LUKU 1

1LE omẹ susu ko yí do alọ mẹ nado wlan otàn onú nẹle tọn dopodopo he yè ko hẹn se to mí ṣẹnṣẹn, 2Yèdọ dile yé he yín kunnudetọ lẹ po divizónwàtọ ohó lọ tọn lẹ po sọn whéwhéwhenu yí yé do alọ mẹ na mi do; 3E jẹ na mi ga, bọ yẹn ko dafọna onú lẹpo gbọn ganjiganji sọn dòdó, nado wlan owé hlan we whinnuwhinnu, hiẹ Teofil gigonọ daho, 4Na hiẹ nido yón nugbo gbọn ohó lẹ lọ tọn dali ehè mẹ yè plón we te.

5To Hẹlọdi ahọlu Jude ton whenu, yẹwhenọ de tin, oyín etọn wẹ Zakali, to Abia hennu; asi etọn basi dopo to Aalọn viyọnnu lẹ mẹ, oyín etọn sọ nọ yín Elizabẹti. 6Yé omẹ awe lẹ sọ yín dódónọ to Jiwheyẹwhe nukọn, yé to zọnlinzin to osén po ali Oklunọ tọn lẹpo po me mablu. 7Yé ma ji ovi, na Elizabẹti jọ wènsino, yé omẹ awe le sọ poyọnho. 8Dinvie e sọ wá jo whenuena é to yẹwhẹnọzon wà to Jiwheyẹwhe nukọn to hukan etọn mẹ. 9Di azon yẹwhenọ lẹ tọn, otẹn etọn wẹ nado biọ fiwiwe Oklunọ tọn mẹ, bo mè nuwhẹnkun. 10Gbẹtọ he pli lepo sọ to dèho to gbonu to nuwhẹnkun mimẹ̀ whenu. 11Angẹli Oklunọ tọn de sọawúhia hlan en to finẹ, to ote to adusi agbà nuwhẹnkun tọn mẹ. 12Whenuena Zakali mo en, é yín tuklanọ, obu sọ jẹ e ji. 13Ṣigba angeli lọ dọ hlan ẹn, dọmo, A dibu blo, Zakali: na yè sè odè towe; asi towe Elizabẹti na ji ovisunnu de hlan we, hiẹ nasọ ylọ oyín etọn Johanu. 14Hiẹ na tindo homẹhùnhùn po ayajijẹ po; omẹ susu na jaya to JIJI etọn mẹ. 15Na ewọ na klo to Oklunọ nukọn, é ma to na nù ovẹ̃n kavi ahàn sinyensinyen de; é na gọ na Gbigbọ Wiwe, yèdọ sọn ohò onọ etọn tọn mẹ 16Susu to ovi Islaeli tọn lẹ mẹ wẹ é na lé do Oklunọ Jiwheyẹwhe yetọn de. 17Gbigbọ po huhlọn Eli tọn po wẹ é na yí do nukọn nẹ̃, nado lé ayiha otọ́ lẹ tọn hlan ovi lẹ de, podọ tólivẹtọ lẹ nado nọ zinzọnlin to nuyọnẹn dódónọ lẹ tọn mẹ, 1 nado wleawu gbẹtọ lẹ de tọn dote dai na Okluno. 18Zakali sọ dọ hlan angẹli lọ, dọmọ, E tẹwẹ yen na do yón ehe? Na yẹn ko poyọnho, owhè asi ṣie tọn lẹ sọ yì nukọn susu. 19Angeli lọ sọ gblọn bo dọ hlan ẹn, dọmọ, Yẹn Gabliẹli he nọ site to Jiwheyẹwhe nukọn wẹ; yẹn wẹ yè dohlan nado dọhó hlan we, podọ nado hẹn wẹndagbe helẹ wá de we. 20Do ayi e go, hiẹ na zùn unbọpẹn bo ma na sọgan dọhó, kaka jẹ azán he gbè onú helẹ na jọ, na hiẹ ma yí ohó ṣie se, he na di to ojlẹ yetọn mẹ wutu. 21Gbẹtọ lẹ sọ nọtepọ́n Zakali, awu sọ ji yé na é dẹn to fiwiwe lọ mẹ wutu. 22Whenuena é sọ jẹgbonu wá, é ma sọgan dọhó hlan yé: yé sọ mọhlan dọ é mọ númimọ de to fiwiwe mẹ; na é to alọ yí do to ohia basi hlan yé, bo sọ nọte makẹnu. 23E sọ wá jọ whenuana azán yẹwhenọzón etọn tọn lẹ pé, é fọ́nyì owhé etọn gbè.

