Eksọdusi 3

1MOṢE koto kanlinpa Jẹtlo yónwhẹn etọn yẹwhenọ Midiani tọn tọn hó: é sọ plan kanlinpa lọ jẹ godo zùngbo lọ tọn, bo wá osé Jiwheyẹwhe tọn lọ ji, to Holebi. 2Angẹli OKLUNỌ tọn lọ sọ sọawúhia ẹ to ozòlọ miyọn tọn de mẹ sọn ṣẹnṣẹn nukàn lọ tọn: ewọ sọ pọ́n, bo, dayi e go, núkàn lọ yí miyọn do to jiji, yè ma sọ hẹn núkàn lọ fiọ.

3Moṣe sọ dọmọ, Yẹn na lẹ́jẹ apadopo lò, bo pọ́n númimọ daho he, etẹwutu wẹ núkàn lọ ma jizò. 4Whenuena OKLUNỌ mọ dọ é léjẹ apadopo nado mọ, Jiwheyẹwhe dlangbewhán hlan ẹn sọn ṣẹnṣẹn nukàn lọ tọn, bo dọmọ, Moṣe, Moṣe. Ewọ sọ dọmọ, Yẹn tin to ofi. 5Ewọ sọ dọmọ, A sẹpọ́ fìdali blo: dè afọpa towe sọn afọ towe, na otẹn fietọn ji hiẹ site te aigba wiwé wẹ. 6Humọ é dọmọ, Yẹn Jiwheyẹwhe otọ́ towe tọn wẹ, Jiwheyẹwhe Ablaham tọn, Jiwheyẹwhe Isaki tọn, podọ Jiwheyẹwhe Jakobu tọn. Moṣe sọ sọ nukunmẹ etọn whlá; na búdi i nado bònukun do Jiwheyẹwhe go.

7OKLUNỌ sọ dọmọ, Nugbonugbo yẹn ko mọ nukunbibia omẹ ṣie he tin to Egipti lẹ tọn, bo ko sọ sè awhá yetọn gbọn azóngán yetọn lẹ tọn dali; na yẹn yon awúfiẹsa yetọn lẹ; 8yẹn sọ jẹte wá nado whlẹn yé sọn alọ Egiptinu lẹ tọn mẹ, podọ nado hẹn yé hẹ́aga sọn aigba nẹ ji yí aigba dagbe kiklo de ji, yì aigba he yí anósìn po owín po do to sisá de ji; yì otẹn Kenaninu lẹ tọn, Hitinu lẹ, Amolinu lẹ, Pẹlizinu lẹ, Hivinu lẹ, po Jẹbusinu lẹ po tọn mẹ. 9Bé dinvie, dayi e go, awhá ovi Islaeli tọn lẹ tọn wá dẽ: humọ yẹn ko mọ nukunbibia ehetọn Egiptinu lẹ yí do to nukunbiana yé. 10Enẹwutu wá dinvie, yẹn nasọ do we hlan Falo de, na hiẹ nido hẹn omẹ ṣie lẹ ovi Islaeli tọn lẹ tón sọn Egipti.

11Moṣe sọ dọ hlan Jiwheyẹwhe, dọ, Menu wẹ yẹn, bọ yẹn na do yì Falo de, bọ yẹn nado hẹn ovi Islaeli tọn lẹ tọ́n sọn Egipti?

12Ewọ sọ dọmọ. Nugbonugbo yẹn na tin po hiẹ po; ehe wẹ nasọ yín ohia hlan we, dọ yẹn wẹ do we hlan: whenuena hiẹ ko hen gbẹtọ lẹ tón sọn Egipti, míwlẹ na sẹ́n Jiwheyẹwhe to osó he ji.

13Moṣe sọ dọ hlan Jiwheyẹwhe, Dayi e go, whenuena yẹn wá ovi Islaeli tọn lẹ de, bo na dọ hlan yé, Jiwheyẹwhe otọ́ mítọn lẹ tọn ko do mi hlan mì; bọ yé na dọ hlan mi, Etẹ wẹ oyín etọn? etẹ wẹ yẹn na dọ hlan yé?

14Jiwheyẹwhe sọ dọ hlan Moṣe, YẸN WẸ MẸHE TIN NẸ : ewọ sọ dọmọ, Le wẹ hiẹ na dọ hlan ovi Islaeli tọn lẹ, YẸN NA YÍN ko do mi hlan mì de.

15Jiwheyẹwhe dọ humọ hlan Moṣe, Le wẹ hiẹ na dọ hlan ovi Islaeli tọn lẹ, OKLUNỌ Jiwheyẹwhe otọ́ mítọn lẹ tọn, Jiwheyẹwhe Ablaham tọn, Jiwheyẹwhe Isaki tọn, podọ Jiwheyẹwhe Jakobu tọn, ko do mi hlan mì de: ehe wẹ oyín ṣie kakadoidoi ehe sọ wẹ oflin ṣie hlan whẹndo lẹpo. 16Yì, bo pli mẹho Islaeli tọn lẹ dopọ, bo dọ hlan yé, OKLUNỌ, Jiwheyẹwhe otọ́ mítọn lẹ tọn, Jiwheyẹwhe Ablaham tọn, Isaki tọn, podọ Jakobu tọn, ko sọawúhia hlan mi, dọmọ, Yẹn ko dla mì pọ́n nugbonugbo, bo ko mọ enẹ he yè wà do mì to Egipti: 17Yẹn ko sọ dọmọ, Yẹn na hẹn mí hẹ́ji sọn nukunbibia Egipti tọn mẹ wa aigba Kenaninu tọn, po Hitinu tọnpo, po Amolinu tọn po, po Pẹlizinu tọn po, po Hivinu tọn po, po Jẹbusinu tọn po, wá aigba he yí anósìn po owín po do to sisá ji. 18Yé na nató ogbè towe: hiẹ nasọ wá hiẹ po mẹho Islaeli tọn lẹ po jẹ ahọlu Egipti tọn de, mìwlẹ nasọ dọ hlan ẹn, OKLUNỌ, Jiwheyẹwhe Heblu lẹ tọn, ko pla mí; dinvie gbọ mí ni yì, mí vẹ́ we, azán atọ̀n gbejizọnlin biọ zùngbo mẹ, na míwlẹ nido sánvọ́ hlan OKLUNỌ Jiwheyẹwhe mítọn. 19Yẹn sọ yónẹn dọ ahọlu Egipti tọn ma na dike mì ni yì, lala, é ma gbọn alọ huhlọnnọ de dali gba. 20Yẹn na dè alọ ṣie jegbonu, bo yí nújawu ṣie lẹ do linu Egipti, ehe yẹn na wà to ṣẹnṣẹn etọn: to enẹgodo é na gbọ mì ni yì. 21Yẹn nasọ na nukundagbe omẹ helẹ to nukun Egiptinu lẹ tọn mẹ: é nasọ wá jọ, dọ, whenuena mì jei, mì ma to na yì alọvó gba. 22Ṣigba yọnnu dopodopo na biọ asọdonú fataka tọnlẹ, po asọdọnú sika tọn po, po asọvò po to kọmẹnu etọn si: bọ mì na yí do ogo na visunnu mítọn lẹ, podọ do ogo na viyọnnu mítọn lẹ; mì nasọ bó onú Egiptinu lẹ tọn.

Currently Selected:

Eksọdusi 3: BWL23

Highlight

Copy