MALKU 15

1TO afọdoponẹji to afọnnu, ogán yewhenọ tọn lẹ po mẹho le po po wekantọ lẹ po, po tohodọtọ lẹpopete po, kana; yiha de, bo bla Jesu, bo hen ẹn tónyì, bo jo é hlan Pilati. 2Pilati sọ kanbiọ ẹ dọ, Be hiẹ we Ahọlu Ju lẹ tọn? E sọ gblọn bo dọ hlan ẹn, dọ, Hiẹ dọ. 3Ogán yẹwhenọ tọn lẹ sọ slẹ ẹ to onú susu mẹ. 4Pilati sọ vó kanbiọ ẹ dọ, Hiẹ ma gblọn núde? Pọ́n onú susu he yé sislẹ We na lẹ. 5Ṣigba Jesu ma sọ gblọn nudepope ba: sọmọ bọ awuji Pilati.

6To hunwhẹ lo me, é nọ jo ogántọ dopo dai na ye, medepope he yé biọ. 7Mẹde sọ tin he yè nọ ylọ dọ Balabas, mẹhe yè ko yi do ogàn me po mẹhe ṣiatẹ po e po lẹ po, yé mehe hùme to ate lọ mẹ lẹ. 8Gbẹtọ le sọ sè awhádo ogbè lelé, ye to bibio ni wa na yé dile é ko nọ wà na yé do dai 9Ṣigba Pilati gblọnna yé dọ, Mi jlo dọ yẹn ni jo Ahọlu Ju lẹ tọn dai na mì? 10Na é mọhlan dọ na nuvẹun We ogán yẹwhenọ lẹ tọn ko do jo e 11Ṣigba ogán yẹwhenọ tón le ko fọnadan agùndaho lọ dọ, é ni kúku jo Balabas dai na yé. 12Pilati so gblọn bo vó dọ hlan yé, dọmọ, Be etẹwẹ mì jlo yẹn ni wà lò do mẹhe mì ylọ Ahọlu Ju lẹ tọn? 13Yé sọ vó awhádo dọ, Whè e do satin go. 14Whenẹnu wẹ Pilati dọ hlan yé, domọ, Etẹwutu wẹ, oylan tẹwẹ é wà? Té sọ dawhá humọ talala, dọmọ, Whè e do satin go. 15Pilati sọ jlo nado napekọ agùndaho lọ, é jo Balabas dai na yé, whenuena é ko hò Jesu, é jo e nado yín whiwhe do satin go.

16Awhanvipẹ lẹ sọ dòn ẹn jẹgbonu yì gbángan he yè nọ ylọ Pletọlia mẹ; yé sọ ylọ awhanpa lepo plidopọ. 17Yé yí avọ̀ ogefunwunmẹ ṣinyọn nẹ̃, bo lòn ojẹgbakun owùn tọn, bo yí ṣinyọn ota nẹ, 18yé sọ sè nudọdo e, dọ, Oyínjla, Ahọlu Ju lẹ ton 19Yé sọ yí ofán li ota nẹ, bo túntán do ogo nẹ, bo sọ jẹklo bo to taliai nẹ, 20Whenuena yé vlẹ ẹ ko, yé dè avọ̀ ogefunwunmẹ lọ sọn e go, bo sọ yí avọ̀ etọn do nẹ̃, bo dòn ẹn jẹgbonu nado whè e do satin go.

