LUKU 2
2
1DINVIE e sọ wá jọ to azán nẹlẹ mẹ, wẹ asẹ sọn Sesali Àugusti de yì, dọ, yè ni wlan oyín omẹ he to aihọn mẹ lẹpo tọn do owé mẹ. 2(Ehe wẹ winwian tintan he yè basi whenuena Sileniu yín otogan Silìa tọn.) 3Gbetọ lẹpo sọ yì nado wlan oyín yéde tọn do owé mẹ, omẹ dopodopo jẹ otọ́ daho edelọsu tọn mẹ. 4Josẹfu ga sọ heji yì sọn Galili, sọn otò daho Nazalẹti tọn mẹ biọ Judé, jẹ otò daho Davidi tọn mẹ he yè nọ ylọ Bẹtlehẹm, (na ewọ yín owhé po hẹnnu Davidi tọn po wutu:) 5nado wlan oyín etọn po Malia asi mọdaliho etọn tọn po do owé mẹ, mẹhe ohò whénna. 6E sọ wá jọ whenuena yé tin to fine, azán etọn lẹ pó bọ e na do jivi. 7E sọ hẹn visunnu plọnji etọn jẹgbonu wá, bo sọ yí ajaken hizi do e go, bo sọ té ẹ do opa kanlin tọn de mẹ; na ohònu ma tin na yé to dohò mẹ wutu.
8Lẹngbohọtọ lẹ sọ tin to otò lọ mẹ, yé to odanji to lengbọpa yetọn hó to ozán mẹ. 9Angeli Oklunọ tọn sọ site to ye de, gigo Oklunọ tọn sọ hón lédọ yé; obu sọ di ye talala. 10Angẹli lọ sọ dọ hlan yé, dọmọ, Mì dibu blo: pon, yẹn hẹn wẹndagbe homehùnhùn daho tọn wá na mì, he na tin hlan gbẹtọ lẹpo. 11Na yè ji Whlẹngan tọ de hlan mì to egbé to otò daho Davidi tọn mẹ, he yín Klisti Oklunọ. 12Ehe sọ wẹ basi ohia hlan mì; Mì na mọ ovivu de he yè yí ajakẹn hizi do e go, é mlọnai to opa kanlin tọn de mẹ. 13Ajiji agùndaho awhanpa olọn tọn de tin to angẹli lọ de, bo tò Jiwheyẹwhe pa, dọmọ,
14Gigo hlan Jiwheyẹwhe to olọn aga,
Podọ jijọho to gbẹtọ mẹhe mẹ ewọ yín homẹhùnnọ te lẹ ṣẹnṣẹn.
15E: sọ wá jọ, whenuena angẹli lẹ lé sọn yé de yì biọ olon mẹ, lẹngbọhọtọ lẹ dọ hlan yénọzọ, dọmọ, Mì gbọ mí ni yì Betlehem dinvie bo yì pọ́n onú he jọ, he Oklunọ ko hẹn zun yinyọnẹn hlan mí. 16Yé sọ yawu wá po awuyiya po, bo mọ Malia, Josefu, po ovivu lọ po to aimimlọn tó opa kanlin tọn lọ mẹ. 17Whenuena yé mọ ẹn, yé hlun ohó he yè dọ hlan yé gbọn ovi he lọ tọn dali lédo pé. 18Podọ mehe sè e lepo wẹ awuji do onú le lọ go, he lẹngbohọtọ lẹ dọ hlan yé. 19Ṣigba Malia yí onú he lẹpo whlá, bo to yé lẹnpón to ayiha etọn mẹ. 20Lẹngbọhọtọ lẹ sọ lẹgò, bo to gigopana Jiwheyẹwhe, bo sọ to pipa ẹ, na onú he yé ko sè bo sọ mọ lẹ, yèdọ dile yè dọ hlan yé do.
21Whenuena azán sinatòn pé nado gbowhena ẹn yé ylọ oyìn etọn dọ JESU, he yè ylọ mọ gbọn angeli lọ dali, whẹpo yè do mọhò etọn to adò mẹ.
22Whenuena azán lẹ́we etọn tọn lẹ pé kẹdedi osén Moṣe tọn, yé hen en wá Jelusalẹm, nado jo e hlan Oklunọ; 23(Dile yè wlan to osén Oklunọ tọn mẹ dọ, Ovisunnu depope he hùn adò wẹ yè na ylọ dọ wiwe hlan Oklunọ;) 24podọ nado sanvó kedẹdi enẹ he yè dọ to osén Oklunọ tọn mẹ, Apoe awe, kavi awhannẹvu awe. 25Do ayi e go, dawe de tin to Jelusalẹm, oyín mehetọn no yín Simeọni; dawe he sọ yín dódónọ, hùnséntọ, mẹhe nọtepọ́n homẹmimiọn Islaeli ton, Gbigbọ Wiwe sọ tin to e ji. 26Yè sọhia hlan ẹn gbọn Gbigbọ Wiwe dali, dọ, ewo ma to na mọ okú, whẹpo ewọ do mọ Klisti Oklunọ lọ tọn. 27Ewọ sọ gbọn Gbigbọ mẹ wá tẹmpli me: whenuena mẹjitọ lẹ sọ zé ovi lọ Jesu wá, na yé nido wà gbọn ewọ tọn dali kẹdẹdi owalọ osén tọn. 28Whenẹnu wẹ é yí i do awà etọn mẹ, bo dona Jiwheyẹwhe, bo, sọ dọmọ, 29Oklunọ E, dinvie wẹ a ni jo devi towe do ni yì jijọho, Kẹdẹdi ọhó towe.
