MATIU 6
6
1MÌ payi dọ mì wá dódó mìtọn to gbẹtọ nukọn, nado yín mimo gbọn yé de blo; eyínmọ mìwlẹ ma tindo ale de to Otọ̀ mìtọn he tin to olọn mẹ de gba. 2Enẹwutu whenuena hiẹ wà lẹblanu núnina towe, a kún opèn de to nukon towe blo, dile yẹnuwatọ lẹ nọ wà do to sinagogu mẹ, podọ to alihogbó ji na ye nido do gigo sọn gbẹtọ lẹ de. Nugbo wẹ yen dọ hlan mì, dọ, Yé ko mọyí to gigọ́ me ale yetọn. 3Ṣigba whenuena hiẹ wà lẹblanu núnina, a dike amiyọnlọ towe yon onú he adusilọ towe to wiwà blo: 4na lẹblanu nunina towe ni tin nuglọ: Otọ́ towe he mọnú to nuglọ, na suahọ etọn we.
5Whenuena hiẹ to dèho, a di yẹnuwàtọ lẹ blo: na yé yíwánna nado site do hodẹ to sinagogu me, podọ to alihoklanji, nado yín mimọ na gbẹtọ lẹ wutu. Nugbo wẹ yẹn dọ hlan mì, Ye ko mọyí to gigọ́ mẹ ale yetọn. 6Ṣigba hiẹ, whenuena hie to dẹho, biọ abo towe mẹ, whenuena hiẹ sú ohọ̀n towe, hodẹ̀ hlan Otọ́ towe he mọnu nuglọ, Oto towe he mọnú nuglọ, na suahọ etọn we.
7Ṣigba whenuena mì to dẹ̀ho, mì zán dọvọdọ vòtọ di Kosi lẹ blo; na yé lẹn dọ yè na sè yetọn na ohó susu didọ yetọn. 8Enewutu mì di yé blo: na Otọ̀ mìton yọn onú he mì tindo núwhèdo na, whẹpo mì do biọ ẹ.
9Enẹwutu le wẹ mì ni nọ hodè do: Otọ mìtọn he tin to olọn mẹ, hihiọ we oyín towe. 10Ahọludu towe ni wá. Ojlo towe ni yín wiwà to aigba ji, dile e te to olọn mẹ. 11Na mi nudùdù egbesọ mìtọn. 12Bo jo ahọ mìtọn lẹ na mi, dile mí ko jona ahotọnọ mìtọn lẹ do. 13Ádike mí jẹ whlepọ́n mẹ blo, ṣigba whlẹn mí sọn ọylan mẹ Na towe wẹ ahọludu lo huhlọn po gigo po kakadoi, Niṣẹ. si.
14Na eyín mì jona gbẹtọ le ylando yetọn lẹ, Otọ mìtọn olọn tọn nasọ jona mì ga: 15ṣigba eyín mì ma jona gbẹtọ lẹ, Oté mìtọn ma na jona ylando mìtọn.
16Poàọ whenuena mì blanù mì di yẹnuwàtọ lẹ to nukun yínylọn mẹ blo: na yé hẹn nukun yetọn gble, na yé nido sọawúhia gbẹtọ lẹ dọ yé to nùbla. Nugbo wẹ yẹn dọ hlan mì, Yè ko mọyí to gigọ́ mẹ ale yetọn. 17Ṣigba hiẹ, whenuena hiẹ blanù, yí amisisá sá do ota towe, bo klọ nukunmẹ towe; 18na hiẹ sọawúhia gbẹtọ lẹ dọ hiẹ to nùbla blo, adavo na Otọ́ towe he tin nuglọ: Otọ́ towe he sọ mọnú nuglọ na suahọ etọn we.
19Mì bé adokunnúplina mìde to aigba ji blo, fie owán po okó po nọ hẹn en gble te, podọ fie ajotọ lẹ nọ gboado bo fìnnú te: 20ṣigba mì bé adékunnú pli na mìde to olọn mẹ, fie na owán kavi okọ́ ma nọ hen ẹn gble te, podọ fie ajotọ lẹ ma nọ gboadó bo sọ finnú te: 21na fié adọkunnú towe tin te, finẹ wẹ ayiha towe na tin te ga. 22Nukun wẹ miyọngbán agbasa tọn; enẹwutu eyín nukun towe yín dopo , agbasa towe lepo pete na gọ́ na hinhọ́n. 23Eyín nukun towe ylan , agbasa towe lepo pete na gọ na zinvlu. Enewutu eyín hinhọ́n he tin to hiẹ mẹ yín zinvlu, bé nawẹ zinvlu lọ yín daho sọ 24Mẹde ma sọgan sọ̀n Oklunọ awe gba: adavo é gbẹwánna ode, bo yíwánna awetọ: kavi yín é ma yín mọ, é na joawu na ode, bo gbẹkọ awetọ go. Mìwlẹ ma sọgan sẹn Jiwheyẹwhe po Mamoni po gba.
25Enẹwutu yẹn dọ hlan mì, dọ, Mì yín vivẹnunọ na ogbẹ̀ mìton blo, dọ, etọ́ mì na dù podo etẹ́ mì da nù, kavi na agbasa mìtọn dọ etẹ́ mì na ṣinyọn. Bé ogbẹ̀ ma hú núdùdù, agbasa ma sọ hú avọ̀? 26Mì: pọn ohẹ̀ he to aga lẹ; yé ma doji, mọ yé ma gbẹ̀n, mọ yé ma nọ bẹ́plì do zinhọ̀ lẹ mẹ; ṣigba Otọ́ mìtọn olọn tọn to núdù na yé. Bé mìwlẹ ma pọ́nte hú yé? 27Mẹnu wẹ sọgan yí vivẹnu do yí awàgba dopo dogó whinwhén etọn to mì mẹ? 28Etẹwutu wẹ mì yín vivẹnunọ gbọn avọ̀ tọn sinmẹ? Pọ́n lí danji tọn lẹ, le yé to whinwhén; yé ma wàzón, mọ yé ma nọ sésekan. 29Ṣigba yẹn dọ hlan mì, dọ yè ma doasọ yèdọ na Sọlọmoni to gigo etọn lẹpo mẹ di dopo to ehelẹ mẹ. 30Ṣigba, eyín Jiwheyẹwhe doaṣọna ogbé danji tọn, he tin to egbe, bọ yè sọ ze dlan zokán mẹ to osọ, bé nẹmunẹmu wẹ é ma na ṣinyọ̀navọ̀na mì, mì yisepẹvinọ le do? 31Enẹwutu mì yín vivẹnunọ blo, dọ, Eté mí na dù kavi, Etẹ́ mí na nù? kavi, eté na do yín mẹṣinyọnavọna? 32Na onú helẹ pó wẹ Kosi lẹ to dindin pé: Otọ́ mìtọn olọn tọn sọ yonẹn dọ mì ma sọgan nọ ma tindo onú helẹ pó gba. 33Ṣigba mì din ahọludu Jiwheyẹwhe tọn, po dodó etọn po whẹ́; onú helẹ pó wẹ yè na dogọ́ hlan mì. 34Enẹwutu mì yín vivẹnunọ na osọ̀ blo: na osọ̀ na yín vivẹnunọ na ede. Nupekọ hlan azán wẹ oylan etọn.
Currently Selected:
MATIU 6: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.