Chɔɔn 11

Kǎ Laaslɔɛ nu̍ ka-e wlǔh-ɛ

1-2Bɛtani ɛ̀ nu̍-a Mɛle ke ɔ̍ de̍di̍i̍ Mata-a wlɔ̀-ɛ, dǒ u̍h de̍di̍i̍ jɔ̍gbau nɛ ɔ̍ poa. Ɔ̍ nynɛ̌ bo Laaslɔɛ. Mɛle ɔ̀ mu̍-a Joi-a bu̍hᵻ nɔ̌ chlǎn i̍ tli̍ wɛ̀ ɔ̍ iě-a ɔ̍ mǐ nu̍ ɔ̍ iě-a i̍h i̍ slǎn-a, ɔ̍-ɔ bo. 3Wɛ̀ de̍di̍i̍ᵻ nynɔ̌gbaɔᵻ sɔɔ̌n laa̍ iě u̍h dbo̍ dě Jusu we̍ wlu̍. U̍h la̍a̍, “Joi, àn jbɛɛ nyɔ̍-a poa o.”

4Ti̍ Jusu wɔ̌n-a pɔ̀n la-ɛ, iě ɔ̍ la̍a̍, “Ɔ̍ wɛ̌ la mɛ̌ɛ se̍ ɛ̍ dlǔ i̍ chlà mu̍. Ɛ̍ nu̍ ɛ̍ sǔh wɛ̀ Nyɔsoa-a nynɛ̌ iě i̍ bɛ̌. Dě ɛ̍ di̍i̍ bo Nyɔsoa-a Jǔ-a mu̍ nynɛ̌ jě-e.”

5Jusu jbɛɛ Mata ke Mɛle-e, ɛ̍ ke u̍h de̍di̍i̍ Laaslɔɛ ke. 6Ti̍ ɔ̍ wɔ̌n-a Laaslɔɛ-a poa tu̍owli-ɛ, ɔ̍ se̍-e mu̍ iě ɛ̍ nu̍ wǐh sɔɔ̌n. 7Wɛ̀ ɔ̍ la̍a̍ dě ɔ̍ kòà we̍, “Mɔ̀ à mu̍ de̍ Judia fɔɔ.”

8Ɔ̍ kòà la̍a̍ dě ɔ̍ we̍, “Dlǔtu, de̍à Juu nyɔ̍-a pɔ̀n-a u̍h iě-a ìn sɔɔ̌ᵻ i̍ tbaɛ wǐhlaa-ɛ, dě àn pɔ̀n de̍ mu̍-ɛ i̍ dɛ ae?”

9Wɛ̀ Jusu la̍a̍, “Na̍, àba̍-a pùè jɔ̌ sɔɔ̌n bo ìh nɛ dě sɔ̀nweɛ̍ di̍i̍ lě. Nyɔ̍ jɔ na-a sɔ̀n sɛ̀n bla-a, ɔ̍-ɔ gbèle, dɛ̍nu̍ɛ, nɛ̀ ɔ̍ blě kmɔ̌ la ɛ̍ sɔ̀npli ɔ̍ iě i̍ jěe. 10Jɛ pò nyɔ̍ na maɔ̍-ɛ, nɛ̀ ɔ̍ gbèle-e, dɛ̍nu̍ɛ, nɛ̀ sɔ̀npli se̍ nɛ ɔ̍ iě i̍ jě.” 11Ɔ̍ wɔ̀-a dɛ̍ la wlu-ɛ, iě ɔ̍ la̍a̍, “À ba̍ Laaslɔɛ gbǎ nyinɔ̍ i̍, jɛ ǎn mu̍ mu̍ iě ɔ̍ kɛ̍n i̍ bla̍.”

12Wɛ̀ ɔ̍ kòà la̍a̍, “Joi, pò ɔ̍ ja mɔ̌-ɛ, nɛ̀ ɔ̍ mu̍ la̍ pǔh.”

