Luka 11

Jesụ ịkumanyịsya isya kwịpụ̄ta

(Mat. 6:9-13; 7:7-11)

1Ilị̄sịku limo Jesụ īpụ̄taga mbujo bumo. Lelo bo amalịle ukwịpụ̄ta, umfụ̄ndịgwa gwake jumo alinkujoba kumyake alinkuti: Gwe NTWA ulitumanyịsya ukwịpụ̄ta bo apa Johanị ābamanyị̄sye abafụ̄ndịgwa bāke. 2Jesụ ābāmwịle ātịle: Linga mụkwịpụ̄ta mụtigi:

Tāta, īngamụ jako jīmikịgwege,

Ikitāngālala kyako kị̄sege,

3Kukuti ịsịku utupege ifị̄ndu ifyakutufwana,

4Utuswege īmbị̄bị syitu,

buno uswe tụkubaswa bōsa aba bịkutubōmbela īmbị̄bị,

Ungatubīkaga ndugelo.

5Kangi Jesụ alinkujoba nabafụ̄ndịgwa bāke alinkuti: Bule umwe linga jumo nkilūndilo kyinụ ịkubūka kunyụ̄mba ja mmanyānị gwake pakilo pakāti ịkuti: Nkamụ ūngopesye imịkate mịtatu. 6Ummanyānị gwangu ali ninjila, afịkịle lulūlu pamyangu, lelo ngānafyo ifị̄ndu nafịmo fya kunswila! 7Lelo bule linga ummanyānị, gwako ịkwamụla ukufụma nnyụ̄mba ịkuti: Ungandamyaga! Kukifịgo nịgēleko liịtāsị, twesa abānāngu nanịne tulambalēle. Ngabagila ukusụmụka nukukupa fịmo. 8Emwa, bule lelo? Ngubabūla ukuti napapo linga atịkusumuka pakumpa ifị̄ndu kunōngwa ja bumanyānị, lolị kunōngwa ja kūmīlisya ukusūma, ikusumukaga pakumpa akāndu kōsa aka ịkulōnda. 9Kangi ngubabūla nguti: Amụsūmege po mwịsakupegịgwaga; amụlōndege po mwịsakufyagaga; amukụng'undege kulwịgị po mwisakwịgulilịgwaga. 10Namanga gwesa uju ịkusūma ịkwambilila, gwesa uju ịkulōnda ịkufyaga, kangi gwesa uju ịkukung'unda kulwịgị ịkwịgulilịgwa. 11Jwanị umwe mmyinụ uju gwịse gwa mwana, lelo bo umwana asūmịle ị̄swi ampege īnjoka, 12pamo bo ịkusūma ilịfụ̄mbi po ampege kalị̄sya? 13Linga umwe mwebabị̄bị mụmēnye ukubapa ifyabupe ifịnụnụ abānīnụ, po apele pōkị Ugwịsēmwe gwa kumwanya ukubapa Mbepo Mwịkemo aba bịkusūma kumyake!

Jesụ na Belịsebuli

(Mat. 12:22-30; Mali. 3:20-27)

14Lelo lumo Jesụ ājisōsyaga mbepo īnyalị iji jali kinụ̄nụ; lelo bo jisōkịle umụ̄ndu uju āli kinụ̄nụ alinkwenda nukujoba, abāndu balinkuswịga. 15Lolị bamo balinkuti: Īmbepo īnyalị ịkusọsōkesya mwa Belịsebuli, unkulūmba gwa mịsētano; 16abāngi balinkunngela balinkulōnda ukuti abōmbe ikimanyịlo kimo ikyakunāngisya ukuti apēgị̄gwe amaka ukufụma kumwanya. 17Lolị umwene bo asịmēnye īnyịnogono syabo, ābabūlịle ātịle: Ikitāngālala kyosa iki kị̄lundulēnịe kikyo kitupu kitịkuhāba ukufwa; īnyụ̄mba iji jị̄sāmbulenịe jījo ndupu jịkugwa jịkulekanịla. 18Lelo linga jope Setano ịjabēnịe mfịbụgụtila jūjo ntupu, po ubulagilị bwake bwịsakwendelelaga ukujako? Umwe mụkuti īmbepo īnyalị ngusịsōkesya mmaka ga Belịsebuli. 19Linga mbepo īnyalị ngusịsōkesya mwa Belịsebuli, po abānị̄nụ bịkusịsokesya mwanị? Bo bakubatobesya mụno sịjīlị̄le. 20Lelo linga īmbepo īnyalị ngusịsōkesya nndōbe lwa Kyala, po ikitāngālala kya Kyala kị̄sịle kumyinụ. 21Linga umụ̄ndu ugwa maka uju ị̄gelị̄ke ningwego syake ịkulindilila īnyụ̄mba ifyuma fyake fịkuja kanụnụ ịtolo; 22lolị linga uju ankīndịle amaka ịkulwa nagwe ịkuntola, ịkupoka ningulu iji ịkujisūbila po ịkwenda nukujabania ifị apupịle. 23Uju linga akaja pamopēne nanịne jo akīndēne nanịne, uju linga atịkūndūla ukubūngānịa jo ịkubụlụlụsya.

