ISAIA 5
5
1DINVIE yẹn na jihàn hlan mẹvivẹ́ ṣie, ohàn mẹvivẹ́ ṣie tọn na vẹ̃ngle etọn wutu. Mẹvivẹ́ ṣie tindo vẹ̃ngle to oso he whánji ji. 2E dopá lédo e, bo sọ sinyan zannu sẹ sọn é mẹ, é do ovẹ̃n he yọnwhanpẹ tàla do e mẹ, bo gbá dohọ̀ do ṣẹnṣẹn etọn, é basi ahàndanú do e mẹ ga; bo to pinpọn dọ ni sẹ́n sinsẹ́n, ṣigba sinsẹ́n vivlẹ wẹ e sẹ́n. 3Dinvie, Jelusalẹm—nu po sunnu Juda tọn po emì, mì dawhẹ̀, yẹn vẹ̀ mì, mì dawhẹ̀ to yẹn po vẹ̃ngle ṣie po ṣẹnṣẹn. 4Etẹwẹ yè do wa na vẹ̃ngle ṣie bọ yẹn ma basi to e mẹ? Whenuena yẹn to pinpọ́n dọ ni sẹ́n ovẹ̃n, etẹwutu wẹ é sẹ́n sinsẹ́n vivlẹ? 5Be mi wá dinvie: yen na dọ na mì onú he yẹn na wà do vẹ̃ngle ṣie: yẹn na bẹ́ opá he lẹ́do e sẹ̀, yè na sọ dù i súdo; yẹn na họ́ dokọ́ etọn liai, yè na sọ zín i dai. 6Yẹn na gbà ẹ kija: yè ma na klọ ẹ, kavi yè ma to na kùn in; ṣigba awhànglọn po vẹunvẹun po wẹ na wú to finẹ; yẹn na sọ dosẹ́nna aslọ dọ e ja jikun do e ji blo. 7Na vẹ̃ngle OKLUNỌ awhànpa lẹ ton wẹ owhé Islaeli tọn, sunnu Juda tọn lẹ wẹ atin didó he jlo e, é donukun whẹ̀dida, ṣigba dayi e go, yadonamẹ; é donukun dódó, ṣigba do ayi e go, awhá.
8Dindòn wẹ na yé he sá owhé dogọ́ owhé, bo sọ dè ogle dogọ́ ogle, kaka tẹnmẹ ma sọ pò bà, na yé ṣó nido nọ̀ ṣẹnṣẹn aihọn tọn. 9Do otó ṣie mẹ wẹ OKLUNỌ awhanpa lẹ tọn dọ te dọmọ, Nugbo owhé susu na jèvọ, yèdọ owhé he klo po ehe yọ́nwhanpẹ po, matindo mẹhe na nọ̀ é mẹ. 10Nugbo, alpente aó vẹ̃ngle tọn na sọ́n ojlẹ bati dopo tọn, ojlẹ homiẹli tọn dopo na sẹ́n éfa dopo.
11Dindọ̀n wẹ na yé he nọ fọ́n to afọ́nnufu na yé nido yànmọna ahàn sinsinyẹn; he nọte to e mẹ kaka jẹ ozánmẹ, kaka ovẹ̃n do hẹn yé hùnmiyọn 12Ajalẹn po violi po, kele, ován po vẹ̃nhàn po sọ tin to núdùdù yetọn kọ̀n: ṣigba yé ma hò azán OKLUNỌ tọn pọ́n, mọ yé ma lẹn azón alọ etọn mẹ tọn pọ́n. 13Enẹwutu omẹ ṣie lẹ yì kanlinmọgbénu, na yé ma tindo nuyọnẹn: gbẹtọ yẹyinọ yetọn lẹ gblekan, susu yetọn sọ hú na sìnnùgbla. 14Enẹwutu okútòmẹ ko na otẹn ede, bo sọ kẹ̀ onù etọn zẹ̀ ojlẹ go: gigo yetọn, po susu yetọn po, aṣọ yetọn, po yé he to ayajẹ lẹ po na jẹte do e mẹ. 15Yè na zín omẹ vọnu lẹ dai, yè na whiwhẹ asuka lẹ dai, yè na sọ whiwhẹ nukun goyítọ tọn dai. 16Ṣigba OKLUNỌ awhànpa lẹ tọn wẹ yè na zé daga to whẹ̀dida mẹ, podọ Jiwheyẹwhe Omẹ Wiwe Dopo lọ na sọ yín klandowiwe to dódó mẹ. 17Whenẹnu wẹ lẹngbọvu lẹ na to dùdù kẹdẹdi wàlọ yetọn, podọ to wheto yé he mọawu lẹ tọn mẹ wẹ jonọ lẹ na nọ dù te.
