ᐊᒃᓱᑕᔅ 31
31
ᐸᓴᓕᓪ ᑭᔭ ᐅᐦᐅᓕᐊᑉ
1ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, 2“ᓂᒋ ᐅᑎᓇᐤ ᐸᓴᓕᓪ, ᔪᕆᔨᒋ ᐅᑕᐎᔪᐤ, ᐦᐅᕐ ᐅᒧᓱᒧᐤ, ᒍᑕ ᐅᒡ ᑲ ᐃᑎᔅᑲᓇᓯᑦ᙮ 3ᓂᒋ ᑐᑐᐛᐤ ᒐᒋ ᓴᑭᔅᒋᓇᔅᑲᑯᑦ ᑲ ᐸᔭᒋᓯᔨᒋ ᐊᒐᒂ ᐸᓴᓕᓪ ᑭᔭ ᓂᒋ ᑐᑐᐛᐤ ᒐᒋ ᑭᔅᒋᑕᑦ ᐊ ᐅᓯᑕᑦ ᐊ ᒋᔅᑕᔨᑕᑯᓂᔨᒋ ᒐᒂᔪᐛ ᒐ ᐊᐱᑎᓂᔨᒋ ᐊᓐᑕ ᐸᔭᒋ ᐱᒍᐎᔭᓂᒋᐛᐱᒡ᙮ 4ᒋᑭ ᒋ ᒥᒪᑕᐅᓯᓇᑕᐊᒻ ᒐᒂᔪᐛ ᐎᔄᐅᓱᓇᔭᒡ, ᓱᓇᔭᐱᔅᑯᒡ ᑭᔭ ᑲ ᐎᔄᐛᐱᔅᑯᔨᒡ ᐃᓴᑯᔪᐤ ᐅᒡ᙮ 5ᒋᑭ ᒋ ᒪᑎᓱᒻ ᑲ ᓱᓇᔭᐎᔨᒋ ᐊᓯᓂᔭ ᒐᒋ ᒋᑭᒧᑕᑦ ᐎᔄᐅᓱᓇᔭᒡ ᐊᓐᑕ ᐛᔅᑲ ᐊᓯᓂᒡ ᑭᔭ ᐊ ᒧᐧᑯᑕᑦ ᒥᔅᑎᒂ ᑭᔭ ᒐᒋ ᑐᑕᐧᒄ ᐊᑭᔅᒋᑕᑦ ᐊᐅᓯᑕᑦ ᒐᒂᔪᐛ᙮ 6ᓂᒋ ᐅᑎᓇᐤ ᐃᔭᐱᒡ ᐅᐦᐅᓕᐊᑉ, ᐊᐦᐃᓴᒪᒃ ᐅᑯᓴ ᑕᐊᓐ ᐃᔪᐛ ᐅᑎᔅᑲᓇᓱᐤ ᒐᒋ ᐎᒋ ᐊᑐᔅᒐᒥᑯᑦ ᐸᓴᓚᓪ᙮ ᐃᔭᐱᒡ ᑭᔅᒋᐅᓂᔪᐤ ᓂᒋ ᒥᔭᐅᒡ ᑯᑎᑭᒡ ᓇᐸᐅᒡ ᒐᒋ ᐅᓯᑕᒡ ᒥᓯᐛ ᒐᒂᔪᐛ ᑲ ᐃᑎᓱᒥᑕᓐ ᒐᒋ ᐅᓯᑕᑭᓄᐅᒋ᙮ 7ᐊᓯᒡ ᐸᔭᒋ ᐱᒍᐎᔭᓂᒋᐛᐱᔪᐤ ᑭᔭ ᐸᔭᒋ-ᒥᐅᑎᔪᐤ ᑭᔭ ᒋᐸᐃᑭᓂᔪᐤ ᑭᔭ ᒥᓯᐛ ᒐ ᐃᑕᐱᑎᓂᔨᒋ ᒐᒂᔪᐛ ᐊᓐᑕ ᐸᔭᒋ ᐱᒍᐎᔭᓂᒋᐛᐱᒡ, 8ᒥᒋᓱᐛᑭᓇᑎᑯᔪᐤ ᑭᔭ ᑲ ᐎᔄᐅᓱᓇᔭᐱᔅᑯᔨᒋ ᐛᔅᑕᓂᐱᒪᑭᓇᑎᒂ ᑭᔭ ᐊᓂᔭ ᒐ ᐃᑕᐱᑎᓂᔨᒋ ᒐᒂᔪᐛ ᒐ ᓇᑭᑐᐛᔨᑎᑭᓄᐎᔨᒡ ᑭᔭ ᐱᔅᑎᓂᒐᐅᓇᐱᔅᑯᔪᐤ ᐊᓐᑕ ᒐ ᐃᔎᓴᑭᓄᐎᔨᒋ ᑲ ᐎᒋᒪᑯᓯᔨᒋ᙮ 9ᑭᔭ ᐱᔅᑎᓂᒐᐅᓇᐱᔅᑯᔪᐤ ᐊᓐᑕ ᒐ ᒥᑐᔅᑕᐊᒪᒐᓄᐎᔨᒡ ᑭᔭ ᒐ ᐃᑕᐱᑎᓂᔨᒋ ᒐᒂᔪᐛ ᑭᔭ ᐛᐸᑲᐅᓱᔭᑭᓂᔪᐤ ᑭᔭ ᐊᓐᑕ ᒐ ᐅᒋ ᑕᐧᑯᑎᔅᑕᔨᒡ ᐛᐸᑲᐅᓱᔭᑭᓂᔪᐤ᙮ 10ᑭᔭ ᒥᓯᐛ ᑲ ᒥᔽᓯᔨᒋ ᐅᑦ ᐊᔭᒥᐊᐅ-ᐊᐱᒋᑕᐅᓂᔨᐛ ᐊᕋᓇ ᑭᔭ ᐅᑯᓯᔨᐛ ᒐ ᐳᔅᑲᒥᔨᒋ ᐃᔅᐱ ᐊᑐᔅᒐᔨᒐᓂ ᐊᔭᒥᐊᐅᒋᒪᐅᐎᔨᒋ᙮ 11ᑭᔭ ᑐᒥᓂᒐᐅ-ᐱᒥᔭ ᑭᔭ ᑲᐎᒋᒪᑯᓯᒡ ᒐ ᐊᐱᑎᓂᔨᒡ ᐊᓐᑕ ᑲ ᐸᔭᒋᒥᑭᓂᔨᒡ ᑲᐱᔅᒋᒐᔭᔨᒡ᙮ ᒥᓯᐛ ᓇᐊᐤ ᒋᑭ ᐎ ᐃᓯᓇᑯᑕᐅᒡ ᒐᒂᔪᐛ ᐊᓐᒡ ᐊᔭᒡ ᑭᔅᒋᐅᓂᔪᐤ ᒧᔭᒻ ᑲ ᐃᑎᓱᒥᑕᓐ᙮”
ᐊᔭᒥᐊᐅᒋᓯᒄ
12ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, 13“ᒐ ᐃᑎᑥᐤ ᐃᔅᕋᐃᓪ ᐃᔪᒡ ᒐᒋ ᓇᐃᑕᒡ ᐊᓂᔭ ᑲ ᐃᑐᓱᒥᒂᐤ ᒐ ᓇᑭᑐᐛᔨᑕᒡ ᐊᔽᓯᐅᒋᓯᑲᔨᒡ ᒐᒋ ᒋᔅᒋᑎᒪᒄ ᒋᔾ ᑭᔭ ᒋᑦ ᐊᔭᓂᔅᒐ ᐊᓂᔅᑯᑕᐸᓐᒡ ᑲᒋ ᐅᑎᓂᑎᑯᒡ ᒐ ᐅᑦ ᐃᔨᒥᑕᑎᑯᒡ᙮
