Luka 14

Jesụ ikummbūmbulusya unnyāmbala ummbịne

1Lumo pa sabāti Jesụ ābūkịle kukulya ifị̄ndu ku nyụ̄mba ja Mfalịsaị jumo unndōngosị; Abafalịsaị balinkuntegelela, bāja nagwe kuno. 2Lelo nkyenị mmyake ālimo umụ̄ndu jumo gwa mbūngo ja matelekelela (īsāfụla). 3Po papo Jesụ alinkubalālūsya abamanyandagilo na Bafalịsaị alinkuti: Bule mụkaja mwịko ukubūmbulusya ububịne pa sabāti, pamo mwịko? 4Abēne bāja mye ịtolo. Po lelo alinkummwega ummbịne alinkwenda nukummbūmbulusya, alinkunndaga, alinkubūka. 5Alinkujoba nabo alinkuti: Umwe mụno mụjīlị̄le jwanị ajege ni mbụ̄nda jake pamo īng'ōmbe, lelo bo jị̄bụlụkụtị̄le nkisịba kya mīsi atịsakujifyulaga nakalīnga pị̄sịku lya sabāti. 6Balinkutolịgwa ukwamụla kwịsyu lilīli.

Ulwịjị̄syo nukwambilila abahēsya

7Po papo alinkubabūla ikifwanịkisyo kya kubalilamo bala ābabilikị̄le kukulya ifị̄ndu, bo āgịle bịkwịsalila ubujo ubwimikịgwa pakutūgala, alinkuti: 8Linga umụ̄ndu jumo akubilikị̄le kukulya ifị̄ndu fya pabwegị ungịsalilaga ukutūgasya pabujo ubwimikịgwa. Papo lumo mụmo abilikilịgwe numụ̄ndu ujūngi umwimikịgwa ukukukīnda ugwe, 9Po gwịse gwage uju ababilikị̄le mwe babīli ịkwịsa kumyako ịkuti: Mmwepukilepo unnịno pabujo ubu. Lelo po gwage untu gwị̄swile ugwe bo usụmwịke pakwịtūgala pabujo ubu bukaja bwimikịgwa. 10Loli linga ubilikilị̄gwe kukulya ifị̄ndu fya lusekelo, ubūkege ukatūgalege pabujo ubu bukaja bwimikịgwa napanāndi, ko kuti bo ịkwịsa uju akubilikị̄le akubūlege jūjo ātigi: Mwịnāngu, katūgale pabujo ubwimikịgwa bula; po lelo kwịsakwimikịgwaga nkyenị mụli bōsa aba batūgēle bịkulya nanụngwe. 11Namanga gwesa ịtolo uju ịkwịjūmịka mwene jo ịsakwịsịgwaga, kangi uju ịkwịjị̄sya ịsakwimikịgwaga.

12Kangi Jesụ alinkummbūla jope uju alimmbilikị̄le alinkuti: Akabalilo aka linga kubīka ulusekelo lwa kulya ifị̄ndu ulunywamụ, ungababilikilaga kukulya abamanyānị bako, pamo abāmyinụ, pamo abakamụgo, pamo abapalamanị bāko abakabị, ukuti bangịsakukubilikilaga nanụngwe ukuti mo uhōmbelịgwege kuli isị gwababōmbị̄le. 13Lolị bo kubīka ulusekelo lwa fị̄ndu, ubabilikilege abalōndo, abāfịlema, aba bịkukwema nabafwamāso; 14po kwịsakujaga nsajịgwa, namanga bakaja nifyakukugomokesya. Kyala isakukugomokesyaga pị̄sịku lya kusyuka abagolofụ.

Ikifwanịkisyo kya lusekelo ulukulūmba lwa kulya ifị̄ndu

(Mat. 22:1-10)

