ᐊᒃᓱᑕᔅ 34
34
ᑲ ᐅᔅᑲᒋ ᐎᓱᐛᐅ-ᐊᓯᓂᔭ
1ᒂ ᐃᑕᑦ ᑎᐸᔨᒋᒐᓱᐤ ᒧᓱᓴ, “ᒐ ᒋᒥᓱᑥᐤ ᓂᓱ ᐊ ᐱᐱᒋᓯᒡ ᐊᓯᓂᔨᒡ ᒧᔭᒻ ᐅᔅᑭᒡ ᐊᓯᓂᔨᒡ, ᓂᑭ ᒥᓯᓇᐊᓐ ᐊᓐᑕ ᐸᐃᑯᑕᐤ ᐎᓱᐛᐅᓇ, ᒧᔭᒻ ᑲ ᒥᓯᐊᒪᓐ ᐊᓐᑕ ᐅᔅᑭᒡ ᓂᓱ ᐊᓯᓂᒡ, ᐊᓂᔭ ᑲ ᐱᑯᑕᔨᓐ᙮ 2ᒐ ᐊᔭᔅᑯᐎᔨᓐ ᐛᐸᒐ ᒐᒋᓴᐸᔭᒐ ᑭᔭ ᒐ ᐸᒋ ᓴᑭᒋᐛᔨᓐ ᓴᐃᓇᐃ ᐱᔅᑯᑎᓇᐤ ᒐᒋ ᓂᒋᔅᑯᐎᓐ ᐊᓐᑕ ᑕᐧᑯᒡ᙮ 3ᒐ ᐊᑲ ᓇᐃᒥᑦ ᐊᐛᓐ ᒐᒋ ᐎᒐᐅᔅᒄ, ᓇᒪ ᓂᑐᐛᔨᒪᐤ ᑯᑎᒃ ᐊᐛᓐ ᒐᒋ ᐃᑕᑦ ᐊᓐᑕ ᐱᔅᑯᑎᓇᒡ, ᒐ ᐊᑲ ᐊᐛᒡ ᓇᐃᒥᑥᐤ ᒋᑦ ᐊᐛᓯᓯᒧᐛᐅᒡ ᒐᒋ ᒥᒋᓱᐅᒡ ᐊᓐᑕ ᓂᑕᒥᑎᓐ᙮”
4ᐊᑯ ᒧᓱᔅ ᒂ ᒋᒥᓴᐧᒃ ᓂᓱ ᐊᓯᓂᔭ ᒧᔭᒻ ᐊᓂᔭ ᐅᔅᑭᒡ, ᐊᑯ ᒋᔭᒋᓴᐸᔭᔨᒡ ᒂ ᐃᑐᑕᐊᑦ ᐊᓯᓂᔭ ᐊᓐᑕ ᑕᐧᑯᒡ ᓴᐃᓇᐃ ᐱᔅᑯᑎᓇᒡ, ᒧᔭᒻ ᑲ ᐃᑎᓱᒥᑯᑦ ᑎᐸᔨᒋᒐᓱᐛ᙮ 5ᑎᐸᔨᒋᒐᓱᐤ ᒋᓴᒪᓂᑐᐤ ᒂ ᐸᒋ ᔭᓯᑦ ᑭᔅᑯᐅᓂᔅᑯᒡ ᑭᔭ ᐊᑯᑕ ᒂ ᐎᒋᑲᐳᔅᑐᐛᑦ ᒧᓱᓴ ᐊᓐᑕ ᐱᔅᑯᑎᓇᒡ ᑭᔭ ᒂ ᐎᑕᐧᒃ ᐅᑦ ᐃᓯᓂᐧᑲᓱᐅᓐ ᐎᔾ ᐃᔭᐅᑦ ‘ᑎᐸᔨᒋᒐᓱᐤ’᙮ 6ᐊᑯ ᑎᐸᔨᒋᒐᓱᐤ ᓂᑲᓐ ᐊᓐᑕ ᒂ ᐃᓯ ᐎᒪᔅᑯᐛᑦ ᒧᓱᓴ ᑭᔭ ᒂ ᐃᔅᒋᔄᑦ, “ᓂᔾ ᐅ ᑎᐸᔨᒋᒐᓱᐤ ᒋᓴᒪᓂᑐᐤ ᐊᓐ ᑲ ᓴᑭᔅᒋᓇᔅᑲᑯᑦ ᒋᓴᐛᑎᓯᐅᓂᔪᐤ ᑭᔭ ᒋᔅᑎᒪᒐᔨᒋᒐᐅᓂᔪᐤ, ᐊᑲ ᐎᐱᒡ ᒋᔄᓯᑦ ᑭᔭ ᑲ ᐛᔪᑎᓯᑦ ᓱᐛᔨᒋᒐᐅᓂᔪᐤ ᑭᔭ ᑕᑈᐅᒐᔨᑕᑯᓱᐅᓂᔪᐤ᙮ 7ᒧᔅ ᑲᒋᒡ ᓂᑭ ᓴᒋᐊᐎᒡ ᓂᑦ ᐃᔨᒥᒡ, ᓂ ᐛᐸᔨᑕᓐ ᒥᔭᑎᓯᐅᓐ ᑭᔭ ᒥᒋᑥᐅᓐ, ᒥᒄ ᐃᔭᐱᒡ ᓂᑭ ᐊᓏᔨᒪᐅᒡ ᐊᓐ ᐊᐛᓐᒋ ᑲ ᒥᒋᑐᑕᒡ᙮ ᐃᔅᐱ ᒥᒋᑐᑕᒂᐛ ᐃᔪᒡ ᓂᑭ ᐊᓏᔨᒪᐅᒡ ᑭᔭ ᐅᑦ ᐊᐛᓯᒧᐛᐛ ᑭᔭ ᐅᓯᒧᐛᐛ ᐱᐃᒻ ᓂᔅᑐ ᑭᔭ ᓇᐤ ᒐ ᐊᑎ ᐊᓂᔅᒐ ᐱᒪᑎᓯᒡ ᐅᑕᐎᐛᐛ ᐅᒥᒋᑥᐅᓂᔨᐛ ᐅᒋ᙮”
8ᒧᓱᔅ ᒂ ᓂᐱᔅᑯᐱᑦ ᑭᔭ ᒂ ᐊᑎ ᐊᔭᒥᐊᔅᑐᐛᑦ ᑎᐸᔨᒋᒐᓱᐛ᙮ 9ᒂ ᐃᑕᑦ ᒧᓱᔅ, “ᑎᐸᔨᒋᒐᓱᐤ, ᓇᔅᒡ ᒪᔽᔨᑎᒥᑐᐛᓇ, ᓂ ᐱᑯᓴᔨᑕᓐ ᒐᒋ ᐎᒐᐎᔭᒡ᙮ ᒋ ᑕᑈᓐ ᐊᓐ ᐊ ᐃᔅᒋᔄᔨᓐ ᐊ ᒥᒋᑐᑕᒡ ᐅᒡ ᐃᔪᒡ ᑭᔭ ᐊ ᐊᑲ ᓇᐃᑕᒡ ᒐᒂᔪᐤ ᑲ ᐃᑎᓱᐛᔨᓐ, ᒥᒄ ᐛᐸᔨᑎᒧᐅᓇᓐ ᓂᒥᒋᑥᐅᓇᓇ ᑭᔭ ᐅᑎᓂᓇᓐ ᒋᔾ ᒐ ᐅᑦ ᐃᔨᒥᑐᐅᔭᒡ ᒧᔅ ᑲᒋᒡ᙮”
10ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᐊᓄᒡ ᓂ ᐃᑐᑎᒧᐛᐅᒡ ᐃᔅᕋᐃᓪ ᐃᔪᒡ ᓂᔅᑯᒥᑐᐅᓂᔪᐤ, ᐅᑎᔅᑯᐤ ᐊᔨᑕᒡ ᐃᔪᒡ ᓂᑭ ᑐᑕᓐ ᒪᒥᔅᑲᒡ ᒐᒂᓇ ᐊᑲ ᓂᑕ ᐛᐸᑕᑭᓄᐅᒋ ᐅᑕ ᐊᔅᒋᒡ᙮ ᒥᓯᐛ ᐃᔪᒡ ᒋᑭ ᐛᐸᑎᒧᒡ ᐅᔭ ᑭᔭ ᒋᑭ ᒋᔅᒐᔨᑎᒧᒡ ᓂᔾ, ᑎᐸᔨᒋᒐᓱᐤ, ᒐ ᐃᑐᑎᒧᐅᒂᐤ ᒪᒥᔅᑲᒡ ᒐᒂᔪᐛ᙮ 11ᒐ ᓂᓇᐃᑎᒥᓐ ᑕᓐ ᐊᐃᑎᓱᒥᑕᓐ ᐊᓄᒡ ᒐᓯᑲᒡ᙮ ᓂᑭ ᐃᑲᑎᓴᐛᐅᒡ ᐅᑎᔅᑯᐤ ᐊᐃᑕᔨᓐ ᐊᒧᕆ ᐃᔪᒡ, ᑲᐃᓇᓐ ᐃᔪᒡ, ᐊᑦ ᐃᔪᒡ, ᐸᕆᔅ ᐃᔪᒡ, ᐃᑉ ᐃᔪᒡ, ᒐᐱᐅᔅ ᐃᔪᒡ, ᒥᒄ ᒋᑭ ᐎ ᑐᑕᓐ ᒐᒂᓐ ᒐ ᐃᑎᓱᒥᑕᓐ ᐊᓄᒡ᙮ 12ᒐ ᐊᑲ ᐃᑐᑎᒪᒄ ᓂᔅᑯᒧᐅᓇ ᐊᓯᒡ ᐊᓐᒡ ᐃᔪᒡ ᐛᒋᒡ ᐊᓐᑕ ᐊᔅᒋᒡ ᒐ ᐃᑐᑕᔨᓐ᙮ ᐃᑐᑎᒥᓇ ᒪᒃ ᐅ, ᒧᔭᒻ ᐊ ᑕᐱᒂᑎᑯᐎᔨᓐ ᒋᑭ ᐃᓯᓇᑯᓐ᙮ 13ᒐ ᐱᑯᓂᒺᒄ ᐅᐱᔅᑎᓂᒐᐅᓇᐱᔅᑯᒧᐛᐛ ᑭᔭ ᒐ ᓂᓱᐅᓇᒋᑕᐛᒄ ᐅᐸᔭᒋ ᓯᑥᔅᑲᐃᑭᓄᐛᐛ ᑭᔭ ᒐ ᒋᒪᐅᒪᑯᐤ ᐊᓂᔭ ᒥᔅᑎᒂ ᐃᔭᐱᒐᐊᒡ ᐊᔭᒥᐊᔅᑐᐛᒡ ᐅᑦ ᐃᔎᐅ-ᒥᓂᑐᐧᑲᓂᒧᐛᐛ ᐊᓱᕋᔨᒋ᙮ 14ᓂᔾ ᒥᒄ ᒐ ᐊᔭᒥᐊᔅᑐᐅᔭᒄ, ᒐ ᐊᑲ ᐊᔭᒥᐊᔅᑐᐛᑯᒡ ᑯᑎᑭᒡ ᒥᓂᑐᐅᒡ, ᐛᔅ ᓂᔾ ᑎᐸᔨᒋᒐᓱᐤ ᓂ ᒋᔨᐛᐤ ᒋᓴᒪᓂᑐᐅᓐ᙮
