Luka 12

Ukusōka kunōngwa ja busyobị

(Mat. 10:26-27)

1Nkabalilo kāko, bo abāndu baelufụ bābị̄ngị babūngēne bịkukanyana, ālyandịle ukubabūla tāsị abafụ̄ndịgwa bāke ātịle: Mụje māso nunkese gwa Bafalịsaị ngubala ubusyobị bwabo. 2Sikajako nasịmo isị sịkụpikililị̄gwe isị sịtịsakukị̄ngulịgwaga, pamo isị sịfịsị̄gwe ịsị sịtịsakumanyịgwaga. 3Syosa isị linga mụjobịle mụngị̄sị sịsakupilikịgwaga ndumụlị, kangi isị mụhēhịle mụ̄sofụ nkāti sịsakufụmụsịgwaga pamwanya pānyụ̄mba.

Ugwakuntị̄la

(Mat. 10:28-31)

4Mwe bị̄nāngu ngubabūla ukuti mụngabatị̄laga aba bịkugoga ummbili, aba pānyụma bakaja nasyo nasịmo isị̄ngị isyakubōmba. 5Lolị une nịkubasōka ukuti umwene ugwakuntị̄la mụntị̄lege uju bo agogịle ali namaka ga kutāga ndupānga lwa mōto; ē, ngubabūla, jo mụntị̄lege lolị! 6Bule batūndulu bahāno batịkūlịgwa ilịtobole? Lolị Kyala atịkummwịbwa najumo nkyenị mmyake. 7Kābuno ninywịlị sya kumịtu gyinụ syosa sịbalị̄gwe. Mụngatị̄laga, umwe mụbakīndịle batūndulu ubupala.

Ukummwịtika nukunkāna Kilisịtị

(Mat. 10:32-33; 12:32; 10:19-20)

8Kangi nịkubabūla une nịkuti gwesa uju ịkunyị̄tika une nkyenị mbāndu, jo Nnyamụ̄ndu ịsakummwịtikaga jope nkyenị mbāndumị ba Kyala; 9lolị uju ịkungāna nkyenị mbāndu jo ịsakukānịgwaga jope nkyenị mbāndumị ba Kyala. 10Kangi uju linga ịkujoba ilịsyu limo ilịbị̄bị ku Nnyamụ̄ndu ịsakuswegịgwaga; lolị uju linga ịkuntuka amahēlu Mbepo Mwịkemo jo atịsakuswegịgwaga. 11Kangi linga bịkubatwala nnyụ̄mba syakwịpụ̄tilamo na nkyenị mbalagilị na kubāmaka mụngịsakwịlūsānịaga ukuti kali tụkwamụlaga sịliku tụkujobaga sịliku; 12buno Mbepo Mwịkemo ịsakubamanyịsyaga nkabalilo kalakala isị mụbagị̄le ukujoba.

Ikifwanịkisyo kya nkonyofụ unkabị

13Jumo ugwankilūndilo kila alinkujoba kumyake alinkuti: Mmanyịsị, mmbūle ugwamyitu njabane nagwe ifyapakilīngo. 14Umwene alinkummbūla alinkuti: Gwe mụ̄ndu ugwe, jwanị āmbēle ubulōngị une nukuja gakubajabanịa une umwe? 15Alinkubabūla alinkuti: Mụhīli, mụje māso nubunyonywatōsa bōsa; buno ubūmị bwa mụ̄ndu butịkufụma mbwịngị bwa tūndu utu ali nato, pope aje nkabị bulebule. 16Po papo alinkwenda nukubabūla ikifwanịkisyo alinkuti: Unngūnda gwa nkabị jumo gwalyelịle fị̄jo; 17po papo alinkwịnogona mụ̄nda mmyake alinkuti: Kali mbōmbe fịkị apa ngaja ni kitūba nakimo ikyakubīkamo ifị ndōndwịle? 18Po papo alinkuti: Angubōmba isị; ngupāngula ifitūba fyangu ifịkūlu nukujēnga ifīnywamụ; mo nịsakubīkaga ifị̄ndu fyangu fyosa ni fyuma fyangu. 19Po nịsakujobaga kumōjo gwangu ndigi: Gwe mụ̄ndu gwa lusako, ulinafyo fịngị ifị gwịlūndikị̄le, ifyakukufwana ifyinja fịngị; uhobokege ịtolo, ulyege, unwege usekelege. 20Lolị Kyala ālimmbūlịle ātịle: Gwe nkonyofụ ugwe! Ikilo kikīki ubūmị bwako bukwegịgwaga. Po lelo fyosa ifị gwịbīkị̄le fịkujaga fyanị? 21Bo atēndị̄ke bunobuno uju ịkwịbīkila ikyuma, ịkuja nndōndo nkyenị mwa Kyala.

Mụsūbilege mwa Kyala

(Mat. 6:25-34)

22Po papo alinkujoba kubafụ̄ndịgwa bāke alinkuti: Fyobēne nịkubabūla une nịkuti komma ukwịkatasya nisya būmị bwinụ ukuti mukulyaga fịkị, nisya mmbili gwinụ ukuti mụkufwalaga fịkị. 23Buno ubūmị bụkulūmba ukukīnda ifị̄ndu, kangi ummbili mpala ukukīnda imyenda. 24Amụgakēte amakūngūlu, gatịkusopa kangi gatịkutondola, gakaja nifịtēmbe kangi gakaja ni fitūba fyakusōndamo, lolị Kyala ịkugaswila. Bule umwe mukagakīnda agēne ubupala? 25Umwe jwanị mmyinụ uju abagị̄le ukwịkatasya ukwịjōngelako ubūmị bwake ukuti bujege butalị? 26Apa lelo mụkamanya ukubōmba akāndu akanāndi bo kakāko, nōngwa jafịkị mụkwịkatasya nisị̄ngị? 27Amụgị̄nogone amajibijibi mụno gịkukulila, gatịkwịjūla kangi gatịkuluka; lolị nịkubabūla umwe, nịkuti jope na Solomonị mbwimikịgwa bwake bōsa akāfwelemo imyenda imịnụnụ bo ubulenge bumo. 28Lelo linga bo ịkulifwika imyenda bunobuno ilị̄su lya nndị̄su ili lịkujapo umụsyugu, kilābo lịkusopịgwa mmōto, po apele pōkị ukubafwika umwe! Bo bupepe bukị ulwịtiko lwinụ! 29Īndụmbụla syinụ sịngajaga mmwanya bo mụkwịnogona ukuti kali mụkulyaga fịkị nukuti kali mụkunwaga fịkị. 30Buno abāpānja bōsa ba nkị̄su bikutulōnda utūndu tutūtu; ugwịsēmwe amēnye ukuti mụkutulōnda. 31Umwe lolị mụlōndege tāsị ikitāngālala kya Kyala, po mwịsakōngelịgwangapo pamwanya pali fyosa fịfịfị.

Ubukabị bwa kumwanya

(Mat. 6:19-21)

32Ungatị̄laga gwe katị̄mo akanāndi, buno Ugwịsēmwe ịkyelị̄le ukubapa ikitāngālala. 33Mūlisyege ifyuma fyinụ fyosa, īndalama mụbapege abalōndo. Amwịtendekesyege īnyāmbi sya ndalama isị sịtịkukūlupa, amwịbīkilege ikyuma kumwanya, kuno kitịkunaganịka; iki unhījị najumo atịkukifịkila, iki namajēnje nagamo gatịkulya. 34Namanga kuno ikyuma kyako kilịko ko kuno numōjo gwako gulịko.

Ababōmbị aba bali mōsa bịkugụ̄lila

35Mwịtendekekesyege ngānị kuli syosa isị sịkubonekaga, mwịpịnyege ni mịpāngo mmịsana, ninyāle syinụ syakege; 36mụjege bo abāndu aba bịkunngụ̄lila umalafyale gwabo ukwịsa kukāja ukufụma kulusekelo lwa bwegị, ko kuti bịsebammwịgulilege nakalīnga bo ịsịle ịkukung'ūnda kulwịgị. 37Basangalufụ ababōmbị aba umalafyale ịsakubāgaga bali māso bo agomwịke! Nalolị nikubabūla nịkuti umwene ịsakwịpịnya umpāngo, abanāngisyege pabutūgalo abategelekesyege ifị̄ndu pāmēsa nukubalindilila bo bịkulya. 38Bo busangalufụ bukị abēne linga ịsakubāgaga bali māso, nalinga afịkịle pakilo pakāti pamo nalinga mo mmbukye. 39Loli mụsyaganịege isyakuti, linga umwenenyụ̄mba āmanyaga īsala ja kwịsila unhījị, ngali ịkuja māso ukuti ịse ankage bo ịkupāngula īnyụ̄mba jake. 40Nanụmwe mụbagị̄le ukuti mwịtendekesyege ngānịla, namanga Nnyamụ̄ndu ịsakwịsaga mụ̄sala iji umwe mụkuti pamo akāli.

