Openboarunk 21

De niea Himmel un de niee Ieed

1Un ekj sach eenen nieen Himmel un eene niee Ieed; dan de ieeschta Himmel un de ieeschte Ieed wieren vegonen, un daut Mäa es nich mea.

2Un ekj sach de heilje Staut, daut niee Jerusalem, ut däm Himmel rauf komen von Gott, reed jemoakt aus eene fa äarem Maun utjestraumde Brut. 3Un ekj hieed eene lude Stemm ut däm Himmel sajen: Kjikjt, Gott sien Zelt bie de Menschen! Un hee woat bie an wonen, un see woaren sien Volkj sennen, un Gott selfst woat bie an sennen, äa Gott. 4Un hee woat jiedre Tron von äare Uagen aufweschen, un de Doot woat nich mea sennen, ooda Trua, ooda Jeschrech, uk kjeene Weedoag woat mea sennen; dan daut Ieeschte es vegonen.

5Un dee opp däm Troon saut säd: Kjikj, ekj moak aules nie! Un hee säd [to mie]: Schriew, dan dise Wieed sent jewess (tru) un woarhauftich. 6Un hee säd to mie: Daut es passieet (jeworden). Ekj sie daut A (Alfa) un daut Oo (Omega), de Aunfank un daut Enj. Ekj well däm Darschtjen ut de Kjwal vom Läwenswota emsonst jäwen. 7Wäa bat aum Enj uthelt (äwakjemt, bestonen blift), woat dit oawen, un ekj woa am (sien) Gott sennen, un hee woat mien Sän sennen. 8Oba de vezoachte (enjstelje) un Onjleewende (Ontrue) un Oppscheiselje un Merda un Huara un Zaubra un Jetzendeena un aule Läajna - äa Deel (Poat) es em See, dee met Fia un Schwäwel brent, daut es de tweeda Doot.

Daut niee Jerusalem

9Un daut kjeem eena von de säwen Enjel, dee de säwen Kommen hauden, voll met de säwen latste Ploagen, un räd met mie un säd: Komm häa, ekj well die de Brut, de Fru von daut Laum wiesen. 10Un hee brocht mie em Jeist wajch opp eenen groote un huagen Boajch un wees mie de heilje Staut, Jerusalem, rauf komen ut däm Himmel von Gott; 11un dee haud de Harlichkjeit Gottes. Äa Lichtglauns wia aus een sea wieetvolla Steen, aus een kristalkloara Jaspiessteen; 12un see haud eene groote un huage Mia (Waunt) un haud 12 Puaten, un aun de Puaten 12 Enjel, un Nomes doabowen jeschräwen, daut dee de 12 Stam de Säns von Israel sent. 13Nom Oosten dree Puaten, un nom Nuaden dree Puaten, un nom Sieden dree Puaten, un nom Wasten dree Puaten. 14Un de Mia (Waunt) de Staut haud 12 Gruntsteena, un opp an de 12 Nomes de 12 Apostel von daut Laum.

15Un dee met mie räd haud een Motstock, een goldnet Rua, doamet hee de Staut maut un äare Puaten un äare Wenj. 16Un de Staut licht veakauntich, un äare Lenj es soo groot aus de Breed. Un hee maut de Staut met daut Rua - 12 000 Stadien; de Lenj un de Breed un de Hecht deeselwje sent äwareen. 17Un hee maut äare Mia, 144 Ellen, eene Menschen Mot, daut es uk de Mot von een Enjel (Enjelmot). 18Un jebut wia äare Mia von Jaspies, un de Staut von reinet Golt, soo aus reinet kloaret Glauss. 19De Gruntsteena vonne Stautswenj wieren utjestraumt met jiedren wieetvollen Steen: De ieeschta aus Gruntloag, Jaspies; de tweeda Safier; de dredda Chalzedon; de vieeda Smaracht; 20de fefta Sardoniks; de sasta Sardes; de säwenda Chriesolit; de achta Beril; de näajenda Topas; de tieenda Chriesopras; de alfta Hiazint; de twalfta Ametist. 21Un de 12 Puaten wieren 12 Parlen, jieda eenselne de Puaten wia ut eene Parl, un de Gauss de Staut reinet Golt, aus derchsechtjet Glauss.

22Un ekj sach kjeenen Tempel en ar, dan de Har, Gott, de Aulmajchtja, es äa Tempel, un daut Laum. 23Un de Staut brukt de Sonn nich, ooda de Mon, doamet see ar schienen; dan de Harlichkjeit Gottes haft ar jedacht (dacht ar), un äare Laump es daut Laum. 24Un de Velkja woaren derch äa Licht waundlen, un de Kjennichs de Ieed brinjen äare Harlichkjeit no ar. 25Un äare Puaten sellen bie Dach nich jeschloten woaren, dan Nacht woat doa nich sennen. 26Un maun woat de Harlichkjeit un Iea de Velkja no ar brinjen. 27Un nuscht Orreine woat en ar engonen, uk nich deejanja, dee oppscheiselje Dinja deit un een Lieeja es, sonda blooss dee, dee en daut Laum sien Läwensbuak enjeschräwen sent.

Currently Selected:

Openboarunk 21: PBJHF

Highlight

Copy