Ukugomokelako kwa mbepo īnyalị

(Mat. 12:43-45)

24Bo īmbepo īnyalị jisōkịle mmụ̄ndu, jịkubēta mbujo ubūmụ jịkulōnda pabutūsyo; lelo bo jịkapāga napamo jịkuti: Nịkugomokelaga ku nyụ̄mba jangu kuno nāfụmịle. 25Lelo bo jịkwịsa jịkujaga īnyụ̄mba jipyagilị̄gwe, jitendekesị̄gwe. 26Po lelo jịkubūka jịkwakusịtwala īīmbepo isị̄ngị ịhāno naịbili isị sịjikīndịle ijēne ububị̄bị, po papo sịkwịngila nukwakutūgala mụmo; po lelo akajīlo ka mụ̄ndu jula kikōnāngika ukukīnda mụno kājīlị̄le ulutasị.

Ulusekelo lwa nalolị

27Bo Jesụ amalịle ukujoba sịsịsị, unkị̄kulu jumo alinkwịnēnga ukujoba ukufụma nkilūndilo kila alinkummbūla alinkuti: Nsangalufụ fị̄jo unkị̄kulu uju ākupāpịle nukukōngesya amabēle gāke ugwe! 28Loli Jesụ ātịle: E, lolị basangalufụ fị̄jo aba bịkupilika ilịsyu lya Kyala nukulikōnga!

Ukulōnda ikị̄ka

(Mat. 12:38-42)

29Lelo bo ifịlūndilo fịkōngelela alinkwanda ukujoba alinkuti; Īngulilo jabāndu bālilino aba ngulilo mbị̄bị; jịkulōnda ikimanyịlo, lolị jitịkupēgịgwaga nakimo, kyene kikị̄ka kya Jona. 30Papo bo apa Jona ālipelịle kimanyịlo kya bāndu ba mụ Nịnịbe bo ịsakutendekaga Nnyamụ̄ndu ku bāndu ba lilino aba. 31Pị̄sịku lya bulōngị Umalafyale Unkị̄kulu gwa kwịtōngo ịsakubonekaga bo abāndu ba lilino aba bịkulōngịgwa, ịsakubusịsịmikisyaga ubusobị bwabo. Umwene ālyendịle īnjila jakufụma pabutalị, ālisịle kukupilikisya amasyu ga mahala ga Solomonị; ngīmba lolị alịpo uju nkulūmba na kwa Solomonị. 32Abāndu ba mụ Nịnịbe bịsakusụmụkaga pamopēne nabāndu bālilino aba, pị̄sịku lya bulōngị, bịsakujitobesyaga īngulilo ja lilino, papo abēne bāpīndwịke bo ịkulūmbilila Jona; ngīmba papapa alịpo unkulūmba ukunkīnda na Jona.

Ulumụlị lwa mmbili

(Mat. 5:15; 6:22-23)

33Akajako najumo uju ịkukosya īnyāle jake kangi ịkujikụpikila ni kīkụpikililo, lolị ịkujibīka pakyakwimapo, ukuti aba bịkwịngila bakētege ubwelụ. 34Ikisịge kyako jo nyāle ja mmbili gwako; linga ikisịge kyako kinụnụ ịtolo ummbili gwako gōsa gụkwịsula ubwelụ, lolị linga kikaja kinụnụ, po ummbili gwako gụkujaga ningị̄sị. 35Bunobuno lelo, ujege māso ko kuti ulumụlị mmyako lungị̄pelaga ngị̄sị. 36Lelo linga ummbili gwako gubalịle, gukaja ningị̄sị napamo, gōsa gwịsakumụlikaga, ukufwana bo apa īnyāle nunndāngalila gwake gụkukutwalila ulumụlị.

