1. Mose 11
11
De Torm von Babel woat jebut
1Un de gaunze Ieed haud eene Sproak un jlikje Wieed. 2Un daut passieed, aus see nom Oosten trocken, doa fungen see eene Läacht em Launt Sinear un wonden doa. 3Un see säden eena toom aundren: Woll aun, lot ons Täjle strikjen un hoat brennen! Un de Täjle deenden an aus Steen, un daut Ieedpetj deend an aus Leem. 4Un see säden: Woll aun, bu wie ons eene Staut un eenen Torm, daut de Spetz bat aum Himmel rieekjt, un wie moaken ons eenen Nomen, daut wie nich vestreit woaren äwa de gaunze Ieed! 5Un Gott kaum rauf, dee Staut un däm Torm to seenen, däm de Menschenkjinja buden. 6Un Gott säd: Kjikj, see sent een Volkj un ha aula eene Sproak, un dit ha see aunjefongen to doonen; un nu woat an nuscht opphoolen, waut see dochten to doonen. 7Woll aun, lot ons raufkomen un de Sproaken vewerren, daut see eena däm aundren siene Sproak nich vestonen! 8Un de Har vestreid an von doa äwa de gaunze Ieed; un see hieeden opp, de Staut too buen. 9Doarom jeef maun ar däm Nomen Babel; dan doa vewerd de Har de Sproaken de gaunze Ieed, un von doa vestreid an de Har äwa de gaunze Ieed.
Staumboom von Sem bat Abram
10Dit sent de Jeschlajchta Sem: Sem wia 100 Joa oolt un jebua Arpachschad, twee Joa no de Sindflut. 11Un Sem läwd, nodäm hee Arpachschad jebuaren haud, 500 Joa un jebua Säns un Dajchta.
12Un Arpachschad läwd 35 Joa un jebua Schelach. 13Un Arpachschad läwd, nodäm hee Schelach jebuaren haud, 403 Joa un jebua Säns un Dajchta.
14Un Schelach läwd 30 Joa un jebua Heber. 15Un Schelach läwd, nodäm hee Heber jebuaren haud, 403 Joa un jebua Säns un Dajchta.
16Un Heber läwd 34 Joa un jebua Peleg. 17Un Heber läwd, nodäm hee Peleg jebuaren haud, 430 Joa un jebua Säns un Dajchta.
18Un Peleg läwd 30 Joa un jebua Regu. 19Un Peleg läwd, nodäm hee Regu jebuaren haud, 209 Joa un jebua Säns un Dajchta.
20Un Regu läwd 32 Joa un jebua Serug. 21Un Regu läwd, nodäm hee Serug jebuaren haud, 207 Joa un jebua Säns un Dajchta.
22Un Serug läwd 30 Joa un jebua Nahor. 23Un Serug läwd, nodäm hee Nahor jebuaren haud, 200 Joa un jebua Säns un Dajchta.
24Un Nahor läwd 29 Joa un jebua Tarah. 25Un Nahor läwd, nodäm hee Tarah jebuaren haud, 119 Joa un jebua Säns un Dajchta.
26Un Tarah läwd 70 Joa un jebua Abram, Nahor un Haran.
27Un dit sent de Jeschlajchta Tarah: Tarah jebua Abram, Nahor un Haran; un Haran jebua Loot. 28Un Haran storf ver sienem Voda Tarah sienem Aunjesecht, en sienem Heimatlaunt, en Ur en Chaldäa. 29Un Abram un Nahor neemen sikj Frues; de Nomen von Abram siene Fru wia Sarai, un de Nomen von Nahor siene Fru wia Milka, de Dochta von Haran, de Voda von Milka un de Voda de Jiska. 30Un Sarai wia onfruchtboa, see haud kjeen Kjint. 31Un Tarah neem sienen Sän Abram un Loot, däm Sän von Haran, däm Sän von sienem Sän, un Sarai, siene Schwiadochta, de Fru von sienem Sän Abram; un see trocken metenaunda ut Ur en Chaldäa, om en daut Launt Kanaan too gonen; un see kjeemen bat Haran un wonden doa. 32Un de Doag Tarah wieren 205 Joa, un Tarah storf en Haran.
Currently Selected:
1. Mose 11: PBJHF
Highlight
Share
Copy
Want to have your highlights saved across all your devices? Sign up or sign in
© SW-Radio e.V.