18Dindọ̀n wẹ na yé he yí núvọ do to jijọ ylankan dọ̀n, podọ yé he taidi yé yí okàn kẹkẹ tọn do to ylando dọ̀n. 19He dọmọ, Gbọ ni yawu, bo sọ domìzonmìzọnna azọ́n etọn, na mí nido mọ ẹn: gbọ nuyọnẹn Omẹ Wiwe dopo Islaeli tọn ni sẹpọ́ ofi, ni wá na mí ni yón ẹn.
20Dindọ̀n wẹ na yé he to oylan ylọ dọ dagbe lẹ, bo to dagbe ylọ dọ oylan, he yí zinvlu do hinhọ́n tẹnmẹ, bo yí hinhọ́n do zinvlu tẹnmẹ; he yí vivó do vivi tẹnmẹ, bo sọ yí vivi do vivó tẹnmẹ.
21Dindòn wẹ na yé he yín nuyọnẹntọ to nukun yéde tọn mẹ, bo sọ yín mẹzìnzìn to nukun yéde tọn mẹ.
22Dindón wẹ na yé he dohuhlọn nado nù vẹ̃nhàn, podọ huhlọntọ lẹ nado flusọ ahàn sinsinyẹn. 23Yé he suwhẹna mẹylankanna ale wutu, bo sọ yí dódó nugbonọ tọn sọn é si. 24Enewutu dile mìyọn nọ wlọ núyọ, bọ mìyọnlọ nọ fiọ zìnkán do, Mowẹ adọ́ yetọn na taidi yinyọ̀n: sisẹ́ yetọn na sọ yì aga di afínfín: na yé ko hò osẹ́n OKLUNỌ awhànpa lẹ tọn pla, bo sọ vlẹ ohó Omẹ Wiwe Islaeli tọn tọn.
25Enẹwutu wẹ homẹ OKLUNỌ tọn gble do omẹ etọn lẹ go, é sọ dlẹn alọ etọn do yé ji, bo sọ linú yé: okọta lẹ sọ sisọ, oṣiọ yetọn taidi omí to tòhòmẹ. To ehe lẹpo mẹ, homẹgble etọn ma lẹ́kọ̀, ṣigba alọ etọn dlẹn do gbonu jãnwẹ. 26E na zé asia daga hlan akọta he to aganu lẹ, é na sọ jlẹgbè na yé sọn opòdo aihọn tọn: dayi e go, yé na sọ yawu wá plaun. 27Onú ma na dikọna mẹde mọ ode ma na klẹnafọ to yé mẹ; mẹde ma na samlọngọ́, kavi damlọn, gbaja alinkàn yetọn tọn ma to na tún, mọ afọpàkan yetọn ma to na wẹn. 28Ogá mẹhetọn dá, ogába yetọn lẹpo sọ dẹ́, yè na hia ofẹ̀n osó yetọn tọn na okẹ́n, podọ kẹkẹ yetọn di jẹhọn sinsinyẹn: 29Awhá yetọn na taidi kinnikinni tọn, yé na sọ nọ dawhá taidi ovi kinnikinni tọn lẹ: nugbo, yé na dawhá, bo na sọ hẹn gbélàn lọ go, yé na zé e yì jijọho, mẹde ma na whlẹn ẹn. 30Podọ to azán lọ gbè, yé na fiẹ do yé ji, di zingidi ohù tọn, eyín gbẹtọ sọ pọ́n aigba lọ, dayi e go, zinvlu po nukunbibia po, hinhọ́n sọ lẹzùn zinvlu to aslọ yú etọn mẹ.
Currently Selected:
ISAIA 5: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.