Openboarunk 22
22
1Un hee wees mie eenen Stroom von läwendjet Wota (Läwenswota), kloa aus Kristal, dee rutkjeem von Gott un daut Laum sien Troon. 2Enne Medd äare Gauss un däm Stroom, von dise Sied un jane Sied, wia de Läwensboom, dee 12 mol Frucht drajcht un jieda Moonat siene Frucht jeft; un de Bläda vom Boom sent to Heelunk de Velkja. 3Un kjeen Baun (veflieekjen) woat mea sennen; un Gott un daut Laum sien Troon woat en ar sennen; un siene Kjnajchts woaren am deenen, 4un see woaren sien Aunjesecht seenen; un sien Nomen woat opp (aun) äare Stierns sennen. 5Un Nacht woat nich mea sennen un kjeen Licht von eene Laump un daut Licht von de Sonn es nich needich; dan de Har, Gott, woat äwa an dachen, un see woaren harschen von Eewichkjeit to Eewichkjeit.
Bewoat aul dee profeetische Wieed - Daut Komen Jesus es dicht bie
6Un hee säd to mie: Dise Wieed sent jewess (tru) un woarhauft, un [dee] Har, dee Gott von de Jeista de Profeeten, haft sienen Enjel jeschekjt, siene Kjnajchts to wiesen, waut boolt passieren mott. 7Un kjikj, ekj kom boolt. Seelich, dee doa bewoat dee Wieed de Profeetie von dit Buak.
8Un ekj, Johanes, sie dee, dee dise Dinj hieed un sach; un aus ekj hieed un sach, foll ekj dol, om auntobäden vere Feet vom Enjel, dee mie dise Dinja wees. 9Un hee sajcht to mie: See too (see die väa), doo daut nich. Ekj sie dien Metkjnajcht un dee von diene Breeda, de Profeeten, un dee, dee de Wieed von dit Buak bewoaren. Bäd Gott aun.
10Un hee säd to mie: Vesäajel nich de Wieed de Profezeiunk von dit Buak; de Tiet es dichtbie. 11Wäa orrajcht deit, doo noch orrajcht, un wäa onrein es, veonreinj sikj noch, un wäa jerajcht es, eew wiedahan Jerajchtichkjeit, un wäa heilich es, heilicht sikj noch wieda.
12Kjikj, ekj kom boolt, un mien Loon met mie, om eenem jiedrem to vejelten, woo sien Woakj sennen woat. 13Ekj sie daut A (Alfa) un daut Oo (Omega), de Ieeschta un de Latsta, de Aunfank un daut Enj.
14Seelich, dee äare Kjleeda woschen, doamet see een Rajcht ha aun däm Läwensboom un derch de Dooasch en de Staut nengonen. 15Buten sent de Hunj un de Zaubra un de Huara un de Merda un de Jetzendeena un jiedra, dee de Läajes leeft un deit.
16Ekj, Jesus, ha mienen Enjel jeschekjt, junt dise Dinj to bezeijen en de Jemeenten. Ekj sie dee Wartel un daut Jeschlajcht (de Spross) von David, de jlensenda Morjenstiern.
17Un de Jeist un de Brut sajen: Komm! Un wäa daut hieet, saj: Komm! Un wäm doa darscht, dee komm; wäa doa well, nemm daut Läwenswota emsonst.
18Ekj bezeij jiedrem, dee de Wieed de Profezeiunk von dit Buak hieet: Wan wäa to dise Dinj doatoo deit, soo woat Gott am de Ploagen doatoo doonen, dee en dit Buak jeschräwen sent; 19un wan wäa von de Wieed en dit Buak dise Profezeiunk wajch nemt, soo woat Gott sien Aundeel wajch nämen von däm Läwesboom un ut de heilje Staut, wuavon en disem Buak jeschräwen es.
20Dee dise Dinj bezeicht, sajcht: Jo, ekj kom boolt. - Amen; komm, Har Jesus!
21De Jnod von däm Harn Jesus [Christus] es met aule Heilje!
Currently Selected:
Openboarunk 22: PBJHF
Highlight
Share
Copy
Want to have your highlights saved across all your devices? Sign up or sign in
© SW-Radio e.V.
