MALKU 14

1TO azán awe godo, hunwhẹ juwayì lọ tọn tin po akla madotón po; ogán yẹwhenọ lẹ tọn po wekantọ lẹ po tò dindin le ye na yí oyè do wlé e do, na yé nido hù i. 2Ṣigba yé dọ, To azán hunwhẹ tọn gbè ma gba, na zingidi nikã tin vlavo to gbẹtọ lẹ mẹ.

3Whenuena e tin to Bẹtani, to owhé Simọni potọnọ tọn gbè, le é jagla to núdùdù kòn, nawe he tindo adingbán alabasta nusisa nadi akuẹgegenu tọn de, wá finẹ, bo sọ gba adingbán lọ, bo sọ to kinkòn ẹn do ota nẹ̃. 4Mẹdelẹ sọ tin to ye me bọ homẹ yeton wlu to yéde homẹ, yé sọ dọmọ, Etẹwutu wẹ yè to nusisa he hẹngu? 5Na yè do ko sà nusisa he hú abọgan-kuẹ fọdekanweko, bo do nanú wamono lẹ. Yé sọ to hunhlun do é go. 6Ṣigba Jesu dọmọ, Mì gbọ sọn e go, etẹwutu wẹ mì to tukla do e? azọ́n dagbe de wẹ e wà do oji e. 7Na mi tindo wamọnọ lẹ whepoponu to mì de, whedepopenu mi jlo mì sọgan wà dagbe na ye, ṣigba mì ma tindo yẹn whepoponu gba. 8E wá onú he é sọgan; é ko sá misisana na agbasa ṣie jẹnukọnna osiọ didi lọ. 9Nugbo wẹ yẹn dọ hlan mì, To fidepope yè na dọyẹwheho wẹndagbe he tọn te to aihọn lẹpo mẹ, yè na dọhó ehe nawe he wà tọn to finẹ ga, na oflin etọn de.

10Juda Iskaliọti, dopo to omẹ wiawe lẹ mẹ, yì ogán yẹwhenọ lẹ tọn de, nado dè e hia yé. 11Whenuena yé sè, homẹ yetọn hùn, yé sọ dopagbè nado na akuẹ ẹ. E sọ to dindin le é na dè e hia do.

12To azán tintan akla madotón tọn gbè, whenuena yé to juwayì hù, nuplọntọ etọn le dọ hlan ẹn, dọ, Fie wẹ hiẹ jlo na mi ni wleawu dai na we do, na hiẹ nido dù juwayì lọ? 13E sọ do omẹ awe to nuplọntọ etọn lẹ mẹ hlan, bo dọ hlan yé, dọ, Mì yi otò daho mẹ, dawẹ he hẹn ozẹ́n osìn tọn de na pé mì; mì hodo e. 14Fidepope é biọ, na mì ni dọ hlan owhenọ lọ, dọ, Mẹplọntọ dọmọ, Fie wẹ abò núdùdù tọn lọ te, fie yẹn na dù juwayì te po nuplọntọ ṣie lẹ po? 15E nasọ do àbo daho de hia mì to aga, he yè jlado, he yè wleawu etọn dai: finẹ wẹ mi ni wleawu dai na mí do. 16Nuplọntọ etọn lẹ sọ tọn jẹgbonu yì, bo wá oto daho mẹ, bo sọ mọ kẹdẹdile é dọ na yé do; yé sọ wleawu juwayì tọn dai.

17To tenu, é wá po omẹ wiawe lẹ po. 18Le yé jagla, bo to núdu, Jesu domọ, Nugbo wẹ yẹn dọ hlan mì, Dopo to mì mẹhe to núdù hẹ mi lẹ me na dè mi hia 19Ye sọ sẹ́ awúbla talala, bo sọ ṣẹ̀ nado to didọ hian ẹn dopodopo dọ, Yẹn wẹ la? awetọ sọ dọmọ, Yẹn wẹ la? 20E sọ gblọn bo dọ hlan yé, dọ, Dopo to omẹ wiawe lẹ mẹ he to alọ do agbán mẹ hẹ mi we. 21Ovi gbẹtọ tọn jei nugbo dile yè kanwe gbọn etọn dali do; ṣigba dindọn hlan dawe nẹ alọ mẹhe tọn mẹ yè dè Ovi gbẹtọ tọn hia gbọn! é do pónte na dawe lọ, eyín yè ma ji i.

