Luka 13

Linga utịkupīnduka kufwa

1Nkabalilo kalakala bālipo bamo aba balimmbūlịle isya Bagalịlai aba ilịlopa lyabo Pịlāti ālyongēnịe na makemo gābo. 2Po papo alinkubāmụla alinkuti: Bule mụkwịnogona ukuti Abagalịlajị bababa bāli batulanōngwa babị̄bị ukukīnda Abagalịlajị abāngi bōsa, apa babōmbelị̄gwe īngubilo bo sịsịsị? 3Mma; lolị ngubabūla ukuti linga mụtịkupinduka mwesa mwịsakufwaga bo bunobuno. 4Pamo kalōngo na lwele bala aba ikisōnge kyabagwilị̄le nukubagoga mwa Sịloha, mụkwịnogona ukuti bāli batulanōngwa ukukīnda bōsa aba bājēngịle mụ Jelụsalemụ? 5Mma; lolị ngubabūla ukuti linga mụtịkupīnduka nanụmwe mwesa mwịsakufwaga bo balabala.

Ikifwanịkisyo kya nkuju ugu gutịkupa īseke

6Po papo alinkubabūla ikifwanịkisyo kya kubalilamo alinkuti: Umụ̄ndu jumo ābyele unkuju mụnngūnda gwake gwa māfị̄lu; alinkwịsa kukutūngulamo īseke, alinkusịtakusyaga nasịmo. 7Po papo alinkummbūla ummbōmbelamāfị̄lu alinkuti: Ukētịle, mfyinja fịtatu ifị nịsịleko kukutūngula īseke mụnkuju ugu, lolị ndịkusyaga nasịmo. Gutụmụle; fịkị ukuti gōnāngege ịtolo unngūnda? 8Ummbōmbelanngūnda alinkummwamụla alinkuti: Guleke, Malafyale, ikyinja kikīki ịtolo, ngukūmbilile tāsị nukugutāgilila īndope. 9Lelo linga gwịsịlekupa īseke nkyinja, sịsakuja nụnụ fị̄jo; linga mma, po kwịsakugutụmụlaga.

Jesụ ịkummbūmbulusya sabāti unkị̄kulu unndemale

10Lumo pa sabāti Jesụ āmanyịsyaga nnyụ̄mba ja kwịpụ̄tilamo jimo. 11Mụlamụla ālimo unkị̄kulu uju āli ni īmbepo īnyalị āgonịle najo ifyinja kalōngo na lwele; jalimpelị̄le ikilema ātụ̄ngēme akāmēnye ukwima ukugoloka. 12Lelo bo Jesụ ammbwene, ālinkōlị̄le ālimmbūlịle ātịle: Gwe nkị̄kulu, gwabulị̄gwe ububịne bwako. 13Alinkummbīkapo, amaboko, nakalīnga ịtolo alinkwenda nukugoloka, alinkuntụ̄fya Kyala. 14Lolị unndagilị gwa nyụ̄mba ja kwịpụ̄tilamo, bo akalēle kunōngwa ja Jesụ ukubūmbulusya sabāti alinkujoba kubandu alinkuti: Galịpo amasịku ntandatu aga gabagị̄le ukubōmbamo īmbōmbo; po mwịsege mmasịku galagala kukubūngụlusịgwa, pomma pị̄sịku lya sabāti. 15Lelo UNTWA alinkummwamụla alinkuti: Mwe batūngulu umwe! Bule umwe jumojumo sabāti mụtịkusyabula īng'ōmbe syinụ pamo īmbụ̄nda syinụ mbugono bwabo ukubūka nasyo kukusyosya? 16Po unkị̄kulu uju, umwana gwa Abụlahamụ, uju Setano ālimpịnyịle ifyinja kalōngo na lwele akabagile ukwabuligwa mụngoje pa sabāti. 17Bo ali pakujoba sịsịsị abalugu bāke bōsa balinkukosịgwa īsonị; abāndu bōsa balinkusekela kumbōmbo syosa isị āsịbōmbịle.

Ikifwanịkisyo kya kaseke ka mụtaka

(Mat. 13:31-32; Mali. 4:30-32)

18Po lelo Jesụ ātịle; Ikitāngālala kya kumwanya kifwene bo ifịkị? Nkifwanịkisyege bo ifịkị? 19Kifwene bo akaseke ka mụtaka aka umụ̄ndu ālyegịle ājịlekusopa mụnngūnda gwake; kalinkukula kalinkwịpela mpịkị, ni njunị sịlinkutēnga ifịfụ̄mbwa mụsāmba syake.

Ikifwanịkisyo kya nkese

(Mat. 13:33)

20Kangi Jesụ alinkulālūsya alinkuti: Kali ikitāngālala kya Kyala nkifwanịkisyege nīfịkị? 21Kifwene bo unkese ugu unkị̄kulu ālyegịle alinkugukụpikila bo agongēnịe nubufụ mfyakupimila ubufụ fịtatu ukwịsakufịka papo bōsa bwakalị̄pe.

Ikifịgo ikifịnye

(Mat. 7:13-14,21-23)

22Po papo Jesụ alinkupụlūngānia utwaja tōsa utukulūmba nu tunāndi, alinkubamanyịsya abāndu bo ịkulabila mụ Jelụsalemụ. 23Umụ̄ndu jumo ālinndālūsīsye ātịle: Bule aba bapokị̄gwe bịsakujaga banāndi ịtolo? Ālimmwamwịle ātịle: 24Gwịjūlege ukwịngila pakifịgo ikifịnye; buno bị̄ngị, ngukubūla, bịsakulōndaga ukwịngila lolị bịsakutolịgwaga. 25Linga sịku lelo umwenenyụ̄mba ịsịlekusụmuka nukwigalako kukifịgo, lelo bo mwimịle pānja mụkwanda ukukung'ūnda kukifịgo mukuti: Gwe NTWA twịgulile, ịsakubāmụlaga ātigi: Ngabamanya kuno mụfụmịle. 26Po mwisakwandaga ukujoba mụtigi: Jouswe twe twālyaga nukunwa nanụngwe, kangi ugwe gwatumanyịsyaga ntwaja twitu. 27Lolị umwene ịsakutigi: Nịkubabūla nịkuti ngakumanya kuno mụfụmịle; amụsōkepo pamyangu apa, mwesa mwe babōmbambị̄bị umwe! 28Po lelo mwịsakukụ̄taga nukusyegetụla amị̄no gīnụ bo mụkummbona Abụlahamụ, na Ịsịhaka, na Jakobụ na bakụ̄ngụlụka nkitāngālala kya Kyala, bo umwe mụtāgị̄gwe pānja. 29Po papo abāndu bịsakufụmaga kubusōkelo na kubujōngelo kangi kulūlu nakwịtōngo, bịsakwịtūgalaga pakulya ifị̄ndu nkitāngālala kya Kyala. 30Po lelo mwịsakwagaga aba lilino bākūnyụma bịsakujaga bankyenị, aba lilino batasị bịsakujaga bākūnyụma.

Ulugano lwa Jesụ kwa Jelụsalemụ

(Mat. 23:37-39)

31Pakabalilo kāko Abafalịsaị bamo balinkwịsa kwa Jesụ balinkummbūla balinkuti: Fịkuti usōkepo apa ubūkege kubūngi, namanga Helotị ịkulōnda ukukugoga. 32Umwene ābāmwịle ātịle: Būka mụkakabūle akāmbwe kala mụkāti: Kēta, ngusịsōsya īmbepo īnyalị nukubūmbulusya ababịne umụsyugu na kilābo, ngumalisyaga palubūnju īmbōmbo jangu. 33Lolị lelo fịkuti mbūkege injila jangu umụsyugu nakilābo napalubūnju; namanga kukabagila ukuti unkụ̄ngụlụka afwilege kubutalị na Jelụsalemụ. 34Gwe Jelụsalemụ, gwe Jelụsalemụ! Kugoga abakụ̄ngụlụka, kubatịka na mabwe abatumịgwa aba Kyala akutumị̄le! Kākị̄ngi nālōndaga ukubabūngānịa abāndu bako bōsa bo apa īnguku ifyele jịkutubūnganịa utwanāke, jịkutūbātila mmapiko gāke, lolị umwe mwali mwemma ukuti mbabōmbelege sịsịsị! 35Bunobuno lelo īnyụ̄mba jīnụ īnyị̄kemo jịkulekịgwaga. Nịkubabūla nalolị ukuti mụtịsakūmbonaga ukwịsakufịka bo kị̄sịle akabalilo apa mwịsakutigi: Kyala ansajege uju ịkwịsila mụngamụ ja NTWA.

Currently Selected:

Luka 13: NYB96

Highlight

Copy