ᐊᒃᓱᑕᔅ 32
32
ᑲ ᐎᔄᐅᓱᓇᔭᐱᔅᑯᔨᒋ ᒥᒋᑎᐧᒄ ᒥᓂᑐᐧᑲᓇ
Exodus 32.1-14 (Proper-23 Year A, Proper-19 Year C)
1ᐃᔅᐱ ᐃᔪᒡ ᒐ ᒋᔅᒐᔨᒪᒡ ᒧᓱᓴ ᐊᔅᐱᔅ ᐊᑲ ᓇᐅᔅ ᓂᑎᒋᐛᔨᒋ ᐱᔅᑯᑎᓇᒡ ᐅᒡ, ᒋ ᓂᑐᐛᐱᒪᐅᒡ ᐊᕋᓇ ᑭᔭ ᒂ ᐃᑕᒡ, “ᐅᓯᑎᒧᐅᓇᓐ ᒥᓂᑐᐧᑲᓐ ᒐ ᓂᑲᓂᔅᑯᐎᒥᑦ᙮ ᐛᔅ ᐅᐛ ᒧᓱᔅ ᑲ ᐸᒋ ᐎᐎᑕᔨᒥᑦ ᐃᒋᑉᑎᒡ ᐅᒡ, ᓇᒪ ᓂ ᒋᔅᒐᔨᒪᓇᓐ ᑕᓐ ᐊᑎᑦ᙮”
2ᐊᑯ ᐊᕋᓐ ᐊᑕᑦ ᐃᔪᐛ, “ᒥᓂᒺᐧᒄ ᐊᓂᔭ ᑲ ᐎᔄᐅᓱᓇᔭᐱᔅᑯᔨᒋ ᒥᑐᑲᒡ ᑭ ᐳᔅᑲᑭᓄᐛᓂ ᑭ ᐳᔅᑭᒧᐅᒋ ᒋᐎᒋᒪᑭᓄᐛᐅᒡ, ᒋᑯᓱᐛᐅᒡ ᑭᔭ ᒋᑕᓂᓱᐛᐅᒡ ᑭᔭ ᒐ ᐸᑐᑐᐎᔭᒄ᙮” 3ᐊᑯ ᒥᓯᐛ ᐃᔪᒡ ᒂ ᒥᓇᒡ ᐊᓂᔭ ᑲ ᐳᔅᑲᒡ ᑲ ᐎᔄᐅᓱᓇᔭᐱᔅᑯᔨᒋ ᒥᑐᑲᒡ ᑭ ᐳᔅᑲᑭᓄᐛᓂ, ᑭᔭ ᐊᑐᑐᐛᒡ ᐊᕋᓇ᙮ 4ᒂ ᐊᐸᓴᐧᒃ ᐊᕋᓐ ᒥᓯᐛ ᐊᓂᔭ ᑲ ᒥᔭᑭᓄᐅᑦ ᑭᔭ ᒂ ᐅᓯᐊᑦ ᒥᓂᑐᐧᑲᓇ ᒥᒋᑎᒂ ᐊ ᐃᓯᓇᑯᓯᔨᒋ᙮ ᒂ ᐃᔅᒋᔄᒡ ᐃᔪᒡ, “ᑭᓄᐛᐱᒥᐧᒄ ᒋ ᒋᓴᒪᓂᑐᒧᐛᐤ, ᐅ ᐃᔅᕋᐃᓪ, ᑲᒋ ᐸᒋ ᐎᐎᑕᐃᑕᒄ ᐃᒋᑉᑎᒡ ᐅᒡ᙮”
