ᐊᒃᓱᑕᔅ 35
35
ᒍᐤ ᐊᔭᒥᐊᐅᒋᓯᑲᒡ ᐎᓱᐛᐅᓇ
1ᒧᓱᔅ ᒂ ᒪᒧᓇᑦ ᐃᔅᕋᐃᓪ ᐃᔪᐛ ᑭᔭ ᒂ ᐃᑕᑦ, “ᐊᐅᑯᔪᐛ ᐅᔭ ᒐᒂᔪᐛ ᑲ ᐃᑎᓱᐛᑦ ᑎᐸᔨᒋᒐᓱᐤ ᒐ ᐃᑐᑎᒺᒄ: 2ᐊᓱᑕᒡ ᑕᑐᐤ ᒋᓯᑲᐛ ᒋᑭ ᐃᔅᐱᔅ ᐊᑐᔅᒐᓇᐛᐤ᙮ ᒥᒄ ᐊᓐ ᓂᔄᐅᑕᒡ ᐊ ᒋᓯᑲᒡ ᒋᑭ ᐎ ᐊᔭᔅᑕᔭᔅᑯᓯᓇᐛᐤ, ᐊᐅᑯᓐ ᐊ ᐸᔭᒋ ᒋᓴᑲᒡ ᑎᐸᔨᒋᒐᓱᐤ ᑕᐸᔨᑕᐧᒃ, ᐊᐛᓐ ᒐ ᐊᑐᔅᒐᒂ ᐊᓂᔭ ᒋᓯᑯᔪᐤ ᒋᑭ ᓂᐸᐊᑭᓄᐤ᙮ 3ᒐ ᐊᑲ ᐃᔭᐱᒡ ᑯᑐᐛᔭᒄ ᒋᒋᐛᐛᒡ ᐊᓐ ᒋᓯᒄ᙮”
ᒐ ᐱᔅᑎᓇᑭᓄᐅᒋ ᒥᔨᐛᐅᓇ ᐸᔭᒋ-ᐱᒍᐎᔭᓂᒋᐛᐱᒡ
4ᐊᑯ ᒧᓱᔅ ᑲ ᐃᑕᑦ ᒥᓯᐛ ᐃᔅᕋᐃᓪ ᐃᔪᐛ, “ᐊᐅᑯᔪᐤ ᐅᔭ ᑲ ᐃᑎᓱᐛᑦ ᑎᐸᔨᒋᒐᓱᐤ ᒐᒋ ᐃᑐᑎᒺᒄ: 5ᒐ ᒥᔭᒄ ᑎᐸᔨᒋᒐᓱᐤ ᒥᔨᐛᐅᓇ᙮ ᒥᓯᐛ ᐊᐛᓐ ᒋᑭ ᒋ ᐸᑕᐤ ᒥᔨᐛᐅᓇ ᐊ ᐎᔄᐅᓇᔭᐱᔅᑯᔨᒋ, ᐊ ᓱᓇᔭᐱᔅᑯᔨᒋ ᑭᔭ ᐊ ᐎᔄᐛᐱᔅᑯᔨᒋ; 6ᑲ ᐱᔅᑭᓂᓯᒡ, ᑲ ᐱᒋᒥᓇᑯᓯᒡ ᑭᔭ ᑲ ᒥᐧᑯᓯᒡ ᐊᓯᑭᓂᔭᐱᔨᒡ; ᑲ ᒥᔽᓯᒡ ᐱᒍᐎᔭᓐ; ᒥᔅᑐᓯᔅ ᐅᐱᐎᔭ; 7ᓇᐸ ᒪᔭᑕᓂᓱᔭᓐ ᐊ ᒋᓯᓇᑭᓄᐅᑦ; ᐊ ᒥᔽᒡ ᐱᓴᑭᓐ; ᐊᑲᓯᔭ ᒥᔅᑎᒄ; 8ᐱᒥᔾ ᒐᒋ ᐛᔅᑕᓂᑲᐛᒐᓄᐅᒡ; ᓂᐱᓯᔭ ᑲᐎᒋᒪᑯᓯᔨᒋ ᒐᒋ ᒪᒧᐱᑕᑭᓄᐅᒋ ᐊᓐᑕ ᑐᒥᓂᒐᐅ-ᐱᒥᒡ ᑭᔭ ᐎᒋᒪᓯᑭᓂᒡ; 9ᑲ ᓱᓇᔭᐎᒋ ᐊᓯᓂᔭ ᐅᓂᒃᔅ ᐊᓯᓂᐧᑲᑕᒋ ᑭᔭ ᑯᑎᒂ ᑲ ᓱᓇᔭᐎᔨᒋ ᐊᓯᓂᔭ, ᒐᒋ ᒋᑭᒧᑕᑭᓄᐎᔨᒋ ᐊᓐᑕ ᐊᔅᐱᒋᑯᓇᐅᓂᒡ ᑭᔭ ᐱᑕᓱᐅᓂᒡ ᐊᔭᒥᐊᐅᒋᒪᐤ ᐅᑦ ᐊᐱᒋᑕᐅᓂᒡ᙮
10ᑲᓄᐛᔨᑎᒧᒂ ᐊᐛᓐ ᑭᔅᒋᐅᓂᔪᐤ ᒋᐸ ᐅᓯᑕᐤ ᐊᓂᔭ ᒐᒂᔪᐛ ᑎᐸᔨᒋᒐᓱᐤ ᑲ ᐃᑎᓱᐛᑦ᙮ 11ᐸᔭᒋ-ᐱᒍᐎᔭᓂᒋᐛᐱᔪᐤ ᑭᔭ ᐊᑯᐛᑲᐃᑭᓇ ᑭᔭ ᓯᐸᔅᑯᓂᑭᓇ, ᑭᔭ ᐊᓂᔭ ᐛᔅᑲᔭᔅᑯᓂᑭᓇ᙮ 12ᑭᔭ ᐸᔭᒋ-ᒥᐅᑎᔪᐤ ᐊᓯᒡ ᒥᔅᑎᒂ ᑭᔭ ᐊᑯᐛᑲᐃᑭᓐ ᒐᒋ ᐊᑯᐛᑲᐃᑭᓄᐅᒡ ᒪᐅᒡ ᐸᔭᒋᓇᒂᒡ ᑲᐱᔅᒋᒐᔭᒡ᙮ 13ᒥᒋᓱᐛᑭᓇᑎᒄ ᑭᔭ ᒥᔅᑎᒂ ᒐ ᐅᒋ ᑕᐧᑯᓇᑭᓄᐅᒡ ᒥᒋᓱᐛᑭᓇᑎᒄ ᑭᔭ ᒐᒂᔪᐛ ᒐ ᐊᐱᑎᓂᔨᒋ ᒥᒋᓱᐛᑭᓇᑎᑯᒡ ᑭᔭ ᑲ ᐸᔭᒋᓯᑦ ᐸᒂᓯᑭᓐ᙮ 14ᐛᔅᑕᓂᐱᒪᑭᓇᑎᒄ ᒐ ᒋᒥᓱᒡ ᐛᔅᑕᓂᐱᒪᑭᓐᒡ ᑭᔭ ᒐ ᐊᐱᑎᓂᔨᒋ ᒐᒂᔪᐛ ᑭᔭ ᐱᒥᔾ ᒐ ᐛᔅᑕᓂᑲᐛᒐᓄᐅᒡ ᐛᔅᑕᓂᐱᒪᑭᓂᒡ, 15ᑭᔭ ᐱᔅᑎᓂᒐᐅᓇᐱᔅᒄ ᐊᓐᑕ ᒐ ᓯᔅᑲᐃᑭᓂᔨᒋ ᑲᐎᒋᒪᑯᓯᔨᒋ ᑭᔭ ᒥᔅᑎᑯᒡ ᒐ ᐅᒋ ᑕᐧᑯᓂᑭᓄᐅᒡ ᐱᔅᑎᓂᒐᐅᓇᐱᔅᒄ᙮ ᑐᒥᓂᒐᐅ-ᐱᒥᔾ ᑭᔭ ᐎᒋᒪᓯᑭᓐ, ᐊᑯᐛᑲᐃᑭᓐ ᐊᓐᑕ ᒐ ᐊᑯᑕᒡ ᐛᒋ ᐱᔨᒐᓄᐅᒡ ᐸᔭᒋ-ᐱᒍᐎᔭᓂᒋᐛᐱᒡ᙮ 16ᒥᑐᔅᑕᐊᒪᒐᐅᓇᐱᔅᒄ ᐊᓯᒡ ᐊ ᐎᔄᐱᔅᑲᒡ ᐃᐸᐱᔅᒄ ᑭᔭ ᒥᓯᐛ ᒐᒂᓐ ᐊᓐᑕ ᐊ ᐃᑕᐱᑎᒡ ᐊᓯᒡ ᐛᐸᑲᐅᓱᔭᑭᓂᔪᐤ, ᑭᔭ ᐊᓐᑕ ᒐ ᑕᐧᑯᑎᔅᑕᒡ᙮ 17ᐊᑯᐛᑲᐃᑭᓇ ᒐ ᒋᑭᒧᒋ ᐊᑐᐛᒡ ᐛᔅᑲ ᐸᔭᒋ-ᐱᒍᐎᔭᓂᒋᐛᐱᒡ ᑭᔭ ᓯᑥᔎᐃᑭᓐᒡ ᑭᔭ ᑕᑕᐃᑭᓐᒡ, ᐊᑯᐛᑲᐃᑭᓐ ᒐ ᐊᑯᑕᒡ ᐊᓐᑕ ᐛᒋ ᐱᒐᓄᐅᒡ᙮ 18ᑭᔭ ᒋᔅᑕᐸᒋᑭᓇ ᑭᔭ ᐊᐱᓴ ᒐ ᐊᐱᑎᒋ ᐸᔭᒋ-ᐱᒍᐎᔭᓂᒥᒋᐛᐱᒡ ᑭᔭ ᐊᓐᑕ ᐊᑐᐛᒡ ᐛᔅᑲ ᒐᐸᐃᑭᓄᐅᒡ᙮ 19ᑭᔭ ᑲ ᒥᔽᓯᔨᒋ ᐊᔭᒥᐊᐅ-ᐊᐱᒋᑕᐅᓇ ᐊᕋᓐ ᑭᔭ ᐅᑯᓴ ᒐ ᒋᔅᑲᒡ ᑐᑕᐧᑲᐛ ᐅᑦ ᐊᔭᒥᐊᐅ-ᐊᑐᔅᒐᐅᓄᐛ ᐊᓐᑕ ᐸᔭᒋ-ᐱᒍᐎᔭᓂᒋᐛᐱᒡ᙮”
20ᐊᑯ ᒥᓯᐛ ᐃᔪᒡ ᒂ ᒋᐛᒡ, 21ᑭᔭ ᒥᓯᐛ ᐊᐛᓐᒋ ᑲ ᐎ ᒥᔭᒡ ᒥᔨᐛᐅᓇ ᑎᐸᔨᒋᒐᓱᐛ, ᒋᐸᑕᐅᒡ ᒐᒋ ᐊᐱᒋᑕᑭᓄᐎᒋ ᐊᓐᑕ ᐸᔭᒋ-ᐱᒍᐎᔭᓂᒋᐛᐱᒡ ᑭᔭ ᐊᔭᒥᐊᓄᐎᒋ ᑭᔭ ᒐ ᐊᐱᑎᓂᔨᒋ ᐊ ᐅᓯᑕᑭᓂᐎᒋ ᐸᔭᒋ ᐊᔭᒥᐊᐅ-ᐊᐱᒋᑕᐅᓇ᙮ 22ᒥᓯᐛ ᓇᐸᐤ ᑭᔭ ᐃᔎᐤ ᐛ ᐱᔅᑎᓇᐧᒃ ᒥᔨᐛᐅᓇ ᒋ ᑎᑯᓯᓄᐤ ᐊᐸᑕᑦ ᒥᓯᐛ ᐊ ᐃᓯᓇᑯᓂᔨᒋ ᐊ ᐎᔄᐅᓱᓇᔭᐱᔅᑯᔨᒋ ᐛᐛᓯᐅᓇᐱᔎ, ᒋᔅᑕᐸᓱᓇ, ᒥᑐᑲᒡ ᑲ ᐳᔅᑲᑭᓄᐅᒋ, ᑕᐱᒋᒐᐱᓱᓇ, ᑭᔭ ᒐᒂᔪᐛ ᐎᔄᐅᓱᓇᔭᐱᔅᑯᒡ ᐊᐅᒡ ᐅᓯᑕᑭᓄᐎᒋ ᐛ ᐊᑎᒥᔅᑯᐛᑦ ᑎᐸᔨᒋᒐᓱᐛ᙮ 23ᒥᓯᐛ ᐊᐛᓐ ᒋ ᐸᓱᐛᐤ ᑲ ᑭᓄᐛᔨᒪᑦ ᑲ ᐱᔅᑯᓂᓯᔨᒋ, ᑲ ᐱᒋᒥᓇᑯᓯᔨᒋ ᑭᔭ ᑲ ᒥᐧᑯᓯᔨᒋ ᐊᓯᑭᓂᔭᐱᔭ ᑭᔭ ᐊ ᒥᔽᔨᒡ ᐱᒍᐎᔭᓂᔪᐤ ᑭᔭ ᑲ ᐅᑦ ᐊᔅᑭᓂᓯᔨᒋ ᐅᐱᐎᔪᐛ ᑭᔭ ᐊ ᒋᓯᓇᑭᓄᔨᒋ ᓇᐸ ᒪᔭᑕᓂᓱᔭᓇ ᑭᔭ ᐊ ᒥᔽᔨᒡ ᐱᓴᑭᓂᔪᐤ᙮ 24ᒥᓯᐛ ᐊᐛᓐ ᑲ ᑭᓄᐛᔨᑕᐧᒃ ᓱᓇᔭᐅᐱᔅᑯᔪᐤ ᑭᔭ ᑲ ᐎᔄᐛᐱᔅᑯᔨᒡ ᒋ ᐸᑕᐅᒡ ᒂ ᒥᔭᒡ ᑎᐸᔨᒋᒐᓱᐛ ᑭᔭ ᐊᐛᓐ ᑲ ᑭᓄᐛᔨᒪᑦ ᒋ ᐸᓱᐛᐤ ᐊᑲᓯᔭ ᒥᔅᑎᒂ ᒐᒋ ᐊᐱᒋᐊᑭᓄᐎᒋ ᐊᑐᔅᑲᓄᐎᒡ᙮ 25ᐃᔎᐅᒡ ᐃᔭᐱᒡ ᒋ ᐸᑕᐅᒡ ᐊᓂᔭ ᑲ ᐃᓯ ᐛᓯᑕᒡ: ᑲ ᐱᔅᑭᓂᓯᔨᒋ ᑭᔭ ᑲ ᐱᒋᒥᓇᑯᓂᔨᒋ ᑭᔭ ᑲ ᒥᐧᑯᓯᔨᒋ ᐱᒍᐎᔭᓇ ᑭᔭ ᐊᓂᔭ ᐛᒋ ᒥᔽᓯᔨᒋ ᐱᒍᐎᔭᓇ᙮ 26ᑭᔭ ᐊᓐᒡ ᐃᔎᐅᒡ ᑲ ᐛᓴᐊᒡ ᐱᒍᐎᔭᓇ ᑲ ᐅᑦ ᐊᔅᑭᓂᓯᔨᒋ ᐅᐱᔅᑲᐅᓂᔪᐛ ᒋ ᒥᔽᔨᑎᒧᒡ ᒐᒋ ᑎᒥᔅᑲᒐᒡ᙮ 27ᐅᒋᒪᐅᒡ ᒋ ᐸᑕᐅᒡ ᐊᓂᔭ ᐊ ᒥᔪᓯᔨᒋ ᑲ ᓱᓇᔭᐎᒋ ᐊᓯᓂᔭ ᐅᓂᒃᔅ ᐊᓯᓂᐧᑲᑕᒋ (ᑲ ᐎᐸᒋ ᐊᓯᓂᔭ) ᒐᒋ ᒋᑭᒧᑕᑭᓄᐎᔨᒋ ᐊᓐᑕ ᐊᕋᓐ ᐅᐸᔭᒋ ᐊᔅᐱᒋᑯᓇᐅᓂᒡ ᑭᔭ ᐱᑕᓱᐅᓂᒡ᙮ 28ᐃᔭᐱᒡ ᒋ ᐸᓱᐛᐅᒡ ᐸᔭᒋ ᐱᒥᔭ ᒐᒋ ᓯᔅᑲᐛᑭᓄᒡ ᐛᔅᑕᓂᐱᒪᑭᓐᒡ ᑭᔭ ᒋ ᐸᑕᐅᒡ ᐊᓂᔭ ᑲ ᐎᒋᒪᑯᓯᔨᒋ ᒐᒋ ᐅᒋ ᐊᒥᔅᒐᔨᑭᓄᐅᒋ ᐎᒋᒪᓯᑭᓇ ᑭᔭ ᐱᒥᔭ ᒐ ᐊᐱᒋᐊᑭᓄᒡ ᐊ ᐅᓯᐊᑭᓄᐅᒡ ᐊᔭᒥᐊᐅᒋᒪᐅᒡ᙮ 29ᒧᓱᔅ ᒋ ᐎᑎᒧᐛᐤ ᐃᔪᐛ ᒐᒂᔪᐛ ᓇᑐᐛᔨᑎᒥᔨᒋ ᑎᐸᔨᒋᒐᓱᐛ ᒐᒋ ᑐᑕᒡ ᑭᔭ ᒥᒐᑦ ᐊᐛᓐ ᑲ ᐎ ᒥᔭᑦ ᒋ ᐸᑕᐤ ᐊᓂᔭ ᐅᒥᔨᐛᐅᓇ᙮
ᐸᓴᓕᓪ ᑭᔭ ᐅᐦᐅᓕᐊᑉ
30ᒧᓱᔅ ᒋ ᐃᑕᐤ ᐊᓂᔭ ᐃᔅᕋᐃᓪ ᐃᔪᐛ ᐊᐛᔪᐛ ᑲ ᐅᑎᓇᑦ ᑎᐸᔨᒋᒐᓱᐤ, ᐸᓴᓕᓪ, ᒪᒃ ᔪᕆᔨᒋ ᒋ ᐅᑕᐎᔪᐤ, ᔪᕆ ᒪᒃ ᐦᐅᕐ ᒋ ᐅᑕᐎᔪᐤ, ᐊᓐᑕ ᒍᑕ ᐅᒡ ᑲ ᐃᑎᔅᑲᓇᓯᑦ᙮ 31ᑲ ᐊᔅᒋᐧᑯᒪᓂᒐᔅᑦ ᑭᔭ ᑲ ᒥᒪᑕᐅᓯᓂᔨᒐᔅᑦ ᒋ ᐃᓯ ᒥᔭᑭᓄᐤ ᑭᔅᒋᐅᓂᔪᐤ ᐊᓂᔭ ᒋᓴᒪᓂᑐᐛ ᐅᑦ ᐊᒐᐧᑯᔪᐛ ᐊ ᐱᔅᑲᑯᑦ ᐊᓴᑭᔅᒋᓇᔅᑲᑯᑦ ᒋᔅᒐᔨᑎᒧᓂᔪᐤ ᑭᔭ ᑭᔅᒋᐅᓂᔪᐤ 32ᓇᒪᔭᔪᐤ ᒥᒄ ᑲ ᓴᑭᔅᒋᓇᔅᑲᑯᑦ ᐅᑦ ᐊᒐᐧᑯᔪᐛ ᑎᐸᔨᒋᒐᓱᐛ, ᐃᔭᐱᒡ ᒋ ᑐᑕᑯᐤ ᒥᓯᐛ ᒐᒂᔪᐛ ᒐᒋ ᐛᓯᑕᑦ ᒥᔅᑎᑯᒡ ᐅᒡ, ᐊ ᓱᓇᔭᐱᔅᑯᐎᒡ, ᐊ ᐎᔄᐅᓱᓇᔭᐎᒡ, ᐊᓯᓂᔪᐤ ᑭᔭ ᑲ ᐎᔄᐛᐱᔅᑯᐎᒡ ᐃᓴᑯᔪᐤ ᐅᒡ᙮ 33ᐃᔭᐱᒡ ᒋᒪᑎᔄᐤ ᐊᓂᔭ ᐊ ᒥᔪᓯᔨᒋ ᐊᓯᓂᔭ ᑭᔭ ᒥᔅᑎᒂ ᒋ ᒥᐧᑯᑕᐤ ᒐᒋ ᒥᔪᓇᑯᑕᑦ ᑭᔭ ᒐᒋ ᒋᑭᒧᑕᑦ ᐊᓐᑕ ᐎᔄᐅᓱᓇᔭᐱᔅᑯᔪᐤ ᑭᔭ ᒋ ᐎᓯᓇᑕᐊᒻ ᐊᓐᑕ ᒐᒂᔪᐤ᙮ 34ᐸᓴᓕᓪ ᑭᔭ ᐅᐦᐅᓕᐊᑉ, ᐊᐦᐃᓴᒪᒃ ᐅᑯᓴ, ᑕᐊᓐ ᐊ ᐃᑎᔅᑲᓇᓯᔨᒋ, ᑎᐸᔨᒋᒐᓱᐛ ᒋ ᒥᔨᑯᐅᒡ ᑭᔅᒋᐅᓂᔪᐤ ᒐᒋ ᒋᔅᑯᑎᒧᐛᔨᒋ ᑯᑎᑲ ᐊᐛᔪᐛ᙮ 35ᒥᓯᐛ ᒐᒂᔪᐤ ᒐᒋ ᐅᓯᑕᔨᒋ ᐊ ᐃᓯ ᒥᔪᓇᑯᓂᔨᒡ ᑭᔭ ᐊ ᐃᓯ ᒥᔽᔨᒡ ᑭᔭ ᐃᔭᐱᒡ ᒐᒋ ᐎᓯᓇᑕᒥᔨᒋ ᒐᒂᔪᐤ ᐊᓐᑕ ᐛᒋ ᒥᔽᓯᔨᒡ ᐱᒍᐎᔭᓂᔪᐤ ᐊ ᐱᔅᑭᓂᓯᔨᒋ ᑭᔭ ᐊ ᐱᒋᒥᓇᑯᓯᔨᒋ ᑭᔭ ᐊ ᒥᐧᑯᓯᔨᒋ ᐊᓯᑭᓂᔭᐱᔭ ᐊᐱᒋᐊᔨᒋ᙮
Currently Selected:
ᐊᒃᓱᑕᔅ 35: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
