Chɔɔn 14

Jusu bo ɔ̀ nu̍ wìè

1Jusu sèàɛ̍ ɔ̍ kòà dɛ̍ wlùh, ɔ̍ la̍a̍, “Mɔ̀-a wlùh bɔ̌ i̍ na-a. Mɔ̀ gbaɛ Nyɔsoa wlùh, nɛ̀ mɔ̀ gbaɛ ǐn wlùh ke. 2Gbòᵻ nynuu̍ dɔu nɛ dě ǐn Baa blǐ gbò. Nɛ̀ ǎn mu̍-i wɛ̀ iě tà gba̍a̍ po̍ dǒ mɔ̀ we̍. Pò ɛ̍ se̍ la̍a̍n nɛ-ɛ, nɛ̀ ǐn se̍ mɔ̀ wlùh sèàɛ̍ mu̍ de. 3Nɛ̀ pò ǐn mu̍ wɛ̀ iě tà gba̍a̍ po̍ dǒ mɔ̀ we̍-ɛ, nɛ̀ ǎn mu̍ de̍ ji̍ dɛ, wɛ̀ iě mɔ̀ dě ǐn we̍ gba̍. Wɛ̀ tà ǐn nɛ-aɛ, mɔ̀ iě-o nɛ ke. 4Tà ǎn mu̍-aɛ, wìè mu̍-a deě-ɛ, mɔ̀ juo ɛ̍-ɛ.”

5Wɛ̀ Tɔmɔ la̍a̍, “Joi, tà àn mu̍-aɛ, à se̍-o juo. Ka à mu̍ wìè ɛ̀ mu̍-a deě-ɛ juo-ɛ nu̍ ɛ?”

6Jusu la̍a̍ dě ɔ̍ we̍, “Mɔ̍ bo ɔ̀ nu̍ wìè, ɔ̀ nu̍ tìh-a taǐn, ɛ̍ ke feɛ ke. Nyɔ̍ se̍ dě ǐn ja̍a̍ jii-ɛ, nɛ̀ ɔ̍-ɔ mu̍ dě ǐn Baa we̍. 7Pò mɔ̀ juo m-ɛ, nɛ̀ mɔ̀ juo ǐn Baa wɛ̀ ke. Sɔ da̍a sèàn blǐ, mɔ̀ juo ɔ̍-ɛ, iě mɔ̀ jě ɔ̍ wɛ̀.”

8Wɛ̀ Felɔ la̍a̍, “Joi, Baa-a chɛ̀ bo ìè àɔ̀ toe, wɛ̀ à wlùh iě i̍ tè.”

9Iě Jusu la̍a̍, “Felɔ, ǐn wlè nɔ̌ mɔ̀ nynɛ̌ wɛ̀ de gbɛɛ̍. Ìn se̍ ǐn juo ke̍ sǔh ae? Nyɔ̍ jɔ jě-a m-ɛ, nɛ̀ ɔ̍ wɔ̀ ǐn Baa jě-ɛ wɛ̀. Ka ɛ̍ nu̍ wɛ̀ nàa̍ iě mɔ̀ Baa toe ke̍ gbɔ̀ɔ ɛ? 10Ka ǐn nɛ-a ǐn Baa wɛ̀ ǐn Baa nɛ-a m-ɛ, ìn se̍ ɛ̍ tìh chɛ̀ po̍ ae? Wlu̍ ǎn wlu-ia dě mɔ̀ we̍-ɛ, ɛ̍ se̍ ǎn chɛ̀-a gbǐh ǐn se̍-e wlu-i. Jɛ Baa ɔ̀ nɛ-a dě ǐn ja̍a̍-ɛ, ɔ̍ bo ɔ̀ nu̍ ɔ̍ dbo̍. 11Mɔ̀ po̍ ɛ̍ tìh chɛ̀ ka ǐn nɛ-a ǐn Baa wɛ̀ ǐn Baa nɛ-a m-ɛ. Pò mɔ̀ se̍ la̍a̍n nu̍-ɛ, nɛ̀ dbo̍ la ǎn nu̍-aɛ ɛ̍ tìh bo mɔ̀ iě ǐn tìh chɛ̀ po̍. 12Bɔ̌ ǐn sèàɛ̍ mɔ̀ gblangbai̍ wlùh, nyɔ̍ jɔ gbaɛ-a ǐn wlùh-ɛ, dbo̍ ǎn nu̍-aɛ, nɛ̀ ɔ̍ mu̍ ɛ̍ nu̍ ke. Nɛ̀ ɔ̍ naɛ-a mu̍ wɔ̍n ku̍ i̍h iě jih la sìì. Dɛ̍nu̍ɛ, ǎn mu̍ dě Baa we̍. 13Nɛ̀ dɛ̍-o-dɛ̍ mɔ̀-a mu̍-a jbǎ dǒ ǎn nynɛ̌ kɛ̍n-ɛ, ǎn mu̍ ɛ̍ nu̍. Wɛ̀ Jǔ iě Baa-a nynɛ̌ i̍ bɛ̌-ɛ. 14Pò mɔ̀ jbǎ-ɛ ǐn dɛ̍-o-dɛ̍-ɛ, nɛ̀ ǎn mu̍ ɛ̍ nu̍.

