Chɔɔn 12
12
Nynɔ̌ due tli̍ Jusu chlǎn i̍ dě Bɛtani
(Matio 26.6-13; Maɛ 14.3-9)
1Ɛ̍ sie-o wǐh mɛ̀o̍ wɛ̀ ɛ̍ iě Sììkɛ̍n Weɛ̍-a Peě nu̍ wɛ̀ Jusu mu̍ dǒ Bɛtani dǒ Laaslɔɛ blǐ wlɔ̀. Laaslɔɛ Jusu sà-eɛ, ɔ̍-ɔ bo. 2Dǒ u̍h pi̍-i Jusu-a dɛ̍. Nɛ̀ Jusu bei tè i̍ dǒ teble̍ gbɔ̀, nɛ̀ dǒ Laaslɔɛ nɛ ke, wɛ̀ Mata-a gba̍ balih. 3Wɛ̀ nɔ̌ chlǎn wlihwlǐh ɛ̀ gbǎ-a dɛ̍kɛ̍n-ɛ, iě Mɛle dǔ ɛ̍ sòlɛ̀ gbàǐ-i. Tu̍ ɛ̀ u̍h nui-a chlǎn-a chɛ̀-ɛ, u̍h-a dǎɛ ɛ̍ naa. Iě ɔ̍ tli̍ chlǎn laa̍ Jusu-a bu̍hᵻ ja̍i̍. Wɛ̀ ɔ̍ nu̍ ɔ̍ mǐ iě ɔ̍ slǎn i̍h ja̍i̍. Iě dě gbò-a chɛ̀ jǐ dǒ ɛ̍ nɔ̌ we̍. 4Wɛ̀ Jusu-a kòà-a due, Juda Ɛkɛlia ɔ̀ mu̍-a ka Jusu nyɔ̍ kwlǎ sà-ɛɛ bɔ̌ɛ-ɛ, iě ɔ̍ la̍a̍, 5“Dɛ̍nu̍ nɔ̌ chlǎn la ɛ̍ se̍ sebla̍ wlǐ-a kmɛ ta̍a̍n (300) ple̍-ɛ wɛ̀ ɛ̍ wlǐ iě nyɔ̍gbà nyɔ̍ we̍ mu̍ de ɛ?” 6Ɔ̍ bla̍ ɛ̀ la̍ sǔh jɛ ɛ̍ se̍ ɔ̍ nyɔ̍gbà nyɔ̍-a tìh kma-a. Ɔ̍-ɔ jlǐ-nyɔ̍ dɛbo. Ɔ̍ bo ɔ̀ nu̍ wlǐ i̍ tè nyɔ̍, jɛ nɛ̀ kǎ ɔ̍ di̍ i̍h we̍i̍ wɛɛ wɛɛ.
7Wɛ̀ Jusu la̍a̍, “Tǎli ɔ̍ i̍, dɛ̍ ɔ̍ mu̍-a nu̍ dǒ ǎn i̍ tè-weɛ̍ di̍i̍-ɛ, ɔ̍ iě ɛ̍ nu̍ duedɛ. 8Nyɔ̍gbà nyɔ̍ nɔ̀ɔ̍, u̍h ke mɔ̀-a mu̍ da̍a nɛ ma̍u̍. Jɛ mɔ̍ɔ-ɛ, mɔ̀ ke ǐn ke à se̍ da̍a nɛ mu̍ ma̍u̍.”
Juu nyɔ̍-a nyɔ̍ klaaᵻ sɔ̌ Laaslɔɛ
9Ka Jusu nɛ-a dǒ Bɛtani wlɔ̀ di̍i̍-ɛ, i̍h bo nyɔ̍ tlùgbei̍ wɔ̌n, iě u̍h mu̍ deě. Jɛ ɛ̍ se̍ Jusu nɛ due tìh u̍h se̍-e mu̍. Laaslɔɛ jɔ ɔ̍ sà-eɛ, ɔ̍ bo u̍h-a mu̍ jě la̍ ke. 10Wɛ̀ slaǎ sà nyɔ̍ klaaᵻ dbǎ wlu̍ i̍ u̍h iě Laaslɔɛ dbǎ ke. 11Dɛ̍nu̍ɛ, dǒ ɔ̍ dɛ kɛ̍n bo nyɔ̍ dɔu jii iě u̍h-a sà u̍h jlǐh we̍, wɛ̀ u̍h-a gbaɛ Jusu wlùh.
