Luka 16

Umwenelelị unkomụ

1Kangi alinkubabūla abafụ̄ndịgwa bāke alinkuti: Ālịko jumo unkabị uju āli numwenelelị, uju bālimmōhị̄le kumyake ukuti ịkubụlụlụsya ikyuma kyake. 2Po papo alinkwenda nukummbilikila alinkunndālūsya alinkuti: Sịli bulebule īnōngwa isị ngupilika bịkukujoba? Mbalilaga ifya pabwenelelị bwako namanga utịkwandisya kangi ukuja mwenelelị. 3Po papo umwenelelị alinkwịnogona mụ̄nda mmyake alinkuti: Kali ndubule, apa umalafyale gwangu ịkwega ubwenelelị kumyangu? Ngaja namaka ukulima kangi ukusūma ndi nisonị. 4Nsyagịle isyakubōmba, ukuti abāndu bịsebanyambililege nnyụ̄mba syabo bo ngagị̄gwe mbwenelelị. 5Po papo alinkubabilikila jumo jumo aba bākopịle ifyuma fya Malafyale, alinkunndālūsya untasị alinkuti: Ugwe kumelelịgwa fịlīnga numalafyale? 6Ātịle: Ifyakupimila īnyēmba mịa jumo. Ālimmbūlịle ātịle: Ega kalata tugasya mbibimbibi usị̄mbe amalōngo mahāno. 7Kangi alinkujoba kujūngi alinkuti: Ugwe gwakopịle bule? Ālimmbūlịle ātịle: Ifị̄bo fya nganụ imịa jimo. Ālimmbūlịle ātịle: Ega kalata, usị̄mbe amalōngo lwele. 8Po papo umalafyale alinkuntụ̄fya umwenelelị unnịongafụ kunōngwa ja bukomụ bwake; namanga abamụ̄ngị̄sị, mụngulilo jabo babakīndịle ubukomụ abanya lumụlị.

9Kangi Jesụ alinkujoba alinkuti: Bunobuno lelo nịkubabūla une nịkuti: Amwịkabilege abamanyānị ni kyuma kya pakị̄su ko kuti linga sịku bo kimalị̄ke bịsebabāmbililege ntwaja utusịtakumalika sịku. 10Uju linga mwịkilị, ntūndu utunāndi jo ịkuja mwịkilị na ntūndu utukulūmba, jope uju akaja nsūbilịgwa ntūndu utunāndi jo akaja nsūbilịgwa mope nantūndu utukulūmba. 11Po lelo linga ukaja mwịkilị mfyuma fya bunịongafụ, po ajege jwanị ugwakukusūbila ku sūbila ukukupa ikyuma kya nalolị. 12Lelo linga mụkaja bị̄kilị nkyuma kya bāngi, po jwanị ịsakubapaga iki kyo kyinụ jujumwe? 13Akajako najumo ummbōmbị uju abagị̄le ukubabōmbela abanyafyale babili; buno ịsakummbēnga jumo nukunngana unnịne, pamo ịsakwịnị̄ngaga kuli jumo nukunsyokela ujūngi. Ukabagila ukummbōmbela Kyala pamopēne nikyuma.

Ubujobị bumo bwa Kyala

(Mat. 11:12-13; 5:31-32; Mali. 10:11-12)

14Abafalịsaị, aba bāli baganandalama, bāpilị̄ke syosa sịsịsị, po papo balinkummōbela. 15Umwene alinkubabūla alinkuti: Umwe mụli bāndu aba bịkwịnāngisya ubugolofụ nkyenị mbāndu, lolị Kyala asịmēnye īndụmbụla syinụ. Namanga aka abāndu bakīmịke, ko kāndu kapela kinyanyasị kumāso kwa Kyala.

16Īndagilo sya Mose naisị bāsị̄mbịle abakụ̄ngụlụka syabōmbaga ukwịsakufịka nkabalilo ka Johanị Umōsị; ukufụmila palapala īnōngwa īnụnụ sya kitāngālala kya Kyala sịkulūmbililịgwa, umụ̄ndu gwesa ịkwịngilila kumaka. 17Lolị kupepe fị̄jo ikya kumwanya nikyapāsi ukujōnga ukukīnda ukōmoka akanyụsụlị kamo ka ndagilo.

18Umụ̄ndu gwesa uju linga ịkunsōsya unkasị nukwega ujūngi bo abōmbịle īmbị̄bị ja bulogwe; kangi linga umụ̄ndu ịkwega unkị̄kulu uju asōkịle kunndume bo alogịlwe.

Umụ̄ndu unkabị na Lasalo

19Nkabalilo kamo āliko jumo umụ̄ndu unkabị uju āfwalaga imyenda gya ntēngo gwa pamwanya, kangi alinkugona mbunụnụ bwịla. 20Ālịpo jope numụ̄ndu jumo unndōndo uju īngamụ jake āli jo Lasalo, uju ummbili gwake fyali fịlōnda fịtupu, uju bwịla ālīndaga pakifịgo kya nkabị jula, 21alinkunyonywa ukulya utubụlụlụkisya twafị̄ndu utu twasatukaga ukufụma pāmēsa iji ālīlāngapo unnkabị. Syope īmbwa sịlinkwịsa sịlinkummyanda ifịlōnda fyake. 22Unndōndo alinkufwa, abāndumị balinkumpīmba balinkwakuntūgasya kifụkị na Abụlahamụ pa lusekelo lwa kulya ifị̄ndu kumwanya. Unkabị jope alinkufwa alinkusyilịgwa, 23Lelo mbusyuka bo ali ndukubilo ulukulūmba alinkwịnula amāso alinkummbona Abụlahamụ pabutalị, atūgasēnịe na Lasalo. 24Po papo alinkukōlela alinkuti: Gwe Tāta Abụlahamụ! Ulīmbākisyaga, untume Lasalo ajụbike ulōbe lwake mmīsi, ịse andalalisye palulimị, namanga ngutamịgwa fijo mmōto mụno! 25Loli Abụlahamụ ālyamwịle ātịle: Ukūmbukege mwanāngu, ukuti bo ulikubūmị ugwe gwapēgị̄gwe ifịnụnụ fyosa, lolị Lasalo ālinafyo ifịbị̄bị fịtupu. 26Pamwanya pali syosa isyapakāti pamyinụ nanụswe lulịpo ulupānga ulutalị, ko kuti aba bịkulōnda ukuloboka ukufụma kuno ukwịsa kumyinụ batolịgwege, kangi ukuti gwesa uju ịkulōnda ukuloboka ukufụma kuno mụlịko ukwịsa kumyitu atolịgwege. 27Unkabị ātịle: Po lelo ngukusūma Tāta Abụlahamụ, nịkuti untume Lasalo kunyụ̄mba ja Tāta, 28kuno ndi nabāmyitu bahāno. Abūke akabasoke ukuti bangịsakuja bojujūne ukwịsa ndukubilo mụno. 29Lolị Abụlahamụ ātịle: Abāmyinụ bali nabo ba Mose nabakụ̄ngụlụka bakubasoka; bo babapilikisyege isị bịkujoba. 30Unkabị ālyamwịle ātịle: Isyo syomma, Tāta Abụlahamụ! Lolị linga jumo uju asyukịle ukufụma mbafwe abūkịle kumyabo, bịkwakupīnduka. 31Po ālimmbūlịle ātịle: Linga batịkubapilika ba Mose na bakụ̄ngụlụka, po sịtịsakubakolaga abēne nalinga jumo āsyukaga ukufụma mmbafwe.

Currently Selected:

Luka 16: NYB96

Highlight

Copy