Luka 15

Ing'ōsi iji josobịle

(Mat. 18:12-14)

1Po papo lelo abasōngesyasōngo nabatulanōngwa balinkusegelela kumyake kukumpilikisya. 2Abafalịsaị na bamanyakalata balinkwịbụnēsya balinkuti: Umụ̄ndu uju ịkubāmbilila abatulanōngwa nukulya nabo.

3Po papo alinkubabūla ikifwanịkisyo iki, alinkuti: 4Jwanị umwe mmyinụ uju ali nīng'ōsị mịa jumo linga jisobịle jimo atịkusịleka mmātēngele amalōngo mahāno na mana na ịhāno naịna sịla, ukubūka nkujilōnda iji jisobịle ukwịsakufịka papo ịkujagila? 5Lelo bo ajagile, ịkujibagala pafịbeja fyake nukusekela. 6Bo afịkịle kukāja, ịkubabūngānịa abanịne na bapalamanị bāke, ịkubabūla ịkuti: Amụ̄ndūle ukusekela njagịle ing'ōsi jangu iji jasobịle. 7Nịkubabūla ukuti bo sịsakuja bunobuno, lwịsakujangako ulusekelo ulwịngị fị̄jo kumwanya kunōngwa ja ntulanōngwa jumojwene uju apīndwịke ukukīnda pa bagolofụ amalōngo mahāno na mana na bahāno na bāna aba bakafụ̄mbwa nulupīnduko nalumo.

Ulutalama ulu lusobịle

8Pamo alịko jumo unkị̄kulu uju ali nindalama kalōngo uju linga asobị̄sye lumo atịkukosya īnyāle nukupyagila nnyụ̄mba, nukwịjūla fị̄jo ukulōnda ukwịsakufịka papo ịkulwagila? 9Lelo bo alwagịle, ịkubabūngānịa abanịne, nabapalamanị ịkuti: Amụ̄ndūle ukusekela, ndwagịle ulutalama ulu lwasobịle. 10Nịkubabūla ukuti ukufwana bo sịsịsị abāndumị ba Kyala bịkusekela kuntulanōngwa jumojwene uju ịkupīnduka.

Umwana unsobị

11Jesụ alinkujoba kangi alinkuti: Ālịko jumo umụ̄ndu uju āli nabāna babili abalumyana; 12unnāndi alinkujoba ku gwịse alinkuti: Tāta, ikyuma ūnjabile ikyangu. Po papo alinkubajabanịa ikyuma kyake abānāke bo babīli. 13Bo gakakīndapo amasịku mịngị umwana unnāndi alinkubūnganịa fyosa ifị āli nafyo alinkusụmụka injila ukubūka kukị̄su kya kubutalị, ko alinkwakubụlụlụsya ikyuma kyake mụmbōmbo sya bwalānganị. 14Lelo bo amalịle ukutāga ikyuma kyosa, īnjala īngulūmba jilinkugwa nkị̄su kila umwene alinkuja nndōndo. 15Bunobuno lelo alinkubūka kukwịngila īmbōmbo kumụ̄ndu jumo ugwa nkị̄su kila, jo alinkuntuma mụ nngūnda gwake ukuti atị̄mege īngulube. 16Alinkunyonywa ukulya amakāndi ga ndima aga syalayaga īngulube; akālipo najumo ugwakumpa ifyakulya. 17Lolị bo ị̄jagēnịe mwene ātịle: Tāta ali nababōmbị bị̄ngị fị̄jo, bịkulya bịkwịkuta nukusyasya, lolị une kuno ngufwa injala! 18Ngusụmụkaga ukubūka kwa Tāta ngwakutigi: Tāta ndulịle īnōngwa kwa Kyala na kumyako. 19Ngabagila ukuja mwanāko kangi; umbelege ukuja ne jumo gwa aba ubị̄ngị̄sye īmbōmbo, kubafwika. 20Po papo alinkusụmụka ukwịsa kugwịse. Loli bo akāli ali pabutalị ugwịse alinkwenda nukummbona, ikisa kilinkunkola alinkubopa alinkwakunkụmbātila alinkumponịa, 21Po papo umwana alinkujoba nagwe alinkuti: Tāta, ndulịle īnōngwa kumwanya na kumyako; ngabagila ukuja mwanāko kangi. 22Loli ugwịse alinkubabūla ababōmbị bāke alinkuti: Umụtwale nakalīnga umwenda unnụnụ mụmfwike; mụmfwike na kakuba nndōbe nifịlato mmalūndi; 23mwege ni ngāmbaku īndụbwa īnyāte mụkome, tulyege tusekelege; 24namanga umwanāngu uju āfwịle, lolị lilino asyukịle; āsobịle lilino abonị̄ke. Po papo balinkwanda ukusekela.

25Pakabalilo kalakala umwanake unkulūmba āli mụnngūnda; lelo bo ịkwịsa asegelị̄le pakāja, alinkupilika akōgo ka nyīmbo nukumoga. 26Alinkunkōlela ummbōmbị jumo alinkunndālūsya isị syabonị̄ke. 27Ālimmbūlịle ātịle: Unnụgụnago ịsịle, lelo ugūso ankomị̄le īngāmbaku īndụbwa īnyāte, papo ammwambilị̄le unnụnụ ịtolo. 28Lolị akālēle, asị̄ta nukwịngila nnyụ̄mba. Ugwịse alinkusōka pānja alinkuntēngulila, 29lolị umwene alinkummwamụla ugwịse alinkuti: Kēta, mfyinja ifị̄ngị fyosa ifị ngubōmbị̄le ugwe ngakịlanịamo sịku īndagilo syako; lolị ugwe ukāmbamo sịku na kapene akākuti mbīkege ulusekelo nabīnāngu. 30Lolị bo ịsịle umwanāko, uju atāgịle ikyuma kyako mmalaja, ummbōlị̄le īngāmbaku īndụbwa! 31Ugwịse ātịle: Gwe mwanāngu, ugwe tuli twesa bwịla, fyosa ifị ndinafyo fyako. 32Lolị kubagị̄le ukuti tusekelege nukwịkyela, namanga unnụgụnago āfwịle lolị lilino asyukịle; āsobịle lolị lilino āgị̄gwe.

Currently Selected:

Luka 15: NYB96

Highlight

Copy