Jusu-a Juluslɛn i̍ sǐ-ɛ mu̍ i̍ ɔ̍ nynɛ̌
(Matio 21.1-11; Maɛ 11.1-11; Luu 19.28-40)
12Sɔ̀n dɛɛ sɛ̀n-aɛ, nyɔ̍ tlùgbei̍ ùh ji̍-a Sììkɛ̍n Weɛ̍-a Peě kɛ̍n-ɛ, dǒ u̍h wɔ̌n-ɛ pɔ̀n ka Jusu-a ji̍-a Juluslɛn-ɛ. 13Wɛ̀ u̍h dǔ ju̍hᵻ wlɔ̍nᵻɛ́, iě u̍h blě i̍ wǐi-ɛ u̍h-a mu̍ ɔ̍ i̍ jǎɛ la̍. U̍h la̍a̍, “Nyɔsoa bo ɔ̀ nu̍ tìhwe̍ po̍ nyɔ̍. Eslɔɛ nyɔ̍-a Blǔh Baa ɔ̀ ji̍-a dǒ Joi-a nynɛ̌ kɛ̍n-ɛ, pɔ̀ìě dǒ ɔ̍ we̍.”
14Jusu jě soo̍pà plɔ̀ iě ɔ̍ tè i̍ dǒ ɛ̍ kɛ̍n. Ɛ̍ kɔn taǐn bo Nyɔsoa-a wlu̍ sà-a, ɛ̍ la̍a̍,
15“Juluslɛn wlɔ̀, bɔ̌ faɔn ple̍-ɛ.
Gbɛ̀n-e, àn Blǔh Baa-a ji̍-ae.
Ɔ̍ tè i̍ dǒ soo̍pà plɔ̀ kɛ̍n.”
16Ɔ̍ kòà se̍ ɛ̀ la we̍i̍ wɔ̌n de sàǐtòò ka Nyɔsoa-a wlu̍ la̍ u̍h-a mu̍-a ɔ̍ ìh la pùn nu̍-ɛ. Jɛ Jusu wlǔh-ae wɛ̀ dě tìh-a i̍ bɛ̌-ɛ di̍i̍-ɛ, wɛ̀ i̍h dǔ dǒ u̍h wlì i̍ sǐi-ɛ.
17Nyɔ̍ tlùgbei̍ juh nɛ-ao wɛ̀ Jusu iě-a Laaslɔɛ dǎ dě gbàlɔ̍ biě di̍i̍ wɛ̀ ɔ̍ iě-ae wlǔh-ɛ, nɛ̀ kǎ u̍h-a chɛ̍n ɛ̍ we̍ sɔ̀ìn ke sǔh. 18Jbaɛdih la ɔ̍ po̍-aɛ, ɛ̍ pɔ̀n bo nyɔ̍ɔ wɔ̌n. Ɛ̍ kɔn nyɔ̍ tlùgbei̍ mu̍ ɔ̍ i̍ jǎɛ la̍. 19Nɛ̀ Fɛlesii nyɔ̍-a sǔh-a nu̍, “Mɔ̀ gbɛ̀n-e, à-a jě-o jua̍a̍ dɛ. Blǔh kli̍hgbɛ̍ wɔ̀ dǒ ɔ̍ de̍e̍ wɛ̀ o.”
Klii nyɔ̍-a pɔ̀n Jusu jě-ɛ i̍
20Nɛ̀ nyɔ̍ ùh mu̍-a Nyɔsoa wɛɛ sà la̍ dǒ peě laa̍ kɛ̍n-ɛ, Klii nyɔ̍ nɛ u̍h nynɛ̌ i̍. 21Wɛ̀ u̍h mu̍ dǒ Felɔ we̍, ɔ̍ sɔ dǒ Bɛseida wlɔ̀ di̍i̍ dě Kaladii bloa̍ kɛ̍n. Iě u̍h la̍a̍, “Nyɔ̍ klaa, à pɔ̀n Jusu jě-ɛ i̍.”