22Le yé to núdù, Jesu yí akla, bo dona, bo sọ kán ẹn, bo yí na yé, bo dọmọ, Mì yí, na mì ni dù: ehe wẹ agbasa ṣie. 23E sọ yí kọfo de, whenuena é dopé, é yí na yé; ye omẹ pó sọ nù sọn é mẹ. 24E dọ hlan yé, dọ, Ehe wẹ ohùn ṣie alẹ́nu yoyó tọn, he yè kòn dai na omẹ susu. 25Nugbo wẹ yẹn dọ hlan mì, Yẹn ma nasọ nù sọn sinsẹ́n ovẹ̃n tọn mẹ ba, kaka jẹ azán lọ gbè whenuena yẹn na nù in yọ́yọ́ to ahọludu Jiwheyẹwhe tọn mẹ.

26Whenuena yé ji ohàn dopo, yé tómegbonu yì osó olivie tọn ji.

27Jesu sọ do hlan yé, dọmọ, Mì omẹ pó wẹ yè na hẹn dahli to ogo e to ozán he mẹ: na yè kanwe dọ, Yẹn na linu lẹngbọhọtọ, yè nasọ gbà lẹngbọ lẹ kija 28Ṣigba godo whenuena yẹn fọ́n, yẹn na jẹnukọnna mì biọ Galili. 29Ṣigba Pita dọ hlan ẹn dọmọ, Le yè na hẹn mẹpo dahli, gãnṣo ma wẹ yẹn gba. 30Jesu sọ dọ hlan ẹn, dọ, Nugbo wẹ yẹn dọ hlan we, To egbé, yèdọ to ozán he mẹ, whẹpo koklo na dose whlawe, hiẹ na món mi whlatòn. 31Ṣigba é do vivẹvivẹ talala, dọ, Eyin yẹn ma nanọma kú hẹ we, yẹn ma na món we gba. Mọkẹdẹ wẹ yé omẹ pó dọ ga.

32Yé sọ wá ofi he yè nọ ylọ Gẹtsemani; é sọ dọ hlan nuplọntọ etọn lẹ, dọ, Mì sinai to ofi whenuena yẹn to dèho. 33E sọ yí Pita, po Jakobu po, po Johanu po do e de, awu so sè jiji i talala, bo sọ to tuklaje badabada: 34e sọ dọ, hlan yé, dọ, Alindọn ṣie to awúbla talala kaka jẹ okú: mì nọte to ofi, na mì ni to alihó 35E sọ sẹ̀ yì nukọn pẹvide, bo jẹklo do aigba ji, bo hodẹ́ dọ, eyín é yín wiwà, ojlẹ lọ do juwayì sọn dè. 36E sọ dọmọ, Abba, Otọ́, onú lẹpo wẹ wiwà na we: dè kọfo he sọn oji e: ṣigba é ma yín ehe yẹn jlo gba, adavo ehe hiẹ jlo. 37E wá, bo mọ yé to amlọndọ, é sọ dọ hlan Pita, dọmọ, Simọni, hiẹ to amlọndọ? Be hiẹ ma sọgan hóali hẹ mi to ojlẹ dopo mẹ gba? 38MÌ nọ hóali, na mì ni sọ nọ hodè na mì ma nado biọ whlepón mẹ. Nugbo wẹ gbigbọ yín ojlonọ, ṣigba agbása yín madogannọ 39E sọ vó yì, bo sọ hodè, bo to ohó dopo lọ dọ 40Whenuena é sọ gò wá, é sọ mọ yé to amlọndọ, (na nukun yetọn pèn) mọwẹ yé ma sọ yón ogbè he yé na gblọn nẹ. 41E sọ wá whlatòntọ, bo dọ hlan yé, dọ, Mì damlọn zọnmí lò, na mì ni sọ gbọjẹ; é jẹ e do, ojlẹ lọ wá; pọ́n, yè dè Ovi gbẹtọ tọn hia do alọ ylandonọ lẹ tọn mẹ. 42Mì fọ́n, mì gbọ mí ni to yìyì; pọ́n, mẹhe dè mi hia sẹpọ́ fi.

43To afọdoponẹji le é to hódọ, Juda, dopo to ome wiawe lẹ mẹ, wá, po agúndaho de po to e de po ohi lẹ po, po aglọpo lẹ po sọn ogán yẹwhenọ lẹ tọn, po wekantọ lẹ po, po mẹho lẹ po de. 44Dinvie mẹhe sọ dè e hia ko na ohia yé, dọ, Mẹdepope yẹn na donùnùgona, enẹ wẹ ewọ: mì ni wlé e, bo dòn ẹn yì blẹo. 45Whenuena é wá, é yì e de to afọdoponẹji, bo dọmọ, Mẹplọntọ, Mẹplọ́ntọ, bo donùnùgo nẹ̃. 46Yé sọ do alọ é go, bo wlé e 47Ṣigba omẹ dopo de to mẹhe nọte to finẹ lẹ mẹ sún ohi etọn, bo li afànumẹ yẹwhenọ daho tọn de, bo sán otọ́ etọn dlangbe. 48Jesu sọ gblọn bo dọ hlan yé, dọ, Be mìwlẹ tón wá di do ajotọ de ji, po ohi lẹ po, po aglọpo lẹ po nado wlé mi? 49Egbésọ wẹ yẹn ko tin to tẹmpli mẹ po mì po, bo nọ to mì plón, mì ma wlé mi gba: ṣigba yè ma sọgan nọ ma hẹn Owé wiwe di gba. 50Yé omẹ pó sọ jo e dai, bo hòn yì.

51Ovidẹpemẹ de sọ to hihodo e, he yí alavọ̀ do ṣinyọn omé agbasa etọn tọn; yé hẹn é go; 52e sọ jo alavọ̀ lọ dai, bo hón yì sọn yé de omémẹ.

53Yé sọ hẹn Jesu yì yẹwhenọ daho de; ogán yẹwhenọ tọn lẹpo, po mẹho lẹ po, po wekantọ lẹ po sọ pli do e de 54Pita sọ to hihodo e to aganu, yèdọ yì awánu yẹwhenọ daho tọn: bo sọ sinai to lizọnyítọ lẹ de, bo to miyọnhú 55Ogán yewhenọ lẹ tọn, po tohodotọ lẹpo po sọ to kunnude din do Jesu go nado hù i; yé ma sọ mọ de gba. 56Na omẹ susu wẹ dekunnu lalo do e go, ṣigba kunnude yetọn ma plidopọ gba. 57Omẹ delẹ fọ́n, bo to kunnu lalo dè do e go, dọmọ, 58Mìwlẹ sè, é dọmọ, Yẹn na họ́ fiwiwe he yè yí alọ do basi liai, to azán atọ̀n mẹ yẹn nasọ dó devo he yè ma yí alọ do basi. 59To ehe lọ mẹ ga, ogbè yetọn ma nọdopo. 60Yẹwhenọ daho sọ fọ́n site to ṣẹnṣẹn, bo kanbiọ Jesu domọ, Hiẹ ma gblọn núde? Etẹwẹ ehe mehe lẹ do to kunnude do go we he? 61Ṣigba é nabọe, é ma sọ gblọn núde. Yẹwhenọ daho sọ vó kanse e, bo dọ hlan ẹn, do, Be hiẹ wẹ Klisti lọ, Ovi Donanọ lọ tọn? 62Jesu sọ dọmọ, Yẹn wẹ: mì nasọ mọ Ovi gbẹtọ tọn sinai to adusilọ huhlọn tọn ji, podọ ja po aslọ olọn tọn lẹ po. 63Whenẹnu wẹ yẹwhenọ daho tlẹn avọ̀ etọn lẹ, bo sọ dọmọ, Kunnudetọ tẹwẹ mì sọ to dindin ba? 64Mì ko sè nùzinzan lọ: etẹwẹ mì lẹn? Yé omẹ pó sọ gblewhẹdo e nado yín mẹhe jẹ na okú. 65Omẹ delẹ sọ sẹ̀ tántún do ogo nẹ̃, bo sọ bla nukunmẹ etọn, bo to akotokún li i, bo sọ to didọ hlan ẹn, dọ, Dọdọdai: lizọnyítọ lẹ sọ to alọpahomẹ yeton yí do to tómẹhò nẹ̃.

66Le Pita sọ tin tó odò to awánu, dopo to awhli yẹwhenọ daho tọn lẹ mẹ wá finẹ: 67mimọ Pita to miyọnhú, é pọ́n ẹn, bo sọ dọmọ, Hiẹ ga ko tin to Jesu Nazalẹti tọn de 68Ṣigba é món, dọmọ, Etẹ dọ hiẹ te, yẹn ma tunwun onú he hiẹ to didọ gba. E sọ tón jẹ hònnuwá mẹ; koklo sọ dose. 69Awhli de sọ vó mọ ẹn, bo sẹ̀ didọ hlan mẹhe nọte to finẹ lẹ, dọ, Dopo to yé mẹ wẹ ehe. 70E sọ vó món. E sọ dẹn vude, yé mẹhe nọte to finẹ lẹ dọ hlan Pita, dọ, Nugbo dopo to yé mẹ wẹ hiẹ: na Galilitọ wẹ hiẹ, ogbè towe di mọ. 71Ṣigba é ṣẹ̀ nado to dẹ̀hodo, bo sọ sẹ̀ whìwhlé, dọ, Yẹn ma yón dawe he mì to didọ gba 72Koklo sọ dose whlawetọ. Pita sọ flin ohó he Jesu dọ hlan ẹn, dọ, Whẹpo koklo na dose whlawe hiẹ na món mi whlatòn. Whenuena é lẹn ẹn é sè avivi.

Currently Selected:

MALKU 14: BWL23

Highlight

Copy