MALKU 12

1E SỌ sè hódọ hlan yé to oló lẹ mẹ, dọ, Dawe de do vẹ̃ngle de, bo dopa lédo e, é kùn vẹ̃nhandò, bo dó dohò, bo sọ haya ẹ na glesi lẹ, bo tónwhen yì otò dindẹn de mẹ 2To ojlẹ lo me, é do afànume de hlan glesi le, na é nido moyi sọn glesi lẹ si sinsẹn vẹ̃ngle ton. 3Yé sọ wlé e, bo linu i, bo do e hlan alọvọ 4E so vó afànume devo dohlan yé; ewọ we yé so dlẹn zannu do, bo húnuin son ota, yé sọ yí winyan do yàn en jegbonu. 5E sọ vó devo de dohlan, yé sọ hù i, po medevo susu po: yé húnu medelẹ, bo hù medeìe. 6Ewọ tindo ovisunnu dopo, visunnu yiwanna de, é do e hlan yé gbọn godo, dọmọ, Yé na gbògbena ovisunnu ṣie. 7Ṣigba oglesi nele dọ to yéde ṣẹnṣẹn, dọ, Ehe wẹ whédutọ lọ; mì wá, mì gbọ mí ni hù i, na ogú eton ni yín mìtọn. 8Yé sọ wlé e, bo hù i, bo zé e dlẹn sọn vẹ̃ngle mẹ. 9Enẹwutu be etẹwe Oklunọ vẹ̃ngle tọn na wà? E na wá, bo na hù glesi lẹ lọ súdo, bo nasọ yí vẹ̃ngle na mẹdevo lẹ. 10Be mì ma ko hia Owé wiwe he,

Zannu he didótọ le gbé dai,

Dopolọ wẹ so lezun gángánsu hòlọnglọnẹnme ton.

11Oklunọ de wẹ ehe sọn,

E sọ yín nujawu to nukun mìtọn mẹ?

12Yé sọ din na yí alọ do e ji, ṣigba yé dibuna gbẹtọ lẹ; na yé yọnen dọ, é dọ oló lọ do yé go: yé sọ jo e dai, bo tón yì.

13Yé sọ do omẹ delẹ hlan ẹn sọn Falesi lẹ de, podo sọn Hẹlọdinu lẹ de, nado wlé e to ohó etọn me. 14Whenuena yé wá, yé dọ hlan ẹn, do, Mẹplọntọ, mìwlẹ yonẹn dọ nugbonọ we hiẹ, mọwẹ hiẹ ma sọ dibuna mẹde; na hie ma hò nukunta mẹde tọn pọn, ṣigba hie to ali Jiwheyẹwhe tọn plónme to nugbo mẹ Be é jẹ na na tòkuẹ Sesali kavi lalá? 15Mí ni na, kavi mí na blo? Ṣigba ewọ, yinyọn yẹnuwiwà yetọn, é dọ hlan yé, dọmọ, Etẹwutu wẹ mì to whiwhle mi pọn? mì hẹn abọgan-kuẹ dopo wá na mi, na yen ni pọ́n en 16Yé sọ hẹn ẹn wá. E kanbiọ ye dọmọ, Mẹnu tọn wẹ bosiọ he po winwlan po? Yé sọ dọ hlan ẹn, dọ, Sesali tọn. 17Jesu sọ dọ hlan yé, dọ, Mì yí onú he yín Sesali tọn hlan Sesali, podọ onú he yín Jiwheyẹwhe tọn hlan Jiwheyẹwhe. Awu sọ ji yé talala do e go.

18Whenẹnu wẹ Sadusi lẹ wá e de, yé mẹhe dọ fọ́nsọnku ma tin; yé kanbiọ ẹ dọ, 19mèplọntọ, Moṣe kanwe hlan mí, dọ, Eyín nọvisunnu mẹde tọn kú, bo jo asi etọn dai, bo ma jọ ovi dai, na novisunnu eton nì yí asi etọn, bo jivi do nov isunnu eton tẹnmẹ. 20Be nọvisunnu ṣinawe delẹ ko tin, tintan plan asi de, bo kú ma jo ovi dai. 21Awetọ yí i, bo ku, mọwẹ é ma so jo ovi dai: mọkẹdẹ wẹ atònto ga. 22Ye omẹ ṣinawe lẹpo wẹ mọ en, bo ma sọ jo ovi dai; to yé omẹ pó godo yọnnu lọ kú ga. 23Be to fọ́n sọnku mẹ, whenuena yé na fọ́n, asi menu tọn wẹ é na yín? na yé omẹ ṣinawe lẹ wẹ yí i do mọasi. 24Jesu sọ gblọn bo dọ hlan yé, dọ, Be é ma yin ehe wutu wẹ mì buali, na mì ma yón Owe wiwe, mì ma sọ yón huhlọn Jiwheyẹwhe ton? 25Na whenuena ye na fọ́n sọn osiọ lẹ mẹ, yé ma na wlealọ, mọwẹ yè ma sọ no na wlealọhẹ; ṣigba yé taidi angẹli he tin to olọn mẹ lẹ 26Ṣigba gbọn osiọ lẹ tọn dali, dọ yé fọ́n; be mìwlẹ ma ko hia to owé Moṣe tọn mẹ, le Jiwheyẹwhe dọ nẹ̃ to ozùn mẹ, domo, Yen wẹ Jiwheyẹwhe Ablaham tọn, Jiwheyẹwhe Isaki tọn, podọ Jiwheyẹwhe Jakobu tọn? 27Ewọ ma yín Jiwheyẹwhe osiọ le tọn gba, adavọ̀ Jiwheyẹwhe ogbónọ lẹ tọn: mìwlẹ; buali talala.