22Wɛ̀ Felɔ mu̍ ɔ̍ sèàɛ̍ Andlu wlùh. Iě ɔ̍ ke Andlu mu̍ u̍h sèàɛ̍ Jusu wlùh. 23Wɛ̀ Jusu la̍a̍ dě u̍h we̍, “Jɛwɛ̀ ti̍ nyni̍-o wɛ̀ Nyi̍ɔ̍-a Jǔ-a nynɛ̌ iě i̍ bɛ̌. 24Tìh-a taǐn ǎn sèàɛ̍ mɔ̀ wlùh, ti̍ ìn se̍-a kwǐ kɛnɛ̌-a jɔɛ̍ dě wlù po̍ ke̍-ɛ, dǒ ɛ̍ nɛ-ɛ due sǔh. Jɛ pò ìn po̍ ɛ̍ dě wlù-ɛ, nɛ̀ ɛ̍ mɛ̌-ɛ. Pò ɛ̍ mɛ̌ wɛ̀-ɛ, iě ɛ̍ tlo jɔ̌ dɔu. 25Nyɔ̍ jɔ kma-a ɔ̍ feɛ tìh-ɛ, nɛ̀ ɔ̍ mu̍ ɛ̍ mǎ-ɛ. Nɛ̀ nyɔ̍ jɔ mu̍-a ɔ̍ feɛ-ɛ faɛn da̍a kmɔ̌ la we̍-ɛ, nɛ̀ ɔ̍ mu̍ ɛ̍ blě dǒ kmɔ̌ sie feɛ we̍. 26Nyɔ̍-o-nyɔ̍ ɔ̀ pɔ̀n-a ǐn jǔ dbee-ɛ i̍-ɛ, nɛ̀ ɔ̍ kɔn ɔ̍ iě dǒ ǐn de̍e̍ gbǎ. Wɛ̀ tà ǐn nɛ-aɛ, ǎn pòi̍ju iě-o nɛ ke. Nyɔ̍ ɔ̀ mu̍-a ǐn jǔ dbee-ɛ, ǐn Baa-a mu̍ ɔ̍ ja̍ tè.
Jusu sà ɔ̍ mɛ̌ɛ tìh i̍
27“Kaka la̍, dǒ ǐn wlì-a nu̍ gbɛ̀ùgbɛ̀ù, sɔ nɛ̀ ka iě-a dǎ-ɛ ǐn se̍ ɛ̍ juo. Iě ka nu̍, ‘Baa, jua̍i̍ sàɛ̀ la, bɔ̌ wɔ̌n-ɛ ɛ̍ bɔ̌ ǐn we̍ ji̍-ɛ o’ ae? Iěe, dɛ̍nu̍ɛ, jua̍i̍ sàɛ̀ tìh bo ǐn ji̍. 28Baa, àn nynɛ̌ bo ìè i̍ bɛ̌-ɛ o.”
Wɛ̀ wlu̍ sɔ dě ja̍i̍wlɔ̀, ɛ̍ la̍a̍, “Ǐn bɛ̌-ɛ ɛ̍ i̍ wɛ̀ se̍e̍, iě ǎn mu̍ ɛ̍ i̍ bɛ̌-ɛ dɛ.”
29Nyɔ̍ tlùgbei̍ ùh nyna-a doǒ i̍-ɛ, u̍h wɔ̌n wlu̍ laa̍, iě u̍h la̍a̍, “Tɛ̀n bo ɛ̀ plǎn.” Duuh la̍a̍, “Nyɔsoa-a ǐnchɔ̀ bo ɛ̀ wlu dě ɔ̍ we̍.”
