Eksọdusi 1
1
1EHELẸ wẹ oyín ovi Islaeli tọn lẹ tọn, he wá Egipti; omẹ dopodopo po whédo etọn po wá po Jakobu po. 2Lẹubeni, Simeoni, Levi, po Juda po; 3Issakali, Zẹbuluni, po Bẹnjamini po; 4Dani po Naftali po, Gadi po Aṣeli po. 5Ayiha he tón sọn adaja Jakobu tọn lẹ mẹ yín ayiha kandegbàn: Josefu ko tin to Egipti hóhó.
6Josefu sọ kú, po mẹmẹsunnu etọn lẹpo po, po whẹndo nẹ lẹpo po. 7Ovi Islaeli ton lẹ yín sinsẹ́nnọ, bo to sisawẹ̃n, bo to jijigbà, tónalùn bo gángán gbahú: yè sọ hẹn aigba lọ gó na yé.
8Ahọlu yọ́yọ́ de fọ́n to Egipti ji, he ma yón Josefu. 9Ewọ sọ dọ hlan omẹ etọn lẹ, Dayi e go, omẹ ovi Islaeli tọn le tọn to susu bo sọ to huhlọnnọ yín hu mìwlẹ: 10mì wá, gbọ mí ni yí núyónẹn do zán hẹ yé; yé nikã jigbà, é nasọ wá jọ dọ, whenuena awhàn de wá jai, bọ yówlẹ ga kòn yéde dopọ hlan kẹ̀ntọ mítọn lẹ, bo hòavùn hẹ mí, bo hẹn yé fọ́n sọn aigba lọ ji. 11Enẹwutu wẹ yé dè azóngán lẹ do yé ji nado yí agbàn yetọn lẹ do bianukun na yé. Yé gbá na Falo tòdahodaho agbànhọ tọn lẹ Pitomi po Laamsesi po. 12Ṣigba le yé to nukunbia na yé húgán sọ, wẹ yé to jijigbà húgán do, bo sọ to vúnvún péai. Yè sọ yin homegbletọ na ovi Islaeli tọn lẹ tọn wutu. 13Egiptinu lẹ hẹn ovi Islaeli tọn lẹ nado yí hlọnhlọn do sẹn: 14yé sọ yí azón sinsinyẹn do hẹn ogbè yetọn vé to obó po okómímẹ po mẹ, podọ to azón alọpàlọpa lẹpo mẹ to danji, azón yetọn lẹpo ehemẹ yé yí hlọnhlọn do hẹn yé sèn te.
15Ahọlu Egipti tọn dọhó na ajinọ Heblu tọn lẹ, sọn mẹhe mẹ oyín dopo lọ tọn nọ yín Ẹifla; podọ oyín awetọ tọn Púa: 16ewọ sọ dọmọ, Whenuena mì to azón ajinọ tọn wà na yọnnu Heblu tọn lẹ, bo mọ yé to vijiján ji; eyín é yín visunnu, mì na hù i; ṣigba eyín é yín viyọnnu, ewọ na nọgbó. 17Ṣigba ajinọ le dibúna Jiwheyẹwhe bo ma wà dile ahọlu Egipti tọn degbèna yé do gba, ṣigba bo whlen ovisunnu lẹ dogbẹ̀. 18Aholu Egipti tọn ylọ ajinọ lẹ, bo dọ hlan ye, Etẹwutu wẹ mì do wà onú he, bo ko whlen ovisunnu lẹ dogbẹ? 19Ajinọ ewlẹ sọ dọ hlan Falo, Na Heblu yọnnu lẹ ma dile Egipti yọnnu lẹ te wutu wẹ: na yé yawu, bo nọ yín vijitọ whẹpo ajinọ nado wà yé de. 20Jiwheyẹwhe sọ zán dagbe hẹ ajinọ lẹ: gbẹtọ le sọ jigbà bo tónalùn bo gángán gbahú. 21E sọ wá jọ, na ajinọ lẹ dibúna Jiwheyẹwhe wutu, wẹ é basi ohọ lẹ na yé.
22Falo sọ degbena ome etọn lẹpo dọmọ, Visunnu depope he ye ji mì na zédlan otò lọ mẹ, podọ viyọnnu lẹpo mì na whlẹn dogbè.
Currently Selected:
Eksọdusi 1: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.