14ᒋᑭ ᐎ ᓇᐃᑕᓐ ᓂᑦ ᐃᑎᓱᐛᐅᓇ ᐊ ᓇᑭᑐᐛᔨᑕᑭᓄᐅᒡ ᐊᔽᓯᐅᒋᓯᑲᒡ ᐛᔅ ᒋᒋᐛ ᐸᔭᐧᑭᓐ᙮ ᐊᐛᓐ ᐊᑲ ᓇᓴᐊᐧᒃ ᓂᑦ ᐃᑎᓱᐛᓂᔪᐤ ᑭᔭ ᒐ ᐊᑐᔅᒐᒂ ᐊᓂᔭ ᒋᓯᑯᔪᐤ, ᒋᑭ ᓂᐸᐊᑭᓄᐤ᙮ 15ᐊᓱᑕᒡ ᑕᑐᐤ ᒋᓯᑲᐛ ᒋᑭ ᐊᑐᔅᒐᓐ, ᒋᑭ ᑐᑕᓐ ᑭᔭ ᒥᓯᐛ ᒐᒂᓐ ᐊ ᑎᒂᒡ ᒐ ᐃᑐᑎᒥᓐ, ᒥᒄ ᓂᔄᐅᑕᒡ ᐊ ᒋᓯᑲᒡ ᐊᔪᐅᒄ ᐅᑦ ᐊᔽᓯᐅᒋᓯᑲᒻ ᑎᐸᔨᒋᒐᓱᐤ ᒋ ᒋᓴᒪᓂᑐᒻ, ᐊᐛᓐ ᒐ ᐊᑐᔅᒐᒂ ᐅᔭ ᒋᓯᑯᔪᐤ ᒋᑭ ᓂᐸᐊᑭᓄᐤ᙮ 16ᒥᓯᐛ ᐊᐛᓐ ᒐ ᐊᑎ ᐊᓂᔅᒐ ᐱᒪᑎᓯᑦ ᐃᔅᕋᐃᓪ ᐊ ᐃᑎᔅᑲᓇᓯᑦ ᒋᑭ ᐎ ᒋᔅᑕᔨᑎᒻ ᐅᔭ ᒋᓯᑯᔪᐤ ᒐᒋ ᒋᔅᒋᑎᒪᒄ ᓂᔅᑯᒧᐅᓐ ᑲ ᐃᑐᑎᒪᑎᑯᒡ ᒧᔅ ᑲᒋᒡ ᒐ ᑎᒂᒡ᙮ 17ᐊᐅᒄ ᐅ ᒐᒋ ᐅᒋ ᒋᔅᒋᑎᒪᒄ ᓂᔾ ᑎᐸᔨᒋᒐᓱᐤ ᐊᓱᑕᒡ ᑕᑐᐤ ᒋᓯᑲᐛ ᐃᔅᐱᔅ ᑲ ᐅᓯᑕᔭᓐ ᒋᒋᒋᓯᒄ ᑭᔭ ᐊᔅᒋᔾ ᒥᒄ ᐊᓐ ᓂᔄᐅᑕᒡ ᒋᓯᒄ ᓂᒋ ᐊᔅᑕᔭᔅᑯᓯᓐ᙮”
18ᐃᔅᐱ ᒋᓴᒪᓂᑐᐤ ᑲᒋ ᐃᓯ ᐃᔨᒪᐊᑦ ᒧᓱᓴ ᐊᓐᑕ ᓴᐃᓇᐃ ᐱᔅᑯᑎᓇᒡ᙮ ᒂ ᒥᔭᑦ ᓂᓱ ᐊᓯᓂᔭ ᐊᓐᑕ ᑲ ᒥᓯᓇᐊᐧᒃ ᐅᑦ ᐃᑎᓱᐛᐅᓇ ᐅᑎᒋᒡ ᐅᒡ᙮
Currently Selected:
ᐊᒃᓱᑕᔅ 31: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