30Na nukun ṣie lẹ ko mọ whlengan towe,
31Ehe hiẹ ko wleawu etọn dai to gbẹtọ lepo nukọn;
32Hinhón de na osọhia hlan Kosi lẹ,
Po gigo Islaeli omẹ towe lẹ tọn po.
33Podọ otọ́ etọn po onọ etọn po to awuji do onú he ye dọ gbọn ewọ dali lẹ go. 34Simeọni sọ dona yé, bo dọ hlan Malia onọ etọn, dọ, Pọ́n, yè dọ ovi he na aijijẹ po finfọ́n omẹ susu tọn po to Islaeli; podọ na ohia de he go yè na dọ oylan do; 35(Mọwẹ podọ, ohi de na biọ alindọn towe lọsu mẹ lùntọn,) na yè nido dè linlẹn ayiha susu tọn le hia. 36Mẹde sọ tin finẹ Anna yẹwhegán, viyọnnu Fanueli tọn, sọn hennu Aṣeli tọn mẹ: é sù to azán mẹ bo ko sọ nò asú de kòn hò owhè ṣinawe sọn awhli ME ETON WA. 37E ko sọ yín asusiọsi yèdọ hò owhè kanwenukunẹnẹ, mẹhe ma fọ́nyì sọn tẹmpli mẹ, bo sọ yí nùbibla po ovẹ́ po do to Jiwheyẹwhe sẹ̀n to ozán po okle po. 38Hihẹji wá to ojlẹ lọ mẹ, é dopéna Jiwheyẹwhe ga, bo sọ dọ ohó etọn hlan mẹhe to nukundo ofligò Jelusalẹm tọn lepo. 39Whenuena yè dotana onú lẹpo he tin kẹdẹdi osén Oklunọ tọn, yé lẹ́gọ̀ yi Galili, yì otò yetọn titi Nazalẹti mẹ.
40Ovi lọ whén, bo lẹzun huhlọnnọ to gbigbọ mẹ, bo sọ gó na nuyọnẹn: ojọmiọn Jiwheyẹwhe tọn sọ tin to e ji.
41Whèmẹ-whèmẹ wẹ mẹjitọ etọn lẹ nọ yì Jelusalẹm to juwayì hunwhẹ zángbè. 42Whenuena é yín ovi owhè wiawemẹ tọn, yé hẹji yì Jelusalẹm kẹdẹdi owàlọ hunwhẹ tọn. 43Whenuena yé ko pé azán yetọn lẹ, le yé gò ja, ovi lọ Jesu nọte to godo to Jelusalẹm; Josẹfu po onọ etọn po ma sọ yọnẹn. 44Ṣigba linlẹn dọ é tin to ogbé lọ mẹ; yé ko zìn azán dopo zọnlin; yé din in pó to hẹnnumẹ yetọn lẹ, po họ́ntọn yetọn lẹ po ṣẹnṣẹn. 45Whenuena yé ma mọ ẹn, yé lẹ́gọ̀ yì Jelusalẹm, bo to dindìn in pé. 46E sọ wá jọ, to azán atóntọ gbè, yé mọ ẹn to tẹmpli mẹ, é sinai to mẹplọntọ lẹ ṣẹnṣẹn, é to ohó yetọn só, bo sọ to ohó kanbiọ yé. 47Avò sọ vò mẹhe sè e lẹ, po do wuntuntun po gbèyíyí etọn lẹ po go. 48Whenuena yé sọ mọ ẹn, avọ̀ vò yé: onọ etọn sọ dọ hlan ẹn, dọ, Ovi, etewutu wẹ hiẹ wà mọ hẹ mí? pọ́n, otọ́ towe po yẹn po ko to dindìn we pé po awúbla po. 49Ewọ sọ dọ hlan yé, dọ, Etẹwutu wẹ mì to dindin mi pé? Mì ma yọnẹn dọ yẹn ma sọgan nọ ma tin to azón Otọ́ ṣie tọn kòn? 50Yé ma sọ tunwun ohó he é dọ hlan yé gba. 51E sọ jẹte hodo yé yi, bo wá Názalẹti, bo sọ whìwhẹ ede dai hlan yé; podọ onọ etọn yí onú he lẹpo whlá do ayiha etọn mẹ.
52Jesu sọ to nukọnyì tó nuyọnẹn mẹ, podọ to whinwhẹn mẹ, podọ to nukundagbe mẹ to Jiwheyẹwhe po gbẹtọ po de.
Currently Selected:
LUKU 2: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.