5ᐃᔅᐱ ᐊᕋᓐ ᐎᔭᐸᑕᐧᒃ ᑲ ᐃᔅᐱᔨᒡ, ᐱᔅᑎᓂᒐᐅᓇᐱᔅᑯᔪᐤ ᒋ ᐅᓯᑕᐤ ᐅᑎᔅᑯᐤ ᑲ ᐎᔄᐅᓱᓇᔭᐱᔅᑯᔨᒋ ᒥᓂᑐᐧᑲᓇ ᐊ ᑕᔨᒋ ᑭᔭ ᒂ ᐃᔅᒋᔄᑦ, “ᐛᐸᒐ ᒋᑭ ᒥᔽᑕᓇᓄᐤ ᐊ ᒋᔅᑕᔨᒪᐧᒄ ᐅᑎᐸᔨᒋᒐᐤ᙮” 6ᐊᑯ ᒥᓐ ᐎᔭᐱᓂᔨᒡ ᐎᐱᒡ ᒋ ᐅᓂᐅᒡ ᐃᔪᒡ ᑭᔭ ᒂ ᓂᐸᐊᒡ ᐱᔅᒐ ᐊᐛᓯᓴ ᒐᒋ ᒥᑐᔅᑕᐊᒪᒐᒡ ᑭᔭ ᒐᒋ ᒧᐛᒡ᙮ ᐃᔪᒡ ᒋ ᓇᐃᐳᐅᒡ ᒐᒋ ᒥᒋᓱᒡ ᑭᔭ ᒥᓂᒡ, ᒋ ᐱᓯᑯᐅᒡ ᒪᒃ ᒐᒋ ᓂᒥᒡ ᑭᔭ ᐎᓂᓯᐤ ᐱᒪᑎᓯᒡ᙮
7ᐊᑯ ᑎᐸᔨᒋᒐᓱᐤ ᐊᑕᑦ ᒧᓱᓴ, “ᓂᑎᒋᐛ, ᐛᔅ ᒋᑦ ᐃᔨᒥᒡ ᐊᓐᒡ ᐃᒋᑉᑎᒡ ᑲ ᐅᒋ ᐎᐎᑕᐃᑥᐤ, ᓴᔅ ᒥᒐᑎᓯᐅᒡ᙮ 8ᓴᔅ ᓂᑭᑎᒧᒡ ᑲ ᐃᑎᓱᐛᑎᒂᐤ ᒐ ᐃᑎᒡ, ᒥᓂᑐᐧᑲᓇ ᒪᒃ ᐅᓯᑎᒪᓱᐅᒡ, ᐊᔭᒥᐊᔅᑐᐛᐅᒡ ᑭᔭ ᒥᑐᔅᑕᐊᒧᐛᐅᒡ ᑭᔭ ᐃᔅᒋᔄᐅᒡ, ‘ᐊᐅᑯᐤ ᒋ ᒋᓴᒪᓂᑐᒧᐛᐤ, ᐅ ᐃᔅᕋᐃᓪ, ᐃᒋᑉᑦ ᐊᔅᒋᒡ ᐅᒡ ᑲ ᐸᒋ ᐎᐎᑕᐃᑕᐧᒄ᙮’ ”
9ᑭᔭ ᑎᐸᔨᒋᒐᓱᐤ ᐃᑕᐤ ᒧᓱᓴ, “ᓴᔅ ᓂᒋ ᐛᐱᒪᐅᒡ ᐅᒡ ᐃᔪᒡ ᑭᔭ ᒥᔅᑯᔅᑎᒂᓇᐅᒡ, 10ᐊᑯ ᒪᒃ ᐊᑲ ᑯᒋᑕ ᒐᒋ ᓂᑲᐎᔨᓐ, ᓂ ᒋᔄᐃᑯᒡ ᑭᔭ ᓂᑭ ᓂᓱᐅᓇᒋᐊᐅᒡ᙮ ᐊᑯ ᒋᔾ ᑭᔭ ᒋᑦ ᐊᓂᔅᑯᑕᐸᓐᒡ ᒐ ᐃᑐᑕᑎᑯᒡ ᒐ ᒥᒐᑐ ᐃᑎᔅᑲᓇᓯᔭᒄ᙮”
11ᒥᒄ ᒧᓱᔅ ᒋ ᓂᑐᑎᒧᐛᐤ ᐅᒋᓴᒪᓂᑐᒪ ᑎᐸᔨᒋᒐᓯᐛ ᐊ ᐃᑕᑦ, “ᐅᑎᐸᔨᒋᒐᐤ, ᒐᒂᓐ ᒋᐸ ᐅᒋ ᒋᔄᐱᔅᑐᐛᐅᒡ ᒋᑦ ᐃᔨᒥᒡ, ᐊᓐᒡ ᐃᒋᑉᑎᒡ ᑲ ᐅᒋ ᐎᐎᑕᐃᑥᐤ ᒋᓱᐧᑲᑎᓯᐅᓂᒡ ᐅᒡ ? 