24To azán nẹlẹ godo wẹ Elizabẹti asi eton mọhò, bo sọ yí ede whlá hò osùn atón, bo dọmọ, 25Le wẹ Okluno wà hlan mi, to azán helẹ gbè é hùn nukun pọ́n mi, nado dè ovlẹ ṣie sọn gbẹtọ lẹ ṣẹnṣẹn.

26To osùn sidopotọ mẹ yè sọ do angeli Gablieli lọ hlan sọn Jiwheyẹwhe de yì otò daho Galili tọn de mẹ, he yè nọ ylọ Nazalẹti, 27Hlan awhli he yè mọdahho de hlan dawe de oyín mẹhetọn yín Josẹfu, sọn owhé Davidi tọn gbè; oyín awhli lọ tọn wẹ Malia 28Angẹli lọ sọ wá e de, bo dọmọ, Oyínjla, hiẹ he mọ nukundagbe daho, Oklunọ tin to de we; donano wẹ hiẹ to yọnnu lẹ mẹ. 29Whenuena é mọ ẹn, awú ma jai nẹ̃ na ohó etọn wutu, é sọ lẹn to ayiha etọn mẹ dọ, núdọdomẹ té hunkọ we ehe do yín? 30Angẹli lọ sọ dọ hlan ẹn, dọmọ, A dibu blo, Malia, na hiẹ ko mọ nukundagbe to Jiwheyẹwhe de. 31Bo do ayi e go, hiẹ na mọho to ohò towe mẹ, bo nasọ ji ovisunnu de bo sọ ylọ oyín etọn JESU. 32Ewọ na yín kiklo, Ovi Gigogan tọn wẹ yè na nọ ylọ ẹ: Oklunọ Jiwheyẹwhe nasọ yí ofìn Davidi otọ́ etọn tọn na en. 33E nasọ duahọlu to owhé Jakobu tọn gbè kaka doi; ahọludu etọn ma na do pòdo. 34Whenẹnu wẹ Malia dọ hlan angeli lọ, dọmọ, Nawẹ ehe na yin, whenuena yẹn ma yón sunnu gbède? 35Angeli lọ sọ gblọn bo dọ hlan ẹn, dọ, Gbigbọ Wiwe na wá oji we, huhlọn Gigogan tọn nasọ ṣinyọn oyé oji we: enẹwutu ga onú wiwe he tin nado yín didètọ́n sọn hiẹ mẹ, Ovi Jiwheyẹwhe tọn yè na nọ ylọ ẹ. 36Do ayi e go, Elizabẹti mẹmẹyọnnu towe ga ko mọhò ovisunnu de tọn to yọnho etọn mẹ: ehe wẹ osùn sidopotọ na ewọ he yín wónsinọ 37Na pe jiwheyẹwhe po onu lẹpo wẹ vi wiwa. 38Malia sọ dọmọ, Pọ́n afànumẹ yọnnu Oklunọ tọn; ni nọ hlan mi kẹdẹdi ohó towe. Angẹli lọ sọ yì sọn é de.

39Malia sọ fọ́n to azán nẹlẹ mẹ, bo yawu yì biọ otò okọta tọn mẹ, to otò daho Judé tọn de mẹ; 40Bo sọ biọ owhé Zakali tọn gbè, bo dọnúdo Elizabeti. 41E sọ wá jọ whenuena Elizabẹti sè núdọdomẹ Malia tọn, ovi whàngo to adọ̀ etọn mẹ; Elizabẹti sọ gó na Gbigbọ Wiwe; 42E sọ zé ogbé etọn daga po awhá lélé de po, bo dọmọ, Donanọ wẹ hiẹ to yọnnv lẹ mẹ, donanọ wẹ sinsẹ́n adò towe mẹ tọn. 43Fie wẹ ehe sọn wá jẹ dẽ, bọ onọ Oklunọ ṣie tọn nado wá yẹn de? 44Bo pọn, le ogbè núdọdomẹ towe tọn jẹ otọ́ ṣie lẹ mẹ, ovi whàngo to adò ṣie mẹ na ayajẹ. 45Donanọ wẹ ewọ he yise; na didi onú he yè dọ hlan ẹn sọn Oklunọ de lẹ tọn na tin fine wutu. 46Malia sọ dọmọ,

Ayiha ṣie jlayínna Oklunọ,

47Gbigbọ ṣie sọ jaya to Jiwheyẹwhe

Whlẹngantọ ṣie mẹ.

48Na é ko hùn nukun pọ́n walọmìmiọn afànume yọnnu etọn tọn í

Na pọ́n, sọn dinvie wẹ whẹndo lẹpo na nọ ylọ mi donanọ.

49Na ewọ he yín hlonhlọnnọ ko wà onú he klo lẹ hlan mi;

Podọ wiwe wẹ oyín etọn

50Lẹblanu etọn sọn whẹndo de jẹ whẹndo

Lẹpo me to yé he dibusi i lẹ ji.