15ᒐ ᐊᑲ ᐃᑐᑎᒪᒄ ᓂᔅᑯᒥᑐᐅᓐ ᐊᓯᒡ ᐊᓐᒡ ᐃᔪᒡ ᐊᓐᑕ ᐛᒋᒡ ᐊᔅᒋᒡ ᐅᓴᒻ ᐃᔅᐱ ᐊᔭᒥᐊᔅᑐᐛᑥᐛ ᐅᒥᓂᑐᐅᒧᐛᐛ ᑭᔭ ᒥᑐᔅᑕᐊᒧᐛᑥᐛ, ᒋᑭ ᐎᓴᒥᑯᐛᐅᒡ ᒐᒋ ᒥᒍᐛᒄ ᐊᓂᔭ ᒥᒋᒥᔪᐤ ᑲ ᒥᑐᔅᑕᐊᒧᐛᒡ ᐅᒥᓂᑐᐅᒧᐛᐛ᙮ 16ᐃᔭᐱᒡ ᒋᑯᓱᐛᐅᒡ ᒋᑭ ᐎ ᐎᒋᒪᐅᒡ ᐊᓂᔭ ᐅᑕᓂᓯᔨᐛ ᑭᔭ ᒋᑭ ᓯᒋᒥᑯᐅᒡ ᒐᒋ ᐊᔭᒥᐊᔅᑐᐅᒪᒡ ᐊᓂᔭ ᐅᒥᓂᑐᐅᒥᔪᐛ᙮
17ᒐ ᐊᑲ ᐅᓯᐊᑯᒡ ᐊ ᐃᓴᑯᐅᒡ ᒥᓂᑐᐧᑲᓐᒡ ᒐᒋ ᐊᔭᒥᐊᔅᑐᐛᑯᒡ᙮
18ᒐ ᐊᑲ ᐅᓂᒋᔅᒋᑎᒪᒄ ᒥᑯᓴᐤ ᒋᓯᒄ ᐊᑲ ᐅᐱᓱᑦ ᐸᒂᓯᑭᓐ, ᒧᔭᒻ ᑲ ᐃᑎᓱᒥᑎᑯᒡ᙮ ᓂᔄᐅᑕᒡ ᑕᑐᐤ ᒋᓯᑲᐛ ᐃᔅᐱᔅ ᒋᑭ ᒧᐛᐛᐤ ᐊᑲ ᐅᐱᓱᑦ ᐸᒂᓯᑭᓐ ᐊᐱᑉ ᐱᓯᒧᒡ ᐛᔅ ᐊᐅᑯᐤ ᐱᓯᒻ ᐃᒋᑉᑎᒡ ᑲ ᐅᒋ ᐎᐎᔭᒄ᙮
19ᒥᓯᐛ ᐅᔅᑭᒡ ᓂᔭᐸᐅᒡ ᒋᑦ ᐊᐛᓯᓯᒧᐛᐅᒡ ᑭᔭ ᒋᓇᐸ ᐊᐛᓯᓯᒧᐛᐅᒡ ᓂᔾ ᓂ ᑎᐸᔨᒪᐅᒡ᙮ 20ᐅᔅᑭᒡ ᑲᓂᐧᑲᑎᓯᑦ ᒋᓇᐸ ᑲᐸᐃᑭᔎᒧᐛᐤ ᐃᔭᐱᒡ ᓂᔾ ᓂᑎᐸᔨᒪᐤ᙮ ᒋᑭ ᒋ ᐱᒪᒋᑕᐛᓇᐛᐤ ᐅᐱᒪᑎᓯᔪᐅᓐ ᐅᔅᑭᒡ ᑲᓂᐧᑲᑎᓯᑦ ᑲᐸᐃᑭᔎᐤ ᐊ ᒥᑐᔅᑕᐊᒪᒐᔭᒄ ᒪᔭᑕᓂᔅ᙮ ᐊᑲ ᑭᓄᐛᔨᒪᒂ ᒪᔭᑕᓂᔅ ᒋᑭ ᐎ ᓇᑥᑯᐎᐛᓇᐛᐤ ᑲᓂᐧᑲᑎᓯᑦ ᑲᐸᐃᑭᔎᐤ᙮ ᒋᑭ ᐎ ᐱᒪᒐᐛᐅᒡ ᐅᔅᑭᒡ ᓂᔭᐸᐅᒡ ᒋᑯᓱᐛᐅᒡ᙮ ᓇᓂᑎᒻ ᒋᑭ ᐎ ᒥᔨᓇᐛᐤ ᐱᔅᑎᓂᒐᐅᓐ ᑕᑥᐤ ᓂᔭᒋ ᐊᔭᒥᐊᔅᑐᐎᔭᑯᐤ᙮
