Openboarunk 20

De Soton woat jebungen - Daut dusentjoasche Rikj

1Un ekj sach eenen Enjel ut däm Himmel rauf komen, dee dän Schlätel vom Aufgrunt un eene groote Kjäd en siene Haunt haud. 2Un hee jreep dän Droak (Drachen), de oole Schlang, dee de Diewel un de Soton es, un hee bunk am opp 1000 Joa, 3un schmeet am en dän Aufgrunt un schloot too un vesäajeld äwa am, doamet hee nich mea de Velkja veleit, bot de 1000 Joa vollbrocht (to Enj) wieren. No dit mott hee eene korte Tiet loos jeloten woaren.

4Un ekj sach Troons, un see saden sikj doanopp, {Dan.7,9.22.27} un daut wort an jejäft, Jerecht to hoolen; un [ekj sach] de Seelen von dän, dee om daut Zeichnis Jesus un om Gott sien Wuat wellen entheeft (de Kjap aufjehakt) wieren, un dee, dee daut Tia nich aunjebät hauden, un sien Bilt, un daut Moltieekjen nich aunjenomen hauden aum Stiern un aun äare Haunt, un see läwden un harschten met Christus 1 000 Joa. 5De äwaje de Doodes woaren nich läwendich, bot de 1 000 Joa toenj wieren.

Dit es daut ieeschte Oppstonen. 6Seelich un heilich, wia deel haft aun daut ieeschte Oppstonen! Äwa dise haft de tweeda Doot kjeene Macht, sonda see woaren Priesta Gottes un Christus sennen, un met am 1000 Joa harschen.

De latsta Oppstaunt vom Soton un daut latste Jerecht äwa am

7Un wan de 1000 Joa vollbrocht (to Enj) sent, woat de Soton ut sien Jefenkjnis loosjeloten, 8un woat utgonen, de Velkja to veleiden, dee aun de vea Akjen de Ieed sent, Gog un Magog, toom Kjrich to vesaumlen, äare Zol es aus de Saunt aum Mäa. 9Un see trocken nopp opp de Breed de Ieed un omrinjden daut Häaloaga de Heilje un de jeleewde Staut; un Fia kjeem [von Gott] rauf ut däm Himmel un vetäad (veschlenjd) an. 10Un de Diewel, dee an veleid, wort em Fia un Schwäwel See jeschmäten, wua uk daut Tia es aus uk de faulscha Profeet; un dee woat Dach un Nacht jekjwält woaren von Eewichkjeit to Eewichkjeit.

Daut latste Jerecht - De tweeda Doot

11Un ekj sach eenen groote witten Troon un däm, dee doabowen saut (sett), ver däm sien Aunjesecht de Ieed wajch rand un de Himmel, un kjeen Plauz (Uat, Städ) wort fa an jefungen. 12Un ekj sach de Doodje, de Groote un de Kjliene, ver däm Troon stonen, un Bäakja worden opjemoakt; un een aundret Buak wort opjemoakt, daut et Läwensbuak es. Un de Doodje worden jerecht no daut, waut en dee Bäakja jeschräwen wia, no äare Woakjen. 13Un daut Mäa jeef de Doodje, dee doabennen wieren, un de Doot un daut Doodenrikj (griechisch: Hades) jeewen de Doodes, dee doabennen wieren, un see worden jerecht, een jiedra no siene Woakjen. 14Un de Doot un daut Doodenrikj (griechisch: Hades) worden em Fiasee jeschmäten. Dit es de tweeda Doot, de Fiasee. 15Un wan wäa nich jefungen wort em Läwensbuak jeschräwen, soo wort hee em Fiasee jeschmäten.

Currently Selected:

Openboarunk 20: PBJHF

Highlight

Copy