ ‘ᑲ ᓂᒋᔅᑲᑎᓇᓄᐅᒡ ᐸᔭᒋ ᐱᒍᐎᔭᓂᒥᒋᐛᑉ,’ ᒋ ᐃᓯᓂᐧᑲᑎᒻ᙮ ᒥᒄ ᐊᐛᓐ ᐛ ᐃᔨᒪᐊᑦ ᑎᐸᔨᒋᒐᓱᐛ ᐊᑯᑕ ᑲ ᐃᑐᑕᑦ᙮ 8ᑕᑥᐤ ᐊ ᑐᑕᒋ ᒧᓱᔅ ᐊᓐᑕ ᑲ ᐸᔭᐧᑭᓂᔨᒡ ᐱᒍᐎᔭᓂᒋᐛᐱᔪᐤ, ᒥᓯᐛ ᐊᐛᓐ ᒋᐱᔎᒡ ᑎᐱᔨᐛ ᐅᐱᒍᐎᔭᓂᒋᐛᐱᒡ ᒋ ᓇᓂᐳᐤ ᐊ ᑭᓄᐛᐱᒪᑦ ᒧᓱᓴ ᐸᑐᔅ ᑲᒋ ᐱᒐᔨᒋ ᑲ ᐸᔭᐧᑭᓂᔨᒡ ᐱᒍᐎᔭᓂᒋᐛᐱᔪᐤ᙮ 9ᐃᔅᐱ ᑲ ᐱᒐᑦ ᒧᓱᔅ ᑲ ᐸᔭᐧᑭᓂᔨᒡ ᐱᒍᐎᔭᓂᒋᐛᐱᔪᐤ ᒂ ᐸᒋ ᔭᓯᐱᔨᒋ ᑭᔅᑯᐅᓇ ᒧᔭᒻ ᐃᔅᑯᑕᔪᐤ ᐊ ᐃᓯᓇᑯᓯᔨᒋ, ᐊᓐᑕ ᐊ ᐅᒋ ᐱᒐᓄᐎᒡ ᐃᔅ ᐱᒍᐎᔭᓂᒋᐛᐱᒡ, ᐊᑯᑕ ᒂ ᐅᒋ ᐃᔨᒥᑯᑦ ᒧᓱᔅ ᑎᐸᔨᒋᒐᓱᐛ᙮ 10ᐃᔅᐱ ᐎᔭᐱᒪᑥᐎ ᐃᔪᒡ ᐊᓂᔭ ᑭᔅᑯᐅᓇ ᐊᓐᑕ ᐊ ᐅᒋ ᐱᒐᓄᐎᒡ ᐸᔭᒋ ᐱᒍᐎᔭᓂᒋᐛᐱᒡ ᒂ ᓂᐱᔅᑯᐱᒡ ᐊᓐᑕ ᒋᐱᔎᒡ ᑎᐱᔨᐛ ᐅᐱᒍᐎᔭᓂᒋᐛᐳᐛᐛᒡ ᑭᔭ ᒂ ᐊᔭᒥᐊᔅᑐᐛᒡ ᑎᐸᔨᒋᒐᓱᐛ᙮ 11ᑎᐸᔨᒋᒐᓱᐤ ᐅᑎᔅᑯᐤ ᒋ ᐃᔨᒪᐤ ᒧᓱᓴ ᒧᔭᒻ ᐊᐛᓐ ᐊ ᐃᓯ ᐃᔨᒪᒋ ᐎᒐᐛᑭᓇ᙮ ᐊᑯ ᒧᓱᔅ ᑲᐤ ᐊᑐᑕᑦ ᐊᓐᑕ ᐛᒋᓇᓄᐎᒡ᙮ ᒥᒄ ᐊᓂᔭ ᐅᑯᐸᓇᒪ ᒐᓱᐛᔨᒋ ᓇᓐ ᐅᑯᓯᔨᐛ, ᓇᒪ ᐅᒋ ᓂᑭᑎᒥᔪᐛ ᑲ ᐸᔭᐧᑭᓂᔨᒡ ᐱᒍᐎᔭᓂᒋᐛᐱᔪᐤ᙮
ᑎᐸᔨᒋᒐᓱᐤ ᑲ ᐊᓱᑎᒪᒐᑦ ᒐ ᑕᐛᑦ ᐊ ᑕᔨᒋ ᐅᑦ ᐃᔨᒪ
Exodus 33.12-23 (Proper-24 Year A)
12ᒧᓱᔅ ᒪᒃ ᒋ ᐃᑕᐤ ᐅᑎᐸᔨᒋᒐᐛ, “ᐛᐸᑕ, ᒋᒋ ᐃᓯᓐ, ‘ᐸᓱᐅᒡ ᐊᑯ ᐃᔪᒡ᙮’ ᓇᒪ ᒪᒃ ᒋ ᒋᔅᒐᔨᑎᒥᔨᓐ ᐊᐛᓐ ᒐ ᐃᑎᓴᐅᑦ ᒐᒋ ᐎᒐᐅᑦ᙮ ᐊᔪᐛᒡ ᒪᒃ ᔅᒋ ᐃᔅᒋᔄᓐ, ‘ᒋ ᒋᔅᒐᔨᒥᑎᓐ ᒋᑦ ᐃᓯᓂᐧᑲᓱᐅᓐ ᐅᒡ, ᑭᔭ ᔅᒋ ᒥᔅᑲᓐ ᓱᐛᔨᑕᑯᓱᐅᓐ ᐊ ᐸᑕᔅᑎᒥᐱᔭᓐ᙮’ 13ᐊᐅᒄ ᐛᒋ ᒪᒃ, ᒋ ᐱᑯᓴᔨᒥᑎᓐ, ᒧᔭᒻ ᑲ ᒥᔅᑯᒧᐛᓇ ᓱᐛᔨᑕᑯᓱᐅᓐ ᐊ ᐸᑕᔅᑎᒥᐱᔨᓐ, ᐛᐸᑎᔨ ᐊᑯ ᒋᑦ ᐃᓯᑥᐅᓐ, ᒐᒋ ᐊᑎᑐᐤ ᒋᔅᒐᔨᒥᑕᓐ, ᒐᒋ ᒥᔅᑲᒪᓐ ᓱᐛᔨᑕᑯᓱᐅᓐ ᐊ ᐸᑕᔅᑎᒪᐱᔨᓐ; ᑭᔭ ᒪᒥᑐᓇᔨᑕ, ᐊᐅᑯᐤ ᐅᒡ ᐊ ᐃᑎᔅᑲᓇᓯᒡ ᐃᔪᒡ ᑲ ᐎᔭᔨᒥᑥᐤ ᒐ ᐅᑦ ᐃᔨᒥᔨᓐ᙮”
14ᒋ ᐃᔅᒋᔄᐤ ᒪᒃ ᑎᐸᔨᒋᒐᓱᐤ, “ᒋᑭ ᐎᒐᐅᑎᓐ, ᑭᔭ ᒋᑭ ᒥᔨᑎᓐ ᒐᒋ ᐊᔽᓯᔨᓐ᙮”
15ᒋ ᐃᑎᑯᐤ ᒪᒃ ᒧᓱᓴ, “ᒧᔭᒻ ᐊᑲ ᐎᒐᐎᓇ, ᐊᑲᐎᔾ ᒋᑎᓴᐅᓇᓐ ᐅᑕ ᐅᒋ᙮ 16ᐛᔅ ᑕᓐᑕ ᒐ ᐅᒋ ᒋᔅᒐᔨᑕᒂᒡ ᓂᔾ ᑭᔭ ᒋᑦ ᐃᔨᒥᒡ ᐊᒋ ᒥᔅᑲᒪᒡ ᓴᐛᔨᑕᑯᓯᐅᓐ ᐊ ᐸᑕᔅᑎᒪᐱᔨᓐ ᐊᑲ ᐎᒐᐎᔭᒐ ? ᐊᑯ ᐃᔭᒡ ᒐ ᐃᑎᔅᑲᓂᓯᔭᒡ, ᓂᔾ ᑭᔭ ᒋᑦ ᐃᔨᒥᒡ, ᒥᓯᐛ ᐃᔪᒡ ᐅᒋ ᒥᓯᐛᔅᑭᒥᒡ ᑲ ᐃᑕᒡ᙮”
