Chɔɔn 13

Jusu dle ɔ̍ kòà-a bu̍hᵻ

1Ɛ̍ si̍e̍-o weɛ̍ due wɛ̀ ɛ̍ iě Sììkɛ̍n Weɛ̍-a Peě nu̍. Dǒ Jusu juo-e dɛ̍ i̍ ka ti̍ nyni̍-a wɛ̀ ɔ̍ iě-a da̍a kmɔ̌ la we̍ sɔ ɔ̍ iě-a Baa we̍ mu̍-ɛ. Nyɔ̍ ùh kɔn-a dǒ ɔ̍ we̍ nɔ̌ kmɔ̌-ɛ, u̍h-a jbɛɛ ɔ̍ sà-a dě bloɔ̍ i̍-ɛ, ɛ̍ bo ɔ̍ chlà-ɛ ɛ̍ dlǔ i̍.

2Jusu ke ɔ̍ kòà iě-a dǒ wìe̍dɛ di̍ la̍ nɛ-ɛ, Juda Ɛkɛlia ɔ̀ nu̍-a Samo-a jǔ-ɛ, nɛ̀ Kǔ gbǎ dǒ ɔ̍ wlùh kɛ̍n wɛ̀ se̍e̍ ɔ̍ iě Jusu kwlǎ sà. 3Jusu juo i̍h ka Baa po̍-a dɛ̍ᵻ kli̍hgbɛ̍ dě ɔ̍ kwa̍a̍, iě ɔ̍ sɔ-a dě Nyɔsoa we̍ wɛ̀ ɔ̍ mu̍-a la̍ dě de̍ Nyɔsoa we̍-ɛ. 4Wɛ̀ Jusu sɔ bloɔ̍ dǒ teble̍ gbɔ̀, iě ɔ̍ sà plɛ̀i̍ i̍. Wɛ̀ ɔ̍ tù dle-e baɔ we̍. 5Iě ɔ̍ chɛ̌li nǐ dě pani̍ di̍i̍, sɔ ɔ̍ dle la̍ ɔ̍ kòà-a bu̍hᵻ sǔh. Wɛ̀ ɔ̍ nu̍ dle-e baɔ ɔ̍ tù-a we̍-ɛ, iě ɔ̍ slǎn i̍h ja̍i̍. 6Ɔ̍ jɛɛ-a Samo Pitɛ-ɛ, iě Pitɛ la̍a̍, “Joi, àn ji̍ ǎn bu̍hᵻ dle la̍ ke ae?”

7Wɛ̀ Jusu la̍a̍ dě ɔ̍ we̍, “Dɛ̍ ǎn nu̍-aɛ, ìn se̍ ɛ̍ juo kaka. Jɛ bɔ̌, àn mu̍ ɛ̍ we̍ i̍ ju̍o̍e dě nya̍.”

8Pitɛ la̍a̍, “Tlùǔmà, ìn se̍ ǎn bu̍hᵻ dle mu̍ o.”

Jusu la̍a̍, “Pò ǐn se̍ àn bu̍hᵻ dle-ɛ, nɛ̀ ìn ke ǐn ke à se̍ we̍ nɛ̍aɛ mu̍ dɛ.”

9Samo Pitɛ la̍a̍, “Joi, pò ɛ̍ ja laan nɛ mu̍-ɛ, nɛ̀ ɛ̍ se̍ ǎn bu̍hᵻ nɛ due ìn se̍ dle mu̍. Jɛ nɛ̀ ǎn sɔ̍nᵻ ke ǎn dlǔ bei kli̍hgbɛ̍ bo ìè dle.”

10Wɛ̀ Jusu la̍a̍ dě ɔ̍ we̍, “Nyɔ̍ jɔ dle-aɛ nɔ̀ɔ̍, nɛ̀ ɔ̍ wɛ̀ flɛ̀n wɛ̀. Nɛ̀ ɔ̍ bu̍hᵻ nɛ due bo ɔ̍ mu̍ la̍ dle sǔh. Mɔ̀ wɛ̀ flɛ̀n wɛ̀, jɛ ɛ̍ se̍ mɔ̀ kli̍hgbɛ̍.” 11Nɛ̀ Jusu juo nyɔ̍ ɔ̀ mu̍-a ɔ̍ kwlǎ sà-a wɛ̀ se̍e̍. Ɛ̍ kɔn ɔ̍ la̍a̍, “Ɛ̍ se̍ mɔ̀ kli̍hgbɛ̍ ùh se̍ flɛ̀n wɛ̀.”