Jusu po̍ Nyɔsoa-a Sùù-a wlu̍ tɔ̀ma̍a̍

15“Pò mɔ̀ jbɛɛ m-ɛ, nɛ̀ mɔ̀-a mu̍-o ǎn telě i̍ tè, 16-17wɛ̀ iě Baa i̍ tèle ɔ̍ iě mɔ̀ Sùù ɛ̀ naɛ-a nyɔ̍ sɔ̍nᵻ we̍ i̍-ɛ we̍ dbo̍. Wɛ̀ Sùù ɛ̀ sèàɛ̍-a nyɔ̍ Nyɔsoa-a tìh-a taǐn tìh wlùh-ɛ ɛ̍ iě dǒ mɔ̀ we̍ nɛ kleǐnklein. Ɛ̀ kɔn tìh kmɔ̌ nyɔ̍ se̍-a ɛ̍ tìh i̍ wɔ̌ɛn-ɛ, ɛ̍ nu̍, u̍h-u se̍a ɛ̍ jě, iě u̍h se̍ ɛ̍ juo. Jɛ mɔ̀ɔ̍ nɔ̀ɔ̍, mɔ̀ juo ɛ̍-ɛ, dɛ̍nu̍ɛ, ɛ̍ nɛ dǒ mɔ̀ we̍, iě ɛ̍ mu̍ dě mɔ̀ ja̍a̍ nɛ ma̍u̍.

18“Ǐn se̍ mɔ̀ kwie̍ sie mu̍, ǎn mu̍ mɔ̀ we̍ ji̍ dode̍. 19Ɛ̍ mu̍-o wlè wɛɛ, nɛ̀ kmɔ̌-a nyɔ̍ se̍ ǐn jě mu̍ dɛ. Jɛ mɔ̀ɔ̍ nɔ̀ɔ̍, mɔ̀-a mu̍ ǐn jě. Ǐn nɛ kmɔ̌, ɛ̍ tìh-ɛ, mɔ̀-a mu̍ kmɔ̌ nɛ ke. 20Dǒ weɛ̍ laa̍ di̍i̍ dǒ mɔ̀-a mu̍ ɛ̍ i̍ juo-e ka ǐn nɛ-a ǐn Baa, wɛ̀ mɔ̀ nɛ-a m, iě ǐn nɛ-a mɔ̀ɔ̍-ɛ.

21“Nyɔ̍ jɔ tè-ao telě ǐn po̍-a i̍-ɛ, nɛ̀ ɔ̍-ɔ bo ɔ̀ jbɛɛ m. Nyɔ̍ ɔ̀ jbɛɛ-a m-ɛ, nɛ̀ ǐn Baa-a mu̍ ɔ̍-ɔ jbɛɛ ke. Nɛ̀ ǎn mu̍ ɔ̍-ɔ jbɛɛ ke, wɛ̀ iě ǎn chɛ̀ tà sà dě ɔ̍ we̍.”

22Wɛ̀ Juda ɔ̀ se̍-a Ɛkɛlia naɛ jǔ-ɛ, ɔ̍ la̍a̍ dě ɔ̍ we̍, “Joi, dɛ̍nu̍ àn mu̍ àn chɛ̀ tà sà nɔ̌ àɔ̀ we̍, iě ìn se̍ àn chɛ̀ tà sà mu̍ dě kmɔ̌ nyɔ̍ we̍ ɛ?”