12ᒐᒂᓂᔪᐤ ᒋᐸ ᐅᒋ ᐃᔅᒋᔄᐅᒡ ᐃᒋᑉᑦ ᐃᔪᒡ, ᐊᒋ ᐎᐎᑕᐃᑥᐤ ᐃᒋᑉᑎᒡ ᐅᒡ ᒐᒋ ᓂᐸᐃᑥᐤ ᐊᓐᑕ ᐱᔅᑯᑎᓇᒡ ᑭᔭ ᒥᓯᐛ ᓂᓱᐅᓇᒋᐊᑥᐤ ? ᐊᑲ ᒋᔄᐱᔅᑐᐅᒡ ᒋᑦ ᐃᔨᒥᒡ, ᐊᑲ ᓂᓱᐅᓇᒋᐃᒡ᙮ 13ᒋᔅᒋᑐᐅᒡ ᒋᑦ ᐊᐱᒋᐊᑭᓐᒡ ᐊᑉᕋᐊᒻ, ᐊᐃᓯᒃ ᑭᔭ ᒐᑭᑉ᙮ ᑲ ᐊᓱᑎᒧᐅᑥᐤ ᑲ ᐃᑎᑥᐤ, ‘ᓂᑭ ᒥᒐᑐᐛᐅᒡ ᒋᑦ ᐊᓂᔅᑯᑕᐸᓄᐛᐅᒡ ᒧᔭᒻ ᒋᓯᑯᒡ ᐊᔅᐱᒐᑎᒡ ᐅᒐᑭᑕᐧᑯᒡ ᑭᔭ ᓂᑭ ᒥᔭᐅᒡ ᒥᓯᐛ ᐅᔭ ᐊᔅᒋᔭ ᑲ ᐊᓱᑎᒧᐅᒂᐤ ᑭᔭ ᐎᔨᐛᐤ ᒧᔅ ᑲᒋᒡ ᒋᑭ ᑎᐱᔨᐛᓯᐅᒡ᙮’ ” 14ᑎᐸᔨᒋᒐᓱᐤ ᒂ ᒂᔅᒐᔨᑕᐧᒃ ᐊᓂᔭ ᑲ ᐃᑕᑦ ᒐ ᐃᑐᑐᐛᑦ ᐅᑦ ᐃᔨᒪ᙮
15ᒧᓱᔅ ᒂ ᒋᐛᑲᐳᔅᑐᐛᑦ ᒂ ᐊᑎ ᓂᑎᒋᐛᑦ ᐊᓂᔭ ᐱᔅᑯᑎᓇᔪᐤ, ᐊ ᑕᐧᑯᓇᑦ ᐊᓂᔭ ᐊᓯᓂᔭ ᐊᔨᑐᐤ ᐃᑕᒐ ᑲ ᒥᓯᓇᑕᒥᔨᒋ ᒋᓴᒪᓂᑐᐛ ᐃᑎᓱᐛᐅᓇ᙮ 16ᐎᔾ ᒋᓴᒪᓂᑐᐤ ᒋ ᐅᓯᐊᐤ ᐊᓂᔭ ᐊᓯᓂᔭ ᑭᔭ ᐎᔾ ᒋ ᒥᓯᓇᑕᐊᒻ ᐊᓂᔭ ᐎᓱᐛᐅᓇ᙮
17ᒐᓱᐛ ᒋ ᐸᑎᒻ ᐊ ᐃᑎᑕᑯᓯᔨᒋ ᐃᔪᐛ᙮ ᐊᑯ ᒐᑲᑦ ᐛᑎᑕᐧᒃ ᐊᓐᑕ ᑲ ᒪᓂᑲᓱᓇᓄᐎᒡ, ᒧᓱᓴ ᒋᓂᒋᔅᑯᐛᐤ ᐊᑯ ᒂ ᐃᑕᑦ, “ᓂ ᐸᑕᓐ ᐊᓐᑕ ᑲ ᒪᓂᑲᓱᓇᓄᐅᒡ ᒧᔭᒻ ᐊ ᓂᑐᐱᔨᓇᓄᐅᒋ ᐊᑎᑕᒂᒡ᙮”
18ᒧᓱᔅ ᒂ ᐃᑕᑦ,
“ᓇᒪ, ᓇᒪᔭᔪᐤ ᐊᓂᔭ ᐊ ᐃᑎᑕᑯᓯᒡ ᐃᔪᒡ ᑲᒋ ᑲᓂᔪᑥᐎ ᑭᔭ ᒪᒃ ᑲᒋ ᐅᓂᑕᒡ ᓇᑐᐱᔨᑥᐎ !
