MATIU 5
5
1WHENUENA é mọ agùndaho lẹ, é hẹ́ osọ́ lọ ji aga: whenuena é sinai, nuplọ́ntọ etọn lẹ wá e de: 2é kẹ̀ onù etọn bo plón yé, domọ,
3Donanọ wẹ wamonọ lẹ to gbigbọ mẹ; na yetọn wẹ ahọludu olọn ton.
4Donanọ wẹ yé he to awubla lẹ; na yè na miọnhomẹ na yé.
5Donanọ wẹ homẹmimiọnnọ lẹ; na yé na dugu aigba tọn.
6Donanọ wẹ ye he hùvẹ́ hùhù bọ ovẹ́ to húhú na dódo wutu lẹ: na yè na gọho na yé.
7Donanọ wẹ lẹblanunọ lẹ; na yé na mọ lẹblanu yí.
8Donanọ we wiwénọ to ayiha mẹ lẹ; na yé na mọ Jiwheyẹwhe.
9Donanọ we jijọhodinto lẹ; na yè na ylọ ye visunnu Jiwheyẹwhe tọn.
10Donanọ wẹ yé he yè to hòmẹkẹndo na dodó tọn wutu lẹ; na yetọn wẹ ahọludu olọn tọn.
11Donanọ wẹ mìwlẹ, whenuena gbẹtọ lẹ na to vivlẹ mì kò, bo to homekẹndo mì, bo sọ to oylan hunkọhunkọ dọ do mì go to lalo mẹ, na ṣie wutu. 12Mì ni jaya, na mì ni sọ to ayajẹ susu; na ale miton wẹ daho to olọn mẹ: na mọkẹdẹ wẹ yé dohomẹkẹn yẹwhegán he ko tin jẹnukọn na mì lẹ.
13Mì wẹ, ojẹ̀ aigba tọn: ṣigba eyín ojẹ̀ ko bú otọn etọn, etẹ́ yè na do sọ diọ ẹ zùn ojẹ̀? sọn whenẹnú é ma sọ yín dagbe na núde, adavo nado yín zédlangbe po zindai po to afọ gbẹto lẹ tọn glọ.
14Mì wẹ hinhọ́n aihọn tọn. Otò he yè doai do osó ji, ma sọgan yín whiwhla gba. 15Mọwẹ gbẹto lẹ ma nọ tá miyọngbán, bo nọ yí i do ojlẹ́nú glọ gba, adavo do miyọngbántin ji; bọ é nasọ họ́nhinhọn hlan mẹhe to owhé gbè lẹpo. 16Mọkẹdẹ wẹ mì ni gbọ hinhọ́n mìtọn ni họ́nwun to gbẹtọ lẹ nukọn do, na ye nido mọ azọ́n dagbe mìtọn lẹ bo pagigona Otọ́ mìtọn he tin to olọn mẹ.
17Mì len dọ yẹn wá nado hẹn osén kavi yẹwhegán lẹ gble blo: yẹn ma wá nado hengble gba, adavo nado hen di 18Na nugbo wẹ yen do hlan mì, dọ, Kaka olọn po aigba po nado juwáyi, yọwhi dopo kavi jaja dopo ma na juwáyì son osen me, kaka onu lẹpo nado wa jọ. 19Enẹwutu medepope he na hen pẹvi ṣiunṣiun dopo gble to osẹn helẹ mẹ, bo nasọ plon gbelọ lẹ domọ, ewọ lọ wẹ yè na ylọ ome siunsiun to ahọludu olọn tọn me: ṣigba mẹdepope he na basi yé bo sọ plọn gbẹtọ lẹ domọ, wẹ yè na ylọ mẹkiklo to ahọludu olọn tọn mẹ 20Na yẹn dọ hlan mi, dọmọ, Adavo dódó mìtọn hugan dódó wekantọ lẹ po Falẹsi lẹ po tọn, mì ma na biọ ahọludu olọn tọn mẹ gbọn alọ depope mẹ gba.
21Mì ko sè dọ yè dọ hlan omẹ hóhó whenu tọn lẹ, dọ, Hiẹ ma na hùme; medepope he hùmẹ, é na tin to owù whẹ̀dida ton mẹ; 22ṣigba yẹn dọ hlan mì, dọ, Mẹdepope he gblehomẹ do mẹmẹsunnu eton go, na tin to owù whẹ̀dida ton mẹ; mẹdepope he dọ hlan mẹmẹsunnu etọn, dọ, Laka , é na tin to owù tohodọtọ lẹ tọn mẹ; ṣigba medepope he na dọ, Hiẹ nulunọ, é na tin to owù lọnzo miyọn tọn mẹ. 23Enẹwutu e; yín hiẹ hẹn nunina towe yì agbà kọn, bo sọ flin to finẹ dọ mẹmẹsunnu towe tindo nude do ogo we: 24jo núnina towe dai to finẹ to agbà nukọn, bo yì, gbọwhẹ hẹ mẹmẹsunnu towe whẹ́; whenẹnu we a ni wa bo na núnina towe. 25Yawu gbọwhẹ hẹ kẹ̀ntọ towe, whenuena hiẹ tin to alihopó e po; kẹ̀ntọ towe nikã yí we do alọ mẹ na whẹdatọ, whẹdatọ na ahọludemẹ, yènasọ ze we dlan ogàn mẹ. 26Nugbo wẹ yẹn dọ hlan we, dọ, Hie ma to na tọ́n sọn finẹ gbon alọ depope mẹ, kaka hiẹ nado sú akuẹ dopo akàn he po.
27Mì ko sè dọ yè dọmọ, Hiẹ ma na deayọ̀: 28sigba yẹn dọ hlan mì, dọ, Eyín mẹdepope pọ́n yọnnusi de nado wà núgbigble hẹ ẹ, é ko deayọ̀ hẹ ẹ to ayiha etọn mẹ dote. 29Eyin nukun towe adusi tọn hen we dahli, sún in sẹ̀, bo sọ dè e sọn ogo we: na é do ale na we na dopo awutugonu towe tọn ni dọ̀n, hú na ye ni zé agbasa towe lepo pete dlan olọnzo mẹ. 30Eyín alọ towe adusi tọn sọ hẹn we dahli, sán ẹn sè, bo de e sọn de we; na é do ale na we na dopo awutugonu towe tọn ni dọ̀n, hú na yè ni zé agbasa towe lẹpo pete dlan olọnzo mẹ.
31Yè ko dọ ga, Medepope he gbẹ́ asi etọn dai, gbọ é ni yí owe gbẹdai tọn nẹ. 32Ṣigba yen dọ hlan mì, Mẹdepope he gbẹ́ asi etọn dai, adavo na ogà wutu, é hẹn ẹn deayọ̀: mẹdepope he sọ wlealọ hẹ mẹhe yè gbẹ́dai, é deayọ̀.
33Podọ mì ko sọ se dọ yè dọ hlan omẹ hóho whenu tọn lẹ, dọ, Hiẹ ma na whlé to lalo mẹ, adavo hiẹ na hẹn whiwhlé towe lẹ di hlan Oklunọ: 34ṣigba yẹn dọ hlan mì, Mì yí núde do whlé gbọn alọ depope mẹ blo; kavi yíyí olọn do whlé, na ofìn Jiwheyẹwhe tọn wẹ: 35kavi yíyí aigba do whle, na tokloafọligbe, etọn tọn wẹ: kavi yíyí Jẹlusalem do whlé, na otò Ahọlu daho tọn wẹ: 36Mọwẹ hiẹ ma na yí ota towe do whle, na hiẹ ma sọgan hẹn odà dopo zùn wéwé kavi oyù. 37Ṣigba mì gbọ hógbè mìtọn ni yín, Mọwẹ, mọwẹ; Lala, lala: na onú depope he sọ hu ehelẹ, mẹylankan lọ mẹ wẹ é sọn wá.
38Mì ko sè le yè dọ, dọmọ, Nukun na nukun, adú na adú: 39ṣigba yẹn dọ hlan mì, dọ, Mì gbẹ́ oylan lọ blo: ṣigba mẹdepope he hò alaka adusi tọn na we, le amiyọn tọn hlan ẹn ga. 40Eyín mẹde jlo nado ylọwhẹ̀ we, bo nado yí awù towe, gbọ e ni yí avọ towe ga. 41Eyín mẹdepope yí huhlọn do hẹn we yì liu dopo, yì hẹ ẹ jẹ awe. 42Na mẹhe biọnú we, a diọkọ sọn mẹhe jlo na yàn to a si we de blo.
43Mì ko sè dọ yè dọ, dọmọ, Hiẹ ni yíwánna hẹnnumẹ towe, bo gbẹwánna kẹ̀ntọ towe. 44Ṣigba yẹn dọ hlan mì, Mì yíwánna kẹ̀ntọ mìton lẹ, bo sọ hodè na mẹhe to vivlẹ mì kò, bo sọ to homẹkẹn do mí lẹ 45na mì nido yín ovi Otọ̀ mìtọn he tin to olọn mẹ tọn: na é hen owhè etọn vẹ́ do omẹ ylankan lẹ ji, podọ do omẹ dagbe lẹ ji, bo sọ jikunja do dódonọ lẹ ji, podọ do mawàdódóno lẹ ji. 46Na eyín mì yíwánna mẹhe yíwánna mì lẹ, ale tẹ́wẹ mì tindo? tokueṣinyantọ lẹ ma nọ wà mọ ga? 47Eyín mì sọ dọnúdo mẹmẹsunnu mìtọn le kẹdẹ, etẹ́wẹ mì wà hú mẹdevo lẹ? kosi lẹ ma nọ wà mọ ga? 48Enẹwutu mìwlẹ ni yín mẹpipé, dile Otọ́ mìtọn he tin to olọn mẹ yín mẹpipó do.
Currently Selected:
MATIU 5: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.