13Jɛ nɛ̀ Laaslɔɛ mɛ̌ɛ bo Jusu-a dǎ. Jɛ ɔ̍ kòà jajeɛ̍ nyinɔ̍ chɛ̀ɛ̌chɛ̀ bo ɔ̍ dǎ de. 14Wɛ̀ Jusu sèàɛ̍ u̍h wlùh te̍gbe̍i̍n, ɔ̍ la̍a̍, “Laaslɔɛ mɛ̌-ɛ. 15Jɛ mɔ̀-a tìh-ɛ, sɔ ɛ̍ po̍ ǐn gbǐh wɛ̀ ǐn se̍-e nɛ, wɛ̀ mɔ̀ iě wlùh gbaɛ-ɛ blě. Mɔ̀ sɔ-ɔ à iě dě ɔ̍ we̍ mu̍.”

16Tɔmɔ (u̍h-a dǎɛ-a Gbàju-ɛ) la̍a̍ dě ɔ̍ ba̍ᵻ kòà we̍, “Mɔ̀ à mu̍ ɔ̍ we̍, tà ɔ̍ mu̍-a mɛ̌-ɛɛ, à iě-o mɛ̌-ɛ ke.”

Jusu bo ɔ̀ nu̍-e wlǔh-ɛ ke feɛ

17Ti̍ Jusu sǐ-a i̍-ɛ, dǒ ɔ̍ wɔ̌n-ɛ i̍h i̍ ka u̍h tè-a Laaslɔɛ i̍-ɛ nɛ̀ ɛ̍ nu̍-a wǐh nyìɛ̍ wɛ̀-ɛ. 18Sɔ dǒ Bɛtani ìè dǒ Juluslɛn mu̍ ɛ̍ se̍-e tɛn. Ɛ̍ bɛ̌ɛ tlu̍hᵻ gbɔ̍ɔ̍ᵻ sɔɔ̌n nu̍-ɛ. 19Ɛ̍ ti̍ laa̍ nɛ̀ Mata ke Mɛle blǐ nyɔ̍ dɔu-a ji̍ u̍h gbòɛ̀ i̍ bla̍-ɛ la̍ dǒ u̍h de̍di̍i̍-a mɛ̌ɛ dɛ we̍.

20Ti̍ Mata wɔ̌n-a i̍h ka Jusu-a ji̍-a la̍-ɛ, wɛ̀ ɔ̍ mu̍ ɔ̍ i̍ jǎɛ la̍. Nɛ̀ Mɛle sie dě gbò. 21Iě Mata la̍a̍ dě Jusu we̍, “Joi, pò ìn nɛ da̍a de-ɛ, nɛ̀ ǐn de̍di̍i̍ se̍ mɛ̌ mu̍ de wa. 22Jɛ ǐn juo ɛ̍-ɛ, dɛ̍ jɛ àn mu̍-a Nyɔsoa i̍ tèle kaka-a chɛ̀-ɛ, ɔ̍ mu̍ ɛ̍ nu̍ dǒ ìn we̍.”

23Wɛ̀ Jusu la̍a̍, “Ìn de̍di̍i̍-a mu̍-e wlǔh dode̍.”

24Iě Mata la̍a̍, “Ǐn juo i̍h, ɔ̍ mu̍-e wlǔh dǒ bɔ̌ɛ-o weɛ̍ di̍i̍.”

25Wɛ̀ Jusu la̍a̍ dě ɔ̍ we̍, “Mɔ̍ bo ɔ̀ nu̍-e wlǔh-ɛ ke feɛ. Nyɔ̍ jɔ gbaɛ-a ǐn wlùh-ɛ, pò ɔ̍ jɛ mɛ̌-ɛ, jɛ nɛ̀ ɔ̍ mu̍ kmɔ̌ nɛ. 26Nɛ̀ nyɔ̍ jɔ tè-a kmɔ̌ i̍ wɛ̀ ɔ̀ gbaɛ-a ǐn wlùh-ɛ, ɔ̍ se̍ gba̍ mɛ̌. Ìn po̍ ɛ̀ la tìh chɛ̀ ae?”