15Lelo bo jumo mụli aba bạ̄lyaga nagwe ifị̄ndu apilị̄ke sịsịsị, ālimmbūlịle ātịle: Nsangalufụ uju ịsakulyaga ifị̄ndu nkitāngālala kya Kyala! 16Jesụ ālimmbūlịle ātịle: Lumo umụ̄ndu jumo ābīkịle ulusekelo āpījịle ifị̄ndu fịngị fị̄jo, alinkubabilikila abāndu ba bị̄ngị; 17lelo pa kabalilo ka kulila ifị̄ndu alinkuntuma ummbōmbị gwake kukubabūla aba babilikilị̄gwe ukuti bị̄sege, ifị̄ndu fyosa fịjabị̄gwe. 18Lolị bōsa bafwene ịtolo balinkulōnda isya kukānịlamo. Ugwakwanda alinkummbūla alinkuti: Nūlịle unngūnda lelo ngulōndịgwa ukuti mbēke kukugukēta; ngukusūma ukuti ūhobokelege. 19Ujūngi ātịle: Nūlịle īngāmbaku kalōngo, nsụmwịke kukusịkēta mụno sịkulimila, mbelịle ukāndambilengeko. 20Kangi ujūngi ạ̄tile: Nālipakwega unkị̄kulu, po ndolị̄gwe ukuti nịse. 21Ummbōmbị alinkugomoka alinkwakummbūla syosa sịsịsị umalafyale gwake. Po papo umwenekāja alinkukalala alinkummbūla ummbōmbị gwake alinkuti: Būka nakalīnga mmịpūlo na ntujila twa kāja akakulūmba ukabatwalege abalōndo, abalemale, abafwamāso naba bịkukwema. 22Ummbōmbị ātịle: Malafyale, syosa isị ulagile sịbōmbị̄gwe, lelo ubujo bukāli bulimo ubu busyele. 23Umalafyale ālimmbūlịle ummbōmbị atịle: Usōke ubūkege mụnjila īndekāno na mmịpaka ukabafịmbilisyege abāndu ukuti bị̄sege, īnyụ̄mba jangu jịsejị̄sule. 24Nịkubabūla umwe nịkuti: Mụli bala babilikilị̄gwe najumo atịsakufịmanyaga nkanwa ifị̄ndu fyangu fya palusekelo.

Ubupalapala bwa kuja mfundịgwa

(Mat. 10:37-38)

25Lelo ifịlūndilo fịngị fya bāndu fịlinkwenda nagwe; alinkubasanụkila alinkujoba nabo alinkuti: 26Uju linga ịkwịsa kumyangu bo tāsị akammbēnga ugwịse nunna, unkasị nabāna, nabāmyabo nabalūmbu, kangi nubūmị bwake jūjo, akabagila ukuja mfụ̄ndịgwa gwangu. 27Uju linga atịkupīmba ikikohekano kyake jūjo nukūngōnga une, akabagila ukuja mfụ̄ndịgwa gwangu. 28Umwe mmyinụ, jwanị uju linga ịkulōnda ukujēnga ikisōnge atịkutūgala tāsị pakubala untēngo ukukēta tāsị linga alinafyo ifyakujēngela ukumala? 29Linga atịkubōmba sịsịsị, bo ālị̄sye ulwalo, lelo ịkutolịgwa ukumala, bōsa aba bịkujibona bịsakwandaga ukummōbela bātigi: 30Umụ̄ndu uju ālyandịle ukujēnga kangi atolị̄gwe ukumalisya. 31Pamo alịko jumo umalafyale uju āsụmwịke kukulwa ubwịte numalafyale ujūngi, uju atịkutala tāsị ukwịtūgala nukupima linga ịkwakuja namaka ukulwa nabalugụ baelufụ amalōngo mabili, bo umwene alinabo abasịkali baelufụ kalōngo ịtolo? 32Linga āgịle akabagila ukulwa nabo, bo abalugu bakāli ukufịka bali pabutalị ịsakubatumaga abāndu bakwakwaganịla numalafyale unnịne kukunsūma ukuti bapilikisanịe isya kutwala ulutēngāno. 33Ukufwana bo sịsịsị lelo, uju linga atịkufịleka fyosa ifị alinafyo akabagila ukuja mfụ̄ndịgwa gwangu.

Umụ̄nyụ ugu gusūkịle

(Mat. 5:13; Mali. 9:50)

34Umụ̄nyụ nnụnụ; lolị linga umụ̄nyụ gusūkịle, jikajapo injila najimo ijakugupela nkali kangi. 35Gukabagila nukugutāga mụnngūnda, pamo pị̄būngila lya mbolela; abāndu bịkugutāga ndīsị uko. Uju ali nimbulukutu sya kupilikila jo alīpilikaga.

Currently Selected:

Luka 14: NYB96

Highlight

Copy