21Yé sọ yi huhlọn do wlé dawe de, Simọni Silene tọn, mẹhe gò sọn gbeta bo juwá jei, otọ́ Alẹksandlé po Lufu po tọn, nado hẹn satin etọn. 22Yé sọ hen ẹn wá ofi he yè nọ ylọ Gọlgọta, tadena ehe tọn yin, Otẹn otaka tọn. 23Ye sọ yi vẹnhan he yè flusọ po zuya po na ẹn nù: ṣigba é ma yí i gba. 24Whenuena yé whè e do satin go, yé má avọ̀ etọn, bo sọ devò do yé ji, na ehe omẹ dopodopo na yí. 25To ogàn atọ̀ntọ okle tọn mẹ wẹ, yé whè e do satin go. 26Yè sọ wlan winwlan meslehó etọn tọn do aga, AHỌLU JU LẸ TỌN. 27Yé sọ whè ajotọ awe do satin go po e po, dopo to adusi mẹ, awetọ to amiyọn mẹ. 28Owé wiwe sọ di, ehe domo, Yè hia ẹ dogó ylandonọ lẹ. 29Mehe to jujujei lẹ sọ to vivlẹ ẹ ko, bo sọ to ota yetọn mìmi, dọmọ, So Hiẹ mẹhe hó fiwiwe lọ, bo sọ dó e to azán atọ̀n mẹ, 30whlẹn dewè gán, bo jẹte wá sọn satin go. 31Mọkẹdẹ wẹ ogán yẹwhenọ tọn lẹ to vivlẹ ẹ ko to yéde ṣẹnṣẹn ga, po wekantọ lẹ po, dọmọ, E whlẹn mẹdevo le gán, é ma sọgan whlèn ede gán. 32Gbọ Klisti Ahọlu Islaeli tọn ni jete sọn satin go wá dinvie, na mí nido mọ bo yise Mẹhe yè whè do satin go po e po lẹ sọ to vivlẹ ẹ ko.

33Whenuena é zùn ogàn sidopotọ mẹ, zinvlu do ṣinyọn aigba lẹpo ji, kaka jẹ ogàn sinẹnẹtọ me. 34To ogàn sinẹnẹtọ mẹ, Jesu yí ogbè lélé do dawhá dọ, Enoi, ELOI, LAMA SABAKTANI? ehe tadena etọn yín, Jiwheyẹwhe ṣie, Jiwheyẹwhe ṣie, etẹwutu hiẹ gbé mi dai? 35Omẹ delẹ to mehe site to finẹ lẹ mẹ, whenuena yé sè ehe, yé dọmọ, Pọ́n, é to Eli ylọ. 36Omẹ dopo sọ họnwezun, bo yí ovẹ̃nvẹsìn do gó hùmẹtekan de, bo yí i do ófán ji, bo yi na ẹn nù, bo dọmọ, Mì gbọ sọn é go; na mí ni pọ́n, eyín Eli na wá nado hen ẹn jẹte. 37Jesu sọ do ogbè lélé de, bo sọ jo gbigbọ etọn do. 38Avò yè do gbòabò to fiwiwe lọ me tlẹn do awe sọn aga jẹ odò. 39Whenuena mẹkanwekowhangán he site pànnukọn ẹn mọ bọ é dawhá dole, bo sọ jo gbigbọ etọn dọ, é dọmọ, Nugbo, Ovi Jiwheyẹwhe tọn wẹ dawe he. 40Yọnnu delẹ ga sọ to nupón to aganu: yé mẹhe mẹ Malia Magdaleni, po Malia onọ Jakobu pẹvi tọn po po Jose po tọn, po Salomi po te; 41(mẹhe ga, whenuena é tin to Galili hodo e, bo to lizọnyí nẹ̃;) podọ yọnnu susu devo he hẹji po e po yì Jelusalẹm lẹ.

42Dinvie whenuena tenu do, na é yín azán awuwle tọn wutu, ene wẹ azán he jẹnukọnna azán gbọjẹ tọn, 43Josẹfu Alimate tọn, tòhodọtọ yeyinọ de, mẹhe to nukundo ahọludu Jiwheyẹwhe tọn, wá, bo biọ owhé gbè yì Pilati de madibu, bo biọ osiọ Jesu tọn. 44Áwu sọ ji Pilati gbahúgbahú, eyín é ko kú wẹ: é sọ ylọ mẹkanwekowhangán bo kanse e, eyín é ko kú to whenu dindẹn. 45Whenuena é yọnẹn sọn mẹkanwekowhangán de, é jo osiọ lọ na Josẹfu. 46E sọ hò alà dagbedagbe, bo zé e jẹte, bo yí alà do bla ẹ, bo sọ tó ẹ do oyòwhó he yè kùn do osé glọ mẹ, bo sọ bli zannu de yì ohòn oyòwhé lọ tọn ji. 47Malia Magdaleni, po Malia onọ Jose tọn po sọ mọ ofi he yè tẹ́ ẹ do.

Currently Selected:

MALKU 15: BWL23

Highlight

Copy