MATIU 8
8
1WHENUENA é jẹte sọn osó lọ ji, agùndaho susu to hihodo e.
2Do ayi e go, pòtọnọ de wá e de, bo litai nẹ̃, bo dọmọ, Oklunọ, eyín hiẹ jlo, hiẹ sọgan hẹn mi zùn wiwé.
3E sọ dlẹn alọ etọn, bo do e go, bo domọ, Yen jlo, hie ni zan wiwé. Afọdoponẹji opo etọn sọ wé.
4Jesu sọ dọ hían ẹn, domo, Payi a do na mede blo; ṣigba yì bo do dewe hia yewhenọ, bo sọ na núnina he Moṣe degbèna to osén me na kunnu hlan yé.
5Whenuena é sọ biọ Kapẹlnaumi mẹ, mẹkanwekowhangán de wá é to vẹvẹ nẹ̃, 6bo dọmọ, Oklunọ, devi ṣie mlọnai to whegbè, bo to awúkuzọ̀njẹ, to awufiẹsa mẹ talala. 7E sọ dọ hlan ẹn, dọ, Yẹn na wá hẹnazọngbọ nẹ̃.
8Mẹkanwekowhangan lọ sọ gblọn, bo dọmọ, Oklunọ, yẹn ma je mẹhe hiẹ na wá ohọ̀ta ṣie glọ gba: ṣigba dọ ohó lọ kẹdẹ, yè nasọ hen azọ̀n devi ṣie tọn gbọ. 9Na mẹhe tin to aṣẹ glọ wẹ yẹn ga, yẹn sọ tindo awhànvipẹ lẹ to oglọ ṣie, yẹn dọ hlan ode, dọ, Yì, é nọ yì; podọ hlan awetọ, dọ, Wá, é nọ wá; podọ hlan devi ṣie dọ, Wa ehe, é nọ wà ẹ.
10Whenuena Jesu sè e, awú ji i, é sọ dọ hlan yé he to hihodo e lẹ, dọmọ, Nugbo wẹ yẹn dọ hlan mì, Yẹn ma mọ yise nẹhunkọ de to mẹde mẹ to Islaeli mẹ gba . 11Yẹn sọ dọ hlan mì, Omẹ susu wẹ na wá sọn whèzizẹ dali po whèyìhọ po dali, bo na jagla hẹ Ablaham, Isaki, po Jakobu po, to ahọludu olọn ton mẹ. 12Ṣigba ovisunnu ahọludu tọn lẹ wẹ yè nasọ yàn tonjẹgbonu do zinvlu he to gbonu mẹ: finẹ wẹ avi lọ po adukúnkún lọ po na te 13Jesu sọ dọ hlan mẹkanwekowhangán lọ, dọ, Yì; ni yín wiwà hlan we kedẹdile hie yise do. Yè sọ hẹnazọ̀n devi lọ tọn gbọ to ojlẹ nẹ mẹ.
14Whenuena Jesu biọ owhé Pita tọn gbè, è mọ onọ asi eton tọn to aimimlọn, é to ovazọ̀njẹ. 15E doalọ alọ eton go, ova sọ jo e do; é sọ fọ́n bo to devízọnwà hlan ẹn.
16Whenuena é zùn whèjai, yé hẹn susu mẹhe do lẹgba lẹ tọn wá e de: é sọ yí ohó do yàn gbigbọ lẹ jẹgbonu, bo sọ hẹn azòngbọna azọ̀ntọ lẹpo: 17na ehe yè dọ gbọn onù Isaia yẹwhegán tọn mẹ nido di, dọ, Ewlọsu ko zé madogán mìtọn lẹ, bo sọ hẹn azọ́n mìtọn lẹ.
18Whenuena Jesu mọ agùndaho pli lẹ́do e, é dọ hlan yé ni tọ́nyi awà awetọ ji.
19Wekantọ de sọ wá, bo dọ hlan ẹn, dọmọ, Mẹplóntọ, yẹn na hodo we yì fidepope hiẹ jei. 20Jesu sọ dọ hlan ẹn, dọmọ, Wọtupọẹ lẹ tindo odò, ohẹ́ olọn tọn lẹ sọ tindo adó: ṣigba Ovi gbẹtọ tọn ma tindo ofi é na yí ota etọn dai te.
21Devi awetọ sọ dọ hlan ẹn, dọ, Oklunọ, gbọ yẹn ni yì bo di oṣiọ otọ́ ṣie tọn whẹ́. 22Ṣigba Jesu dọ hlan ẹn, dọ, Hodo mi, gbọ oṣiọ lẹ ni di oṣiọ yetọn titi lẹ.
23Whenuena é sọ biọ vàtlẹ lọ mẹ, nuplóntọ etọn lẹ hodo e. 24Do ayi e go, jẹhọn daho de fọ́n to ohù mẹ, sọmọ bọ agbowhẹn lẹ ṣinyọn vàtlẹ lọ ji: ṣigba ewọ to amlọndọ. 25Yé wá e de, bo fọ́n ẹn, bo dọmọ, Oklunọ, whlẹn mí, mí dòn. 26E sọ dọ hlan yé, dọmọ, Etwutu wẹ mì dibú, mì yisepẹvinọ? Whenẹnu wẹ é fọ́n bo kọ́hona jẹhọn po ohù po; jijọho susu tin. 27Ṣigba avọ̀ vò gbẹtọ lẹ, yé sọ dọmọ, Gbẹtọ tẹ́ hunkọ die, he yèdọ jẹhọn po ohù po yí etọn sè!
28Whenuena é sọ jẹ awà awetọ ji to otò Gadaleni lẹ tọn mẹ, dawe awe he do lẹgba lẹ tọ́n sọn yọ̀do mẹ wá pé e, yé dukan talala, sọmọ bọ mẹdepope ma sọgan ju gbọn aliho nẹ ji. 29Bo pọ́n, yé dawhá dọmọ, Etwẹ wà mí po hiẹ po, Jesu, hiẹ Ovi Jiwheyẹwhe tọn? bẹ́ hiẹ wá to ofi whẹpo ojlẹ́ lọ na wá nado doyana mí wẹ?
30Apó ohàn susu he to núdù pe tọn tin aganu do yé. 31Aovi lẹ sọ vé ẹ dọmọ, Eyín hiẹ yàn mí jẹgbonu, do mí hlan yì apó ohàn lẹ tọn lọ mẹ. 32E sọ dọ hlan yé, dọmọ, Mì yì Yé tọ́njẹgbonu, bo biọ apó lọ mẹ: bo pọ́n, apó lẹpo hòzin bo họ̀nwezun gbọn agbàdo tó yì ohù mẹ, yé sọ dọ̀n to osìn mẹ.
33Yé he to yé yìn lẹ họ̀n, bo sọ yì otò mẹ, bo dọ onú lẹpo, po onú he yè wà hlan yé he do lẹgba lẹ po. 34Bo pọ́n, gbẹtọ he to otò lọ mẹ lẹpo tọ́n wá pọ́n Jesu: whenuena yé sọ mọ ẹn, yé vẹvẹ nẹ, na ni tọ́n sọn agbègbè yetọn dali.
Currently Selected:
MATIU 8: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.