ᒐ ᐸᑕᔭᒄ ᐱᔅᑎᓂᒐᐅᓐ ᑕᑥᐤ ᑕᑯᓯᓂᔭᑯᐤ ᒐᒋ ᐊᔭᒥᐊᔭᒄ᙮
21ᐊᓱᑕᒡ ᑕᑐᐤ ᒋᓯᑲᐛ ᒋᑭ ᐊᑐᔅᒐᓇᐛᐤ ᐊᑯ ᓂᔄᐅᑕᒡ ᐊ ᒋᓯᑲᒡ ᒋᑭ ᐊᔭᔅᑕᔅᑯᓯᓇᐛᐤ᙮ ᐊᑎᓱᐧᒄ ᒐ ᒋᐱᓇᓄᒋ ᐊ ᓂᑕᐅᒋᒐᓄᐅᒡ ᑭᔭ ᐊ ᒪᒧᓴᒋᓇᑭᓄᐅᒡ᙮
22ᐊᓯᑯᒻ ᐱᐳᓇ ᒐ ᒥᑯᓴᔭᒄ ᑲ ᒪᒧᓴᒋᓂᑭᓄᐅᒡ ᑲ ᓂᑕᐅᒋᒡ ᒥᒋᒻ ᒥᑯᓴᐅᓐ ᐃᔅᐱ ᒐᒋᐱᔭᑯᐤ ᐊ ᒪᒧᓴᒋᓂᒪᒄ ᐅᔅᑭᒡ ᑲ ᓂᑕᐅᒋᒡ ᐸᒂᓯᑭᓂᒥᓐ ᑭᔭ ᐃᔭᐱᒡ ᒐ ᒥᑯᓴᔭᒄ ᐛᔅᑲᐃᑭᓇ ᒥᑯᓴᐅᓐ ᑕᒂᒋᒋ ᐃᔅᐱ ᒋ ᐃᓯ ᒪᒧᓴᒋᓂᒪᒂ ᒥᔅᑎᑯᒡ ᓂᑕᐅᒋᑕᑭᓇ᙮ 23ᓂᔍᐤ ᐸᐃᑯᐳᓇ ᒥᓯᐛ ᓇᐸᐤ ᒋᑭ ᑎᑯᓯᓐ ᒐᒋ ᐊᔭᒥᐊᔅᑐᐅᑦ ᓂᔾ ᑎᐸᔨᒋᒐᓱᐤ ᐃᔅᕋᐃᓪ ᐃᔪᒡ ᐅᒋᓴᒪᓂᑐᒧᐛᐛ᙮ 24ᓂᑭ ᐃᑲᑎᓴᐛᐅᒡ ᐃᔪᒡ ᐊᓐᑕ ᐊᔅᒋᒡ ᒐ ᐎᒋᔭᒄ ᑭᔭ ᓂᑭ ᒥᓯᑕᓐ ᒋᑦ ᐊᔅᒋᐛᐤ, ᓇᒪ ᐊᐛᓐ ᒋᑭ ᒋ ᒥᔅᑭᒥᑯᐛᐤ ᒋᑦ ᐊᔅᒋᐛᐅᔪᐤ ᐃᔅᐱ ᐸᒋ ᐊᔭᒥᐊᔅᑐᔭᑯᐤ ᓂᔍᐤ ᐊᓯᑯᒻ ᐱᐳᓇ᙮
25ᐃᔅᐱ ᒪᑐᔅᑕᒧᐅᔭᑯᐤ ᐊᐛᓯᔅ ᒐ ᐊᑲ ᐊᓯᒡ ᒥᑐᔅᑕᐊᒧᐅᔭᒄ ᓯᐅᔅᑎᒪᑭᓐ᙮ ᒐ ᐊᑲ ᓇᔅᑎᔅ ᐃᔅᑯᓂᒪᒄ ᐎᔭᔅ ᑲ ᒥᑐᔅᑕᐊᒪᒐᓄᐅᒡ ᐎᒪᔅᑲᒐᐤ ᒥᔅᑯᓴᐅᓂᒡ ᒐᒋᓴᐸᔭᒐ᙮