28Dopo to wekantọ lẹ mẹ sọ wá, bo sè yé to nukanbiọ yénọzo podọ mimọ dọ é gblọnna yé dagbe, é kanbiọ ẹ dọ, Be etẹ wẹ tintan to osén lẹpo mẹ? 29Jesu sọ gblọn dọ hlan ẹn, dọ, Tintan osén lẹpo tọn we, Sè, hiẹ Islaeli È, Oklunọ Jiwheyẹwhe mìtọn, Oklunọ dopo wẹ: 30podọ hiẹ na yiwanna Oklunọ Jiwheyẹwhe towe sọn ayiha towe lẹpo mẹ, podọi sọn alindọn towe lẹpo me, podọ sọn niiyònen towe lẹpo mẹ, podọ sọn huhlọn towe lẹpo mẹ. 31Awétọ sọ wẹ ehe, Hiẹ na yiwanna komẹnu towe di dewe. Osén he klohú ehele de ma tin. 32Wekantọ lọ sọ dọ hlan ẹn, dọ, Mẹplọntọ, é yón, hiẹ dọ nugbo; na Jiwheyẹwhe dopo we tin; devo de ma tin, adavo ewọ: 33Podọ nado yí ayiha lẹpo, po nuyọnen lẹpo po, po gbigbo lẹpo po, po huhlọn lẹpo po, do yiwan nẹ, bo yiwanna kọmẹnu etọn di ede, é hú nunina mimẹ̀ lẹ po avọ́ lẹpo po. 34Whenuena Jesu mọ dọ é dọhó di nuyọnẹnto, édọ? hlan ẹn, dọ, Hiẹ ma dẹn do aholudu Jiwheyẹwhe tọn gba. Enẹgodo mẹde ma so ha kan onú de biọ ẹ ba.

35Le Jesu to meplón to témpli mẹ, é gblọn bo dọmọ, Be etẹwutu wẹ wekantọ lẹ to didọ dọ ovi Davidi tọn wẹ Klisti? 36Na Davidi lọsu dọ to Gbigbọ Wiwe mẹ,

Dọ, Oklunọ dọ hlan Oklunọ ṣie dọ,

Hiẹ sinai to adusilọ ṣie mẹ,

Kaka yen na yí kẹnlọ towe lẹ do basi tokloafoligbe towe tọn.

37Davidi lọsu ylọ ẹ Oklunọ; whetẹnu wẹ é yín ovi etọn? Omẹ susù so yí homehún do sè ohó etọn.

38E sọ dọ hlan ye to núplọnmẹ etọn mẹ, dọ, Mì payi wekantọ lẹ go, he nọ jlo na zinzọnlin to avọ̀ tedona mẹ, bo sọ yiwanna núdọdomẹ to ahi mẹ, 39podọ aisintẹn daho lẹ to sinagogu lẹ mẹ, podọ oten daho le to nududù tẹnmẹ le: 40Yé mẹhe dù owhé asusiọsi lẹ tọn súdo, bo sọ nọ hodè dindẹn na goyíyí: ehelẹ nasọ mọ whegbledo daho yí.

41Jesu sọ sinai sẹpọ́ adọkunnú potin, bo to pinpọ́n le gbẹtọ lẹ to akuẹ dlẹn do adọkunnú potin mẹ do; omẹ susu he yín adọkunnọ lẹ sọ yí susu do e me. 42Asusiọsi wamọnọ de sọ wá fìnẹ, bo yí abọgan-kuẹ pẹvipẹvi awe dlẹn e me, ehe basi dadao abogan-kuẹ fíínflín dopo tọn. 43E sọ ylọ nuplọntọ etọn lẹ do e de, bo dọ hlan ye, dọ, Nugbo wẹ yẹn dọ hlan mì, Asusiọsi wamọnọ he sọ susu dlẹn e mẹ hú omẹ popo he to dindlan do adọkunnú potin mẹ lẹpo: 44Na yé omẹ pó wẹ dlẹn do e mẹ sọn adọkun susu yetọn mẹ; ṣigba ewọ sọn matindo etọn me, é yí onú he e tindo lẹpo dlẹn e mẹ, yèdọ gbómẹnu etọn lẹpo.

Currently Selected:

MALKU 12: BWL23

Highlight

Copy