Ummbōmbị unsūbiligwa pamo ummbōmbị unsịtakusūbilịgwa

(Mat. 24:45-51)

41Po papo Petelị alinkulālūsya alinkuti: NTWA, ikifwanịkisyo iki kịkutubala jujuswe, pamo kịkubabala abāndu bōsa? 42UNTWA ālyamwịle ātịle: Jwanị lelo ummbōmbelị unsūbiligwa ugwa mahala? Jo uju numalafyale gwake ammwimị̄ke ukuja gwa kubalindilila abannyụ̄mba jake nukubapa ifị̄ndu bo kafịkịle akabalilo kākulīla. 43Nsangalufụ ummbōmbị uju umalafyale gwake bo ịkwịsa ịsakummwagaga ịkubōmba sịsyo ālinndagị̄le. 44Nalolị nịkubabūla une nịkuti ịsakummbīkaga ukuja gwa kwenelela ifyuma fyake fyosa. 45Lolị linga ummbōmbị julajula ịkwịnogona mụ̄nda mmyake ịkuti: Umalafyale gwangu ịkukābilaga ukwịsa, āndege ukubakoma ababōmbị abanyāmbala nabakị̄kulu, alyege, anwege, agālege, 46umalafyale gwa mmbōmbị jula ịsakufikaga pị̄sịku ili umwene ịkuti pamo akāli, na mụ̄sala iji akajimanya, po ịsakummbụ̄tanịaga nukummōngānịa nabasịtalwịtiko. 47Umwene ummbōmbị uju asịmēnye isị umalafyale gwake ịkulōnda ukuti abōmbēge, lolị asịtenukubōmba jo ịsakukụpamịkwịga akabị̄bị nifịkotị. 48Lolị uju akāsịmēnye, uju ābōmbị̄le isị syalimmbagị̄le ukukomịgwa, jo ịsakukomịgwangamo panāndi ịtolo. Gwesa uju ịkupēgwa fịngị, jo ịsakumelelịgwaga fịngị; jope uju linga apēgị̄gwe ukulindilila ifị̄ngịpo jo bịsakukindililaga ukulōnda kumyake ifị̄ngị ifịkīndepo.

Jesụ ntwala lutapukano

(Mat. 10:34-36)

49Nālisịle kukukikosya mmōto ikị̄su; kali ngali nhobwịke lusụmo lukị linga gwalyakịle. 50Ndinulōsyo lwakōsịgwa une; lilino ulu ngatēngāna nakamo mpaka papo sịsakumalikilaga! 51Mụkwịnogona ukuti nịsịle kukukipa ulutēngāno ikị̄su? Mma nịkubabūla umwe ukuti ndwele lulusomanịo; 52namanga ukufụma lilino abāndu bahāno abannyụ̄mba jimojēne bịsakupāgukanaga, batatu bịsakubasāmbukilaga babili bala, kangi babili bịsakubasāmbukilaga abị̄nābo batatu bala; 53bịsakusāmbukilanịlaga, ugwịse ịsakunsāmbukilaga umwanāke unndumyana, umwana unndumyana ịsakunsāmbukilaga ugwịse; unna ịsakunsāmbukilaga umwanāke unndīndwana jope umwana unndīndwana ịsakunsāmbukilaga unna, unna gwa nndume ịsakunsāmbukilaga unkamwana, unkamwana ịsakunsāmbukilaga unna gwa nndume.

Ukukāganịa akabalilo

(Mat. 16:2-3)

54Po papo alinkufịbūla ifịlūndilo fya bāndu alinkuti: Linga mwagịle amabīngu gịkubilịngana kulubafụ lwa kubujōngelo po mụtịkuhāba ukujoba ukuti: Īfụla jịkuja pakutịma; ngīmba nalolị. 55Kangi linga mụkugubona ummbelo umfụma kwịtōngo gụkukụla mụkuti: Lukuja pakubala ulumụ ulukali fịjo; ngīmba nalolị. 56Mwe batūngulu umwe! Mụmēnye ukulīngānịa isya pamwanya pakị̄su nisya mụ mpālānga; kali po sịli bulebule kangi ukuti mụtolịgwege ukusịlīngisanịa isya kabalilo akapīmba aka?

Umanyanege nu nndufụ gwako

(Mat. 5:25-26)

57Fịkị mụtịkusyaganịa jujumwe isị sịtalwịle ukusịbōmba? 58Bo mụkubuka kubulōngị nauju akusịtākị̄le ugelege fị̄jo ukujimalisya īnōngwa jīnụ mụmụnjila bo mụkāli ukufịka pabulōngị ukuti angajakukutwalaga nkyenị mụnndōngị, jope unndōngị angajakukubīkaga mmaboko ga nsịkali ugwakukutwala nkupịnyịgwa mụnnyololo. 59Ngukubūla, mụlamụla utịsakusōkaga sịku mpaka papo kwịsakumalilaga ukuhōmba fyosa kisịta kusyalako nakamo.

Currently Selected:

Luka 12: NYB96

Highlight

Copy