27Mata la̍a̍, “I̍i̍n Joi, ǐn po̍ ɛ̍ tìh chɛ̀ mɔ̀ bo ɔ̀ nu̍ Nyɔsoa-a Chèɛ̀ Tba̍ju, ɔ̀ nu̍-a ɔ̍ Jǔ ɔ̀ kɔn ɔ̀ iě-a nɔ̌ kmɔ̌ we̍ ji̍-ɛ.”

Jusu fìn-i

28Mata wɔ̀-a dɛ̍ la bla̍-aɛ, wɛ̀ ɔ̍ mu̍ ɔ̍ de̍di̍i̍ Mɛle dǎ la̍-a, iě ɔ̍ bla̍ ɔ̍ slǎn. Ɔ̍ la̍a̍, “Mɛle, à Dlǔtu ji̍ wɛ̀, ɔ̍ tèle àn tìh i̍ de̍à.” 29Mɛle wɔ̌n-a i̍h-ɛ, iě ɔ̍ wa̍n bloɔ̍, wɛ̀ ɔ̍ mu̍ dě ɔ̍ we̍. 30Nɛ̀ Jusu se̍ wlɔ̀ i̍ sǐ ke̍. Jɛ nɛ̀ tàdùè Mata jɛɛ-a ɔ̍-ɛ, dǒ ɔ̍ nɛ. 31Nyɔ̍ ùh-a bla̍-ɛa Mɛle gbòɛ̀ i̍ dě gbò-ɛ, dɛ̍ ɔ̍ nu̍-a bloɔ̍ wa̍n-aɛ, sɔ u̍h jajeɛ̍ ɔ̍ mu̍ fìn la̍ dě gbàlɔ̍ biě wɔ̍i̍n de. Iě u̍h wɔ̀ dǒ ɔ̍ de̍e̍.

32Mɛle nyni̍-a dǒ Jusu we̍-ɛ, wɛ̀ ɔ̍ bla̍ ɔ̍ chɛ̀ i̍ dǒ ɔ̍ jǔ. Ɔ̍ la̍a̍, “Joi, pò ìn nɛ da̍a de-ɛ, nɛ̀ ǐn de̍di̍i̍ se̍ mɛ̌ mu̍ de wa.”

33Nɛ̀ dɛ̍ Mɛle-a chɛ̀ ke nyɔ̍ nɛ-a dǒ ɔ̍ we̍-ɛ u̍h-a nu̍-a fìn-ɛɛ, sɔ ɛ̍ pa̍ Jusu i̍, iě ɛ̍ nu̍ ɔ̍ wlùh-a wàànwààn. 34Ɔ̍ la̍a̍, “Tà mɔ̀ tè ɔ̍ i̍ ɛ?”

U̍h la̍a̍, “Joi, ji̍ ìè-o jě.”

35Iě Jusu fìn. 36Wɛ̀ nyɔ̍ɔ la̍a̍, “Jě, ka ɔ̍ nu̍-a jǔ la-a jbɛɛ-ɛ.”

37Jɛ u̍h-a duuh la̍a̍, “Ɛ̍ se̍ jɔ̍gbau ɔ̀ pɔ̀ni-a dɔ̌-nyɔ̍-a jlǐh-ɛ ae? Nɛ̀ ɔ̍ se̍ ɛ̍ nu̍-ɛ bɛ̌ɛ ke de wɛ̀ Laaslɔɛ-ɛ je̍e mɛ̌ ae?”

Jusu sà-e Laaslɔɛ

38Sɔ ɛ̍ nu̍ Jusu-a wlùh-a wàànwààn dɛ, iě ɔ̍ mu̍ dǒ gbàlɔ̍ biě-a chɛ̀ wɔ̍i̍n. Wɔ̍ bo iě u̍h kaɛn ɛ̍ sɔɔ̌ wɔ̍i̍n. 39Ɔ̍ la̍a̍, “Mɔ̀ sà sɔɔ̌ la dǒ ɛ̍ wɔ̍i̍n.”

Jɔ̍gbau mɛ̌-aɛ, ɔ̍ de̍di̍i̍ Mata la̍a̍, “Ɔ̍ɔ̍, Joi, u̍h tè-a ɔ̍ i̍-ɛ, ɛ̍ wǐh nyìɛ̍ sèàn. Pò u̍h pɔ̀ni-oɛ, nɛ̀ ɔ̍ mu̍ nɔ̌ po̍.”

