MATIU 7
7
1MI dawhẹ̀ blo na mì ma yín mẹdawhẹ̀na na blo. 2Na whẹ̀dida he mì yí do dawhẹ̀, wẹ yè na do dawhẹ̀na mì; podọ nújlẹ́nu he mì yí do jlẹ́, wẹ yè na do jlẹ́ hlan mì. 3Etẹwutu wẹ hiẹ to núyọ he tin to nukún mẹmẹsunnu towe tọn mẹ pọ́n, ṣigba hiẹ ma lẹn atinpo he tin to nukun hiẹlọsu tọ́n mẹ tọn pọ́n? 4Kavi nawẹ hiẹ na dọ hlan mẹmẹsunnu towe do, dọ, Gbọ yẹn ni dè núyọ sẹ̀ sọn nukun towe mẹ, bo do ayi e go, atinpo tin to nukun hiẹlọsu tọn mẹ? 5Hiẹ yẹnuwàtọ, dè atinpo sẹ̀ sọn nukun hiẹlọsu tọn mẹ whẹ́; whenẹnu wẹ hiẹ na mọnu gblegede nado dè núyọ sẹ̀ sọn nukun mẹmẹsunnu towe tọn mẹ.
6Mì yí onú he yín wiwé nẹ hlan avún lẹ blo, mì sọ yí nududu he họakuẹ mìtọn lẹ dlan nukọn na ohàn lẹ blo, ye nikà zín yé dai to afọ yetọn glọ, bo nasọ lẹ́ bo tlẹn mì.
7Mì biọ, yè na na mì; mì din, mì na mọ, mì húhúhọ̀n, yè nasọ hùn in hlan mì. 8Na mẹdepope he biọ, é mọ yí; mẹhe sọ din, é mọ; podọ hlan mẹhe húhúhọ̀n, yè na hùn hlan ẹn. 9Kavi gbẹtọ tẹ́ wẹ tin sọn mì mẹ, mẹhe eyín visunnu etọn na biọ akla dopo e, bé ewọ na yí zannu de nẹ? 10Kavi eyín é na biọ whèvi de, bé ewọ na yí odàn de nẹ? 11Bé eyín mìwlẹ yínyín mẹylankan yọ́n le yè nọ na núnina dagbe ovi mìtọn lẹ do, nẹmunẹmu wẹ Otọ́ mìtọn he tin to olọn mẹ ma na yí onú dagbe na yé mehe biọ ẹ lẹ?
12Enẹwutu onú depope mìwlẹ jlo gbẹtọ ni wà hlan mì, mọkẹdẹ wẹ mì ni wà hlan yé: na ehe wẹ osẹ́n po yẹwhegán lẹ po.
13Mì gbọn họntonu bibó mẹ biọ whégbè, na gbigblo wẹ họntonu lọ, gblagada sọ wẹ ali lọ, he hẹn omẹ yì dindọn mẹ, susu sọ wẹ yé he to zọnlinzin gbọn finẹ lẹ. 14Na bibó wẹ họ̀ntonu lọ, jijlọ́ sọ wẹ ali lọ, he hẹn omẹ yì ogbẹ́ mẹ, pẹvide wẹ yé he din in mọ lẹ.
15Mì payi yẹwhegán lalonọ le go, he to mí de wá lẹ to avọ lẹngbọ lẹ tọn mẹ, ṣigba ohla nuwletọ lẹ wẹ yé to hòmẹ. 16Mì na yọ́n ye gbon sinsẹn yetọn mẹ. Be gbẹtọ nọ gbẹ̀n vẹn sinsẹn to vewùn ji, kavi ovò sinsẹ́n to tẹwùn mẹ? 17Mokedẹ wẹ atin dagbe lẹpo nọ hẹn sinsẹn dagbe jẹgbonu; ṣigba atin yinyọn lọ hen Sinsẹn ylanylan jẹgbonu. 18Atin dagbe ma sọgan hẹn sinsẹ́n ylanylan jẹgbonu gba, mọ àtin ylanylan ma sọ sọgan hẹn sinsẹ́n dagbe jẹgbonu. 19Atin he ma hẹn sinsẹ́n dagbe jẹgbonu lẹpo, yè na sán ẹn liai, bo sọ dọ̀n ẹn dlan miyon mẹ. 20Enẹwutu gbọn sinsẹ́n yetọn mẹ wẹ mì na yón yé te.
21E ma yin medepope he ylọ mi, Okluno, Oklunọ, we na biọ ahọludu olọ̀n tọn mẹ gba; adavo ewọ he wà ojlo Otọ ṣie he tin to olọn me tọn. 22Ọmẹ susu wẹ na dọ hlan mi to azán nẹ gbè, dọ, Okluno, Oklunọ, bé mìwlẹ ma ko dọdai gbọn oyín towe mẹ? podọ gbọn oyìn towe mẹ mí ko yàn legba le jegbonu? podo oyìn towe mẹ mí wà azọ́n huhlonnọ susu te? 23Whenẹnu wẹ yen na yigbè hlan yé dọ, Yen ma yọn mì gbède, mì ton sọn dẽ, mì azọ́n ylankan wàtọ.
24Enẹwutu mẹdepope he sè ohó ṣie helẹ, bo sọ basi yé, yè na jlẹ́ ẹ do gbẹtọ núyọ́nẹnto de go, he gbá ohọ etọn do osé ji. 25Whenuena jikunja, bọ asisa lẹ fọ́n, bọ jẹhọn le yìn, bo ho jẹ ohọ̀ lọ ji: é ma jai: na yè do é do osé ji wutu. 26Mẹdepope he sọ sè oho ṣie helẹ, bo ma sọ basi yé, yè na jlẹ́ ẹ do gbẹtọ nuluno de go, he gbá ohọ̀ etọn do tọ̀kẹ́n ji. 27Whenuena jikunja, bọ asisa lẹ gọ, bọ jehọn lẹ yìn, bo họ̀ jẹ ohọ́ lọ ji, é họ́: hihọ́ etọn sọ sù talala.
28E sọ wà jọ, whenuena Jesu dotana ohó helẹ, avọ̀ vò gbẹto lẹ do núplọ́nmẹ etọn go: 29na é to ye plon di mẹhe tindo aṣẹ, é ma di wekantọ lẹ gba.
Currently Selected:
MATIU 7: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.