MATIU 10

1E ylọ nuplọntọ etọn wiawe lẹ, bo na aṣẹ yé to gbigbọ mawe lẹ ji, nado yàn yé jẹbonu, podọ nado hẹn okúzọ̀n lẹpo po awutuzòn lẹpo po gbọ.

2Oyín apọsteli wiawe lẹ tọn wẹ ehelẹ; Tintan, Simọni, he yè nọ ylọ dọ Pita, po Andlé nọvisunnu etọn po: Jakobu ovi Zẹbedé tọn, po Johanu nọvisunnu etọn po; 3Filipi, po Batelemi po; Tomasi po Matiu tòkuẹsinyantọ po, Jakobu, ovi Alfe tọn, Tade; 4Simọni, Kenaninu , po Juda Iskahọti mẹhe dè e hia po ga.

5Omẹ wiawe helẹ wẹ Jesu dohlan gbonu, bo sọ nagbè yé dọ, Mì yì jẹ Kosi lẹ de blo, mì sọ biọ otò Samalìtọ lẹ tọn depope mẹ blo: 6Ṣigba mì gbọ bo kúkú yì lẹngbọ owhé Islaeli tọn gbè tọn he bú lẹ de. 7Le mì to yìyì, mì ni to yẹwheho dọ, dọmọ, Ahọludu olọn tọn sẹpọ́. 8Mì hẹnazọ̀ngbọna azọ̀ntọ lẹ, mì nọ fọ́n oṣìọ lẹ do ogbọ̀, mì sọ hẹn pòtọnọ lẹ zùn wiwé, mì ni nọ yàn aovi lẹ jẹgbonu: vọnu wẹ mì mọyí, vọnu wẹ mì ni na omẹ. 9Mì donukun azónnú de, sika, kavi fataka, kavi ogànvẹ̃ to sẹgẹ mìtọn lẹ mẹ blo, 10Kavi azọpò na whẹntóngbe mìtọn blo, mì hẹn awù awe, kavi afọpa, kavi opò blo: na azọ́nwàtọ jẹ na núdùdù etọn.

11Otò depope kavi gbeta depope mẹ he mì na biọ, mì kanse eyín mẹhe to e mẹ jẹ; finẹ wẹ mì ni nò kaka mì na do tọ́n sọn finẹ. 12Whenuena mì sọ biọ owhé de gbè, mì dọnúdo e. 13Eyín owhé lọ sọ jẹ, na jijọho mìtọn ni jẹte do e ji: ṣigba eyín é ma jẹ, na jijọho mìtọn ni gòdo mì de. 14Mẹdepope he ma yí mì, kavi bo ma sè ohó mìtọn, whenuena mì tọ́n sọn owhé ne gbè, kavi sọn otò nẹ mẹ jẹgbonu, mì húnhún kògudu afọ mìtọn tọn dai. 15Nugbo wẹ yẹn dọ hlan mì, E na pónte na aigba Sọdọmi po Gomọla po tọn to whẹdazángbè hú na otò ne.

16Mì pọ́n, yẹn do mì hlan di lẹngbọ do ohla ṣẹnṣẹn: enẹwutu na mì ni yọnnuin di odàn, bo sọ do jijọmimiọn di apoe. 17Ṣigba mì payi gbẹtọ lẹ go; na yé na hẹn mì yì tòhodọtọ lẹ de, yé nasọ hò mì to sinagogu yetọn lẹ mẹ; 18Yè na hẹn mì yì otògán po ahọlu lẹ po nukọn na yẹn wutu, na okunnude do yé po Kosi lẹ po go.

19Ṣigba whenuena yé yí mì do alọ yetọn mẹ, mì lẹn dọ, nawẹ kavi eté mì na dọ blo: na yè na na onú he mì na dọ mì to ojlẹ nẹ mẹ. 20Na é ma yín mìwlẹ wẹ to hódọ gba, ṣigba Gbigbọ Otọ́ mìtọn tọn wẹ to hódọ to mì homẹ.

21Nọvisunnu na yí nọvisunnu na okú, otọ́ na yí ovi na okú; ovi na fọ́n do mẹjitọ yetọn le ji, yé nasọ hù yé. 22Yè na gbẹwánna mi gbọn gbẹtọ lẹpo de na oyín ṣie tọn wutu: ṣigba mehe sinyẹnlin kaka jẹ pòdo wẹ yè na whlẹngán.

