MATIU 9

1E sọ biọ vàtlẹ de mẹ, é juwayì, bo sọ wá otò ewlọsu tọn mẹ.

2Bo pọ́n, yé zé dawe de awúkuzònjẹtọ wá e de, é mlọnai to adózan ji; le Jesu mọ yise yetọn, é dọ hlan awukuzọnjẹtọ lọ, dọmọ, Ovi, dotu, yè jo ylando towe lẹ na we.

3Do ayi e go, mẹdelẹ to wekantọ lẹ mẹ to didọ to yéde hòmẹ, dọmọ, Dawe he to nùzán.

4Jesu sọ yón linlẹn yetọn, é dọmọ, Etẹwutu wẹ mìwlẹ to oylan lẹn to ayiha mìtọn mẹ? 5Bé etéwẹ bọawú na dọ, Yè jo ylando towe lẹ na we: kavi na dọ, Fọn, bo zinzọnlin? 6Ṣigba na mì nido yón ẹn dọ Ovi gbẹtọ tọn do asẹ to aigba go nado jo ylando lẹ na omẹ—whenẹnu wẹ é dọ hlan awúkuzònjẹtọ lọ, dọ, Fọn, zé adózan towe, bo yì owhé towe gbè.

7E sọ fọ́n, bo tọ́nyì owhe etọn gbè. 8Ṣigba whenuena agùndaho lẹ mọ ẹn, obú di yé, yé sọ pagigona Jiwheyẹwhe, he na aṣẹ he hunkọ hlan gbẹtọ lẹ.

9Le Jesu sọ ju sọn finẹ wá jei, é mọ dawe de, he yè nọ ylọ Matiu, é jagla to odenu: é sọ dọ hlan ẹn, dọ, Hodo mi. E sọ fọ́n, bo hihodo e.

10E sọ wá jọ, le Jesu jagla to núdù kọ̀n to owhé gbè, pọ́n, tòkuẹsinyantọ susu po ylandonọ lẹ po wá, bo jagla hẹ Jesu, po nuplọntọ etọn lẹ po. 11Whenuena Falesi lẹ mọ ẹn, yé dọ hlan nuplọntọ etọn lẹ, dọmọ, Etẹwutu wẹ Mẹplọntọ mìtọn to núdù hẹ tòkuẹsinyantọ po ylandonọ lẹ po?

12Ṣigba whenuena é sè enẹ, é dọ, dọmọ, Yé he to gángán ma tindo núwhèdo na bokọtọnọ gba, adavo yé he to azọnjẹ lẹ. 13Ṣigba mì yì, bo plón onú he ehe yín, Yẹn nọ jlo lẹblanu, é ma yín avọ́: na yẹn ma wá nado ylọ dódónọ lẹ gba, adavo ylandonọ lẹ.

14Whenẹnu wẹ nuplọntọ Johanu tọn lẹ wá e de, dọmọ, Etẹwutu wẹ míwlẹ po Falẹsi lẹ lọ po to nùbla, ṣigba nuplọntọ towe lẹ ma nọ blanù gba? 15Jesu sọ dọ hlan yé, dọmọ. Be yè sọgan hẹn ovi he tin to abò asiyọ́yọ́ tọn mẹ lẹ blawú, whenuena asisunọ tin to yé de? Ṣigba azàn ja, whenuena yè na yí asisunọ sọn yé de, whenẹnu wẹ yé na blanù. 16Mẹde ma nọ yí sinsán avówhẹ de tọn do awú hóhó go gba, na didé he to e go tlẹn ede sé sọn awù lọ mẹ, tintlẹn ylanhú de sọ yín bibasi. 17Mọ gbẹtọ lẹ ma nọ yí vẹn yọyó do ayúgò hóhó lẹ mẹ gba: ayú lẹ nikà là, yè sọ hẹn ovẹ̃n lọ sakọ́nyìngbe, ayúgo lẹ lọ sọ dọ̀n: ṣigba ovẹ̃n yọ́yọ́ wẹ yè nọ yí do ayùgò yọ́yọ́ mẹ, yè bo sọ hla yé awelẹ dai.