30Jusu la̍a̍, “Wlu̍ la ɛ̀ wlu-aɛ, mɔ̀-a tìh bo ɛ̍ wlu, ɛ̍ se̍ ǎn tìh. 31Jɛwɛ̀ ɛ̍ nu̍ ti̍ kmɔ̌ la ɛ̍ iě kɛ̀n sà-ɛ. Nɛ̀ ɛ̀ blě-a kmɔ̌ la ɛ̍ wlu̍ kwa̍-ɛ, jɛwɛ̀ tu̍h-a mu̍ ɛ̍ du̍. 32Ti̍ ǎn mu̍-a ja̍i̍ pèle-ɛ dǒ tu̍ wlì iě-a nɔ̌ bloɔ̍ sɔ-ɛ, nɛ̀ ǎn mu̍ nyɔ̍ kli̍hgbɛ̍ ǎn chɛ̀ we̍ ja.” ( 33Ɔ̍ sà ɛ̀ la-a wɛ̀ ɛ̍ iě ka ɔ̍ mu̍-a mɛ̌-ɛ sɔɛn nu̍-ɛ we̍i̍ flɔn-ɛ.)
34Wɛ̀ nyɔ̍ɔ la̍a̍ dě ɔ̍ we̍, “À telě la̍ Nyɔsoa-a Chèɛ̀ Tba̍ju-a mu̍ kmɔ̌ nɛ kleǐnklein. Ka ìn nu̍ wɛ̀ nàa̍ Nyi̍ɔ̍-a Jǔ kɔn ɔ̍ iě ja̍i̍ pèle-ɛ dǒ tu̍ wlì ɛ? Nɛ̀ Nyi̍ɔ̍-a Jǔ jɔwe̍ bo ɛ?”
35Iě Jusu la̍a̍ dě u̍h we̍, “Sɔ̀npli-a mu̍ da̍a mɔ̀ we̍ nɛ ke̍ dǒ ti̍ gbɔ̍ di̍i̍. Mɔ̀ na duedɛ ka mɔ̀ blě-a sɔ̀npli ke̍-ɛ, wɛ̀ wlù-u je̍e mɔ̀ wɔ̀-ɛ. Nyɔ̍ ɔ̀ na-ɛa dě kwile-ɛ, tà ɔ̍ mu̍-aɛ, nɛ̀ ɔ̍-ɔ jě-o i̍. 36Ka mɔ̀ blě-a sɔ̀npli ke̍-ɛ, mɔ̀ gbaɛ ɛ̍ wlùh duedɛ, wɛ̀ mɔ̀ iě ɛ̍ nynuu̍ nu̍.”
Nyɔ̍ɔ se̍ wlùh gbaɛ blě
Jusu wɔ̀-a wlu-ɛɛ, iě ɔ̍ sɔ dě u̍h nynɛ̌, wɛ̀ ɔ̍ sìle ɔ̍ chɛ̀. 37Dǒ u̍h jlǐhwai bo ɔ̍ poe jbaɛdih dɔu la gbàkla̍a̍, jɛ u̍h se̍ ɔ̍ wlùh gbaɛ. 38Ɛ̀ la, ɛ̍ iě Nyɔsoa-a wlu̍ ɔ̍ tu̍owli po̍ nyɔ̍ Asaia-a bla̍-aɛ kɛ̀ǐn po̍ dɛbo. Ɔ̍ la̍a̍,
“Joi, nyɔ̍we̍ bo ɔ̀ dǎɛ à tu̍owli tìh ɛ?
Nyɔ̍ kɔn we̍ bo ìn toe àn gbǐh ɛ?”
39Ɛ̀ kɔn tìh u̍h se̍-a ɔ̍ tìh chɛ̀ po̍-ɛ bɛ̌ɛ-ɛ, ɛ̍ bo Asaia bla̍-a dɛ, ɔ̍ la̍a̍,
40“Nyɔsoa gbe-e dě u̍h jlǐh,
iě ɔ̍ mǎ-ɛ u̍h-a pɔluh,
u̍h-a jlǐh-i je̍e i̍ jě,
wɛ̀ u̍h-a wlùh-u je̍e dɛ̍ɛ̍ i̍ wɔ̌n.
Wɛ̀ u̍h-u je̍e dě ɔ̍ we̍ i̍ bǐi,
ɔ̍-ɔ je̍e u̍h pǔh-i.”
41Asaia bla̍ ɛ̀ la, dɛ̍nu̍ɛ, ɔ̍ jě Jusu-a nynɛ̌-a i̍ bɛ̌-ɛ, iě ɔ̍ bla̍ ɛ̍ dǒ ɔ̍ pùn.