12Ɔ̍ wɔ̀-a u̍h-a bu̍hᵻ dle-ɛ, wɛ̀ ɔ̍ pa̍ ɔ̍ plɛ̀i̍ dode̍, iě ɔ̍ mu̍ dǒ ɔ̍ tèla̍. Iě ɔ̍ la̍a̍, “Dɛ̍ ǐn nu̍-a mɔ̀ pùn da̍a tiɔ-ɛ, mɔ̀ juo ɛ̍ gbɔ̀ ae? 13Mɔ̀-a dǎɛ ǐn Dlǔtu ke Joi, mɔ̀ blaɛ i̍, dɛ̍nu̍ɛ, mɔ̍ bo chɛ̀. 14Ka mɔ̍ jɔ nu̍-a mɔ̀-a Joi ke Dlǔtu, wɛ̀ ǎn dle-a la̍ mɔ̀-a bu̍hᵻɛ́, nɛ̀ mɔ̀ kɔn mɔ̀ iě bu̍hᵻ we̍ dle-e ke. 15Ɛ̀ ǎn nu̍-a mɔ̀ pùn-ɛ, nɛ̀ wìè bo ǎn toe mɔ̀, wɛ̀ mɔ̀ iě-e ǎn wɔ̀ɔ̀ i̍ sà. 16Tìh-a taǐn ǎn sèàɛ̍ mɔ̀ wlùh, pòi̍ju-u ku̍ wɔ̍n ɔ̍-ɔ sìì ɔ̍ dlǔtu. Nɛ̀ dbo̍ju se̍ wɔ̍n ku̍ ɔ̍ se̍ jɔ dbo̍-a ɔ̍-ɛ sìì. 17Ka mɔ̀ juo-a ìh la-ɛ, pò mɔ̀ ja i̍h nu̍-ɛ, nɛ̀ mɔ̀ nmɔ i̍ wɛ̀.

18“Ɛ̍ se̍ mɔ̀ kli̍hgbɛ̍ ǐn se̍ dǎ, juh ǐn tba̍-a chèɛ̀-ɛ, ǐn juo u̍h-i. Jɛ ɛ̍ iě Nyɔsoa-a wlu̍ kɛ̀ǐn po̍ dɛbo, ɛ̀ la̍a̍, ‘Nyɔ̍ ɔ̀ di̍-a ǎn dɛ̍-ɛ, ɔ̍ bo ɔ̀ poe ǐn gbɔ̀là.’ 19Ǎn sèàɛ̍ la̍ mɔ̀ wlùh duedɛ, wɛ̀ ɛ̍ iě nɛ-ɛ dǔ. Ti̍ ɛ̍ mu̍-a nɛ-ɛ, nɛ̀ mɔ̀-a mu̍ ɛ̍ tìh chɛ̀ po̍ ka ‘Mɔ̍ bo ɔ̀ nu̍-a Ɔ̍-ɛ.’ 20Tìh-a taǐn ǎn sèàɛ̍ mɔ̀ wlùh, nyɔ̍-o-nyɔ̍ ǐn dbo̍-a, nyɔ̍ jɔ gbɛ̍n-a ɔ̍ tìh i̍-ɛ, nɛ̀ ɔ̍ gbɛ̍n ǎn tìh i̍ wɛ̀. Nyɔ̍ ɔ̀ gbɛ̍n-a ǎn tìh i̍-ɛ, nɛ̀ ɔ̀ dbo̍-a m-ɛ, ɔ̍ tìh bo ɔ̍ gbɛ̍n i̍ wɛ̀ ke.”

Jusu la̍ nyɔ̍-a mu̍ ɔ̍ kwlǎ sà

(Matio 26.20-25; Maɛ 14.17-21; Luu 22.21-23)

21Jusu wɔ̀-a wlu-ɛɛ, nɛ̀ dǒ ɔ̍ wlì-a nu̍ gbɛ̀ùgbɛ̀ù. Iě ɔ̍ wlu dɛ, ɔ̍ la̍a̍, “Bɔ̌ ǐn sèàɛ̍ mɔ̀ tìh-a taǐn wlùh, mɔ̀-a nyɔ̍ due-a mu̍ ǐn kwlǎ sà.”

22Iě ɔ̍ kòà-a gbèɛ̀ɛ̍n jlǐh, pò nyɔ̍ ɔ̍ dǎ kɔ̌ɔ. 23Jusu-a kòà due ɔ̀ kɔn tìh ɔ̍ kma-ɛ, nɛ̀ ɔ̍ tè i̍ dǒ ɔ̍ pùn. 24Wɛ̀ Samo Pitɛ po̍ jlǐh dě ɔ̍ we̍, ɔ̍ la̍a̍, “Tèle Jusu laa̍ i̍ pò nyɔ̍ ɔ̍ dǎ kɔ̌ɔ.”

25Iě ɔ̍ klɛɛn dǒ Jusu we̍ wɛ̀ ɔ̍ tèle ɔ̍ i̍, ɔ̍ la̍a̍, “Joi, ɔ̍ nynɛ̌ ɛ?”

