Eksọdusi 2

1DAWE de yì sọn owhé Levi tọn gbe, bo yí viyọnnu Levi tọn lọ hlan asi. 2Yọnnu lọ sọ mọho, bo ji visunnu de: whenuena ewọ mọ ẹn dọ ovi whanpẹnọ wẹ, é whlá ẹ osùn atọ̀n. 3Whenuena ewọ ma sọgan whlá ẹ dẹn ba, ewọ yí aki owoko tọn de, bo yí oko po atinsin po do tlẹ ẹ; é ze ovi lọ do e mẹ, bo zé e tó do ofánkàn mẹ to otò tó. 4Nọviyọnnu etọn site to aganu, nado pọ́n onú he yè na wà do e.

5Viyọnnu Falo tọn jẹte wá nado lawu to otọ tó; deviyọnnu etọn lẹ sọ to dudlu to otò tó; ewọ sọ mọ aki lọ to owoko lẹ ṣẹnṣẹn, bo do deviyọnnu etọn hlan nado yì zé e wá. 6Ewọ sọ hùn in, bo mọ ovi lọ: bo, dayi e go, vianónnu lọ ko viavi. Ewọ sọ tindo lẹblanu do e ji, bo dọmọ, Ovi Heblu lẹ tọn de wẹ ehe.

7Whenenu wẹ nọviyọnnu etọn dọ hlan viyọnnu Falo tọn, Yẹn ma na yì bo ylọ vigopóntọ Heblu yọnnu tọn de na we, na ewọ nido na anó ovi lọ na we? 8Viyọnnu Falo tọn dọ nẹ, Yì. Yọnnuvu lọ sọ yì bo ylọ onọ ovi lọ tọn. 9Viyọnnu Falo tọn dọ hlan ẹn, Zé ovi he sọ yì, bo na anó ẹ na mi, yẹnlọsu nasọ na azónkuẹ towe we. Yọnnu lọ sọ zé ovi lọ, bo na anó ẹ. 10Ovi lọ whén, ewọ sọ hẹn ẹn wá viyọnnu Falo tọn de, é sọ lezùn ovi etọn. Ewọ ylọ oyín etọn dọ Moṣe, bo dọmọ, Na yẹn dọ̀n ẹn sọn osìn mẹ wutu.

11E sọ wá jọ to azán nẹlẹ mẹ, whenuena Moṣe ko whén, wẹ é tón yì mẹmẹsunnu etọn lẹ de, bo pọ́n agbàn yetọn lẹ: é mọ Egiptinu de to nuli Heblu dopo de to mẹmẹsunnu etọn lẹ mẹ. 12Ewọ sọ pọ́n de, pọ́n dọn, whenuena é mọ dọ ome de ma tin to finẹ, é hù Egiptinu lọ bo whlá ẹ do tòkẹn mẹ.

13Ewọ sọ tón yì gbonu to aihọngbè, bo, dayi e go, sunnu awe Heblu tọn to nuli yénọzo: ewọ sọ dọ hlan ewọ mehe dinaklọn, Etẹwutu wẹ hiẹ to nuli hatọ towe? 14Ewọ sọ dọmọ, Mẹnu wẹ yí we do basi ahọvi de po whèdatọ de po do mi ji? hiẹ to linlẹn nado hù mi, dile hiẹ hù Egiptinu lọ do? Moṣe sọ dibú, bo dọmọ, Nugbonugbo onú lo yín yinyónẹn.

15Whenuena Falo sè onú he, é din nado hù Moṣe. Ṣigba Moṣe họ̀nyì sọn Falo nukunmẹ, bo nò aigba Midiani tọn ji: é sọ sinai to odotò de ji 16Yẹwhenọ Midiani tọn tindo viyọnnu ṣinawe: yé wá bo dòn osìn, bo gó otò lẹ nado na osìn kanlinpa otọ́ yetọn tọn lẹ. 17Lẹngbọhọtọ lẹ wá bo yàn yé yì: ṣigba Moṣe site bo gọalona yé, bo na osìn kanlinpa yetọn lẹ. 18Whenuena yé wá Lueli otọ́ yetọn de, é domọ, Nawẹ é yín bọ mì do yawu gò dọmọ to egbé? 19Yé sọ dọmọ, Egiptinu de whlen mí sọn alọ lengbọhọtọ lẹ tọn mẹ, humọ e dọn osìn na mí, bo nasìn kanlinpa. 20Ewọ sọ dọ hlan viyọnnu etọn lẹ, Fie ka wẹ é te? etẹwutu wẹ mì jo dawe lọ dai? mì ylọ ẹ, na é nido dù akla.

21Awú Moṣe tọn sọ jai nado nọ̀hẹ dawe lọ: é sọ na Zipola viyọnnu etọn Moṣe. 22Ewọ ji visunnu de, ewọ sọ ylọ oyìn etọn dọ Gelsomi: na ewọ dọmọ, Yẹn ko yín wásinu de to aigba jonọ de ji.

23E sọ wá jọ to whenu azán susu nẹlẹ tọn mẹ, wẹ ahọlu Egipti tọn kú: ovi Islaeli tọn lẹ wẹ́n gbọn mẹglọnọ lọ tọn dali, yé dawhá, yiylọ yetọn na alọgọ hẹ́ji wá Jiwheyẹwhe de gbọn mẹglọnọ lọ tọn dali. 24Jiwheyẹwhe sè winwón yetọn, Jiwheyẹwhe sọ flin alẹ̀nu etọn hẹ Abla-ham, hẹ Isaki, podọ hẹ Jakobu. 25Jiwheyẹwhe sọ mọ ovi Islaeli tọn lẹ, Jiwheyẹwhe sọ yọnẹn na yé.

Currently Selected:

Eksọdusi 2: BWL23

Highlight

Copy