MALKU 13
13
1LE é tanjẹgbonu jei sọn tẹmpli mẹ, dopo to nuplọntọ etọn lẹ mẹ dọ hlan ẹn, do, Mẹplọntọ, pon zannu hunkọ po didó he hunkọ po tin to ofi lẹ 2Jesu sọ dọ hlan ẹn, dọ, Hiẹ mọ didó daho helẹ? Zannu dopo ma to na pò bọ yè na jodai do awetọ jibọ yè ma na họ́ liai.
3Le é sọ sinai to osó olivie tọn ji pànnukọn tẹmpli, Pita po Jakobu po, po Johanu po, po Andlé po kanbiọ ẹ to nuglọ dọmọ, 4Dọ na mí, whetẹnu wẹ onú helẹ na jọ? Etẹ wẹ na yín ohia whenuena onú helẹ pó tin nado yín hinhen di? 5Jesu sọ sè nado to didọ hlan yé, dọmọ, Mì payi, na mẹde klọ mì blo: 6Na gbẹtọ susu na wá to oyín ṣie mẹ bo dọ, Yẹn wẹ Klisti; bo nasọ klọ ome susu. 7Whenuena mì na sè awhàn linlin podọ zinzin awhàn tọn, obu di mì blo; na onú he hunkọ ma sọgan nọ ma jọ; ṣigba opòdo ma yin dinvie gba. 8Na akọta na fọ́n do akọta ji, ahọludu do ahọludu ji: aigba whinwhàn lẹ na tin to ofi delẹ, huvẹ lẹ po magbojẹ lẹ po nasọ tin; ehelẹ wẹ dòdo nukunbia lọ tọn.
9Ṣigba mì payi mìde go: na yé na yí mì do alọ tohodọtọ lẹ tọn mẹ; yè na lìnu mì to sinagọgu lẹ mẹ: tògán lẹ po ahọlu lẹ po nukọn wẹ mì na nọte te na yẹn tọn wutu, na okunnu de do yé go. 10Yè ma sọgan nọ ma dọhó wẹndagbe tọn pó akọta lẹpo ṣẹnṣẹn whé. 11Podọ whenuena yé plan mì jẹ whẹ̀dida mẹ, bo jo mì, mì yín wénhatọ jẹnukọn na núhe mì na dọ tọn blo: ṣigba nudepope yè na na mì to ojlẹ nẹ mẹ, enẹ mì ni dọ: na é ma yín mìwlẹ wẹ to hódọ, adavo Gbigbọ Wiwe. 12Nọvisunnu na dè nọvisunnu hia na hùhù, otọ na dè ovi hia; ovi na fọ́n do mẹjitọ yetọn lẹ ji, bo nasọ basi na yè ni hù yé. 13Yè na gbẹwanna mì sọn gbẹtọ lẹpo de na oyín ṣie tọn wutu; ṣigba mẹhe sinyẹnlin kaka jẹ opòdo wẹ yè na whlẹngan.
14Ṣigba whenuena mì mọ osùnú ovọ̀je tọn ṣite to ofi he ewọ ma jẹ (gbọ ewọ he hia ni tunwun), whenẹnu gbọ yé he tin to Judé lẹ ni họ̀nyì osó lẹ kòn 15Bo sọ gbọ ewọ he tin to hòta jẹte yì ohò mẹ blo, é biọ é mẹ nado yí onú depope sọn ohò etọn mẹ blo. 16Mẹhe sọ tin to oglè mẹ gòwá nado yí avọ̀ etọn blo. 17Ṣigba dindọn hlan mẹhe mọhò lẹ, podọ hlan mẹhe to anọ na ovi lẹ to azán nẹlẹ mẹ 18Na mì ni hodè, dọ e yín avivọ whenu blo 19Na nukunbibia na tin to azán nẹlẹ gbè, ehe hunkẹ ma ko tin sọn whéwhwhenu aihọn dida tọn, he Jiwheyẹwhe ko da, kaka jẹ ojlẹ he mẹ, hunkọ etọn ma nasọ tin. 20Podọ adavo le Oklunọ sán azán nẹlẹ do ogli, yè ma do whlẹn agbasalan de gán gba; ṣigba na mẹsinsinyan he é dè lẹ tọn wutu, é ko sán azán nẹlẹ do ogli. 21Podọ whenẹnu eyín mẹde dọ hlan mì, dọ, Pọ́n, Klisti tin to ofi; kavi, Pọ́n, é tin to finẹ; mì yi i se blo; 22na Klisti lalonọ lẹ, po yẹwhegán lalonọ lẹ po na fọ́n, bo na yí ohia lẹ po onú jawu po hia, sọmọ eyín é sọgan yín wiwà, nado klọ mẹsinsinyan lẹ lọsu 23Ṣigba na mì ni payi e go: pọ́n, yẹn ko dọ onú lẹpo na mì dai.
24Ṣigba to azán nẹlẹ mẹ, to nukunbi bia nẹlẹ godo, owhè na dozinvlu, osun ma nasọ na hinhọ́n etọn, 25sunwhlẹvu lẹ na flẹ́, yè nasọ whàn huhlọn he tin to olọn lẹ mẹ. 26Whenẹnu wẹ ye na mọ Ovi gbẹtọ tọn to aslọ lẹ mẹ ja to huhlọn po gigo daho po mẹ. 27Whenẹnu wẹ é na do angẹli etọn lẹ hlan, bo na bé mẹṣinyanṣinyan etọn lẹ sọn jẹhọn enẹ lẹ me dopọ, sọn opòdo aihọn tọn kaka jẹ opodo olọn tọn.
28Dinvie mì plọ́n oló sọn ovotin de, Whenuena alà etọn tin to yòyó, bo sọ dè amà etọn lẹ jegbonu, mì yọnẹn dọ alúnlún whenu sẹpọ́. 29Mọkẹdẹ wẹ mì, whenuena mì na mọ onú hele to jijọ, na mì ni yọnen dọ é sẹpọ́, yèdọ to hòntonu. 30Nugbo wẹ yẹn dọ hlan mì, whẹndo he ma to na juwayì, kaka yè nado hẹn onú lẹpo di. 31Olọn po aihọn po na juwayì; ṣigba ohó ṣie ma na juwayì gba. 32Ṣigba na azán nẹ tọn, kavi ojlẹ nẹ, mẹde ma yọnẹn, lala, yèdọ é ma yín angẹli he tin to olọn mẹ lẹ, kavi Ovi, adavo Otọ́ 33Mì payi, na mì ni sọ nọ hó mìde, na mì ni sọ nọ hodè: na mì ma yón whenuena ojlẹ lọ yín 34Na é tin taidi whenuena dawe de jẹgbéjizònlin ji jei otò dindẹn de me, bo jo owhé eton dai, bo sọ na asẹ afànumẹ etọn lẹ, bo dè azọ̀n mẹdopodopo tọn nẹ̃, bo sọ na osén alihótọ nado to alihọ̀. 35Enewutu mì ni to alihò; na mì ma yọ́n whenuena owhénọ lọ na wá, eyín tenu wẹ, kavi to zánhòme, kavi koklolise, kavi to afonnu. 36Gigò ajiji é nikã mo mì to amlọndọ 37Onú he yẹn dọ hiàn mì, yẹn dọ hlan omẹ popo, Mì to alihó.
Currently Selected:
MALKU 13: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.