26Jusu la̍a̍, “Pò ǐn tba̍ blèe̍ tile la smǎ i̍-ɛ, nyɔ̍ ǎn mu̍-a ɛ̍ nyǐ-ɛ, nɛ̀ ɔ̍-ɔ bo.” Wɛ̀ ɔ̍ tba̍ ɛ̍ smǎ i̍, iě ɔ̍ nyǐ ɛ̍ Samo-a jǔ Juda Ɛkɛlia. 27Juda dǔ-a blèe̍ laa̍ ka-ɛ, Setɔn gbǎ dě ɔ̍ ja̍a̍ kleǐn. Jusu la̍a̍ dě ɔ̍ we̍, “Dɛ̍ àn ji̍-a nu̍ la̍-ɛ, nu̍ ɛ̍ suei̍.” 28Jɛ dɛ̍ kɔn tìh ɔ̍ bla̍-a dɛ̍ laa̍ dě Juda we̍-ɛ, u̍h kli̍hgbɛ̍ nɛ-a dǒ teble̍ gbɔ̀-ɛ, u̍h se̍ ɛ̍ gbɔ̀ juo. 29Sɔ dɛ̍ laa̍ Juda nu̍-a wlǐ i̍ tè nyɔ̍-ɛ, u̍h-a duuh jajeɛ̍ dɛ̍ᵻ u̍h-a pɔ̀n-a i̍ dǒ peě laa̍ kɛ̍n-ɛ, i̍h bo Jusu-a sèàɛ̍ ɔ̍ wlùh ɔ̍ iě tɛ̀n la̍-a mu̍ de, àe̍e̍ ɔ̍ iě nyɔ̍gbà nyɔ̍ dɛ̍ nyǐ de.

30Juda gbɛ̍n-a blèe̍ laa̍ i̍-ɛ, dǒ ɔ̍ nyna ɔ̍ sǐ sɔ̀n, nɛ̀ wlù wɔ̀ wɛ̀.

Jusu po̍ nyɔ̍ slǔh delee

31Juda sǐ-a sɔ̀n wɛ̀-ɛ, wɛ̀ Jusu la̍a̍, “Jɛwɛ̀ Nyi̍ɔ̍-a Jǔ-a nynɛ̌-a ji̍ i̍ bɛ̌ la̍-a. Iě ɔ̍ bɛ̌-ɛ Nyɔsoa-a nynɛ̌ i̍ ke. 32Nɛ̀ pò ɔ̍ bɛ̌-ɛ Nyɔsoa-a nynɛ̌ i̍ wɛ̀-ɛ, nɛ̀ Nyɔsoa-a chɛ̀-a mu̍ ɔ̍ nynɛ̌ i̍ bɛ̌-ɛ ke. Nyɔsoa-a mu̍ ɛ̍ nu̍ suei̍. 33Ǎn jbɛɛ nyɔ̍, ti̍ ǎn mu̍-a da̍a mɔ̀ we̍ nu̍-ɛ, ɛ̍ se̍ dlǔ tɛn dɛ. Nɛ̀ mɔ̀-a mu̍ ǐn i̍ pɔ̀n, jɛ dɛ̍ due ǐn sèàɛ̍-a Juu nyɔ̍-a nyɔ̍ klaaᵻ wlùh-ɛ, ɛ̍ bo ǎn ji̍ la̍ mɔ̀ wlùh sèàɛ̍ la̍ ke. Na̍a̍, ‘Tà ǎn mu̍-aɛ, mɔ̀ se̍-e mu̍-ɛ bɛ̌ɛ mu̍.’ 34Mɔ̀ jbɛɛ we̍, ɛ̍ bo ɛ̀ nu̍ slǔh delee ǎn po̍ mɔ̀. Ka ǐn nu̍-a mɔ̀-ɔ jbɛɛ-ɛ, kǎ mɔ̀ iě we̍ jbɛɛ nu̍ ke. 35Pò mɔ̀ jbɛɛ we̍-ɛ, nɛ̀ nyɔ̍ kli̍hgbɛ̍-a mu̍ ɛ̍ i̍ juo ka mɔ̀ nu̍-a ǎn kòà-ɛ.”

Pitɛ-a mu̍ Jusu-a tìh-i tòlo

(Matio 26.31-35; Maɛ 14.27-31; Luu 22.31-34)

36Wɛ̀ Samo Pitɛ la̍a̍ dě ɔ̍ we̍, “Joi, tà àn mu̍ ɛ?”

Jusu la̍a̍, “Tà ǎn mu̍-aɛ, ìn se̍ dǒ ǐn de̍e̍ gbǎ-a bɛ̌ɛ kaka. Jɛ àn mu̍ dǒ ǐn de̍e̍ gbǎ dě nya̍.”

37Iě Pitɛ la̍a̍ dě ɔ̍ we̍, “Dɛ̍nu̍ ǐn se̍ dǒ ìn de̍e̍ gbǎ-a bɛ̌ɛ kaka ɛ? Ǐn gbàɛ̀ iě ìn we̍ mɛ̌-ɛ.”

38Jusu la̍a̍, “Nàa̍ ìn gbàɛ̀ ìè ǐn we̍ mɛ̌-ɛ ae? Tìh-a taǐn ǎn sèàɛ̍ ìn wlùh, àn mu̍ ǎn tìh-i tòlo ìè gbɔ̍ᵻ ta̍a̍n nu̍ sasǎ wɛ̀ suuh iě slò-ɛ dǔ sɔ̀n wɔ̍i̍n.”

Currently Selected:

Chɔɔn 13: KDNT

Highlight

Copy