ISAIA 6
6
1TO owhè he mẹ Ozia ahọlu kú te, yẹn mọ OKLUNỌ sinai to ofìn he yì aga ji, ehe fón yì oji, aṣọvọ̀ etọn gọ́ tẹmpli mẹ. 2Selafin lẹ nọte to aga etọn, dopodopo tindo awà ṣidopo; é yí awe sinyọ́n nukunmẹ etọn, bo yí awe sinyọ́n afọ̀ etọn, bo sọ yí awe do zinzlọn. 3Odẹ́ dawhá hlan awetọ, dọmọ, Wiwe, wiwe, wiwe wẹ OKLUNỌ awhànpa lẹ tọn: aihọn lẹpo gọ́ na gigo etọn. 4Dòtin ohọ̀n tọn whàn na ogbè ewọ he dawhá tọn, ohọ̀ lọ sọ gó na azọ̀. 5Whenẹnu wẹ yẹn dọmọ, Dindọ̀n wẹ yẹn na yẹn pòta; na yẹn basi omẹ nùflo mawenọ, yẹn sọ tin to ṣẹnṣẹn omẹ nùflo mawenọ lẹ tọn: na nukun ṣie ko mọ ahọlu, OKLUNỌ awhànpa lẹ tọn. 6Whenẹnu wẹ dopo to selafin lẹ mẹ zlọn wá dẽ, é hẹn mìyọnkán to alọ etọn mẹ, he e yí obẹ́ do dè sọn agbà lọ ji. 7E yí i do onù ṣie go, bo dọmọ, dayi e go, ehe ko jẹ nùflo towe go; yè bẹ́ ylankan towe sẹ́, yè sọ klọ ylando towe sẹ́. 8Yẹn sọ sè ogbè OKLUNỌ tọn ga, dọmọ, Mẹnu wẹ yẹn na dohlan, mẹnu wẹ na yì na mí? Whenẹnu wẹ yẹn dọmọ, yẹn die; do mì hlan. 9E sọ dọmọ, yì bo dọ na omẹ helẹ, dọmọ, Mì sisè nugbo, ṣigba mì ma tunwun; mì mimọ nugbo, ṣigba mì ma yọ́nẹn. 10Hẹn ayiha omẹ helẹ tọn tliji, bo hẹn otó yetọn pẹ́n, sú nukun yetọn na yé nikã yí nukun yetọn do mọ, bo sọ yí otó yetọn do sè, na yé niká yí ayiha yetọn do yónẹn, na yé niká diọ, na yè nikã hẹnazọ̀ngbọna yé. 11Whenẹnu wẹ yẹn dọmọ, OKLUNỌ, na é na dẹ̀n sọ? E sọ gblọn dọ, kaka otòdaho lẹ nado jẹvọ mado omẹ he na nọ̀ e mẹ, owhé lẹ mado gbẹtọ, aigba lọ na jẹ́vọ mlẹnmlẹn, 12kaka OKLUNỌ nado bẹ́ gbẹtọ lẹ yì aganu, bọ gbẹ̀dai daho nado tin to aigba lọ ji. 13Ṣigba gãnṣo dadao na tin to é mẹ, é na sọ lẹ́gọ́, bo sọ zùn súsúdo di telebin-tin, podọ di kẹnetin otù ehetọn tin to yé mẹ, whenuena amà yetọn jà kọyingbó: mọwẹ okún wiwe lọ na yín otù to yé mẹ.
Currently Selected:
ISAIA 6: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.