26ᓂᔾ ᐅ ᑎᐸᔨᒋᒐᓱᐤ ᒋᒋᓴᒪᓂᑐᒧᐛᐤ᙮ ᒋᑭ ᐎ ᐸᑕᓇᐛᐤ ᐅᔅᑭᒡ ᑲ ᒪᒧᓴᒋᓂᒪᒄ ᑲᓂᑕᐅᒋᑕᔭᒄ ᐊᓐᑕ ᐸᔭᒋ-ᐱᒍᐎᔭᓂᒋᐛᐱᒡ, ᒐ ᐊᑲ ᐅᓱᐛᒃ ᒪᔭᑕᓂᔅ ᐊᓐᑕ ᐅᑲᐎᔭ ᐅᒋᒋᓇᐳᒥᔨᒡ᙮”
27ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᒐ ᒥᓯᓇᑕᐊᒥᓐ ᐅᔭ ᐃᔨᒧᐅᓇ ᑲ ᐎᑎᒪᑕᓐ᙮ ᐅᔭ ᐅᒡ ᑲ ᒥᔨᑕᓐ ᐎᓱᐛᐅᓇ, ᒋᒋ ᓂᔅᑯᒧᐅᓐ ᒋ ᐃᑐᑎᒪᑎᓐ ᐊᓯᒡ ᐃᔅᕋᐃᓪ ᐃᔪᒡ᙮” 28ᓇᐎᔪᐛᒋᓯᑲᐛ ᑭᔭ ᓇᐎᔪᐛᑎᐱᔅᑲᐛ ᐃᔅᐱᔅ ᓇᒪ ᐅᒋ ᓂᑎᒋᐛᐤ ᒧᓱᔅ ᐱᔅᑯᑎᓇᔪᐤ ᑭᔭ ᓇᒪ ᐅᒋ ᒥᒋᓱᐤ ᑭᔭ ᓇᒪ ᐅᒋ ᒥᓄᐤ ᓂᐱᔪᐤ᙮ ᒋ ᒥᓯᓇᑕᐊᒻ ᓂᔅᑯᒧᐤ ᐃᔨᒧᐅᓇ ᐊᓐᑕ ᐊᓯᓂᒡ, ᐊᐅᑯᔪᐛ ᐸᐃᑯᔪᐤ ᐃᑎᓱᐛᐅᓇ᙮
ᒧᓱᔅ ᑲ ᓂᑎᒋᐛᑦ ᓴᐃᓇᐃ ᐱᔅᑯᑎᓇᔪᐤ
Exodus 34.29-35 (Transfiguration Year C)
29ᐃᔅᐱ ᒧᓱᔅ ᐱᔭᒋ ᓂᑎᒋᐛᑦ ᓴᐃᓇᐃ ᐱᔅᑯᑎᓇᔪᐤ ᐅᒡ, ᐊ ᑕᐧᑯᓇᐧᒃ ᐸᐃᑯᔪᐤ ᐃᑎᓱᐛᐅᓇ, ᓇᒪ ᐅᒋ ᒋᔅᒐᔨᑎᒻ ᒪᒃ ᐊᐛᔅᑕᔨᒡ ᐅᑕᔅᑎᒥᐧᒄ ᐛᔅ ᐊᒋ ᐃᔨᒪᐊᑦ ᒋᓴᒪᓂᑐᐛ᙮ 30ᐃᔅᐱ ᐊᕋᓐ ᑭᔭ ᒥᓯᐛ ᐃᔅᕋᐃᓪ ᐃᔪᒡ ᒐ ᑕᐱᒪᒡ ᒧᓱᓴ ᑭᔭ ᐎᔭᐸᑎᒺᒡ ᐊᐛᔅᑕᔨᒡ ᐅᑕᔅᑎᒥᐧᑯᔪᐤ, ᒋ ᑯᔅᑕᐅᒡ ᒥᒋᒪ ᒐᒋ ᓇᑕᒡ᙮ 31ᒥᒄ ᒧᓱᔅ ᒋ ᑕᑈᑕᐤ, ᐊᕋᓐ ᑭᔭ ᑲ ᓂᑲᓇᔨᑕᑯᓯᒡ ᐃᔪᒡ ᒋ ᐸᒋ ᓇᑕᐅᒡ ᑭᔭ ᐊ ᐃᔨᒥᑯᒡ ᒧᓱᓴ᙮ 32ᐊᑯ ᒥᓯᐛ ᐃᔅᕋᐃᓪ ᐃᔪᒡ ᐱᔭᒋ ᐛᔅᑲᑲᐳᔅᑐᐛᒡ ᑭᔭ ᒧᓱᔅ ᒂ ᒥᔭᑦ ᐊᓂᔭ ᐃᑎᓱᐛᐅᓇ ᑲ ᒥᔨᑯᑦ ᑎᐸᔨᒋᒐᓱᐛ ᐊᓐᑕ ᓴᐃᓇᐃ ᐱᔅᑯᑎᓇᒡ᙮
33ᐊᔅᒄ ᒧᓱᔅ ᒋ ᐛᔅᑕᔪᐤ ᐅᑕᔅᑎᒥᐧᒄ ᑭᔭ ᑲᒋ ᐃᓯ ᐃᔨᒪᐊᑦ ᒧᓱᔅ ᐃᔪᐛ, ᐊᑯᐛᐱᒂᐅᓂᔪᐤ ᒋ ᐊᑯᓇᐊᒻ ᐅᑕᔅᑎᒥᐧᒄ᙮ 34ᐃᔅᐱ ᒧᓱᔅ ᐸᒐᒋ ᐸᔭᒋ-ᐱᒍᐎᔭᓂᒋᐛᐱᔪᐤ ᒐᒋ ᐃᔨᒪᐊᑦ ᑎᐸᔨᒋᒐᓱᐛ, ᒋ ᒥᓂᒻ ᐊᑯᐛᐱᒂᐅᓂᔪᐤ ᑭᔭ ᐃᔅᐱ ᐸᒋ ᐎᐎᔨᒋ, ᒋ ᐎᑎᒧᐛᐤ ᐃᔅᕋᐃᓪ ᐃᔪᐛ ᒥᓯᐛ ᒐᒂᔪᐤ ᑲ ᐃᑎᑯᑦ ᑎᐸᔨᒋᒐᓱᐛ ᒐᒋ ᐃᔅᒋᔄᑦ᙮ 35ᑭᔭ ᐃᔪᒡ ᒋ ᐛᐸᑎᒺᐅᒡ ᒧᓱᓴ ᐊᐛᔅᑕᔨᒡ ᐅᑕᔅᑎᒥᐧᑯᔪᐤ ᑭᔭ ᑲᐤ ᐊᑯᐛᐱᒂᐅᓂᔪᐤ ᒋ ᐊᑯᓇᐊᒻ ᐅᑕᔅᑎᒥᐧᒄ ᐸᑐᔅ ᒥᓐ ᐸᒐᒋ ᐸᔭᒋ-ᐱᒍᐎᔭᓂᒋᐛᐱᔪᐤ ᒐᒋ ᐃᔨᒪᐊᑦ ᑎᐸᔨᒋᒐᓱᐛ᙮
Currently Selected:
ᐊᒃᓱᑕᔅ 34: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
