MALKU 16

1WHENUENA azán gbọjẹ tọn juwayì, Malia Magdaleni, po Malia onọ Jakobu tọn po, po Salomi po, hò nuwhẹnkun vivi na yé nido wá do samisisa nẹ́. 2To afọnnu fliflimẹ azán tintan awlẹn tọn gbè, yé wá oyòwhé kòn, whenuena owhè sẹ́ zizẹ̀. 3Yé sọ to didọ to yéde ṣẹnṣẹn, dọmọ, Mẹnu wẹ na bli zannu sọn ohòn oyòwhé tọn go sẹ́ na mí? 4Whenuena yé sọ pọ́n, yé mọ yè ko bli zannu lọ sé: na é klo gbahú wutu. 5Whenuena yé biọ oyọwhé lọ mẹ, yé mọ ovisunnu de sinai to adusi mẹ, he yè ṣinyọn avọ̀ tedona wéwé de na, obu sọ di yé: 6é sọ dọ hlan yé, dọ, Mì dibu blo: mì to Jesu Nazaleti tọn he yè whè do satin go din: é ko fọ́n; é ma tin to ofi gba; mì pọ́n ofi he yé tó ẹ do 7Ṣigba mì yì, bo dọ hlan nuplọntọ etọn lẹ, po Pita po, dọ é jẹnukọnna mi jei Galili: finẹ wẹ mì na mọ ẹn te, dole é dọ na mì do. 8Yé sọ yawu tónjẹgbonu yi, bo họ̀nyì sọn oyòwhé lọ kòn: na sisọsisọ, po awujiji po wá yé ji: mọwẹ yé ma dọ onú de na mẹdepope: na obu di yé.

9Whenuena Jesu fọ́n to afọnnufù to azán tintán awlen tọn gbè, é jenukọn sọawúhia Malia Magdaleni, mehe me é yàn aovi ṣinawe jẹgbonu sọn. 10E yì bo dọ na mẹhe tin to e de le, le yé to awúbla bo sọ to avivi. 11Whenuena yé sè dọ é tin to ogbẹ̀, podọ yè ko mọ ẹn to e de, yé ma yise gba.

12To onú hele godo é sọawúhia awe devo to yé mẹ to ohia devo mẹ, le yé to zọnlinzin jei gbeta. 13Yé sọ yì bo dọ ẹ hlan omẹ he pò lẹ, mọwẹ ye ma sọ yí yé se ga.

14To enegodo é sọ sọawúhia omẹ widopo lẹ, le yé jagla to núdùdù kọ̀n, é sọ wọhẹ yé na mayìse yetọn, po sinsinyẹn ayiha yetọn tọn po wutu, na yé ma yí mẹhe mọ en to ehegodo é fọ́n le se wutu. 15E sọ dọ hlan yé, dọmọ Mì yì aihọn lẹpo me, mì ni to yẹwheho wendagbe tọn dọ hlan gbẹtọ lepo. 16Mẹhe yise bọ yè baptizi i, yè na whlẹn ẹn gán; ṣigba mẹhe ma yise wẹ yè na gblewhẹdo. 17Ohia helẹ wẹ na sọ nọ hodo mẹhe yise lẹ: To oyín ṣie me yé na nọ yàn aovi lẹ jegbonu; yé na nọ yí ogbè yọ́yọ́ lẹ do dọhó; 18yé na zé odàn lẹ do alọ me; eyín yé sọ nù onú he doadi de, é ma na gbleawu na yé; yé na zé alọ do azòntọ ji, yé nasọ je gángán.

19Mọwẹ whenuena Oklunọ Jesu dọhó hẹ yé godo, yè yí i sọ yì aga biọ olon mẹ, é sọ sinai to adusilọ Jiwheyẹwhe tọn mẹ; 20Yé sọ tọ́njegbonu yì, bo to yẹwheho dọ to ofi popo, Oklunọ sọ to àzónwà hẹ yé, bo sọ to ohó lọ hẹn lódo ga gbọn ohia he to hihodo lẹ dali. Nlẹẹ.

Currently Selected:

MALKU 16: BWL23

Highlight

Copy