42Juu nyɔ̍-a nyɔ̍ klaaᵻá wlu̍ kwa̍ blě nyɔ̍ dɔu-a chɛ̀ gbaɛ ɔ̍ wlùh. Jɛ u̍h-a ple̍ Fɛlesii nyɔ̍ jǔ. Ɛ̍ kɔn u̍h-u sà i̍h-i dǒ wlɔ̀gbàɛ̀, wɛ̀ Fɛlesii nyɔ̍ je̍e u̍h sɔ̀n po̍ dě wɛɛ sà gbò sɔ̀n. 43Dɛ̍nu̍ɛ, wlɔ̀ nyi̍ɔ̍ iě u̍h tìhwe̍ po̍, ɛ̍ bo ɛ̀ po̍ u̍h gbǐh ɛ̍ sìì Nyɔsoa iě u̍h tìhwe̍ po̍.
Jusu-a wlu̍-a mu̍ nyɔ̍ tìh gbɛ̍n-ɛ
44Iě Jusu wǐ, ɔ̍ la̍a̍, “Nyɔ̍ jɔ gbaɛ-a ǐn wlùh-ɛ, nɛ̀ ɛ̍ se̍ ǐn nɛ due ɔ̍ se̍ wlùh gbaɛ. Jɛ nɛ̀ nyɔ̍ ɔ̀ dbo̍-a m-ɛ bo ɔ̍ gbaɛ wlùh ke. 45Nɛ̀ nyɔ̍ jɔ jě-a m-ɛ, nɛ̀ ɔ̍ jě nyɔ̍ ɔ̀ dbo̍-a m-ɛ wɛ̀. 46Ǐn ji̍ nɔ̌ kmɔ̌ we̍ ka sɔ̀npli-ɛ, wɛ̀ nyɔ̍ ùh gbaɛ-a ǐn wlùh-ɛ u̍h-u je̍e dě kwile di̍i̍ sie. 47Pò nyɔ̍-o-nyɔ̍ wɔ̌n ǎn wlu̍ wɛ̀ ɔ̍ se̍ ɛ̍ nu̍-ɛ, ǐn se̍ ɔ̍ tìh gbɛ̍n-ɛ mu̍. Dɛ̍nu̍ɛ, ǐn se̍ ji̍ iě kmɔ̌ tìh gbɛ̍n-ɛ, jɛ ǐn ji̍-i wɛ̀ iě ɛ̍ sèìe. 48Jɛ nyɔ̍ jɔ ɔ̀ tba̍-a ǐn chla sǔh wɛ̀ ɔ̀ se̍-a ǎn wlu̍ nu̍-ɛ, ɔ̍ blě dɛ̍ ɛ̀ mu̍-a ɔ̍ tìh gbɛ̍n-ɛɛ. Wlu̍ ǎn bla̍-a ka-ɛ, ɛ̍ bo ɛ̀ mu̍ ɔ̍ tìh gbɛ̍n-ɛ dǒ bɔ̌ɛ-o weɛ̍ di̍i̍. 49Dɛ̍nu̍ɛ, ǐn se̍ dǒ ǎn chɛ̀-a sɔ̍n kɛ̍n wlu-i, jɛ Baa ɔ̀ dbo̍-a m-ɛ, dɛ̍ iě-a wlu-ɛ ke, ka iě-a wlu-ɛ nu̍-ɛ, ɔ̍ bo ɔ̀ tù ɛ̍ ǐn wɔ̍n. 50Ǐn juo ɛ̍-ɛ dɛ̍ ɔ̍ tù-a ǐn wɔ̍n-ɛ, ɛ̍ nyǐ nyɔ̍ kmɔ̌ sie feɛ. Ɛ̍ tìh-ɛ, dɛ̍ Baa sèàɛ̍-a ǐn wlùh-ɛ, ɛ̍ bo ǎn bla̍.”
Currently Selected:
Chɔɔn 12: KDNT
Highlight
Share
Copy
Want to have your highlights saved across all your devices? Sign up or sign in
The New Testament in Western Krahn published as KU̍O̍ DELEE © The Bible Society in Liberia, 1999.