40Jusu la̍a̍ dě ɔ̍ we̍, “Ǐn se̍ ìn wlùh sèàɛ̍, ǐn se̍ la̍ pò ìn blě wlùh gbaɛ-ɛ, nɛ̀ àn mu̍ Nyɔsoa-a tìh-a i̍ bɛ̌-ɛ jě ae?” 41Wɛ̀ u̍h sà-o sɔɔ̌ laa̍. Iě ɔ̍ gbɛ̀n dě ja̍i̍, wɛ̀ ɔ̍ la̍a̍, “Baa, ǐn po̍ ìn tlɔ̌ ka àn dounᵻá nɛ-a nɔ̌ ǐn we̍-ɛ. 42Ǐn juo i̍h ka àn dounᵻá nɛ-a nɔ̌ ǐn we̍ ma̍u̍-ɛ, jɛ nyɔ̍ la ùh nyna-a da̍a i̍-ɛ, ka ìn dbo̍-a m-ɛ, u̍h iě i̍h tìh chɛ̀ po̍ dɛbo ɛ̍ kɔn ǎn bla̍ jɛ la nɔ̀ɔ̍.” 43Ɔ̍ wɔ̀-a ɛ̀ la wlu-ɛɛ, iě ɔ̍ plǎn, ɔ̍ la̍a̍, “Laaslɔɛ, ji̍ sɔ̀n sǐ.” 44Laaslɔɛ ɔ̀ mɛ̌-a de-ɛ, wɛ̀ ɔ̍ sǐ sɔ̀n. Nɛ̀ jlii̍ u̍h po̍-a ɔ̍-ɛ, nɛ̀ i̍h pìàɛ̍n ɔ̍ dlǔ i̍, ɛ̍ ke ɔ̍ ja̍i̍ ke̍. Wɛ̀ Jusu la̍a̍, “Mɔ̀ sà i̍h ɔ̍ ja̍i̍ ɔ̍ iě mu̍.”

Juu nyɔ̍-a nyɔ̍ klaaᵻ sɔ̌ Jusu-a dbǎ-a tìh

(Matio 26.1-5; Maɛ 14.1-2; Luu 22.1-2)

45Mɛle blǐ nyɔ̍ dɔu ùh ji̍-a ɔ̍ gbàì tù la̍-aɛ, u̍h jě-a Jusu-a nu̍-dɛ̍-ɛ, ɛ̍ kɔn u̍h gbaɛ ɔ̍ wlùh. 46Jɛ u̍h-a duuh gba̍ Jusu-a nu̍-dɛ̍ᵻá kunǎ dě Fɛlesii nyɔ̍ we̍. 47Ɛ̍ bo ɛ̀ nu̍ ɛ̍ wɛ̀ Fɛlesii nyɔ̍ ke slaǎ sà nyɔ̍ klaaᵻ deǎɛ Juu nyɔ̍-a taɔ klaaᵻ. U̍h la̍a̍, “Ɛ̀ jɔ̍gbau la ɔ̍ nu̍-a ka jbaɛdih dɔu po̍-ɛɛ, nɛ̀ dɛ̍we̍ à iě nu̍ ɛ? 48Pò à gbɛ̀n ɔ̍ ja̍ wɛ̀ ɔ̍ iě ɛ̀ la dluwe̍ i̍ gba̍-ɛ, nɛ̀ nyɔ̍ kli̍hgbɛ̍-a mu̍ ɔ̍ wlùh gbaɛ. Nɛ̀ ɛ̍ mu̍ Wloma nyɔ̍ ja u̍h iě à Nyɔsoa-a slaǎ sà gbò ke à bloa̍ jii̍ nyni-i.”