18Le é to onú helẹ dọ hlan yé, pọ́n, ogán de wá, bo litai nẹ̃, dọmọ, Viyọnnu ṣie kú dinvie: ṣigba wá yí alọ towe do e ji, é nasọ tin to ogbẹ́. 19Jesu sọ fọ́n, bo hodo e, po nuplọntọ etọn lẹ po.

20Bo pọ́n, nawe de he to zẹntin ohùn tọn jẹ to owhè wiawe gbọn godo etọn wá, bo doalọ okẹ̀yẹ̀ awù etọn tọn go. 21Na é dọ to ede mẹ, dọmọ, Eyín yẹn gbé sọgan doalọ awù etọn go, yẹn na jẹ gángán. 22Ṣigba Jesu lé ede pé, whenuena é mọ ẹn, e dọmọ, Viyọnnu, dotu, yise towe ko hẹn we jẹ gángán. Nawe lọ sọ jẹ gángan sọn ojlẹ nẹ mẹ.

23Whenuena Jesu biọ owhé ogán lọ tọn gbè, bo mọ vánkuntọ lẹ, po gbẹtọ lẹ po to awhádo 24é dọ, Mì natẹn, na viyọnnu lọ ma kú gba, amlọn é dọ. Yé sọ to vivlẹ ẹ ko. 25Ṣigba whenuena yè hẹn gbẹtọ lẹ jẹgbonu, e biọ họ̀mẹ, é hẹn alọ nẹ, viyọnnu lọ sọ tite. 26Linlin he sọ di lẹdo otò nẹlẹ pó mẹ pé.

27Dawe nukuntọnnọ awe to hihodo Jesu whenuena é tọn sọn finẹ, bo to awhádo, dọmọ, Hiẹ visunnu Davidi tọn, wàlẹblanuna mí.

28Whenuena é biọ owhé gbè, nukuntọnnọ lẹ wá e de: Jesu sọ dọ hlan yé, dọmọ, Be mìwlẹ yise dọ yẹn sọgan wà ehe? Yé dọ hlan ẹn, dọ, Mọwẹ Oklunọ, a sọgan basi. 29Whenẹnu wẹe doalọ nukun yetọn go, bo dọmọ, Ni yín wiwà hlan mì kẹdẹ di yise mìtọn. 30Nukun yetọn sọ hùn; Jesu sọ kọna yé talala dọmọ, Do ayi e go, pọ́n dọ mẹdepope yón ẹn blo. 31Ṣigba whenuena yé tọ́n yì, yé hẹn linlin etọn di pó lẹ́do otò lẹpo mẹ.

32Le yé tọ́n jei, pọ́n, yè hẹn dawe unbọpẹn de wá e de, he do lẹgba. 33Whenuena yè yàn lẹgba lọ jẹgbonu, unbọpẹn lọ dọhó: avọ̀ sọ vò agùndaho lọ lẹ, yé dọmọ, Yè ma ko mọ ehe hunkọ to Islaeli mẹ gbède. 34Ṣigba Falẹsi lẹ dọmọ, Huhlọn ogán lẹgba lẹ tọn tọn wẹ é do to lẹgba lẹ yan jegbonu.

35Jesu sọ zinzọnlin yì otò daho po gbeta lẹ pomẹ pé, é to meplọ́n to sinagọgu yetọn lẹ me, bo sọ to yẹwheho wẹndagbe ahọludu tọn dọ, é to awutuzòn lẹpo po okuzọ̀n lẹpo po hẹngbọ to gbẹtọ lẹ ṣẹnṣẹn.

36Ṣigba whenuena é mọ agùndaho lẹ, é wàlẹblanu na yé, na yè hẹn agbọ́pé yé, bo sọ hẹn apọ̀si yé di lẹngbọ he ma tindo lẹngbọhọtọ de. 37Whenẹnu wẹ é dọ hlan nuplọntọ etọn lẹ, dọmọ, Ojijẹ sù nugbo, ṣigba azọ́nwàtọ lẹ ma sù: 38Enẹwutu mì hodẹ́ hlan Oklunọ ojijẹ tọn, na é ni do azọ́nwàtọ lẹ hlan ojijẹ etọn mẹ.

Currently Selected:

MATIU 9: BWL23

Highlight

Copy