51E ko yí awà etọn do do huhlọn, hia;

E sọ gbà saklanọ lẹ kija, gbọn homegble ayiha yetọn tọn dali.

52E ko dè ahọvi lẹ jẹte sọn ofìn yetọn lẹ ji,

Bo sọ zé hùwhẹnọ lẹ do aga.

53E ko yi onú dagbe lẹ do pekòna mẹhe huvẹ to hùhù lẹ;

Bo sọ yàn adọkunnọ lẹ yì alọvọ.

54E ko gọalọna Islaeli devi etọn,

Na ewọ nido flin lẹblanu;

55Dile é dọhó hlan otọ́ mìtọn lẹ,

Hlan Ablaham dali po okún etọn lẹ po kaka doi.

56Malia sọ nò e de hò osùn atọ̀n nkọ, bo sọ legò yì owhé etọn gbè.

57Ojlẹ Elizabẹti tọn sọ pé, bọ é nado jivi; é sọ hẹn ovisunnu de jẹgbonu wá. 58Kọmẹnu etọn lẹ, po mẹmẹ etọn lẹ pọ sè dọ Oklunọ ko jlayinna lẹblanu etọn hlan ewọ dali; yé sọ jaya hẹ ẹ. 59E sọ wá jọ to azán sinatòntọ gbè, wẹ yé wá nado gbowhẹna ovi lọ; yé do ko sọ ylọ ẹ Zakali, kẹdẹdi oyín otọ́ etọn tọn, 60Onọ etọn sọ gblọn bo dọmọ, Mọ ma gba: ṣigba Johanu wẹ yè na ylọ ẹ. 61Yé sọ dọ hlan ẹn, dọmọ, Mẹmẹ towe de ma yín oyín he hunkọ gbède. 62Yé sọ basi ohia lẹ hlan otọ́ etọn, etẹ wẹ é jlo yè ni ylọ ẹ. 63E sọ kàn wekanu de biọ, bo wlan dọmọ, Johanu wẹ oyín etọn. Awu sọ ji yé omẹ pó. 64Yè sọ hùn onù etọn to tẹndoponẹmẹ, odékan etọn sọ tún, é sọ dọhó, bọ sọ dona Jiwheyẹwhe, 65Obu sọ di yé he nọnọ̀ yé dali lẹpo: onú helẹ sọ hlun pé otò okọta Judé tọn lepò me. 66Mẹhe sè lẹ sọ yí yé hẹn do ayiha yetọn me, dọmọ, Eté wẹ ovi he na yín? Na alọ Oklunọ tọn tin po e po.

67Zakali otọ́ etọn sọ gó na Gbigbọ Wiwe, bo dọdọdai, dọmọ, 68Donanọ wẹ Oklunọ yín Jiwheyẹwhe Islaeli tọn, Na é ko diapón, bo ko sọ basi ofligọ na omẹ etọn lẹ, 69E ko zé azò whlẹngan tọn de daga na mí To owhó devi etọn Davidi tọn gbè; 70Dile é dọ gbọn onù yẹwhegán wiwe etọn lẹ tọn mẹ, he ko tin sọn whenu aihọn ko sè: 71Whlengan sọn kèntọ mìtọn le si, podọ sọn alọ yé he gbẹwanna mí lẹpo tọn mẹ; 72Nado do lẹblanu hia hlan otọ́ mìtọn lẹ dali, Nado flin alènu wiwe etọn; 73Whiwhlé he é whlé hlan otọ́ mìtọn Ablaham, 74Nado na mí, dọ whinwhlẹn mí sọn alọ kèntọ mìtọn lẹ tọn mẹ, Nido sẹ́n ẹn matin obudi, 75To wiwe po dódó po mẹ to nukọn etọn to azán mìtọn lẹpo me. 76Mọwẹ podọ hiẹ, ovi, yẹwhegán Gigogan tọn wẹ yè na nọ ylọ we, Na hiẹ na jẹnukọnna Oklunọ nado jla ali etọn lẹ do: 77Nado na oyọnẹn whlẹngan tọn omẹ etọn lẹ, To desé ylando yetọn lẹ tọn mẹ, 78Na ayiha lẹblanu Jiwheyẹwhe mìtọn tọn tọn wutu; Ehe mẹ wunkinkẹn sọn oji aga wá dla mí pọ́n, 79Nado hón do yé he sinai to zinvlu mẹ, po to oyé oku tọn mẹ lẹ po ji; Nado do afọ mìtọn lẹ do ali jijọho tọn mẹ.

80Ovi lọ sọ whẹn, bo lezun huhlọnnọ to gbigbo mẹ, bo sọ tin zùngbo mẹ kaka jẹazán dido e hia Islaeli tọn gbè.

Currently Selected:

LUKU 1: BWL23

Highlight

Copy