ᐊ ᓂᑭᒧᓇᓄᐅᒡ ᓂᐸᑕᓐ !”
19ᒥᒋᒪ ᑲᒋ ᐅᑎᑕᐧᒃ ᒧᓱᔅ ᐊᓐᑕ ᐛᒋᓇᓄᐎᒡ ᑭᔭ ᐎᔭᐱᒪᑦ ᒥᓂᑐᐧᑲᓇ ᑭᔭ ᐊᓂᔭ ᐃᔪᐛ ᓇᒥᔨᒋ, ᒋᒋᐛ ᒋ ᒋᔄᐳᐤ᙮ ᒋ ᐛᐱᓇᐤ ᐊᓂᔭ ᐊᓯᓂᔭ ᑲ ᑕᐧᑯᓇᑦ ᐊᓐᑕ ᒧᔅᑎᑭᒥᒡ ᑭᔭ ᒋ ᐱᓯᓯᒪᐤ᙮ 20ᒂ ᐅᑎᓇᑦ ᐊᓂᔭ ᒥᓂᑐᐧᑲᓇ ᒥᒋᑎᒂ ᐊ ᐃᓯᓇᑯᓯᔨᒋ ᐃᔪᐛ ᑲ ᐅᓴᔨᒋ, ᒂ ᐊᑎ ᒥᑐᔅᑕᐛᐱᓇᑦ ᑭᔭ ᒂ ᐊᐸᓱᐎᔨᒋ᙮ ᒂ ᐱᒋᔅᑲᐛᑦ ᑭᔭ ᒂ ᐊᑎ ᐱᓂᐱᔭᐊᑦ ᐊᓐᑕ ᓂᐱᒡ ᑭᔭ ᒂ ᑐᑐᐛᑦ ᐃᔅᕋᐃᓪ ᐃᔪᐛ ᒐᒋ ᒥᓂᔨᒋ ᓂᐱᔪᐤ᙮
21ᐊᑯ ᒂ ᐃᑕᑦ ᐊᕋᓇ, “ᒐᒂᔪᐤ ᑲ ᑐᑕᔅᒡ ᐊᓐᒡ ᐃᔪᒡ, ᐛᒋ ᒥᔨᑥᐤ ᒐᒋ ᑐᑕᒡ ᐅᔭ ᒥᒋᑐᑎᒧᐅᓂᔪᐤ ?”
22ᐊᕋᓐ ᒂ ᐃᑕᑦ, “ᐊᑲ ᒋᔄᐱᔅᑐᐎ, ᒋ ᒋᔅᒐᔨᒪᐅᒡ ᐅᒡ ᐃᔪᒡ ᐊᔅᐱᔅ ᓱᒐᔨᒧᒡ ᒐᒋ ᒥᒋᑐᑕᒡ᙮ 23ᓂᒋ ᐃᑎᑯᒡ ᐊᓐᒡ ᐃᔪᒡ, ‘ᓇᒪ ᓂ ᒋᔅᒐᔨᒪᓇᓐ ᑕᓐ ᐊ ᐃᑎᑦ ᐅ ᓇᐸᐤ ᒧᓱᔅ, ᐊᓐ ᑲ ᐎᐎᑕᔨᒥᑦ ᐃᒋᑉᑎᒡ ᐅᒡ, ᐅᓯᑎᒧᐅᓇᓐ ᒪᒃ ᒥᓂᑐᐧᑲᓐ ᒐᒋ ᒋᔅᒋᓄᑕᔨᒥᑦ !’ 24ᐊᑯ ᒂ ᐃᑎᒂᐤ, ‘ᒥᓯᐛ ᐊᐛᓐ ᑈᔅᑲᐧᒃ ᑲ ᐎᔄᐅᓱᓇᔭᐱᔅᑯᔨᒋ ᒥᑐᑲᒡ ᑭᐳᔅᑲᑭᓄᐛᓂ ᒋᑭ ᒥᓂᒻ᙮’ ᐊᑯ ᒂ ᒥᓇᒡ ᑭᔭ ᒂ ᒥᔨᒡ᙮ ᒂ ᐊᑎ ᒥᑐᔅᑕᐊᒧᒡ, ᐊᑯ ᐱᔭᒋ ᓄᑯᓯᑦ ᒥᒋᑎᐧᒄ ᐃᔨᒐᐛᓐ !”
