Luka 17

Ubutulanōngwa

(Mat. 18:6-7,21-22; Mali. 9:42)

1Po papo Jesụ alinkububūla abafụ̄ndịgwa bāke alinkuti: Isyakubagwisya abāndu syo sịlịpo sịtịkupōndwa ukwịsa; lolị ahīlị uju ịkusịtwala isyakubagwisya abāngi! 2Umụ̄ndu gwa bo bunobuno kwali kunụnụ fị̄jo ukumpịnyila ulwala mmakosị nukuntāga mụnyanja, ukukīnda ukuti antwalilege ubutulanōngwa jumo ugwa banāndi aba. 3Mụje māso mwịtị̄mege; linga gwagịle ugwamyinụ ịkubōmba isị sịli mwịko unkemelege, linga apīndwịke unswege; 4kangi linga gwagịle ịkukuliga kahāno na kabili mwịsịku, kangi ịkugomokela kahāno nakabili kumyako ịkuti: Nsobịle, fịkuti unswege.

Ulwịtiko

5Abafụ̄ndịgwa bājobịle ku Ntwa bātịle: Ulitōngelapo ulwịtiko lubāle! 6Untwa ātịle: Linga mwali nulwịtiko ulu luli bo akaseke ka mụtaka ubunāndi angali mụmēnye ukujoba kumpịkị gwa mandōngomịlo mụkuti: Kūpūka ukibyāle mụnyanja, po angali gukubị̄tika.

Isị sịmmbagị̄le ukubōmba ummbōmbị

7Bule umwe mụno mụjīlị̄le linga jumo ali nummbōmbị gwake gwa kulima pamo gwa kutị̄ma īng'ōsị, bo akotwịke ịkummbūla ịkuti: Oko nakalīnga tūgala ulyemo? 8Atịsakummbūla ukuti: Ndendekekesya ifị̄ndu, ufwale imyenda gya mbōmbo ukwịsakufịka bo mmalịle ukulya nukunwa, po lelo nụngwe ulyege nukunwa? 9Bule ịkugw'ulupi kummbōmbị kunōngwa jakuti abōmbịle isị ālagilị̄gwe? 10Nanụmwe bunobuno, linga mụbōmbịle isị mwalagilị̄gwe, mutigi: Tuli babōmbị abasịtakubagila; tubōmbịle syene isi jali mbōmbo jītu ukusịbōmba.

Jesụ ịkubabūmbulusya abāndu kalōngo

11Lelo bo Jesụ ịkulabila ku Jelụsalemụ, ēndaga mụmpaka gwa Samalịja na Galịlaị. 12Bo ịkubūka nkāja kamo akanāndi alinkwaganịla nabāndu kalōngo aba bali nimbūngo ja bukoma; bīmịle pabutalị; 13bịkukōlela bịkuti; Gwe Jesụ gwe Malafyale! Ulitupākisyaga! 14Bo ababwene ābabūlịle ātịle: Amụbūke mụkị̄nāngisye kubapụ̄tị. Lelo bo bịkubūka balinkwenda nukubūmbuluka. 15Lelo jumo mụli balabala, bo ị̄bwene ukubūmbuluka, alinkugomoka, alinkumpāla Kyala niịsyu ilịkulūmba, 16alinkwakubụngụlụka mmalūndi mwa Jesụ alinkugwa ulupị. Lelo umwene āli Nsamalịja. 17Po lelo Jesụ ālālūsị̄sye ạ̄tile: Aba bābūmbulusị̄gwe bakāli kalōngo? Bahāno na bāna bo bali kūgu? 18Nōngwa jafịkị najumo akagomoka kukuntụ̄fya Kyala lolị mwene unhēsya uju? 19Po papo alinkummbūla alinkuti: Sụmụka ubūkege, ulwịtiko lwako lḳubūmbulwịsye.

Ukwịsa kwa kitāngālala

(Mat. 24:23-28,37-41)

20Abafalịsaị bamo balinndālūsị̄sye Jesụ akabalilo ka kwịsila ikitāngālala kya Kyala. Ālyamwịle ātịle: Ikitāngālala kya Kyala kitịkuboneka mmaso ukwisa. 21Najumo atịsakujobaga ukuti: Kēta, iki kili apa! Pamo kila kili kula! Namanga ikitāngālala kili mmyinụ jujumwe.

22Po papo alinkubabūla abafụ̄ndịgwa alinkuti: Gịkwịsaga amasịku apa mwịsakunyonywaga fị̄jo ukulibona ilị̄sịku limo mmasịku ga Nnyamụ̄ndu, lolị mụtịsakulibonaga. 23Kangi bịsakubabūlaga bātigi: Kēta, alinkūla! Pamo kēta, ali kuno! Mungịsakubūkangako, mụngịsakubakōngaga. 24Buno bo apa ulumụlị lwa fụla lụkumwekụka lụkugumụlika umpālānga ukufụma kulubafụ lumo ukwakufịka kulubafụ ulūngi, bo ịsakutendekaga Nnamụ̄ndu mwịsịku lyake. 25Lolị fịkuti tāsị akubilwege mụnjila nyịngị nukusyokelịgwa na bāndu ba lilino aba. 26Bo mụno syajīlị̄le nkabalilo ka Nwaka, bo sịsakutendekaga na mmasịku ga Nnyamụ̄ndu. 27Abene Bạ̄lyaga, nukunwa, balinkwega nukwegigwa, mpaka ukwịsakufịka pị̄sịku ili Nwaka ịngilaga mụngalaba, apa umwelesyo gwịsaga nukubapyụta bōsa. 28Kangi ukufwana bo mụno syajīlị̄le mmasịku ga Lotị apa balinkulya, balinkunwa, balinkūla, balinkūlisya, balinkubyala, balinkujēnga, 29lolị pị̄sịku ili Lotị āsōkelāngamo mụ Sotomụ, umōto umōngānịe nikibịlịtị gulinkulagala ukufụma kumwanya ukufwana fụla jịkutịma, gulinkubapyụta bōsa, 30bo sịsakujaga bunobuno na pị̄sịku lya kwịsakubonekela Nnyamundu. 31Pị̄sịku lila, uju ali pamwanya pānyụ̄mba angịsakusụlụkaga kukwega ifyuma fyake nnyụ̄mba jake; buno buno kangi uju linga ali mụnngūnda angịsakugomokelaga kukāja. 32Mụkūmbukilege mụ nkasị gwa Lotị. 33Uju linga ịkuti mbuponesye ubūmị bwake jo ịsakubupēsyaga, lolị uju linga ịkubutāga ubūmị bwake jo ịsakubuponesyaga. 34Pakilo kilakila, ngubabūla ukuti babili bịsakulambalalaga pakitala kimokyene; jumo ịsakwegịgwa ujūngi ịsakulekịgwa pāpo. 35Abakị̄kulu babili bịsakusyaga pamopēne pa lwala; jumo ịsakwegịgwa ujūngi ịsakulekịgwaga. [ 36Abāndu babili bịsakulimaga bo babili mụnngūnda gumogwene, jumo ịsakwambililịgwaga unnịne ịsakulekịgwa pāpo.] 37Po papo balinkunndālūsya balinkuti: Ko kūgu Malafyale? Ābabūlịle ātịle: Apa gulịpo umfị̄mba po apa nimịnōmbo gịkubūngāna.

Currently Selected:

Luka 17: NYB96

Highlight

Copy