17ᑎᐸᔨᒋᒐᓱᐤ ᒪᒃ ᒋ ᐃᑕᐤ ᒧᓱᓴ, “ᐅᒪ ᑭᔭ ᓂᑭ ᑐᑕᓐ ᑲᒋ ᐃᔅᒋᔄᔨᓐ: ᐛᔅ ᔅᒋ ᒥᔅᑲᓐ ᓱᐛᔨᑕᑯᓱᐅᓐ ᐊ ᐸᑕᔅᑎᒥᐱᔭᓐ, ᒋ ᒥᔪ ᒋᔅᒐᔨᒥᑎᓐ᙮”
18ᒋ ᐃᑎᑯᐤ ᒪᒃ ᒧᓱᓴ, “ᒋ ᐱᑯᓴᔨᒥᑎᓐ, ᐛᐸᑎᔨ ᒋ ᒋᓴᒪᓂᑐᓇᑯᓯᐅᓐ᙮”
19ᑎᐸᔨᒋᒐᓱᐤ ᒪᒃ ᒋ ᐃᑕᐤ, “ᓂᑭ ᑐᑕᓐ ᒥᓯᐛ ᓂᒥᔽᑎᓯᐅᓐ ᒐᒋ ᐎᒪᐱᔨᔅᑕᑯᔨᓐ ᐅᑎᔅᑯᐤ ᐊᑕᔨᓐ ᑭᔭ ᓂᑭ ᐎᑕᒺᓐ ᑎᐸᔨᒋᒐᓱᐤ ᐅᑦ ᐃᓯᓂᐧᑲᓱᐅᓐ: ᓂᑭ ᒋᔅᑎᒪᒐᔨᒪᐤ ᒪᒃ ᐊᐛᓐ ᐛ ᒋᔅᑎᒪᒐᔨᒥᒃ ᑭᔭ ᓂᑭ ᓱᐛᔨᒪᐤ ᐊᐛᓐ ᐛ ᓱᐛᔨᒥᒃ᙮ 20ᒥᒄ ᓇᒪᐎᔾ ᒋᑭ ᒋ ᐛᐸᑕᓐ ᓂᑕᔅᑎᒥᐧᒄ: ᐛᔅ ᓇᒪ ᐎ ᐊᐛᓐ ᓂᑭ ᐛᐱᒥᒄ, ᐃᔭᐱᒡ ᒐ ᐱᒪᑎᓯᑦ᙮
21ᐊᑯᑕ ᐅᑕ ᐃᑕᐅᓐ ᒐ ᑕᔭᓐ, ᒋᑭ ᓂᐳᐅᓐ ᒪᒃ ᑕᐧᑯᒡ ᒋᔅᑕᐱᔅᑯᒡ᙮ 22ᒋᑭ ᐃᔨᓐ ᒪᒃ, ᒪᒂᒡ ᐊ ᐎᒪᐱᔨᒡ ᓂᒋᓴᒪᓂᑐᓇᑯᓯᐅᓐ, ᒋᑭ ᐊᐃᑎᓐ ᐊᓐᑕ ᐊᐱᓴᐱᔅᒋᐱᔨᒡ ᐊᓯᓂᔾ: ᒋᑭ ᐊᑯᐛᓇᐅᑎᓐ ᒪᒃ ᓂᑎᒋᔾ ᐅᒋ ᒪᒂᒡ ᐊ ᐎᒪᔅᑲᑕᓐ᙮ 23ᓂᑭ ᐅᒋᐱᔨᑕᓐ ᒪᒃ ᓂᑎᒋᔾ, ᐊᑯ ᒪᒃ ᒐ ᐛᐱᒥᔨᓐ ᓂᔅᐱᔅᑯᓂᒡ ᐃᑕᒐ: ᒪᒃ ᓂᑕᔅᑎᒥᐧᒄ ᓇᒪᐎᔾ ᒋᑭ ᒋ ᐛᐸᑕᑭᓄᐤ᙮”
Currently Selected:
ᐊᒃᓱᑕᔅ 33: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