25ᒧᓱᔅ ᒂ ᐛᐸᑕᐧᒃ ᐊᕋᓇ ᐊᒋ ᓇᐊᔨᒪᔨᒋ ᐃᔪᐛ ᒐᒋ ᒋᔎᔭᔨᑕᑯᓯᔨᒋ ᑭᔭ ᒐᒋ ᐃᑐᑎᒥᔨᒋ ᒐᒂᔪᐤ ᐊ ᐊᑲ ᒥᔽᔨᒡ, ᒐᒋ ᐃᑎᑯᔨᒋ ᑲ ᐛᐧᑲᑎᑯᔨᒋ ᐃᔪᐛ ᓇᒪ ᓂᔅᑐᐛᔨᑎᒧᒡ ᐃᔅᕋᐃᓪ ᐃᔪᒡ᙮ 26ᐊᑯ ᒂ ᓇᓂᐳᐅᑦ ᐊᓐᑕ ᐛᒋ ᐱᔨᒐᓄᐎᒡ ᐊᓐᑕ ᐛᒋᓇᓄᐎᒡ ᑭᔭ ᒂ ᐊᑎ ᑕᑈᑦ, “ᒥᓯᐛ ᐊᐛᓐ ᐛᒐᐛᑦ ᑎᐸᔨᒋᒐᓱᐛ ᓂᑭ ᐸᒋ ᓇᑎᒄ !” ᐊᑯ ᒥᓯᐛ ᐊᓂᔭ ᓕᐸᐃ ᐊ ᐃᑎᔅᑲᓇᓯᔨᒋ ᒋ ᐸᒋ ᐛᔅᑲᑲᐳᔅᑕᑯᐤ᙮
27ᐊᑯ ᒂ ᐃᑕᑦ ᐊᓂᔭ ᐃᔪᐛ, “ᑎᐸᔨᒋᒐᓱᐤ ᐃᔅᕋᐃᓪ ᐅᒋᓴᒪᓂᑐᒧᐛᐛ ᒋᑦ ᐃᑎᓱᒥᑯᐛᐤ ᒥᓯᐛ ᐊ ᑎᓯᔭᒄ ᒐᒋ ᒋᔅᑭᒪᒄ ᒋᓂᑐᐱᔪᐅ-ᒧᐧᑯᒪᓄᐛᐛ ᑭᔭ ᒥᓯᐛ ᐊᓐᑕ ᐊ ᐊᑎ ᐃᑕᓄᐅᒡ ᒐ ᐃᑐᑕᔭᒄ ᐅᑕ ᐛᒋᓇᓄᐅᒡ ᑭᔭ ᒐ ᓂᐸᐊᑯᒡ ᒋᐧᑲᓂᓱᐛᐅᒡ, ᒋᐎᒐᐛᑭᓄᐛᐅᒡ ᑭᔭ ᐊᓐᒡ ᒥᒋᒪ ᐛᒋ ᐎᒋᒥᑕᑯᒡ᙮” 28ᓕᐸᐃ ᑲ ᐃᑎᔅᑲᓇᓯᒡ ᐃᔪᒡ ᒋ ᐃᑐᑎᒺᐅᒡ ᑲ ᐃᑎᓱᒥᑯᒡ ᒧᓱᓴ, ᓂᔍᐤ ᒐᓯᐱᔪᐤ ᐃᔪᒡ ᒋ ᓂᐸᐊᑭᓄᐎᒡ ᐊᓂᔭ ᒋᓯᑯᔪᐤ᙮ 29ᒧᓱᔅ ᒪᒃ ᒋ ᐃᑕᐤ ᐊᓂᔭ ᓕᐸᐃ ᐃᔪᐛ, “ᐊᓄᒡ ᒐᓯᑲᒡ ᔅᒋ ᐸᔭᒋᐃᓱᓇᐛᐤ ᒐᒋ ᐊᑐᔅᑯᐛᒄ ᑎᐸᔨᒋᒐᓱᐤ ᐊᒋ ᓂᐸᐊᑯᒡ ᑎᐱᔨᐛ ᒋᑯᓱᐛᐅᒡ ᑭᔭ ᒋᐧᑲᓂᓯᐛᐅᒡ, ᑭᔭ ᒋᒋ ᓱᐛᔨᑕᑯᐃᑯᐛᐤ ᐊᓄᒡ ᒐᓯᑲᔨᒡ᙮”
30ᒥᓐ ᐎᔭᐱᓂᔨᒡ ᒧᓱᔅ ᒂ ᐃᑕᑦ ᐃᔪᐛ, “ᒋᒋᐛ ᒋᒥᒋᑐᑕᓇᐛᐤ, ᒥᒄ ᐊᓄᒡ ᒥᓐ ᓂᑭ ᓴᑭᒋᐛᓐ ᐱᔅᑯᑎᓇᐤ ᒐᒋ ᓂᑐᐛᐱᒥᒄ ᑎᐸᔨᒋᒐᓱᐤ, ᒐᒋ ᒥᔪᐱᑕᔭᓐ ᒐᒋ ᐛᐸᔨᑎᒪᑯᐅᔭᒄ ᒋᒥᒋᑐᑎᒧᐅᓄᐛᐤ᙮”