23Ṣigba whenuena yé to homẹkẹndo mì to otò he mẹ, mì họ̀n yì awetọ mẹ: nugbo wẹ yẹn dọ hlan mì, Mìwlẹ ma na jugbọn otò Islaeli tọn lẹpo mẹ, whẹpo Ovi gbẹtọ tọn na do wá gba.

24Mẹhe yè to pinplọ́n ma nọ húgan mẹplóntọ etọn gba, mọ afanumẹ ma nọ húgan okluno etọn. 25E sù na mẹhe yè to pinplón ni dile meplóntọ etọn te, podọ na afanumẹ ni di Oklunọ etọn. Eyín yé ylọ whénọ dọ Beẹzẹbuli, be nẹmunẹmu wẹ yé ma na ylọ yé he tin to owhé etọn gbè lẹ?

26Enẹwutu mì dibúsi yé blo: na núde ma tin he ye sunúdo bọ yè ma na dè hia; podọ ehe whlá bọ yè ma na yónẹn. 27Onú he yẹn dọ hlan mí to zinvlu mẹ, wẹ mì ni dọ to hinhọ́n mẹ: onú he mì só do otọ́ wẹ mì ni demìsẽluna to ohọ̀ta lẹ.

28Mì dibúsi yé he nọ hù agbasa, ṣigba bọ yé ma sọgan hù gbigbọ blo: ṣigba mì kúkú dibusi ewọ he sọgan hù agbasa po gbigbọ po súdo to olọnzo mẹ. 29Bé oblẹnọ awe ma wẹ yé nọ sà yín abọgankuẹ pẹvi de? mọ dopo yetọn ma na flẹ́ jẹ aigba to Ọtó mìtọn godo. 30Ṣigba yèdọ odà ota mìtọn tọn lẹpo wẹ yè hia pé. 31Enẹwutu mì dibú blo, mìwlẹ doale hú oblẹnọ susu.

32Enẹwutu mẹdepope he yigbè ṣie to gbẹtọ le nukọn, ewọ wẹ yẹn na yigbè etọn ga to Otọ́ ṣie he tin to olọn mẹ nukon. 33Ṣigba mẹdepope he món mi to gbẹtọ lẹ nukọn, ewọ wẹ yẹn na mon to Otọ́ ṣie he tin to olọn mẹ nukọn ga.

34Mì lẹn do yen wá nado do jijọho hlan aigba ji blo: yẹn ma wà nado do jijọho hlan gba, adavo ohi. 35Na yẹn wá nado klán ovisunnu dovo do otọ́ etọn ji, oviyọnnu do onọ etọn ji, podọ asi ovi tọn do onọ asú etọn tọn ji. 36Kẹ́ntọ gbẹtọ de tọn wẹ yé he tin to owhé ewlọsu tọn gbè lẹ na yín. 37Mẹhe yíwánna otọ́ kavi onọ hú mi, é ma jẹ na mi: mẹhe sọ yíwánna ovisunnu, kavi oviyonnu hú mi, é ma jẹ na mi. 38Mẹhe ma sọ zé satin etọn, bo hodo mi, é ma jẹ na mi. 39Ewọ he do alindọn etọn ai, na hẹn ẹn bú: podọ ewọ he hẹn alindọn etọn bú, na ṣie tọn wutu, na mọ ẹn sọ́.

40Mehe yí mì, é yí mi, mẹhe sọ yí mi, é yí mehe do mi hlan 41Mẹhe yí yẹwhegán de to oyín yẹwhegán tọn mẹ, é na duale yẹwhegán tọn: mẹhe sọ yí dódónọ de to oyín dódónọ tọn me, é na duale dódonọ tọn. 42Mẹdepope he na yí kọfo osìn mimiọn tọn de ṣokẹdẹ na dopo to yé omẹ flin flin helẹ mẹ to oyín nuplọntọ tọn mẹ, nugbo wẹ yẹn dọ hlan mì, ewo ma na bà ale etọn po to alọ depope mẹ gba.

Currently Selected:

MATIU 10: BWL23

Highlight

Copy