23Iě Jusu la̍a̍, “Pò nyɔ̍ jbɛɛ m-ɛ, nɛ̀ ɔ̍ mu̍ ǎn wlu̍ nu̍, nɛ̀ ǐn Baa-a mu̍ ɔ̍-ɔ jbɛɛ. Nɛ̀ à mu̍ dě ɔ̍ we̍ ji̍, wɛ̀ dě ɔ̍ we̍ iě à blǐ nu̍. 24Nyɔ̍ jɔ se̍-a ǐn jbɛɛ-ɛ, nɛ̀ ɔ̍-ɔ nu̍ ǎn wlu̍. Wlu̍ la mɔ̀-a wɔ̌n-aɛ, ɛ̍ se̍ ǎn chɛ̀-a wlu̍, jɛ ɛ̍ sɔ dě Baa ɔ̀ dbo̍-a m-ɛ we̍.

25“Ǎn bla̍ ìh la ka ǐn nɛ-a da̍a mɔ̀ we̍ ke̍-ɛ. 26Jɛ Nyɔsoa-a Sùù ɛ̀ naɛ-a nyɔ̍ sɔ̍nᵻ we̍ i̍-ɛ, Baa-a mu̍ ɛ̍ dbo̍ dǒ ǎn nynɛ̌ kɛ̍n, nɛ̀ ɛ̍ mu̍ mɔ̀ dɛ̍ᵻ kli̍hgbɛ̍ nǎ poe. Wɛ̀ ɛ̍ iě dɛ̍ᵻ kli̍hgbɛ̍ ǎn bla̍-a ka dě mɔ̀ we̍-ɛ dǒ mɔ̀ wlì i̍ sǐ-i.

27“Ǎn siee mɔ̀ wlùh-a i̍ tè-ɛ. Ǎn wlùh-a i̍ tè-ɛ ǎn nyǐ-a mɔ̀-ɛ, ǐn se̍ ɛ̍ mɔ̀ nyǐ ka kmɔ̌-a nyɔ̍ nyǐ nyɔ̍ wlùh-a i̍ tè-ɛ. Mɔ̀-a wlùh bɔ̌ i̍ na-a, mɔ̀ wɔ̍ bɔ̌ faɔn ple̍-ɛ ke. 28Dɛ̍ ǐn sà-a dě mɔ̀ we̍-ɛ, mɔ̀ wɔ̌n ǎn wlu̍, na̍a̍, ‘Ǎn mu̍-i, wɛ̀ iě mɔ̀ we̍ ji̍ dode̍.’ Pò mɔ̀ jbɛɛ m chɛ̀ɛ̌chɛ̀-ɛ, nɛ̀ mɔ̀-a mu̍ mɔna̍-a gbǎ ka ǎn mu̍-a dě Baa we̍-ɛ. Dɛ̍nu̍ɛ, ɔ̍ ku̍ wɔ̍n ɔ̍ sìì m. 29Ǐn sèàɛ̍ mɔ̀ wlùh wɛ̀ duedɛ, wɛ̀ ɛ̍ iě nɛ-ɛ dǔ. Wɛ̀ pò ɛ̍ nɛ-ɛ, mɔ̀ iě ɛ̍ tìh chɛ̀ po̍. 30Ǐn se̍ dɛ̍ dɔu wlu mu̍ dɛ dě mɔ̀ we̍, dɛ̍nu̍ɛ, ɛ̀ blě-a kmɔ̌ la ɛ̍ wlu̍ kwa̍-ɛ, ɛ̍ ji̍ la̍-ɛ. Ɛ̍ se̍ gbǐh blě dǒ ǐn we̍. 31Ka ǐn kma-a ǐn Baa-a tìh-ɛ, kmɔ̌ iě ɛ̍ juo, ɛ̍ kɔn ǎn nu̍ dɛ̍ᵻ kli̍hgbɛ̍ ɔ̍ po̍-a ǐn slǔh iě-a nu̍-ɛ.

“Mɔ̀ sɔ-ɔ à iě mu̍.

Currently Selected:

Chɔɔn 14: KDNT

Highlight

Copy