31ᒧᓱᔅ ᒂ ᓴᑭᒋᐛᑦ ᐱᔅᑯᑎᓇᔪᐤ ᑭᔭ ᒂ ᐃᑕᑦ ᑎᐸᔨᒋᒐᓱᐛ “ᒋᒋᐛ ᒥᒋᑐᑎᒧᒡ ᐅᒡ ᐃᔪᒡ, ᒋ ᐅᓯᑎᒪᓱᐅᒡ ᐊ ᐎᔄᐅᓱᓇᔭᐎᒋ ᒥᓂᑐᐧᑲᓇ ᒐ ᐅᒋᓴᒪᓂᑐᒥᒡ᙮ 32ᒥᒄ ᒋ ᐱᑯᓴᔨᒥᑎᓐ ᒐᒋ ᐛᐸᔨᑎᒧᐅᑥᐤ ᐊᓂᔭ ᐅᒥᒋᑥᐅᓄᐛᐤ, ᐊᑯ ᐊᑲ ᐎ ᐛᐸᔨᑎᒧᐅᑥᐛ ᒐ ᑲᓯᓯᓇᐊᒥᓐ ᓂᑦ ᐃᓯᓂᐧᑲᓱᐅᓐ ᐊᓐᑕ ᒋᒥᓯᓇᐃᑭᓂᒡ ᑲ ᒥᓯᓇᑕᐅᒧᑦ ᒋᑦ ᐃᔨᒥᒡ ᐅᑦ ᐃᓯᓂᐧᑲᓱᓄᐛᐛ᙮”
33ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᒥᒄ ᐊᓐᒡ ᑲ ᐅᓂᑐᑐᐅᒡ ᓂᑭ ᑲᓯᓯᓇᐊᒺᓐ ᐅᑦ ᐃᓯᓂᐧᑲᓱᐅᓄᐛᐛ ᓂᒥᓯᓇᐃᑭᓂᒡ᙮ 34ᒪᒋ ᒪᒃ ᒐ ᐃᑐᑕᐃᑥᐤ ᐃᔪᒡ ᐊᓐᑕ ᐃᔅ ᐃᑕᐅᓂᒡ ᑲ ᐊᔨᒧᑎᒪᑕᓐ, ᒐ ᒋᔅᒋᔨᓐ ᓂᑦ ᐊᓐᒋᓂᒻ ᒐ ᒋᔅᒋᓄᑕᔨᑕᒄ᙮ ᒥᒄ ᓴᔅ ᒋᑭ ᐅᑎᒋᐱᔪᐤ ᒐ ᐊᓏᔨᒥᒂᐤ ᐅᒡ ᐃᔪᒡ ᐊᓂᔭ ᑲ ᐃᓯ ᒥᒋᑐᑎᒡ᙮”
35ᐊᑯ ᓇᓇᒐ ᑎᐸᔨᒋᒐᓱᐤ ᒂ ᐊᓏᔨᒪᑦ ᐃᔅᕋᐃᓪ ᐃᔪᐛ ᐊ ᐃᑎᓴᐊᒧᐛᑦ ᒥᒋ ᐃᑕᔅᐱᓇᐅᓂᔪᐤ ᐛᔅ ᑲᒋ ᓯᒋᒪᒡ ᐊᕋᓇ ᒐᒋ ᐅᓯᑎᒪᑯᒡ ᑲ ᐎᔄᐅᓱᓇᔭᐅᔨᒋ ᒥᓂᑐᐧᑲᓇ ᒥᒋᑎᒂ ᐊ ᐃᓯᓇᑯᓯᔨᒋ᙮
Currently Selected:
ᐊᒃᓱᑕᔅ 32: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