49Wɛ̀ u̍h-a due ɔ̀ nu̍-a slaǎ sà nyɔ̍-a dlǔtu dǒ sɔ̀n laa̍ di̍i̍-ɛ, iě ɔ̍ wlu. Ɔ̍ nynɛ̌ bo Kaifa. Ɔ̍ la̍a̍, “Mɔ̀ se̍ dɛ̍ i̍ juo fu̍u̍. 50Ka ɛ̍ nmɔ-a jii̍ dǒ mɔ̀ we̍ nyɔ̍ due iě-a mɛ̌ dǒ blǔh nyɔ̍ we̍ nɛ̀ blǔh gbàǐ se̍-a gbɔ̀lɔ mu̍-ɛ, mɔ̀ se̍ i̍h juo ae?” 51Dɛ̍ ɔ̍ sà-aɛ, ɔ̍ se̍ ɛ̍-ɛ sà dǒ ɔ̍ chɛ̀ blǐ paǐ. Jɛ ka ɔ̍ nu̍-a Nyɔsoa-a slaǎ sà nyɔ̍-a dlǔtu dǒ sɔ̀n laa̍ di̍i̍ wɛ̀ Jusu-a mu̍-a mɛ̌ dǒ Juu nyɔ̍-a tìh we̍-ɛ, ɛ̍ kɔn gbànwli bo ɔ̍ po̍. 52Jɛ ɛ̍ se̍ Juu bloa̍ nɛ due-a tìh ɔ̍ se̍ mɛ̌ mu̍. Jɛ ɔ̍ mɛ̌ɛ-a mu̍ Nyɔsoa-a nynuu̍ ùh gbà-a ja̍i̍-ɛ i̍ gbòe. Wɛ̀ u̍h iě nyɔ̍ due nu̍.

53Sɔ dǒ weɛ̍ laa̍ di̍i̍-ɛ, Jusu-a dbǎ-a tìh-a di̍i̍chì bo Juu nyɔ̍-a nyɔ̍ klaaᵻ laa̍ u̍h-a chɛ̍n la̍ sǔh. 54Sɔ ɛ̍ nu̍ ɛ̍ Jusu se̍ i̍ na dɛ dě Judia. Jɛ ɔ̍ wa̍n u̍h jlǐh iě ɔ̍ mu̍ dě bloa̍ ɛ̀ kɔǎn-ɛa kwlǎslò we̍-ɛ kɛ̍n, dǒ wlɔ̀ due u̍h-a dǎɛ-a Iflɛm-ɛ di̍i̍. Dǒ ɔ̍ ke ɔ̍ kòà tè i̍.

55Ɛ̍ ti̍ laa̍ nɛ̀ Sììkɛ̍n Weɛ̍-a Peě kɔǎn we̍ wɛ̀. Wɛ̀ nyɔ̍ɔ dɔu-a sɔ wlɔ̀gbàɛ̀ di̍i̍ i̍ u̍h-a mu̍ dǒ Juluslɛn, u̍h iě u̍h-a chɛ̀ i̍ dle dě Nyɔsoa jlǐh i̍ nmɔ dɛ di̍i̍ wɛ̀ Sììkɛ̍n-a Peě iě nyni̍-ɛ dǔ. 56Nɛ̀ kǎ u̍h-a pɔ̀n Jusu i̍. Ɛ̍ tìh ka u̍h-a nynaɛ-a i̍ dě Nyɔsoa-a slaǎ sà gbò sɔ̀n-ɛ, nɛ̀ u̍h-a tèle-e we̍ i̍. Jɔ nu̍ ka-ɛ, nɛ̀ ɔ̍ la̍a̍, “Ǐn ba̍, à wɔ̌n dě ìn we̍? Ǐn juo ɛ̍-ɛ ɔ̍ se̍ da̍a peě la kɛ̍n ji̍ mu̍ o.” 57Jɛ nɛ̀ slaǎ sà nyɔ̍ klaaᵻ ke Fɛlesii nyɔ̍ po̍ telě wɛ̀. U̍h la̍ pò nyɔ̍-o-nyɔ̍ jě ɔ̍ nɛ la̍-ɛ, nɛ̀ ɔ̍ sèàɛ̍ u̍h wlùh wɛ̀ u̍h iě ɔ̍ gbɛ̍n.

Currently Selected:

Chɔɔn 11: KDNT

Highlight

Copy