Jesụ ịkubakemela Abafalịsaị na bamanyandagilo

(Mat. 23:1-36; Mali. 12:38-40)

37Lelo bo alipakujoba Umfalịsaị jumo alinkusūma ukwakulya nagwe ifị̄ndu; po papo alinkwịngila alinkwakutūgala pị̄pị nimēsa. 38Umfalịsaị alinkuswịga bo āgịle ukuti akasụgụsula bo akāli ukwanda ukulya. 39UNTWA ālimmbūlīle ātịle: Kābuno lelo mwe Bafalịsaị mụkusụka ikikōmbe nīsahanị mụnyụma ịtolo, lolị nkāti mwị̄swile ubugāsị nimbị̄bị. 40Mwe bakonyofụ umwe! Bule Kyala uju āpelịle mụnyụma akāpelịle na nkāti mope? 41Lolị ifị fịli mfịkōmbe fyinụ naifị fịli mụ̄sahanị syinụ mụbapege abalōndo. Po fyosa ịtolo fịkujaga fyelụ ịtolo kumyinụ.

42Lolị mụli bākị mwe Bafalịsaị, namanga mụkupāgula ifya pị̄lōngo ukufụma mfyakulūnga, bo īnyụ̄ngụ, īmbwịga niịsēke ilīngi; mụkubuleka ubugolofụ nulugano lwa Kyala; lolị linga mwātigi tubōmbēge sịmo syope ni nịne sịla tungasịlekaga, po lolị! 43Mụli bākị mwe Bafalịsaị! Mụkwịgana ukutūgala mfịkota ifyimikịgwa nnyụ̄mba syakwịpụ̄tilamo, mụ̄sokonị mụkulōnda ukuti abāndu babaponịege nulwimiko. 44Mụhīli! Mwe mụfwene mapūmba aga gatịkuboneka, abāndu bịkwenda pamwanya pali gāgo kisịta kusịmanya.

45Jumo mbamanyandagilo ālimmwamwịle ātịle: Mmanyịsị, apa kujoba sịsịsị po kututuka na jujuswe. 46Jesụ ālyamwịle ātịle: Mwe bamanyandagilo nanụmwe mụhīlị! Namanga abāndu mụkabatwika imịsịgo imịpalapala ukupīmba, bo umwe jujumwe mụtịkugikolapo nulōbe lumo ukubatūla ukupīmba imịsịgo gigigyo. 47Mụhīlị! Namanga mụkujēnga amapūmba gabakūngụlụka aba abị̄sēmwe bābagogịle. 48Bunobuno lelo mụli bakētị kangi mụkusịtika īmbōmbo sya bị̄sēmwe; bābagogịle po umwe mụkujēnga amapūmba gābo. 49Fyobēne lelo amahala ga Kyala gatịle: Ngubatumilaga abakụ̄ngụlụka nabatumịgwa, bamo mwịsakubagogaga nukubatamya, 50ukuti ilịlopa lya bakụ̄ngụlụka bōsa ili lyalyonị̄ke ukufụma lulo kyalịgwege ikị̄su libalōngege abāndu ba lilino aba, 51ukufụma kwịlopa lya Abelị ukufịka kwịlopa lya Sakalịja, uju āfwilị̄le pakāti pakigemo kya kwịkemēkesyapo na pabujo ubwịkemo. Ngubabūla ukuti abāndu ba lilino aba bịsakufụ̄ndịgwaga kunōngwa ja syosa sịsịsị. 52Mụli bākị mwe bamanyandagilo! Mụkolị̄le ikị̄gulilo kyakwịgulila kukifịgo kya nyụ̄mba ja bumanyị; umwe jujumwe mụtịkwịngilamo, kangi mụkubakānịsya aba bịkulōnda ukwịngilamo! 53Lelo bo Jesụ asōkịlepo palapala abamanyandagilo na Bafalịsaị balinkwanda ukunndōndesya fịjo nukunndālūsya sịnyịngị 54unkuntegeka ukuti abāmụle isị ājobaga.

Currently Selected:

Luka 11: NYB96

Highlight

Copy